Rebeca un Mohe Diligente Cu A Teme Dios

SUPONE cu abo personalmente por a scohe un casa pa bo yiu homber. Ki clase di persona lo bo a scohe? Ki cualidadnan e mester tawatin? Lo bo a busca un mucha mohe cu tawata bunita, inteligente, bondadoso y diligente? Of lo bo a wak otro cos prome?

Abraham a confronta e dilema aki. Yehova a primintie cu mediante su yiu Isaak, bendicion lo a pasa pa su desendientenan. Caminda nos ta cuminsa considera e relato, Abraham ya ta bieu caba, pero su yiu homber ainda ta soltero. (Genesis 12:1-3, 7; 17:19; 22:17, 18; 24:1) Ya cu Isaak lo comparti e bendicionnan cu su esposa (cu e mester a haya ainda) y cu e yiunan cu nan lo haya, Abraham ta haci areglo pa busca un casa adecuado pa Isaak. Mas cu tur cos, e mucha mohe mester ta un sirbido di Yehova. Como cu no tin ningun mucha mohe asina na Canan—caminda Abraham tawata biba—e tin cu bai busc’e otro caminda. E persona cu finalmente a keda escohi ta Rebeca. Con Abraham a hay’e? E ta un mucha mohe spiritual? Kico nos por siña di su ehempel?

E Buskeda pa un Mucha Mohe cu e Cualidadnan Necesario

Abraham ta manda su sirbido di mas bieu (probablemente Eliezer) pa bai leu, te na Mesopotamia, pa scohe un casa pa Isaak for di entre e parientenan di Abraham, kendenan tambe ta adorado di Yehova. E asunto ta asina serio cu e ta pone Eliezer hura cu lo e no scohe un Cananeo como casa pa Isaak. Ta bon pa nos tuma  nota di e echo cu Abraham ta insisti riba esaki.—Genesis 24:2-10.

Eliezer ta bai na e stad di e parientenan di Abraham. Ora e yega einan e ta hiba su dies camelnan na un pos. Imagina bo e esena. Ta atardi, y Eliezer ta resa: “At’ami para na e fuente di awa, y e yiu mohenan di e hombernan di e stad ta sali pa saca awa; awor laga cu e mucha mohe cu mi bisa: ‘Pa fabor, pone bo purun abou pa mi bebe’, y cu contesta: ‘Bebe, y lo mi duna bo camelnan tambe di bebe’; laga esei ta esun cu bo a apunta pa bo sirbido Isaak.”—Genesis 24:11-14.

Manera tur hende mohe di e luga ei probablemente lo tawata sa, un camel cu tin sed por bebe hopi awa (te cu 100 liter). Pesei un hende mohe cu ofrece pa duna dies camel awa mester tawata dispuesto pa traha duro. E echo cu lo e kier haci esei—mientras cu lo tin hende ta para wak e pero sin dun’e un man—lo ta prueba sigur di su energia, pasenshi, humildad y curason bondadoso pa cu hende y bestia.

Kico ta sosode? “Prome cu el a caba di papia, ata Rebeca cu a nace pa Betuel, yiu homber di Milca, esposa di Abraham su ruman homber Nacor, a sali cu su purun riba su scouder. Y e mucha mohe tawata masha bunita, un birgen, . . . y el a baha bai na e fuente, a yena su purun, y a subi bek. E ora ei e sirbido a core bai contr’e y a bisa: ‘Pa fabor, laga mi bebe un tiki awa for di bo purun.’ Y el a bisa: ‘Bebe, mi señor’; y el a baha su purun lihe ten’e den su man y a dun’e di bebe.”—Genesis 24:15-18.

Rebeca Tin e Cualidadnan Necesario?

Rebeca ta yiu di Abraham su subrino, y fuera di ta bunita, e tin birtud. E no tin miedo di papia cu un hende desconoci, pero tampoco e no ta mucho familiar. E ta haci Eliezer un fabor door di dun’e di bebe ora el a pidie awa. Pero esei ta algo cu normalmente bo por spera ya cu e ta un muestra di bon manera. Pero Rebeca lo  cumpli cu e segundo parti di e test?

Rebeca ta bisa: “Bebe, mi señor.” Pero e no ta keda te ei. Rebeca ta sigui bisa: “Lo mi saca awa pa bo camelnan tambe te ora cu nan a caba di bebe.” E ta ofrece pa haci mas di loke normalmente bo por verwacht. Cu smak, ‘e ta basha e awa for di su purun mesora den e baki y ta core bai bek na e pos pa saca awa, y e ta saca awa pa tur su camelnan.’ E ta haci su trabou cu hopi pep. Anto segun e relato, ‘e homber mientrastanto ta keda wak e asombra.’—Genesis 24:19-21.

Ora Eliezer ta tende cu e mosa ta famia di Abraham, e ta buig te na suela y gradici Yehova. E ta puntra Rebeca si tin luga na cas di su tata p’e y e hombernan hunto cu ne por pasa nochi. Rebeca ta contesta cu si, y ta core bai cas pa conta nan di e bishitantenan.—Genesis 24:22-28.

Despues di scucha e storia di Eliezer, Rebeca su ruman homber, Laban, y su tata, Betuel, ta conclui cu ta Dios a guia e asunto. Rebeca definitivamente ta pa Isaak. Nan ta bisa: “Tum’e y bai cu ne, y lag’e ta esposa di e yiu di bo shon, manera SEÑOR a papia.” Kico Rebeca ta pensa di e asunto? Ora nan puntr’e si lo e bai mesora, e ta contesta cu un solo palabra Hebreo cu ta nifica: “Mi kier bai.” E no tawata obliga di acepta e proposicion aki. Abraham a mustra bon cla cu ta asina ora el a bisa Eliezer cu lo e no ta bou di e huramento mas “si e mohe no kier” bin cu ne. Pero Rebeca tambe ta mira Dios su man den e asunto. Pesei sin perde tempo, e ta bandona su famia pa bai casa cu un homber cu nunca el a topa. E decision cu curashi ei tawata un demostracion sobresaliente di fe. Rebeca realmente tawata un bon choice!—Genesis 24:29-59.

 Ora Rebeca topa cu Isaak, Rebeca ta tapa su mes cu un velo como evidencia di sumision. Isaak ta tum’e como su casa, y ta bin stim’e, sin duda debi na su cualidadnan excelente.—Genesis 24:62-67.

Yiu Hombernan Morocho

Pa 19 aña largo Rebeca ta keda sin yiu. Porfin, e ta sali na estado di yiu morocho, pero su embaraso ta dificil pasobra e yiunan ta bringa den su bariga, locual ta pone Rebeca sclama na Dios. Nos tambe lo kier haci mescos ora nos ta pasa den gran angustia den bida. Yehova ta scucha Rebeca y ta trankilis’e, bisando cu lo e bira mama di dos nacion, y “esun mayo lo sirbi esun mas chikito.”—Genesis 25:20-26.

No ta e palabranan ei so kisas ta e motibo cu Rebeca tin mas amor pa su yiu mas chikito, Yacob. Cada un di e yiunan tin un otro personalidad. Yacob ta “trankil” (of, “sin culpa”, NW), y Esau no ta ni un tiki interesa den asuntonan spiritual. Su actitud ta asina indiferente cu pa un solo cuminda e ta bende su derecho di primogenitura, esta, su derecho di hereda e promesanan di Dios, cu Yacob. Esau su matrimonio cu dos mohe Heteo ta mustra menosprecio—asta desprecio—pa normanan spiritual, y ta causa su mayornan hopi tristesa.—Genesis 25:27-34; 26:34, 35.

Cu Esfuerso Rebeca Ta Obtene e Bendicion pa Yacob

Bijbel no ta bisa si Isaak tawata sa cu Esau lo tin cu sirbi Yacob. En todo caso, tanto Rebeca como Yacob sa cu e bendicion ta pertenece na Yacob. Rebeca ta tuma accion asina cu el a tende cu Isaak tin intencion di bendiciona Esau ora Esau trece p’e un plato di cuminda prepara di un bestia cu el a yag. Te ainda Rebeca tin e caracter dicidido y celoso di su hubentud. E ta ‘manda’ Yacob trece dos yiu di cabrito. E mes lo prepara un plato cu su esposo gusta. Anto Yacob tin cu pretende di ta Esau pa e haya e bendicion. Yacob no kier haci esei pasobra su tata sigur lo ripara cu ta un triki y maldicion’e! Rebeca ta insisti. E ta bisa: “Bo maldicion sea riba mi, mi yiu.” Anto e ta prepara e plato, disfrasa Yacob y mand’e bai serca su esposo.—Genesis 27:1-17.

Bijbel no ta bisa dicon Rebeca ta actua asina. Hopi comentarista ta condena su accion, pero Bijbel no ta conden’e, ni Isaak tampoco ora cu e descubri cu ta Yacob a ricibi e bendicion. Al contrario, Isaak ta agrega mas cos na e bendicion. (Genesis 27:29; 28:3, 4) Rebeca sa kico Yehova a predeci tocante su yiunan. Pesei e ta actua pa haci sigur cu Yacob ta ricibi e bendicion cu e tin derecho riba dje. Esaki ta claramente na harmonia cu e boluntad di Yehova.—Romanonan 9:6-13.

Isaak Ta Manda Yacob Haran

Despues Rebeca ta stroba loke Esau tin pensa di haci door di urgi Yacob pa hui bai te ora e furia di su ruman pasa. Rebeca ta busca Isaak su aprobacion pa su plan pero bondadosamente ta keda sin menciona cu Esau ta rabia cu Yacob. Mas bien, cu tacto Rebeca ta apela na su casa door di expresa precupacion pa e posibilidad cu Yacob lo por casa cu un Cananeo. E idea ei so ta suficiente pa combence Isaak. E ora ei e ta ordena Yacob pa no casa cu e mohenan di Canan y ta mand’e serca e famia di Rebeca pa haya un casa temeroso di Dios. Bijbel no ta bisa si Rebeca hamas ta bolbe mira Yacob, pero Rebeca su accionnan ta resulta den un gran recompensa pa e futuro nacion di Israel.—Genesis 27:43–28:2.

Loke nos sa tocante Rebeca ta motiva nos pa admir’e. E tawata masha bunita, pero su berdadero beyesa a sinta den su debocion na Dios. Esei ta loke Abraham a busca den un suegra. E otro bon cualidadnan cu e tawatin, probablemente a surpasa tur Abraham su expectativa. Rebeca su fe y curashi pa sigui Dios su guia, y tambe su celo, su modestia y hospitalidad generoso ta cualidadnan cu tur hende mohe cristian mester imita. Esakinan ta e cualidadnan cu Yehova mes tambe ta busca den un hende mohe realmente ehemplar.