Haci Esfuerso pa Mustra Bondad den un Mundo Hostil

“Loke ta deseabel den un hende ta su cariño [“bondad amoroso”, NW].”—PROVERBIONAN 19:22.

1. Dicon por ta dificil pa mustra bondad?

ABO ta considera bo mes un persona bondadoso? Si ta asina, anto bida por ta dificil pa bo den e mundo djawe. Ta cierto cu den Bijbel bondad ta ser identifica como parti di e “fruta di e spirito”, pero dicon ta asina dificil pa expresa bondad asta den paisnan supuestamente cristian? (Galationan 5:22) Manera nos a nota den e articulo anterior, nos por haya un parti di e contesta den loke apostel Huan a skirbi—henter mundo ta bou di control di Satanas e Diabel, un persona spiritual cu no tin bondad. (1 Huan 5:19) Hesucristo a identifica Satanas como gobernante of “prins di e mundo.” (Huan 14:30) Pues, e mundo aki tin e tendencia di parce su gobernante rebelde, kende su actitud ta ser caracterisa pa comportacion cruel.—Efesionan 2:2.

2. Ki situacionnan dificil por afecta nos mustramento di bondad?

² Ora hende trata nos sin bondad esei ta afecta nos bida. E falta di bondad ei kisas ta ser expresa door di biciñanan rencoroso, door di hende desconoci antipatico, y asta door di amigo y famia cu tin biaha ta actua sin consideracion. E stress di ta den contacto cu hende cu tin mal manera y cu ta grita y papia palabra malo cu otro, hopi bes ta causa gran frustracion. Tal falta di bondad di parti di otro hende lo por laga nos tambe sinti rabia of hostilidad, y kisas nos por pensa pa paga malo cu malo.  Un actitud asina por asta hiba na problema cu nos salu fisico of spiritual.—Romanonan 12:17.

3. Ki problemanan serio hende ta confronta cu ta pone cu ta dificil pa nan mustra bondad?

³ Un otro cos cu por pone cu ta dificil pa nos mustra bondad ta condicionnan mundial cu ta causa tension. Por ehempel, humanidad en general ta bou di tension debi na e menasa- y actonan di terorismo, y tambe debi na e posibel uzo di armanan biologico of nuclear door di varios grupo nacional. Ademas, miyones di hende ta biba den pobresa, y nan tin net suficiente cuminda, dak, paña y cuido medico pa sobrevivi. Ta un reto pa mustra bondad ora cu un situacion ta parce di no tin speransa di mehora.—Eclesiastes 7:7.

4. Ki conclusion robes algun hende ta saca ora nan pensa riba mustramento di bondad na otronan?

⁴ Un persona lo por conclui facilmente cu mustramento di bondad no ta realmente un prioridad y cu esei por ta asta un indicacion di debilidad. Lo e por sinti cu hende ta probecha di dje, specialmente ora nan no ta tene cuenta cu su sintimentonan. (Salmo 73:2-9) Sinembargo, Bijbel ta duna nos e guia corecto ora e ta bisa: “Un contesta suave ta kita rabia, ma un palabra skerpi ta lanta rabia.” (Proverbionan 15:1) Suavidad y bondad ta dos aspecto di e fruta di spirito cu ta estrechamente liga cu otro y cu ta masha efectivo ora nos ta confronta circunstancianan dificil.

5. Menciona algun area di bida caminda mester desplega bondad.

⁵ Pero siendo cu pa nos como cristian ta asina importante pa desplega e fruta di Dios su spirito santo, nos mester pensa riba con nos lo por demostra e fruta di bondad. Ta posibel pa mustra bondad den un mundo antipatico of hostil? Si ta asina, den ki areanan di bida nos por duna prueba cu nos no ta laga e influencia di Satanas descurasha nos di mustra bondad, specialmente den situacionnan yen di tension? Laga nos considera maneranan cu nos por mustra bondad den famia, na trabou, na scol, na nos biciñanan, den nos sirbishi di veld y entre nos rumannan den fe.

Bondad den Famia

6. Dicon bondad den famia ta asina importante, y con nos por manifest’e?

⁶ Fruta di spirito ta masha importante pa nos por ricibi Yehova su bendicion y guia, y pesei nos mester cultiva nan plenamente. (Efesionan 4:32) Laga nos consentra un rato riba e echo cu specialmente miembronan di famia mester expresa bondad na otro. Un esposo y esposa mester manifesta un spirito bondadoso y atento den nan trato diario cu otro y cu nan yiunan. (Efesionan 5:28-33; 6:1, 2) E tipo di bondad ei mester ta bisto na e manera cu miembronan di famia ta papia cu otro; yiunan ta honra y respeta nan mayornan y mayornan  ta trata nan yiunan den e manera corecto. Sea cla pa elogia, y no lihe pa condena.

7, 8. (a) Ki tipo di comportacion nos tin cu evita pa nos por mustra berdadero bondad den famia? (b) Den ki manera bon comunicacion ta contribui na un famia hopi uni? (c) Con abo por desplega bondad den bo famia?

⁷ Ser bondadoso cu esnan den nos famia ta encera sigui e conseho aki di apostel Pablo: “Mester pone tur esakinan un banda: rabia, furia, malicia, calumnia y palabra sushi for di boso boca.” Famianan cristian mester comunica tur dia cu otro cu respet. Dicon? Pasobra bon comunicacion ta un ingrediente esencial den famianan fuerte y sano. Ora surgi desacuerdo, purba soluciona e problema en bes di gana e pleito, y asina suavisa e conflicto. Miembronan di un famia felis ta haci esfuerso sinsero pa mustra bondad na otro y tene consideracion cu otro.—Colosensenan 3:8, 12-14.

⁸ Bondad ta un cos positivo y ta crea den nos e deseo di haci bon pa otro hende. Pues, nos ta busca pa sa con den un manera agradabel nos por yuda y mustra consideracion na otro miembronan di famia. Pa por demostra e tipo di bondad cu ta duna un famia un bon reputacion, ta rekeri esfuerso individual y colectivo. Como resultado, e famia ei no solamente lo tin Dios su bendicion sino tambe cu den congregacion y den comunidad, nan lo honra e Dios di bondad, Yehova.—1 Pedro 2:12.

Bondad na Trabou

9, 10. Describi algun problema cu por surgi na trabou, y menciona con por trata cu nan cu bondad.

⁹ Pa un cristian, durante e rutina diario di trabou por presenta e reto di mustra bondad na su coleganan. Competencia entre trahadonan por pone cu un cristian ta core peliger di perde su empleo. Kisas door di un colega cu ta gaña of actua tramposo, y cu asina ta daña reputacion di e cristian serca su doño di trabou. (Eclesiastes 4:4) No ta facil pa mustra bondad den situacionnan asina. No obstante, door di corda cu ser bondadoso por lo general ta e manera corecto pa actua, un sirbido di Yehova mester haci esfuerso te caminda ta posibel pa gana esnan cu no ta facil pa anda cu ne. Un cos cu por yuda nos haci esaki ta di mustra interes personal. Podise bo por mustra interes si un colega ta malo of tin famia cu ta malo. Djis puntra e colega conta cu ne of cu su famia, por tin un efecto positivo riba dje. Si, cristiannan mester busca manera pa promove harmonia y pas te asina leu cu ta depende di nan. Tin biaha un palabra bondadoso cu ta mustra interes y precupacion lo yuda e situacion.

¹⁰ Den otro casonan, un doño di trabou kisas ta obliga su trahadonan pa acepta su opinion y kisas e kier pa tur hende tuma parti den un of otro evenemento nacionalista of den un celebracion cu ta contra principionan biblico. Ora un cristian su consenshi no ta permitie participa den e cosnan ei, esaki lo por hiba na  un confrontacion cu su doño di trabou. Na e momento ei kisas no ta sabi pa bai detaya con malo ta pa cumpli cu e deseonan di e doño di trabou. Al fin y al cabo, pa esnan cu no ta comparti e creencianan cristian, participacion den e evenemento of celebracion por parce e cos corecto pa haci. (1 Pedro 2:21-23) Podise lo bo por splica na un manera bondadoso ta pa ki motibo abo personalmente no ta participa. No contesta comentarionan skerpi cu palabranan skerpi of sarcastico. Ta bon pa un cristian sigui e excelente conseho di Romanonan 12:18: “Si ta posibel, asina leu cu ta depende di boso, sea na pas cu tur hende.”

Bondad na Scol

11. Ki reto hobennan ta confronta pa por mustra bondad na compañeronan di scol?

¹¹ Pa hobennan, e por ta un reto grandi pa mustra bondad na otro alumnonan. Hobennan hopi bes ta anhela pa nan compañeronan di scol acepta nan. Tin mucha homber ta haci cos di machismo pa asina otro alumnonan admira nan. Y tin biaha nan ta bai asina leu di intimida of maltrata otro alumnonan na scol. (Mateo 20:25) Otro hobennan gusta show off ora nan ta bon den cierto vaknan na scol, of den deporte of den otro actividadnan. Ora nan ta cana blof cu nan habilidad, hopi bes nan ta trata nan compañeronan di klas y otro alumnonan na un manera antipatico, pensando ekibocadamente cu e echo cu nan tin cierto talento ta haci nan superior. Un hoben cristian tin cu tene cuidou pa e no imita e muchanan ei. (Mateo 20:26, 27) Apostel Pablo a bisa cu “amor tin pasenshi, amor ta cariñoso” y cu amor “no ta gaba, y no ta arogante.” Pues, un cristian tin e obligacion di no sigui e mal ehempel di esnan cu ta actua antipatico, sino pa pega na conseho biblico den su trato cu compañeronan di scol.—1 Corintionan 13:4.

12. (a) Dicon por ta un reto pa hobennan mustra bondad na nan maestronan? (b) Na ken hobennan por acudi pa yudansa ora nan ta ser presiona pa no mustra bondad?

¹² Tambe hobennan tin cu trata nan maestronan di scol cu bondad. Hopi alumno ta gusta irita nan maestronan. E hobennan ei ta kere cu ta masha sabi nan ta ora nan ta falta respet pa nan maestronan door di haci cosnan cu ta viola reglanan di scol. Door di intimida otro muchanan, nan ta forsa nan pa join nan den tal comportacion. Ora un hoben cristian nenga di tuma parti den esei, nan por cuminsa atac’e cu palabra of di otro manera. Si un cristian  tin cu soporta esei durante henter un aña escolar, esei por ta un test pa su determinacion pa mustra bondad. Pero corda cu ta masha importante pa bo ta un sirbido leal di Yehova. Bo por tin sigur cu lo e sostene bo pa medio di su spirito durante e momentonan dificil ei den bida.—Salmo 37:28.

Bondad na Biciña

13-15. Kico por stroba nos di mustra bondad na nos biciñanan, y con nos por enfrenta e retonan aki?

¹³ Sea cu bo ta biba den un cas, un apartamento of otro caminda, bo por pensa riba maneranan pa mustra bondad y expresa interes den e bienestar di bo biciñanan. Un biaha mas, esaki no ta semper facil pa haci.

¹⁴ Kico si bo biciñanan cu ta biba banda di bo tin prehuicio contra bo debi na bo rasa, nacionalidad of religion? Kico si tin biaha nan ta trata bo cu mal manera of ta ignora bo completamente? Como un sirbido di Yehova, lo ta bon pa bo expresa bondad te caminda ta posibel. Esei lo laga bo destaca como un persona diferente y refrescante, y esei lo ta un berdadero alabansa pa Yehova, kende ta e ehempel supremo di bondad. Bo no sa nunca ki dia e actitud di bo biciña por cambia debi na bo bondad. Lo e por asta bira un alabado di Yehova.—1 Pedro 2:12.

¹⁵ Con lo bo por mustra bondad na bo biciñanan? Pa cuminsa, pa medio di e bon comportacion di bo famia segun cu tur miembro di famia ta desplega e fruta di spirito. Biciñanan ta ripara esaki. De bes en cuando bo por haci bo biciña un fabor. Corda cu bondad ta nifica mustra un interes activo den e bienestar di otro hende.—1 Pedro 3:8-12.

Bondad den Sirbishi

16, 17. (a) Dicon bondad ta importante den nos sirbishi publico? (b) Con nos por manifesta bondad den varios rasgo di sirbishi di veld?

¹⁶ Bondad mester ta un caracteristica di nos  sirbishi cristian segun cu nos ta haci esfuerso na un manera determina y organisa pa alcansa hende na nan cas, na nan trabou y na luganan publico. Nos mester corda cu nos ta representa Yehova, kende semper ta bondadoso.—Exodo 34:6.

¹⁷ Kico bo esfuerso pa mustra bondad den sirbishi ta encera? Por ehempel, ora bo ta predica riba caya, bo por mustra bondad door di ta breve y tene consideracion cu e hendenan cu bo aborda. Por lo general sa tin hopi hende ta cana riba acera, pesei percura pa bo no blokia acera. Tambe, ora bo ta predica den teritorio di negoshi, mustra bo bondad door di ta breve, cordando cu trahadonan den negoshi tin cu atende cliente.

18. Con discernimento por yuda nos mustra bondad den sirbishi di veld?

¹⁸ Den sirbishi di cas pa cas, uza discrecion. No keda mucho largo den un cas, specialmente si tin mal weer. Abo por ripara ora un persona cuminsa perde pasenshi of asta bira irita door di bo presencia? Podise caminda bo ta biba Testigonan di Yehova ta pasa cu frecuencia. Si esei ta e caso, mustra consideracion special, door di ta semper bondadoso y amical. (Proverbionan 17:14) Purba acepta e motibo pakico e doño di cas no por scucha e dia ei como un motibo valido. No lubida cu un di bo rumannan cristian muy probablemente lo bolbe bishita e cas ei den futuro cercano. Si bo topa un hende cu tin mal manera, haci extra esfuerso pa mustra bondad. No hisa bo bos ni wak e cu cara di bom, mas bien papia na un manera trankil. Un cristian bondadoso no kier para discuti cu un doño di cas. (Mateo 10:11-14) Podise riba un dia e persona ei lo scucha e bon nobo.

Bondad na Reunionnan di Congregacion

19, 20. Dicon bondad ta necesario den congregacion, y con nos por mustr’e?

¹⁹ Ta importante tambe pa mustra bondad na rumannan den fe. (Hebreonan 13:1) Siendo cu nos ta parti di un hermandad mundial, bondad ta esencial den nos trato cu otro.

²⁰ Si un congregacion ta comparti un Salon di Reino cu un, dos of mas congregacion, ta importante pa trata e rumannan den e otro congregacionnan cu bondad y tambe cu dignidad. Un spirito di competencia ta dificulta cooperacion ora tin cu haci areglo pa orario di reunion y cosnan necesario manera limpiesa of renobacion. Sea bondadoso y mustra consideracion asta ora por tin algun diferencia di opinion. Den e manera aki bondad lo triunfa, y Yehova realmente lo bendiciona e interes cu boso ta mustra den bienestar di otro hende.

Sigui Mustra Bondad

21, 22. Na harmonia cu Colosensenan 3:12, kico mester ta nos determinacion?

²¹ Bondad ta un cualidad asina extenso cu e ta influencia tur aspecto di nos bida. Pesei nos tin cu hacie un parti integral di nos personalidad cristian. Mustra bondad na otro hende mester bira un custumber.

²² Laga nos tur ta bondadoso cu otro hende tur dia y di e manera ei nos ta aplica individualmente e palabranan di apostel Pablo: “Manera esnan cu a wordo scohi di Dios, santo y stima, bisti un curason di compasion, cariño [bondad], humildad, mansedumbre y pasenshi.”—Colosensenan 3:12.

Bo Ta Corda?

• Kico ta pone cu ta dificil pa un cristian mustra bondad?

• Dicon ta importante pa desplega bondad den bo famia?

• Cua ta algun cos cu ta pone cu ta dificil pa mustra bondad na scol, na trabou of na biciña?

• Splica con cristiannan por desplega bondad den nan sirbishi publico.

[Preguntanan di Estudio]

[Plachi na pagina 18]

E bondad cu tur miembro di famia ta desplega ta promove union y cooperacion

[Plachi na pagina 19]

Bo por mustra bondad ora un colega di trabou of su famia ta sufri di malesa

[Plachi na pagina 20]

Yehova ta sostene esnan cu lealmente ta mustra bondad apesar cu otronan ta haci bofon di nan

[Plachi na pagina 21]

Duna un man na un biciña den necesidad, ta un acto di bondad

[Plachi na pagina 22]