E Boluntad di Dios Ta Sosodiendo Actualmente?

“Cu bo boluntad sosode na tera mescos cu den shelo.” —Mateo 6:10.

CU GRAN consternacion Julio y Christina a mira cuater di nan yiunan muri kima. Un chauffeur burachi a bin dal den nan auto staciona y a pone esaki explota y pega candela. Un di cinco yiu, Marcos, di nuebe aña di edad, a ser rescata for di e candela feros, pero e vlamnan a kima su curpa y a desfigur’e permanentemente. E tata a keda cu curason kibra. El a purba consola su mes y tambe su famia cu e palabranan: “Ta boluntad di Dios esaki ta. Sea bon of malo, of cualkier otro cos, nos tin cu compronde esei.”

Ora un suseso tragico asina tuma luga, hopi hende ta reacciona mescos. Nan ta rasona: ‘Si Dios ta todopoderoso y ta interesa den nos, loke a sosode, den un manera of otro mester ta pa nos mes bon, pa dificil cu esei por ta pa compronde.’ Abo ta eens cu esei?

E punto di bista cu kico cu sosode, sea bon of malo, ta un expresion di e boluntad di Dios, hopi bes ta basa riba e palabranan di Hesus den loke ta conoci como e Oracion di Nos Tata, cita anteriormente. E boluntad di Dios ta sosodiendo den shelo, no ta berdad? Door di resa, “Cu bo boluntad sosode na tera”, nos no ta aceptando cu loke ta sosode riba tera ta e boluntad di Dios?

Hopi hende no ta sinti nan comodo cu e punto di bista aki. E idea cu esaki ta duna nan ta cu Dios no ta tene cuenta cu sintimento di su creacion humano. ‘Con un Dios amoroso por desea loke ta teribel pa hende inocente?’ nan ta puntra. ‘Si ta un les Dios kier pa nos siña, ta kico e les ei por ta anto?’ Podise bo tambe ta pensa asina.

En conexion cu esaki, disipel Santiago, mitar ruman di Hesus, a skirbi: “No laga ningun hende bisa ora cu e wordo tenta: ‘Mi ta wordo tenta door di Dios’; pasobra Dios no por wordo tenta door di maldad, y e mes no ta tenta ningun hende.” (Santiago 1:13) Dios no ta e fuente di loke ta malo. Ta bon cla anto cu no ta tur loke ta sosode riba tera awe ta e boluntad di Dios. Bijbel ta papia tambe di boluntad di hende, boluntad di e nacionnan y asta boluntad di Diabel. (Huan 1:13; 2 Timoteo 2:26; 1 Pedro 4:3) Bo no ta di acuerdo cu loke a sosode cu e famia di Julio y Christina no por tawata e boluntad di un Tata celestial amoroso?

Pues, kico realmente Hesus tawata kiermen anto ora el a siña su disipelnan resa: “Cu bo boluntad sosode”? Tawata djis un peticion pa Dios interveni den cierto casonan, of Hesus tawata siñando nos pa resa pa algo mas importante y mas miho, un cambio cu tur hende por spera ariba? Laga nos analisa mas aleu kico Bijbel ta bisa.

[Reconocemento pa Potret na pagina 3]

Auto: Dominique Faget-STF/AFP/Getty Images; mucha: FAO photo/B. Imevbore