E Palabra di Dios Ta Fortalece Bo?

ORA bo haya bo cu problema, con bo ta trata cu nan? Ora Hesus a hay’e confronta cu e desafionan di Satanas, el a corda un pasashi biblico apropiado y esei a yud’e. (Mateo 4:1-11) Mescos tambe, ora Rei David a haya su mes cu pruebanan personal, e Palabra di Dios a fortalec’e. El a bisa: “Den e multitud di mi precupacionnan den mi, bo consuelonan ta alegra mi alma.”—Salmo 94:19.

Den nos caso tambe, ora nos ta corda un texto faborito, e por consola nos of duna nos e forsa pa nos enfrenta un problema. Por ehempel, Rex, kende aworaki tin 89 aña, ta trahando como predicado di tempo completo desde 1931. Pero e ta bisa: “Hopi bes cu mi a haya un asignacion special den e trabou di predica, mi a sinti mi incapas.” Con el a trata e situacion? “Mi tawata corda mi texto faborito, Proverbionan 3:5, cu ta bisa: ‘Confia den SEÑOR cu henter bo curason, y no depende riba bo mes comprondemento.’ Door di corda y aplica e texto aki, mi por a cumpli cu mi asignacion exitosamente.”

Asta hobennan ta saca beneficio di un texto faborito. Jack, kende tin seis aña, ta bisa cu su texto faborito ta Mateo 24:14. E texto aki ta motiv’e pa bai predica hunto cu su mayornan. E ta bisa: “Mi ta gusta bai predica tur diasabra hunto cu mi mama, tata y mi ruman mohe.”

Bo sa haya bo cu pruebanan direct di bo fe mescos cu Hesus? E ora ei Filipensenan 4:13, NW, lo por bira un di bo textonan faborito. Bo tambe tin bo “precupacionnan” mescos cu Rei David? Anto corda riba Filipensenan 4:6 y 7; lo e por yuda bo. Bo ta pensa tin biaha cu bo sirbishi na Dios no ta bal nada? E ora ei corda 1 Corintionan 15:58; lo e fortalece bo.

Door di corda textonan apropiado for di cabes, nos ta laga e Palabra di Dios eherce poder den nos bida. (Hebreonan 4:12) E textonan faborito ei por duna nos forsa y tambe consuelo.—Romanonan 15:4.