Fortalece Otro
Fortalece Otro
“Nan a proba di ta un encurashamento pa mi [“un yudansa fortalecedor pa mi”, NW].”—COLOSENSENAN 4:11.
1, 2. Apesar di e peligernan envolvi, dicon Pablo su amigonan a bishit’e den prizon?
SER amigo di un hende cu ta pasando dificultad den prizon por ta peligroso, asta si bo amigo a ser encarsela inhustamente. E funcionarionan di prizon lo por sospecha di bo, y vigila delaster un movecion cu bo haci pa ta sigur cu bo no ta comete ningun crimen. Pesei, lo bo mester tin curashi pa keda den estrecho contacto cu bo amigo y bishit’e den prizon.
2 Sinembargo, esaki ta exactamente loke algun amigo di apostel Pablo a haci un 1.900 aña pasa. Nan no a basila pa bishita Pablo den prizon pa dun’e e consuelo y animacion necesario y pa fortalec’e spiritualmente. Ken e amigonan fiel aki tawata? Y kico nos por siña di nan curashi, lealtad y amistad?—Proverbionan 17:17.
Esnan Cu Ta Duna Fortalesa
3, 4. (a) Menciona nomber di cinco amigo di Pablo. Y kico nan tawata p’e? (b) Kico “un yudansa fortalecedor” ta nifica?
3 Laga nos bai bek na rond di aña 60 di nos era. Apostel Pablo ta den prizon na Roma bou di e acusacion falso di a causa un lantamento. (Echonan 24:5; 25:11, 12) Pablo ta menciona spesificamente cinco cristian cu a yud’e: Tikico, su mensahero personal for di e districto di Asia y un “compañero den sirbishi di Señor”; Onesimo, un “ruman fiel y stima” for di Colosas; Aristarco, un Macedonio di Tesalonica y un tempo Pablo su “compañero di den prizon”; Marco, primo di Pablo su compañero misionero Barnabas y escritor di e Evangelio cu ta carga su nomber; y Justo, un di e apostel su compañeronan di trabou “pa e reino di Dios.” Pablo a bisa di e cinconan aki: “Nan a proba di ta un encurashamento pa mi [“un yudansa fortalecedor pa mi”, NW].”—Colosensenan 4:7-11.
4 Aki Pablo a haci un declaracion notabel tocante e yudansa cu su amigonan fiel a dun’e. El a uza un palabra Griego (pa·re·go·rí·a) cu den Bijbel ta ser haya solamente den e versiculo aki, y cu ta ser traduci como “encurashamento”, of “yudansa fortalecedor” [NW]. E palabra aki tin varios nificacion y tawata ser uza specialmente relaciona cu medicina. * Por traducie como ‘animacion, consuelo of alivio.’ Pablo tawatin mester di e clase di fortalesa ei, y e cinco hombernan aki a percura pa esei.
Dicon Pablo Tawatin Mester di “un Yudansa Fortalecedor”
5. Apesar cu Pablo tawata un apostel, kico e tawatin mester, y kico nos tur tambe tin mester de bes en cuando?
5 Kisas pa algun hende ta un sorpresa pa pensa cu Pablo, un apostel, mester a ser fortaleci. Pero ta asina mes. Ta berdad cu Pablo tawatin fe fuerte, y el a sobrevivi hopi maltrato fisico. Por ehempel, ‘masha hopi biaha mes el a ser suta’, e tawata “hopi biaha den peliger di morto” y a sufri otro dolornan mas. (2 Corintionan 11:23-27) No obstante, ta hende e tawata, y tur hende na un momento of otro mester di consuelo y nan fe tin cu ser fortifica cu yudansa di otronan. Esaki tawata asina asta den caso di Hesus. Durante su ultimo anochi, un angel a aparece na dje den hofi di Getsemani pa “fortalec’e.”—Lucas 22:43.
6, 7. (a) Na Roma, ta ken a decepciona Pablo, y ken a curash’e? (b) Ki clase di servicio Pablo su rumannan cristian a rindi na dje na Roma y asina a demostra di ta “un yudansa fortalecedor”?
6 Pues, si Hesus mester a ser fortaleci, ta di compronde cu Pablo tambe lo tawatin mester di esei. Ora el a yega como preso na Roma, e hendenan di su mes rasa no a dun’e un bonbini cordial. En general, e hudiunan aki no tawata habri pa e mensahe di Reino. Despues cu e lidernan di e hudiunan a bishita Pablo caminda e tawata sera, e relato di Echonan ta bisa: “Algun tawata wordo combenci door di loke a wordo bisa, ma otronan no kier a kere. Y sin por a yega na un acuerdo cu otro, nan a cuminsa bai.” (Echonan 28:17, 24, 25) Nan falta di aprecio pa Yehova su bondad inmereci lo mester a causa Pablo hopi dolor. Nos por mira su sintimentonan fuerte relaciona cu e asunto aki den e carta cu el a skirbi un par di aña prome na e congregacion na Roma: “Mi tin gran tristesa y un dolor continuo den mi curason. Pasobra lo mi a desea cu ami mes tawata maldiciona, separa for di Cristo pa motibo di mi rumannan [e Hudiunan], mi famianan segun carni.” (Romanonan 9:2, 3) Pero toch el a haya compañeronan fiel y berdadero na Roma, kende nan curashi y cariño a calma su dolor di curason. Ta nan tawata su berdadero rumannan spiritual.
7 Con e cinco rumannan ei a duna prueba di ta un yudansa fortalecedor? Nan no a laga Pablo su cadenanan di prizon pone nan keda leu for di dje. Mas bien, boluntariamente y amorosamente nan a rindi servicionan personal na Pablo, haciendo tareanan cu e no por a haci pa su mes como cu e tawata sera. Por ehempel, nan a fungi como mensahero y a hiba Pablo su cartanan y instruccionnan verbal na diferente congregacion; nan a trece informenan animante pa Pablo tocante e bienestar di e rumannan na Roma y na otro parti. Probablemente nan a obtene articulonan necesario pa Pablo, manera paña pa friu, buki y cos pa skirbi cu ne. (Efesionan 6:21, 22; 2 Timoteo 4:11-13) Tur e tipo di actonan util ei a fortalece y curasha e apostel encarsela, di manera cu e na su turno por tawata “un yudansa fortalecedor” pa otro hende, incluso pa congregacionnan completo.—Romanonan 1:11, 12.
Con Nos Por Ta “un Yudansa Fortalecedor”
8. Ki les nos por siña for di e echo cu Pablo a admiti humildemente cu e tawatin mester di “un yudansa fortalecedor”?
8 Kico nos por siña di e relato aki di Pablo y su cinco compañeronan? Laga nos consentra specialmente riba e les aki: Nos mester tin curashi y haci sacrificio propio pa duna yudansa na otro hende ora nan ta den dificultad. Ademas, nos mester ta humilde pa reconoce cu nos mes kisas tin mester di yudansa ora nos ta pasando den angustia personal. Pablo no solamente a admiti cu e tawatin mester di yudansa, sino tambe cu aprecio a acepta e yudansa y a elogia esnan cu a dun’e. E no a considera cu si e acepta yudansa for di otro hende esei lo ta un señal di debilidad of un humiliacion di su parti, y nos tampoco no mester mir’e asina. Si nos bisa cu nunca nos no tin mester di yudansa fortalecedor, ta como si fuera nos kiermen cu nos ta sobrehumano. No lubida, Hesus su ehempel ta mustra cu asta un hende perfecto de bes en cuando tin cu sclama pa yudansa.—Hebreonan 5:7.
9, 10. Ki bon resultado por tin ora un persona ta admiti cu e mester di yudansa, y ki influencia esaki por tin riba otro hende den famia y den congregacion?
9 Ora cu rumannan den puesto di responsabilidad ta admiti cu nan tin nan limitacionnan y cu nan ta depende di e sosten di otro ruman, esei por hiba na bon resultado. (Santiago 3:2) Door di admiti esei nan ta fortalece e banchi entre esnan cu autoridad y esnan somete na e autoridad ei, y asina ta promove comunicacion amical y franco. E humildad di esnan cu ta dispuesto na acepta yudansa, ta sirbi como un ehempel practico pa otro rumannan den un situacion similar. Ademas esei ta mustra cu esnan cu ta hiba delantera ta acercabel y cu nan tambe ta hende.—Eclesiastes 7:20.
10 Por ehempel, lo por ta mas facil pa muchanan acepta e yudansa di nan mayornan pa trata cu problema y tentacion, ora nan sa cu nan mayornan tambe a confronta problema- y tentacionnan similar tempo nan tawata mucha. (Colosensenan 3:21) Esei por hiba na bon comunicacion entre mayor y yiu. E mayor por comparti solucionnan biblico na un manera mas efectivo y e yiu lo acepta nan mas lihe. (Efesionan 6:4) Di igual manera, miembronan di congregacion lo ta mas prepara pa ricibi yudansa for di e ancianonan ora nan realisa cu ancianonan tambe ta trata cu problema, temor y situacionnan hopi complica. (Romanonan 12:3; 1 Pedro 5:3) Mescos cu den caso di yiunan, esei por hiba na bon comunicacion, na comparti conseho biblico y na fortalecemento di fe. No lubida cu awor mas cu nunca nos rumannan tin cu ser fortaleci.—2 Timoteo 3:1.
11. Dicon tin asina tanto ruman awe cu mester di “un yudansa fortalecedor”?
11 Sin importa na unda nos ta biba, ken nos ta of con grandi nos ta, nos tur tin momentonan cu nos ta confronta stress den bida. Esei ta un parti di bida den e mundo djawe. (Revelacion 12:12) E situacionnan ei cu fisicamente y emocionalmente ta perturba nos, ta test e cualidad di nos fe. Situacionnan sumamente dificil por surgi na trabou, na scol, den famia of den congregacion. E causa por ta un malesa grave of un trauma bieu. Esta un gran alivio ora un casa, un anciano of un amigo of amiga ofrece animacion cu palabranan bondadoso y actonan util! Wel, esei ta manera ora bo hunta un crema refrescante riba bo cuero irita! Pesei, si bo ripara cu un di bo rumannan ta den un condicion perturba, sea su yudansa fortalecedor. Of si tin un problema hopi inkietante ta causa bo angustia, pidi e yudansa di esnan spiritualmente cualifica.—Santiago 5:14, 15.
Con e Congregacion Por Yuda
12. Kico cada persona den congregacion por haci pa fortalece su rumannan?
12 Tur ruman den congregacion, incluso e hobennan, por haci algo pa fortalece otro. Por ehempel, boso presencia regular na reunion y den sirbishi di veld ta contribui hopi na fortifica e fe di otro rumannan. (Hebreonan 10:24, 25) Boso perseverancia den sirbishi sagrado ta prueba di boso lealtad na Yehova y ta mustra cu boso ta keda spiritualmente alerta apesar di e dificultadnan cu boso kisas ta confronta. (Efesionan 6:18) E perseverancia ei por tin un efecto fortalecedor riba otro rumannan.—Santiago 2:18.
13. Dicon algun ruman por bira inactivo, y kico por haci pa yuda nan?
13 Tin biaha e presionnan di bida of otro dificultadnan por pone algun ruman baha man na nan actividad of bira inactivo den sirbishi di veld. (Marco 4:18, 19) Podise nos no ta mira esnan cu ta inactivo na reunionnan di congregacion. Sinembargo, probablemente ainda nan tin un amor pa Dios den nan curason. Kico por ser haci pa fortalece nan fe? E ancianonan por ofrece yudansa bondadoso door di bishita nan. (Echonan 20:35) Kisas por pidi otro miembronan di congregacion tambe pa duna un man. Tal bishitanan motiva pa amor por ta net e remedi necesario, na moda di papia, pa rebiba esnan cu ta debil den fe.
14, 15. Ki conseho Pablo ta duna tocante fortalece otronan? Duna un ehempel di un congregacion cu a aplica su conseho.
14 Bijbel ta anima nos pa “curasha esnan cu ta falta animo, yuda e debilnan.” (1 Tesalonicensenan 5:14) Podise “esnan cu ta falta animo” ta nota cu nan ta perdiendo nan curashi y cu nan no por supera e obstaculonan cu nan ta confronta sin cu un hende duna nan un man. Abo lo por ta esun cu ta duna nan un man? E expresion “yuda e debilnan” a yega di ser traduci como “tene duro” of “pega na” e debilnan. Yehova ta aprecia y stima tur su carnenan. E no ta considera nan como di poco balor, ni e no kier pa nan aparta for di e caminda. Abo por yuda e congregacion “tene duro” na esnan spiritualmente debil, te ora cu nan bira mas fuerte?—Hebreonan 2:1.
15 Un anciano a bishita un pareha casa cu tawatin seis aña inactivo. E anciano a skirbi: “E interes bondadoso y amoroso cu henter e congregacion a desplega na nan tawatin un impacto asina grandi cu el a motiva nan pa bolbe bek na e tou.” Kico e ruman mohe cu tawata inactivo a pensa di e bishitanan di e miembronan di congregacion? Despues el a bisa: “Loke a yuda nos bira activo atrobe tawata cu ni e ruman hombernan cu a bishita nos, ni e ruman mohenan cu tawata compaña nan, nunca a demostra un actitud critico of di condena nos. Mas bien, nan a mustra comprension y a duna nos animacion biblico.”
16. Ken semper ta cla pa yuda esnan cu tin mester di fortalesa?
16 Si, un cristian sinsero ta contento di por ta un yudansa fortalecedor pa otro rumannan. Y segun cu circunstancianan den nos bida ta cambia, nos mes por ta esnan cu ta ricibi yudansa fortalecedor di nos rumannan. Pero pa nos ta realistico, por sosode cu den tempo di necesidad, no tin ningun yudansa humano disponibel. Sinembargo, tin un Fuente di fortalesa cu semper ta disponibel, uno cu semper ta dispuesto pa yuda, Yehova Dios.—Salmo 27:10.
Yehova—E Fuente Principal di Fortalesa
17, 18. Den ki maneranan Yehova a fortalece su Yiu, Hesucristo?
17 Ora Hesus tawata claba na staca, el a sclama: “Tata, den bo mannan mi ta entrega mi spirito.” (Lucas 23:46) Anto el a muri. Net algun ora prome, nan a arest’e y su amigonan mas intimo a bandon’e y hui bai den temor. (Mateo 26:56) Nan a bai laga Hesus su so cu un solo Fuente di fortalesa, su Tata celestial. Sinembargo, Hesus su confiansa den Yehova no tawata en vano. Yehova a recompensa Hesus su lealtad na dje door di apoy’e lealmente.—Salmo 18:25, NW; Hebreonan 7:26.
18 Atrabes di Hesus su sirbishi riba tera, Yehova a duna su Yiu loke e tawatin mester pa e mantene integridad te na su ultimo rosea. Por ehempel, un poco despues cu Hesus a batisa—marcando asina e comienso di su sirbishi—el a tende e bos di su Tata expresa aprobacion y confirma Su amor pa Hesus. Ora Hesus tawatin mester di sosten, Yehova a manda angel pa fortalec’e. Ora Hesus a confronta e prueba di mas grandi na final di su bida riba tera, Yehova a scucha su suplica- y peticionnan. Tur e cosnan aki sigur tawata un yudansa fortalecedor pa Hesus.—Marco 1:11, 13; Lucas 22:43.
19, 20. Ki garantia nos tin cu Yehova lo fortalece nos ora nos ta den problema?
19 Yehova kier ta nos Fuente principal di fortalesa tambe. (2 Cronicanan 16:9) E Fuente di tur energia dinamico y grandesa di poder por bira un yudansa fortalecedor pa nos ora nos ta den problema. (Isaias 40:26) Guera, pobresa, malesa, morto of nos propio imperfeccionnan por pone nos bou di presion inmenso. Ora cu dificultadnan di bida ta parce aplastante mescos cu un “enemigo poderoso”, Yehova por ta nos fortalesa y nos poder. (Salmo 18:17; Exodo 15:2) E tin un yudansa poderoso pa nos, su spirito santo. Pa medio di su spirito, Yehova por duna “forsa na esun cansa” di manera cu e por “bula bai ariba cu hala manera aguila.”—Isaias 40:29, 31.
20 Dios su spirito ta e forsa mas poderoso den universo. Pablo a declara: “Pa tur cos mi tin e forsa den birtud di esun cu ta duna mi poder.” Si, nos amoroso Tata celestial por duna nos “poder mas aya di loke ta normal”, ya asina nos por soporta tur problema doloroso te ora cu e haci “tur cos nobo” den su Paradijs priminti cu ta asina serca.—Filipensenan 4:13, NW; 2 Corintionan 4:7; Revelacion 21:4, 5.
[Nota]
^ par. 4 Vine’s Complete Expository Dictionary of Old and New Testament Words, di W. E. Vine, ta bisa: “Un forma verbal di e palabra [pa·re·go·rí·a] ta nifica remedi cu ta suavisa iritacion.”
Bo Ta Corda?
• Con e rumannan na Roma a resulta “un yudansa fortalecedor” pa Pablo?
• Den ki maneranan nos por ta “un yudansa fortalecedor” den congregacion?
• Con Yehova ta nos Fuente principal di fortalesa?
[Preguntanan di Estudio]
[Plachi na pagina 19]
Rumannan a resulta di ta “un yudansa fortalecedor” pa Pablo door di ofrec’e sosten leal, encurashamento y servicionan personal
[Plachi na pagina 21]
Ancianonan ta hiba delantera den fortalece e tou