Hobennan, Boso Ta Trahando pa Futuro?

“Mi sa e plannan cu mi tin pa boso, . . . plannan pa pas y no pa calamidad, pa duna boso un futuro y un speransa.”—YEREMIAS 29:11.

1, 2. Den ki diferente manera nos por wak e añanan di hubentud?

MAYORIA hende adulto ta considera hubentud como un periodo fantastico di bida. Nan ta corda e energia y entusiasmo cu nan tawatin tempo cu nan tawata jong. Nan tin grato recuerdo di e tempo cu nan tawatin hopi menos responsabilidad, un tempo cu nan a pasa hopi pret y cu nan tawatin henter un bida nan dilanti, yen di oportunidad.

² Boso cu ta hoben probablemente tin un otro punto di bista di e asunto. Kisas boso tin problema pa handle e cambionan emocional y fisico di hubentud. Na scol kisas boso ta confronta presion fuerte di otro hobennan. Podise boso tin cu haci un esfuerso dicidido pa resisti droga, alcohol y inmoralidad. Hopi di boso ta confronta tambe e asunto di neutralidad of otro cuestionnan relaciona cu boso fe. Si, hubentud por ta un tempo dificil. Pero toch, e ta tambe un tempo di oportunidad. E pregunta ta: Con boso lo uza e oportunidadnan ei?

Gosa di Boso Hubentud

3. Ki conseho y spiertamento Salomon a duna hobennan?

³ Hende mas grandi lo bisa boso cu hubentud no ta dura largo, y nan tin rason. Den un par di aña, boso hubentud ta tras di lomba. Pues gosa di dje tanten cu boso tin e! Esei tawata e conseho di Rei Salomon, kende a skirbi: “Regociha, hoben, durante di bo hubentud, y laga bo curason tin placer durante di e dianan di bo adolecencia. Y sigui e camindanan di bo curason y e deseonan di bo wowo.” Sinembargo, Salomon a spierta hobennan: “Kita tristesa for di bo curason, y tene maldad for di bo curpa.” Anto el a sigui bisa: “Adolecencia y hubentud ta banidad.”—Eclesiastes 11:9, 10.

4, 5. Dicon ta sabi pa hobennan prepara pa futuro? Ilustra esei.

⁴ Boso ta compronde kico Salomon tawata kiermen? Pa yuda boso compronde, pensa riba un hoben cu ta haya un regalo di hopi balor, podise un herencia di placa. Kico lo e haci cu ne? E por gasta henter e placa na fiesta y dibirticion, mescos cu e yiu perdi den Hesus su comparacion. (Lucas 15:11-23) Pero kico lo sosode ora cu e placa caba? Sigur sigur lo e lamenta cu e tawata asina iresponsabel! Di otro banda, supone cu e uza e regalo pa prepara pa futuro, podise door di inverti mayoria di e placa na un manera sabi. Cu tempo, ora cu e ta sacando beneficio di su inversion, boso ta kere cu lo e lamenta cu den su hubentud e no a gasta tur su placa na fiesta y dibirticion? Claro cu no!

⁵ Awor pensa riba boso añanan di hubentud como un regalo di Dios; locual de echo nan ta. Con boso lo uza nan? Boso por malgasta tur boso energia y entusiasmo na satisface boso mes, pasando di un dibirticion pa otro sin pensa mes riba futuro. Pero si boso haci esei, boso “adolecencia y hubentud”, boso flor di bida, en berdad lo resulta di ta “banidad.” Ta mucho mas miho pa probecha di boso hubentud pa prepara pa futuro!

6. (a) Ki conseho di Salomon ta percura un guia pa hobennan? (b) Kico Yehova lo kier haci pa hobennan, y con un hoben por beneficia di esaki?

⁶ Salomon a declara un principio cu por yuda boso uza boso añanan di hubentud di e  miho manera. El a bisa: “Corda tambe riba bo Creador den e dianan di bo hubentud.” (Eclesiastes 12:1) Esei ta e yabi pa exito—scucha Yehova y haci su boluntad. Yehova a bisa e Israelitanan di antiguedad kico e tawata kier haci pa nan: “Mi sa e plannan cu mi tin pa boso, . . . plannan pa pas y no pa calamidad, pa duna boso un futuro y un speransa.” (Yeremias 29:11) Yehova lo kier duna boso tambe “un futuro y un speransa.” Si boso corda riba Yehova den loke boso ta haci y pensa y tambe ora boso ta tuma decision, e futuro y e speransa ei lo ser realisa.—Revelacion 7:16, 17; 21:3, 4.

“Hala Serca Dios”

7, 8. Con un hoben por hala serca Dios?

⁷ Santiago a anima nos pa corda riba Yehova ora el a urgi nos: “Hala serca Dios y e lo hala serca boso.” (Santiago 4:8) Yehova ta e Creador, e Soberano celestial, digno di tur adoracion y alabansa. (Revelacion 4:11) Sinembargo, si nos hala serca dje, e lo hala serca nos. Tal interes amoroso no ta yena boso curason cu cariño p’e?—Mateo 22:37.

⁸ Nos por hala serca Yehova den varios manera. Por ehempel, apostel Pablo a bisa: “Dedica boso mes na oracion, keda alerta den dje cu un actitud di gradicimento.” (Colosensenan 4:2) Cu otro palabra, cultiva e custumber di haci oracion. No keda satisfecho pa djis bisa amen despues cu boso tata of un otro ruman cristian den congregacion representa boso den oracion. Boso a yega di desahoga boso curason na Yehova y bis’e kico boso ta pensa, kico boso tin miedo di dje, ki problemanan boso ta confronta? Boso a yega di cont’e cosnan cu boso lo tin berguensa di papia di dje cu cualkier otro hende? Oracionnan honesto y di curason ta duna un sintimento di pas. (Filipensenan 4:6, 7) Nan ta yuda nos hala serca Yehova y sinti cu e tambe ta hala serca nos.

9. Con un hoben por scucha Yehova?

⁹ Un manera mas pa hala serca Yehova nos ta haya den e siguiente palabranan inspira: “Scucha conseho y acepta disiplina, pa bo por ta sabi pa resto di bo bida.” (Proverbionan 19:20) En berdad, si boso scucha Yehova y obedec’e, boso ta trahando pa futuro. Con boso por demostra cu boso realmente ta scucha Yehova? Casi sigur boso ta asisti cu regularidad na reunionnan cristian y ta scucha e partinan riba programa. Tambe boso ta ‘honra boso tata y boso mama’ door di ta presente na e studio di Bijbel di famia. (Efesionan 6:1, 2; Hebreonan 10:24, 25) Esei ta hopi bon. Pero fuera di e cosnan ei, boso ta ‘haci bon uzo di boso tempo’ pa prepara pa e reunionnan, pa lesa Bijbel cu regularidad y pa haci investigacion? Boso ta purba aplica loke boso ta lesa, pa asina boso por cana manera “hende sabi”? (Efesionan 5:15-17; Salmo 1:1-3) Si boso ta haci e cosnan ei, boso ta halando serca Yehova.

10, 11. Ki beneficionan grandi hobennan ta ricibi ora nan ta scucha Yehova?

¹⁰ Den e palabranan di introduccion di e buki di Proverbionan, e escritor inspira a splica e proposito di e buki biblico ei. El a bisa cu e proposito ta “pa conoce sabiduria y instruccion, pa discerni e dichonan di comprondemento, pa ricibi instruccion den conducta prudente, husticia, huicio y rectitud; pa duna prudencia na e simpelnan, conocemento y discernimento na e hobennan.” (Proverbionan 1:1-4) Pues, segun cu boso ta lesa y aplica e palabranan di Proverbionan—y tambe di e resto di Bijbel—boso lo cultiva husticia y rectitud, y Yehova lo ta contento cu boso ta hala serca dje. (Salmo 15:1-5) Mas boso cultiva sano huicio, prudencia, conocemento y discernimento, mas miho decisionnan boso lo tuma.

¹¹ Ta irasonabel pa spera cu un hoben lo actua sabi den e manera aki? No, pasobra tin hopi hoben cristian cu ta haci esei. Como resultado, otro hende ta respeta nan y ‘no ta menosprecia nan hubentud.’ (1 Timoteo 4:12) Nan mayornan cu rason ta orguyoso di nan, y Yehova ta bisa cu nan ta haci su curason contento. (Proverbionan 27:11) Maske nan ta  jong, nan por tin sigur cu e palabranan inspira aki ta aplica na nan: “Wak hende husto, observa hende drechi: hende di pas tin porvenir.”—Salmo 37:37, BPK.

Scohe Bon

12. Menciona un decision importante cu hobennan tin cu tuma. Y dicon e decision ei tin consecuencianan riba termino largo?

¹² Hubentud ta un tempo pa scohe y pa tuma decision, y algun di nan lo tin consecuencianan duradero. Algun decision cu boso tuma awor lo influencia boso bida pa hopi aña largo. Desisionnan sabi ta contribui na un bida felis y exitoso. Desisionnan cu no ta sabi por mancha e resto di boso bida. Ban wak con esei ta cierto relaciona cu dos decision cu boso tin cu tuma. Esun prome: Ken boso ta scohe pa asocia of anda cu ne? Dicon esaki ta importante? Wel, e proverbio inspira ta bisa: “Esun cu anda cu hende sabi lo ta sabi, ma un compañero di hende bobo lo sufri daño.” (Proverbionan 13:20) Cu otro palabra, cu tempo nos lo bira mescos cu e hendenan cu nos ta anda cu ne—sabi of bobo. Cua di nan boso ta prefera di ta?

13, 14. (a) Fuera di contacto direct cu hende, kico mas asociacion ta encera? (b) Ki eror hobennan mester evita?

¹³ Ora boso ta pensa riba asociacion, probablemente boso ta pensa riba anda cu hende. Esei ta corecto, pero e ta encera mas cos. Ora boso ta wak un programa na television, ta scucha muziek, ta lesa un buki, ta bai wak un pelicula, of ta uza cierto recursonan riba Internet, ta un otro manera cu boso ta asocia. Si e proposito di e asociacion ei ta pa satisface inclinacionnan violento y inmoral of e ta stimula uzo di droga, buracheria of cualkier otro cos contrario na principionan biblico, boso ta den compania di hende “bobo”, kendenan ta actua como si fuera Yehova no ta existi.—Salmo 14:1.

¹⁴ Podise boso ta pensa cu ya cu boso ta asisti na reunionnan cristian y ta activo den congregacion, boso ta suficiente fuerte y lo no ser afecta door di un pelicula violento of un album di muziek cu tin bon ritmo pero letranan cuestionabel. Kisas boso ta pensa cu lo no tin ningun mal consecuencia si boso djis tira un bista na un website pornografico riba Internet. Pero apostel Pablo ta bisa boso cu boso manera di pensa ta robes! El a bisa: “Mal compania ta daña bon custumber.” (1 Corintionan  15:33) Lamentablemente, hopi hoben cristian cu bon prospecto a daña nan bon custumbernan door di mal asociacion. Pues anto, sea dicidido pa evita tal asociacion. Si boso haci esei, boso lo sigui e conseho aki di Pablo: “No sea conforme e mundo aki, ma sea transforma pa medio di e renobamento di boso mente, pa boso por comproba kico ta e bon y agradabel y perfecto boluntad di Dios.”—Romanonan 12:2.

15. Cua ta e di dos decision cu hobennan tin cu tuma, y ki presion tin biaha hende ta pone riba nan relaciona cu esaki?

¹⁵ Awor laga nos wak un di dos decision cu boso ta confronta. Lo yega un tempo cu boso tin cu dicidi kico boso kier haci ora boso caba scol. Si boso ta biba den un pais caminda trabou ta scars, kisas boso lo sinti e presion pa gara mesora e miho trabou cu tin disponibel. Si boso ta biba den un pais prospero, kisas tin hopi oportunidad, di cua algun ta masha atractivo. Cu masha bon intencion boso maestronan of mayornan kisas ta insisti pa boso sigui tras di un carera cu ta ofrece siguridad financiero, kisas asta rikesa. Sinembargo, e preparacion pa un carera asina lo por limita severamente e tempo cu boso por dedica na sirbi Yehova.

16, 17. Splica con diferente texto biblico por yuda un persona hoben haya un punto di bista balansa di trabou.

¹⁶ Corda consulta Bijbel prome cu boso tuma un decision. Bijbel ta anima nos pa traha pa nos pan di cada dia, y esei ta indica cu nos ta responsabel pa mantene nos mes. (2 Tesalonicensenan 3:10-12) No obstante, tin mas cos envolvi den scohe un carera. Nos ta anima boso pa lesa e siguiente textonan biblico y pensa con nan por yuda un persona hoben pa e ta balansa den e asunto di scohe un carera: Proverbionan 30:8, 9; Eclesiastes 7:11, 12; Mateo 6:33; 1 Corintionan 7:31; 1 Timoteo 6:9, 10. Despues di a lesa e versiculonan aki, boso a mira kico ta Yehova su punto di bista den e asunto di scohe un carera?

¹⁷ Trabou nunca mester bira asina importante cu e ta haya prioridad riba nos sirbishi na Yehova. Si boso por tin e cualificacionnan necesario pa un trabou rasonabel aunke cu boso tin solamente un educacion di scol secundario, esei ta bon. Si boso tin mester di mas preparacion despues di scol secundario, esei ta algo cu boso mester considera hunto cu boso mayornan. Sinembargo, nunca perde for di bista “e cosnan mas importante”, esta, e cosnan spiritual. (Filipensenan 1:9, 10, NW) No comete e mesun eror cu Baruk, e secretario di Yeremias. El a perde aprecio pa su privilegio di sirbishi y a cuminsa ‘busca cosnan grandi pa su mes.’ (Yeremias 45:5) El a lubida momentaneamente cu ningun di e “cosnan grandi” di e mundo aki lo trec’e mas serca Yehova ni yud’e sobrevivi e destruccion di Herusalem. Y esei ta conta pa nos awe tambe.

Aprecia Cosnan Spiritual

18, 19. (a) Di kico mayoria di boso biciñanan ta sufri, y kico boso mester sinti pa nan? (b) Dicon hopi hende no ta sinti hamber spiritual?

¹⁸ Boso a yega di mira potret den medionan di comunicacion di muchanan den paisnan caminda tin hamber? Si ta asina, siguramente boso a sinti hopi duele di nan. Boso ta sinti e mesun duele pa hende den boso bario? Dicon boso mester sinti duele di nan? Pasobra mayoria di nan tambe ta muriendo di hamber. Nan ta sufri di e hamber cu Amos a profetisa di dje: “‘Mira, dianan ta bin’, SEÑOR Dios ta declara, ‘cu lo mi manda hamber riba e tera; no hamber pa pan ni sed pa awa, ma mas bien pa tende e palabranan di SEÑOR.’”—Amos 8:11.

¹⁹ Ta berdad cu mayoria di esnan cu ta sufri di e hamber spiritual aki no ta “conciente di nan necesidad spiritual.” (Mateo 5:3, NW)  Hopi di nan no ta sinti hamber spiritual. Tin di nan asta ta sinti cu nan ta bon alimenta. Pero si nan ta sinti asina ta pasobra nan ta alimenta nan mes cu e “sabiduria di e mundo”, un sabiduria sin balor cu ta inclui materialismo, speculacion cientifico, opinionnan tocante moralidad y otro cosnan por estilo. Tin hende ta sinti cu “sabiduria” moderno ta haci e siñansanan di Bijbel ouderwets. Sinembargo, “mundo door di su mes sabiduria no a conoce Dios.” E sabiduria di e mundo lo no yuda boso hala serca Dios. E no ta nada otro cu “bobedad dilanti di Dios.”—1 Corintionan 1:20, 21; 3:19.

20. Dicon no ta rasonabel cu un hende kier imita esnan cu no ta adora Yehova?

²⁰ Ora boso ta wak e potretnan ei di e muchanan hambra, boso sa desea pa boso ta manera nan? Claro cu no! Sinembargo, algun hoben den famianan cristian a demostra cu nan si tin gana di ta manera e hendenan rond di nan cu spiritualmente ta muriendo di hamber. Probablemente, e hobennan ei ta kere cu hobennan den mundo ta gosa di bida sin ningun precupacion. Nan ta lubida cu e hobennan ei ta aleha for di Yehova. (Efesionan 4:17, 18) Tambe nan ta lubida riba e mal efectonan di hamber spiritual. Algun di e mal efectonan ei ta embaraso hubenil indeseabel y e efectonan fisico y emocional di inmoralidad, humamento, buracheria y di uzo di droga. Hamber spiritual ta causa un actitud rebelde, un sintimento profundo di desesperacion y un falta di proposito den bida.

21. Con nos por proteha nos mes pa nos no adopta e mal actitudnan di esnan cu no ta adora Yehova?

²¹ Pesei, ora boso ta na scol meimei di muchanan cu no ta adora Yehova, no laga nan actitudnan domina boso. (2 Corintionan 4:18) Algun di nan lo papia cu menosprecio tocante asuntonan spiritual. Fuera di esei, medionan di comunicacion lo produci propaganda fini cu indirectamente ta bisa cu ta normal pa comete inmoralidad, bira burachi of papia palabra malo. Resisti e influencia ei. Sigui anda of asocia regularmente cu hende cu ta ‘tene fe y un bon consenshi.’ Percura pa semper boso tin hopi di haci “den e trabou di Señor.” (1 Timoteo 1:19; 1 Corintionan 15:58) Keda ocupa na Salon di Reino y den sirbishi di veld. Durante boso añanan na scol, participa de bes en cuando den e sirbishi di pionero ausiliar. Fortalece boso punto di bista spiritual den e manera aki, y boso lo no perde boso balansa.—2 Timoteo 4:5.

22, 23. (a) Dicon hopi bes un hoben cristian lo tuma decisionnan cu otro hende no ta compronde? (b) Kico hobennan ta ser curasha pa haci?

 ²² Mirando asuntonan for di un punto di bista spiritual probablemente lo pone boso tuma decisionnan cu otro hende lo no compronde. Por ehempel, tawatin un hoben cristian cu hopi talento musical y cu a sobresali den tur vak na scol. Ora cu el a caba scol, el a bai traha hunto cu su tata den un negoshi di limpia bentana ya asina e por a sigui cu e vocacion cu el a scohe como pionero, esta, un predicado di tempo completo. Su maestronan di scol no por a compronde e motibo di su decision, pero si boso a hala serca Yehova, nos tin sigur cu boso si ta compronde.

²³ Segun cu boso ta pensa riba e manera pa uza e recursonan precioso di boso hubentud, ‘montona pa boso mes e tesoro di un bon fundeshi pa futuro, pa boso por gara loke ta e bida berdadero.’ (1 Timoteo 6:19) Sea dicidido pa ‘corda riba boso Magnifico Creador’ den boso hubentud, y pa resto di boso bida. Esei ta e unico manera pa traha pa un futuro exitoso, un futuro cu lo no caba nunca.

Na Ki Conclusion Boso A Yega?

• Ki conseho inspira ta yuda hobennan den nan planiamento pa futuro?

• Cua ta algun manera cu un hoben por “hala serca Dios”?

• Cua ta algun decision cu un persona hoben ta tuma cu lo tin efecto riba su futuro?

[Preguntanan di Estudio]

[Plachi na pagina 15]

Boso lo laga actividadnan personal absorba tur boso energia y entusiasmo hubenil?

[Plachi na pagina 16, 17]

Hobennan cristian sabi ta keda enfoca riba cosnan spiritual