Ora Dios Su Boluntad Sosode na Tera

ORA Hesus a siña su disipelnan pidi Dios pa su “boluntad sosode na tera mescos cu den shelo”, e tawata papia di experencia pasobra el a biba cu e Tata. (Mateo 6:10; Huan 1:18; 3:13; 8:42) Prome cu Hesus a bira hende, el a pasa den e tempo den cua tur loke a sosode tanto den shelo como riba tera tawata na harmonia cu e boluntad di Dios. Eseinan tawata temponan deleitabel di logro y satisfaccion.—Proverbionan 8:27-31.

E prome creacionnan di Dios tawata criaturanan spiritual, “angelnan, poderoso den fortalesa, cu ta ehecuta su palabra.” Nan tawata y te ainda ta su sirbidonan “cu ta haci su boluntad.” (Salmo 103:20, 21) Cada un di nan tawatin nan mes boluntad? Si, y ora tera a ser crea, e “yiu hombernan di Dios [aki] tawata grita di alegria.” (Job 38:7) Nan aplauso a refleha e goso cu nan a sinti personalmente den loke ta e boluntad di Dios, y nan a adapta nan boluntad na esun di dje.

Despues cu Dios a funda tera, el a prepar’e pa hende biba ariba y finalmente a crea e prome homber y mohe. (Genesis, capitulo 1) Esaki tambe tawata merece un aplauso? E relato inspira ta bisa: “Dios a mira tur loke el a traha, y ata, tur cos tawata masha bon”, si, sin ningun fayo, perfecto.—Genesis 1:31.

Kico tawata Dios su boluntad pa nos prome mayornan y nan desendientenan? Segun Genesis 1:28, esei tambe tawata hopi bon: “Dios a bendiciona nan, y Dios a bisa nan: ‘Sea fructifero y multiplica, y yena e tera y haci esaki somete na bo; y goberna riba e piscanan di lama y riba e parhanan di shelo, y riba tur ser bibo cu ta move riba tera.’” Pa cumpli cu e tarea maraviyoso ei, nos mayornan original lo mester a sigui biba—pa semper—y nan desendientenan tambe. No tawatin ni un indicacion cu nan lo a bai haya nan cu calamidad, inhusticia, angustia of morto.

Esaki tawata un tempo cu e boluntad di Dios tawata sosode tanto den shelo como riba tera. Esnan cu tawata haci su boluntad lo a haya un gran satisfaccion den esei. Kico a bai robes?

Diripiente e boluntad di Dios a ser desafia. No cu Dios no tawatin un contesta p’e. Pero door di esaki a cuminsa un periodo largo di dolor y tristesa cu lo a trece hopi confusion tocante e boluntad di Dios pa humanidad. Y nos tur a bira victima di esaki. Kico e desafio ei tawata?

E Boluntad di Dios den un Tempo di Rebelion

Un di e “yiu hombernan [spiritual] di Dios” a mira e posibilidad di interferi cu e boluntad cu Dios tawatin pa hende. Su plan tawata pa e saca beneficio personal. Mas e criatura spiritual aki a pensa riba e posibilidad aki, mas realisabel el a mustra y mas atractivo el a bira. (Santiago 1:14, 15) Podise el a rasona cu si e por a logra pa e prome pareha humano scuch’e y no Dios, e ora ei Dios  lo a haya su mes obliga di tolera un soberania rival. Talbes el a imagina su mes cu Dios lo no a mata nan, pasobra esei lo a nifica cu e proposito di Dios lo a faya. Mas bien, Yehova Dios lo tawatin cu cambia su proposito, y acepta e posicion di e yiu spiritual aki como esun cu Dios su creacion humano lo ta obedeciendo awor. E nomber cu e rebelde ei a haya, esta, Satanas, cu kiermen Resistido, ta cuadra cu ne.—Job 1:6.

Pa cumpli cu su deseo, Satanas a acerca e mohe. El a insisti pa e ignora e boluntad di Dios y bira moralmente independiente, door di bis’e: “Boso lo no muri! . . . Boso lo ta manera Dios, conociendo bon y malo.” (Genesis 3:1-5) Loke Satanas a bisa e mohe aki a zona manera algo cu por a dun’e libertad, y el a acept’e como loke aparentemente tawata un miho moda di biba. Despues, el a combence su esposo pa join e.—Genesis 3:6.

Esaki no tawata e boluntad di Dios pa e pareha. Tawata nan mes boluntad. Y e consecuencianan tawata desastroso. Dios a bisa nan caba cu desobediencia lo a hiba na nan morto. (Genesis 3:3) Nan no a ser crea pa biba independiente di Dios. (Yeremias 10:23) Ademas, nan lo a bira imperfecto, y awor nan lo a pasa imperfeccion y morto pa nan yiunan. (Romanonan 5:12) Satanas no por a deshaci di e efectonan aki.

E desaroyonan aki a cambia pa semper e proposito, of boluntad, di Dios pa humanidad y pa tera? No. (Isaias 55:9-11) Pero nan a lanta cuestionnan cu mester a ser resolvi: Hende por “ta manera Dios, conociendo bon y malo”, manera Satanas a pretende? Cu otro palabra, si nos haya suficiente tempo, nos por determina pa nos mes kico ta bon y malo, beneficioso y perhudicial, den tur area di bida? Siendo cu Dios su manera di goberna ta miho, e merece obediencia completo? Nos tin cu cumpli cabalmente cu su boluntad? Con lo bo contesta?

E unico manera pa resolve e cuestionnan aki den bista di henter creacion inteligente tawata pa laga esnan cu kier biba independiente di Dios purba riba nan mes. Yehova lo no a resolve e cuestionnan cu a lanta door di djis caba cu e rebeldenan. E solucion tawata pa laga e rasa humano dal bai riba su mes pa suficiente tempo y laga e resultadonan papia pa nan mes. Ora Dios a bisa e mohe cu lo e haya yiu, el a indica cu ta di e forma aki lo e atende e asunto. Asina un famia humano a cuminsa. Door di esaki, nos ta na bida awe!—Genesis 3:16, 20.

Pero esaki no a nifica si cu Dios lo a permiti hende y e criatura spiritual rebelde haci y deshaci na nan antoho. Dios no a renuncia su soberania, ni e no a bandona su proposito. (Salmo 83:18) El a splica esaki claramente ora el a profetisa cu despues di tempo lo e aplasta e instigado di e rebelion y elimina tur e mal efectonan. (Genesis 3:15) Pesei, for di cuminsamento, e famia humano a haya e promesa cu lo bini un alivio.

Mientrastanto, nos prome mayornan a bira lomba pa e gobernacion di Dios. Y den esei nan a perhudica nan futuro yiunan tambe. Pa Dios preveni tur e mal consecuencianan di nan decision, lo e tawatin cu impone  su boluntad riba nan pa cada cos cu nan haci. Pero esei lo a nifica cu e lo a stroba nan di purba riba nan mes.

Claro cu esun cu kier por scohe pa e gobernacion di Dios. Lo e por siña kico ta Dios su boluntad pa hende den e tempo aki y adapta su mes na dje mas tanto posibel. (Salmo 143:10) No obstante, tanten cu no resolve e cuestion di humanidad su independencia completo, lo e no ta immuun pa problema.

Tempran den historia humano, e efectonan di sigui nan mes rumbo a bira bisto. Cain, e prome yiu di e famia humano, a mata su ruman Abel “pasobra su obranan tawata malo, y esnan di su ruman tawata husto.” (1 Huan 3:12) Esaki no tawata e boluntad di Dios, pasobra Dios a spierta Cain y despues el a castig’e. (Genesis 4:3-12) Cain a scohe e independencia moral cu Satanas a ofrec’e; pesei e tawata na e banda “di e malbado.” Otronan a haci mescos.

Despues cu hende a biba mas cu 1.500 aña caba, “tera tawata corumpi den bista di Dios y tera tawata yen di violencia.” (Genesis 6:11) Accion decisivo tawata necesario pa evita cu tera lo a wordo ruina. Dios a tuma accion door di trece un dilubio mundial y proteha e unico famia husto cu ainda tawata na bida—Noe, su esposa, su yiunan y nan esposanan. (Genesis 7:1) Nos tur ta desendiente di nan.

For di e tempo ei padilanti durante historia humano, Dios a duna guia pa esnan cu ta desea sinseramente di conoce su boluntad. El a inspira hombernan leal pa skirbi su mensahenan pa ken cu a acudi na dje pa guia. E mensahenan aki ta skirbi den Bijbel. (2 Timoteo 3:16) Den su gran amor el a permiti hende fiel drenta den un relacion cu ne, y asta bira su amigo. (Isaias 41:8) Y el a duna nan e fortalesa cu nan tawatin mester pa wanta e pruebanan dificil cu humanidad a pasa aden durante miles di aña di independencia. (Salmo 46:1; Filipensenan 4:13, NW) Nos por ta hopi gradicido pa tur esaki!

‘Bo Boluntad Lo Sosode na Tera’—Completamente

Loke Dios a haci te asina leu no ta tur loke ta su boluntad pa humanidad. Apostel Pedro a skirbi: “Segun su promesa nos ta sperando shelonan nobo y un tera nobo, den cua ta biba husticia.” (2 Pedro 3:13) E idioma simbolico aki ta referi na un gobierno nobo riba humanidad y un sosiedad humano nobo bou di e gobierno ei.

Profeta Daniel a bai mas den detaye ora el a skirbi: “Den e dianan di e reinan ei e Dios di shelo lo lanta un reino cu nunca lo no wordo destrui. . . . E lo garna y pone un fin na tur e reinonan aki, ma e mes lo dura pa semper.” (Daniel 2:44) Segun e profecia aki lo bini un fin na e sistema di cosnan bruha aki y e Reino, of gobierno di Dios, lo remplasa e gobiernonan actual. Esaki si ta bon noticia! Lo yega e dia ora cu e conflictonan y e egoismo cu ta yena e mundo djawe cu violencia y cu atrobe ta menasa di aruina tera, lo pasa pa olvido.

Na ki tempo e cosnan aki lo sosode? Hesus su disipelnan a puntr’e: “Ki tempo e cosnan aki lo sosode, y kico lo ta e señal di bo binida y di e fin di tempo?” Hesus a contesta nan, bisando entre otro: “E evangelio aki di e reino lo wordo predica den henter mundo como un testimonio na tur nacion, y e ora ei e fin lo yega.”—Mateo 24:3, 14.

Ta un echo conoci cu actualmente e trabou di predica aki ta ser efectua rond mundo. Probablemente bo a mir’e den bo mes bicindario. Profesor Charles S. Braden a skirbi den su buki These Also Believe (Esakinan Tambe Ta Kere): “Testigonan di Yehova a cubri tera literalmente cu nan trabou di duna testimonio. . . . Ni un grupo religioso na mundo a desplega un celo y persistencia mas grandi den nan esfuerso pa plama e bon  nobo di Reino cu Testigonan di Yehova.” E Testigonan ta proclamado e bon nobo aki activamente den mas cu 230 pais y den casi 400 idioma. E obra profetisa aki, nunca prome a ser efectua riba un escala mundial. E ta un di e tantisimo evidencianan cu e tempo pa e Reino ei remplasa gobiernonan humano ta hopi serca.

E Reino cu Hesus a bisa cu lo ser predica ta e mesun Reino cu el a siña nos pidi p’e den su oracion modelo: “Cu bo reino bin. Cu bo boluntad sosode na tera mescos cu den shelo.” (Mateo 6:10) Si, e Reino ei ta e medio cu Dios lo uza pa cumpli cu su proposito, su boluntad pa humanidad y pa tera.

Kico esei kiermen? Laga Revelacion 21:3 y 4 contesta: “Mi a tende un bos duro for di e trono, bisando: ‘Mira, e tabernakel di Dios ta meimei di hende, y e lo biba meimei di nan, y nan lo ta su pueblo, y Dios mes lo ta meimei di nan, y e lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor; e prome cosnan a pasa.’” E ora ei en berdad e boluntad di Dios lo ser haci tanto riba tera como den shelo—completamente. * Abo lo no kier ta parti di esei?

[Nota]

[Plachi na pagina 5]

Independencia for di e boluntad di Dios a trece calamidad