Neutralidad Ta Stroba Amor Cristian?

SER cristian ta encera mas cu lesa Bijbel, haci oracion y alaba Dios riba diadomingo. E ta encera haci obranan tanto pa Dios como pa hende. Bijbel ta bisa: “No laga nos stima cu palabra ni cu lenga, ma cu echo y berdad.” (1 Huan 3:18) Hesus tawatin interes sinsero den otro hende, y cristiannan kier imit’e. Apostel Pablo a haci un apelacion na su rumannan den fe pa nan semper ‘abunda den e trabou di Señor.’ (1 Corintionan 15:58) Pero kico ta e trabou di Señor? E ta encera purba cambia gobierno su politica pa beneficia hende pober y oprimi? Esei ta loke Hesus a haci?

Aunke e hendenan a purba combence Hesus pa el a interveni den asuntonan politico of apoya un partido, el a nenga di haci esei. El a rechasa Satanas su oferta pa e haya  poder riba tur reino di mundo, el a evita di mete den un disputa tocante pagamento di belasting, y el a retira ora un movemento popular kier a hacie rei. (Mateo 4:8-10; 22:17-21; Huan 6:15) Pero su posicion neutral no a strob’e di traha na bienestar di otro hende.

Hesus a consentra riba loke lo a trece beneficio permanente pa otro hende. Aunke el a trece alivio temporal pa e cinco mil hendenan cu el a alimenta y pa e enfermonan cu el a cura, su siñansa a habri caminda pa henter humanidad haya bendicionnan eterno. Hesus a bira conoci, no como un organisado di campañanan di alivio, sino simplemente como “e Maestro.” (Mateo 26:18; Marco 5:35; Huan 11:28) El a bisa: “Pa esaki mi a nace y pa esaki mi a bin den mundo, pa duna testimonio di e berdad.”—Huan 18:37.

Predicando Algo Miho cu Politica

E berdad cu Hesus a siña hende no tawata un teoria politico. E berdad aki mas bien a enfoca riba e Reino, di cua e mes lo a bira Rei. (Lucas 4:43) E Reino aki ta un gobierno celestial, y lo e remplasa tur gobernacion humano y trece pas permanente pa humanidad. (Isaias 9:6, 7; 11:9; Daniel 2:44) Pesei, e ta e unico berdadero speransa pa humanidad. En bes di anima hende pa laga nan futuro den man di ser humano, no ta mas amoroso di nos parti pa papia cu nan tocante un speransa sigur pa futuro? Bijbel ta bisa: “No confia den prinsnan, den yiu di hende, den kende no tin salbacion. Su spirito ta sali, e ta bolbe na tera; e mes dia ei su pensamentonan ta perece. Bendiciona ta esun, kende su yudansa ta e Dios di Yacob, kende su speransa ta den SEÑOR su Dios.” (Salmo 146:3-5) Pues en bes di manda su disipelnan bai predica tocante con pa drecha gobiernonan, Hesus a siña nan predica e ‘evangelio di e reino.’—Mateo 10:6, 7; 24:14.

Esaki anto ta “e trabou di Señor” cu predicadonan cristian mester haci. Pa motibo cu subditonan di e Reino di Dios tin cu stima otro, e Reino lo logra elimina pobresa door di reparti e recursonan di humanidad den un manera balansa. (Salmo 72:8, 12, 13) Esaki ta un bon noticia y sigur e ta merece pa nos predic’e.

Awe Testigonan di Yehova ta organisa pa haci e “trabou di Señor” aki den 235 pais. Na harmonia cu Hesus su mandamento, nan ta respeta tur gobierno. (Mateo 22:21) Pero tambe nan ta obedece e siguiente palabranan cu Hesus a dirigi na su oyentenan: “Boso no ta di mundo, ma ami a scohe boso for di den mundo.”—Huan 15:19.

Algun persona cu un tempo tawata activo den politica a cambia despues cu nan a studia Bijbel cuidadosamente. Un politico Italiano kende tawata miembro di Accion Catolico, un organisacion controla pa iglesia, a bisa: “Mi a drenta politica pasobra mi a sinti cu un hende mester contribui activamente na e desaroyo politico y social di comunidad.” Despues di a retira como alcalde di stad pa por a predica e Reino di Dios como Testigo di Yehova, el a splica pakico e intentonan di  hende sinsero den politica ta fracasa. “Mundo ta loke e ta, no pasobra hende decente no a purba mehora condicionnan social, sino mas bien, pasobra e maldad di e mayoria a vence e esfuersonan sinsero di e minoria.”

E echo cu cristiannan berdadero ta keda leu for di politica pa por predica e unico berdadero speransa pa humanidad no ta nifica cu nan no por yuda otro hende den maneranan practico. E personanan cu nan ta yuda bira subditonan di e Reino di Dios ta siña cambia nan actitudnan destructivo, respeta autoridad, mehora nan bida di famia, y haya un punto di bista balansa di rikesa material. Asta mas importante ainda, Testigonan di Yehova ta yuda hende disfruta di un relacion intimo cu Dios.

Hende cu ta predica e Reino di Dios ta beneficia e comunidad den cua nan ta biba. Pero mas cu esei, nan ta yuda hende pone confiansa den un gobierno cu ta real y cu lo trece pas permanente pa tur hende cu ta stima Dios. Como resultado di nan posicion neutral, e cristiannan aki ta liber pa duna e yudansa mas practico y mas duradero cu ta disponibel awe.

[Cuadro/Plachi na pagina 7]

Di Politica pa Predicacion di e Reino di Dios

Como mucha, Átila a siña e teologia di liberacion for di e pastonan di su parokia na Belém, Brazil. El a keda contento di tende cu un dia humanidad lo ser libra for di opresion y el a join un grupo di activista, caminda el a siña organisa marcha di protesta y campaña di desobediencia civil.

Pero tambe Átila tawata gusta duna les na e yiunan di e miembronan di e grupo for di un buki cu nan a dun’e, esta, e buki Scuchando e Gran Maestro. * E buki ta papia di bon conducta y obediencia na autoridadnan. Esaki a pone Átila puntra su mes pakico esnan cu ta apoya teologia di liberacion no ta sigui e normanan moral halto di Hesus y pakico algun ta lubida hende oprimi ora nan yega na poder. Pues, el a bandona e grupo activista. Despues, Testigonan di Yehova a yama na su cas y a papia cu ne tocante e Reino di Dios. No a tarda mucho cu el a cuminsa studia Bijbel y siña tocante e berdadero solucion pa e opresion di humanidad.

Rond di e mesun tempo ei, Átila a asisti na un seminario catolico tocante religion y politica. E instructornan a splica cu “esakinan ta dos banda di e mesun medaya.” Tambe el a asisti na un reunion na Salon di Reino. Esta un diferencia! Loke a hala su atencion ta cu no tawatin hende ta huma, bebe ni conta chiste obsceno. El a dicidi di join nan den nan trabou di predica, y un poco tempo despues el a batisa. Awor e por mira pakico teologia di liberacion no ta e berdadero solucion pa e problemanan di hende pober.

[Nota]

[Plachinan na pagina 6]

E posicion neutral di cristiannan no ta stroba nan di yuda otro hende