Percura pa Rumannan di Edad Ta un Responsabilidad Cristian

“Te na boso biehes ami lo ta mescos, y te na boso añanan di cabei blanco lo mi carga boso!”—ISAIAS 46:4.

1, 2. Con e cuido di nos Tata celestial ta diferencia for di e cuido cu mayornan humano ta duna?

MAYORNAN dedica ta percura pa nan yiunan for di ora nan ta baby, tambe durante nan infancia y adolecencia. Asta ora hobennan bira adulto y tin nan propio famia, nan tata y nan mama cu amor ta sigui duna nan atencion y sosten.

² Aunke tin un limite na loke hende por haci pa nan yiunan, nos Tata celestial si semper ta den posicion pa duna su sirbidonan fiel atencion y sosten cu amor. Papiando cu su pueblo scohi di antiguedad, Yehova a declara: “Te na boso biehes ami lo ta mescos, y te na boso añanan di cabei blanco lo mi carga boso!” (Isaias 46:4) E palabranan ei ta un garantia masha alentador pa cristiannan di edad. Yehova no ta bandona esnan cu keda fiel na dje. Al contrario, el a priminti di sostene, apoya y guia nan henter nan bida, te den biehes.—Salmo 48:14.

3. Kico nos lo considera den e articulo aki?

³ Con nos por imita Yehova su interes y amor pa hende di edad? (Efesionan 5:1, 2) Laga nos considera algun manera cu yiunan, superintendentenan di congregacion y cristiannan individual por percura pa e necesidadnan di miembronan di edad den nos hermandad mundial.

 Nos Responsabilidad Como Yiu

4. Ki responsabilidad yiunan cristian tin pa cu nan mayornan?

⁴ “Honra bo tata y bo mama.” (Efesionan 6:2; Exodo 20:12) Citando e palabranan simpel aki y toch profundo di e Scritura Hebreo, apostel Pablo ta recorda yiunan di e responsabilidad cu nan tin pa cu nan mayornan. Pero con e palabranan aki ta aplica na cuido di hende di edad? Un ehempel conmovedor di e era precristian lo yuda nos contesta e pregunta aki.

5. (a) Kico ta indica cu Yosef no a lubida su debernan como yiu? (b) Kico kiermen honra nos mayornan, y ki excelente ehempel Yosef tawata den esaki?

⁵ Pa mas cu 20 aña, Yosef no tawatin contacto cu su tata anciano, e patriarca Yacob. Sinembargo, Yosef evidentemente no a perde su amor di yiu pa Yacob. De echo, na momento cu Yosef a revela su berdadero identidad na su rumannan, el a puntra nan: “Mi tata ta na bida ainda?” (Genesis 43:7, 27; 45:3) Na e tempo ei, e tera di Canan tawata den e gara di hamber. Pues, Yosef a manda bisa su tata: “Bin serca mi, no tarda. Lo bo biba na tera di Gosen y lo bo ta serca di mi . . . Aya lo mi provee tambe pa bo.” (Genesis 45:9-11; 47:12) Si, honra mayornan di edad ta encera proteha nan y percura pa nan materialmente ora cu nan no ta den posicion pa cuida nan mes. (1 Samuel 22:1-4; Huan 19:25-27) Gustosamente Yosef a acepta e responsabilidad aki.

6. Con Yosef a demostra berdadero amor pa su tata, y con nos por imita su ehempel?

⁶ Cu e bendicion di Yehova, Yosef a bira un di e hombernan mas rico y mas poderoso di Egipto. (Genesis 41:40) Toch e no a sinti cu e tawata mucho importante of mucho ocupa pa honra su tata cu tawatin 130 aña. Ora el a tende cu Yacob (Israel) tawata serca di yega, “Hose [Yosef] a prepara su garoshi y a bai Gosen pa contra cu su tata Israel; asina cu el a presenta su dilanti, el a cai den su brasa y a yora den su brasa pa un bon rato.” (Genesis 46:28, 29) E bonbini aki tawata mas cu djis un muestra di respet pa formalidad. Yosef a stima su tata bieu sin fin y e no tawatin berguensa di demostra su amor. Si nos tin mayornan di edad, nos tambe ta asina generoso den expresa nos cariño pa nan?

7. Dicon Yacob tawata kier pa nan der’e na Canan?

⁷ Yacob su debocion na Yehova a keda fuerte te na fin di su bida. (Hebreonan 11:21) Debi na su fe den e promesanan di Dios, Yacob a pidi pa nan dera su restonan na Canan. Yosef a honra su tata door di cumpli cu e peticion aki, apesar di e gran costo y esfuerso cu esaki a encera.—Genesis 47:29-31; 50:7-14.

8. (a) Kico ta nos motivacion principal pa percura pa nos mayornan di edad? (b) Kico un sirbido di tempo completo a haci pa e por a percura pa su mayornan di edad? (Wak e cuadro na pagina 17.)

⁸ Kico a motiva Yosef pa percura pa su tata? Aunke amor y un sentido di deber pa cu esun cu a dun’e bida y cu a cuid’e a hunga un rol, Yosef sin duda a sinti tambe un deseo profundo pa agrada Yehova. Nos tambe mester sinti mescos. Pablo a skirbi: “Si un biuda tin yiu of nieto, laga nan siña prome di practica piedad pa cu nan mes famia, y di recompensa nan mayornan [“y abuelonan”, NW], pasobra  esaki ta aceptabel den bista di Dios.” (1 Timoteo 5:4) Si, amor pa Yehova y tambe un temor respetuoso p’e lo motiva nos pa percura pa nos mayornan di edad, sin importa ki dificultadnan esei lo por encera. *

Con Ancianonan Ta Demostra Cu Nan Ta Interesa

9. Ken Yehova a nombra pa pastorea e tou, cu ta inclui cristiannan di edad?

⁹ Na final di su bida largo, Yacob a referi na Yehova como “e Dios, kende tawata mi wardado henter mi bida te dia djawe.” (Genesis 48:15) Awe, Yehova ta pastorea su sirbidonan riba tera pa medio di superintendentenan cristian (ancianonan), bou di guia di su Yiu Hesucristo, “e wardado principal.” (1 Pedro 5:2-4) Con superintendentenan por imita Yehova segun cu nan ta percura pa e miembronan di edad di e tou?

10. Kico a yega di ser haci pa percura yudansa material pa cristiannan di edad? (Wak e cuadro na pagina 19.)

¹⁰ Un poco despues cu e congregacion cristian a keda estableci, e apostelnan a nombra “shete homber di bon reputacion, yen di spirito santo” pa supervisa “partimento di e cuminda di tur dia” entre e biudanan cristian cu tawata pober. (Echonan 6:1-6) Despues, Pablo a instrui e superintendente Timoteo pa pone biudanan di edad cu ta ehemplar, riba e lista di esnan cu tawatin derecho di haya yudansa material. (1 Timoteo 5:3, 9, 10) Di igual manera, superintendentenan di congregacion djawe boluntariamente ta cordina yudansa practico pa cristiannan di edad ora cu esaki ta necesario. Sinembargo, percura pa rumannan fiel di edad ta encera mas cos.

11. Kico Hesus a bisa tocante e biuda pober cu a duna un contribucion chikito?

¹¹ Casi na final di su sirbishi riba tera, Hesus a bai sinta den e tempel y “tawata observa con e multitud tawata tira placa den e caha di ofrenda.” Anto un hende a capta su atencion. E relato ta bisa: “Un biuda pober a bin y a tira dos cen di coper aden, cualnan ta suma un placa.” Hesus a yama su disipelnan serca dje y a bisa nan: “Di berdad mi ta bisa boso, e biuda pober aki a tira mas den e caha di ofrenda cu tur e otronan cu a tira algo aden; pasobra nan tur a tira aden for di nan abundancia, ma el a tira aden, for di su pobresa, tur loke cu e tawatin, tur loke cu e tawatin pa biba di dje.” (Marco 12:41-44) Pa loke ta e cantidad di placa, e contribucion di e biuda tawata  chikito, pero Hesus tawata sa cuanto aprecio su Tata celestial tawatin pa tal expresionnan di debocion haci di henter alma. Sin importa e edad di e biuda pober, Hesus no a pasa por halto di loke el a haci.

12. Con ancianonan por demostra nan aprecio pa loke cristiannan di edad ta contribui cu ne?

¹² Mescos cu Hesus, superintendentenan cristian no ta pasa por halto di loke rumannan di edad ta haci pa promove adoracion berdadero. Ancianonan tin motibo pa elogia rumannan di edad pa nan participacion den sirbishi y den reunion, pa nan influencia positivo den e congregacion y pa nan perseverancia. Un palabra sinsero di animacion por yuda esnan di edad haya “motibo pa alegra” den nan sirbishi sagrado. Y esei lo evita cu nan ta sinti nan frustra door cu nan ta compara nan mes cu loke otro cristiannan por haci of cu loke nan mes tawata por a haci den pasado.—Galationan 6:4, NW.

13. Menciona algun manera cu ancianonan por haci uzo di e talentonan y experencia di rumannan di edad.

¹³ Ancianonan por mustra cu nan ta acepta e aporte balioso cu cristiannan di edad ta duna door di haci uzo di nan experencia y talentonan. De bes en cuando por uza rumannan di edad avansa ehemplar den demostracion of entrevista. Un anciano a bisa: “E auditorio ta echt sinta stret y scucha ora mi entrevista un ruman homber of ruman mohe di edad cu a lanta yiunan den e berdad.” Ancianonan den un otro congregacion a informa cu un ruman mohe pionero di 71 aña tawatin exito den yuda publicadonan di Reino bira regular atrobe den sirbishi di veld. Tambe e ruman mohe ta anima nan pa haci e “cosnan basico”, manera lesa Bijbel y e texto di dia, anto medita riba loke nan lesa.

14. Con un cuerpo di anciano a mustra aprecio pa un superintendente di mas edad entre nan?

¹⁴ Tambe ancianonan ta balora e aporte di superintendentenan di edad. José, kende tin 70 y pico aña y a sirbi pa varios decada como anciano, resientemente a haci un operacion grandi. Como cu e tawatin un periodo largo di recuperacion su dilanti, el a pensa di entrega su privilegio di sirbi como superintendente presidente. José a bisa: “E reaccion di e otro ancianonan a sorprende mi. En bes di acepta  mi sugerencia, nan a puntra mi ki yudansa practico mi tawatin mester pa por sigui atende mi responsabilidadnan.” Anto cu yudansa di un anciano mas jong, José por a sigui sirbi gososamente como superintendente presidente, y esaki tawata un bendicion pa e congregacion. Un anciano di su congregacion a bisa: “E rumannan tin masha aprecio pa José su trabou como anciano. Nan stim’e y ta respet’e pa su experencia y fe ehemplar. E ta enrikece nos congregacion.”

Percurando Un pa Otro

15. Dicon tur cristian mester ta interesa den bienestar di e rumannan di edad meimei di nan?

¹⁵ No ta solamente yiunan cu tin mayornan di edad y sirbidonan nombra mester ta interesa den rumannan di edad. Comparando e congregacion cristian cu e curpa humano, Pablo a skirbi: “Dios a compone e curpa di tal manera cu el a duna mas hopi honor na e miembro cu tawata falta honor, pa no tin division den e curpa, ma pa e miembronan tin e mesun percuracion un pa otro.” (1 Corintionan 12:24, 25) Un otro traduccion ta bisa: “Pa tur e miembronan precupa pa otro.” (Version Reina-Valera, 1960) Pa e congregacion cristian funciona harmoniosamente, cada miembro mester ta precupa pa e bienestar di su rumannan den fe, incluso e rumannan di edad.—Galationan 6:2.

16. Con nos por mustra interes den rumannan di edad ora nos asisti na reunionnan cristian?

¹⁶ Reunionnan cristian ta duna nos un bon oportunidad pa mustra interes den e rumannan di edad. (Filipensenan 2:4; Hebreonan 10:24, 25) Nos ta tuma tempo pa combersa cu esnan di edad na e ocasionnan ei? Aunke kisas ta na su luga pa puntra nan con ta bai cu nan salu, nos lo por “comparti algun don spiritual” cu nan? Nos lo por conta nan un experencia edificante of comparti un pensamento biblico cu nan? Ya cu algun ruman di edad no por move dje bon ei, lo ta un muestra di bondad pa nos acerca nan en bes di spera cu ta nan mester bin serca nos. Si algun di nan tin problema cu oido, nos lo tin cu papia mas slow y pronuncia e palabranan bon cla. Y pa por tin un berdadero intercambio di estimulo, nos tin cu scucha atentamente na loke e persona di edad tin di bisa.—Romanonan 1:11, 12.

17. Con nos por mustra nos interes pa cristiannan di edad cu no por sali for di cas?

¹⁷ Kico si cierto rumannan di edad no por asisti na e reunionnan cristian? Santiago 1:27 ta mustra cu ta nos deber di “bishita huerfano y biuda den nan afliccion.” Y rumannan di  edad ta aprecia nos bishitanan masha hopi! Tempo cu Pablo, e “homber di edad”, tawata encarsela na Roma rond di aña 65 di nos era, e tawata practicamente su so. El a anhela di mira su colaborado Timoteo y el a skirbi: “Haci tur esfuerso pa bin serca mi pronto.” (Filemon 9; 2 Timoteo 1:3, 4; 4:9) Aunke nan no ta literalmente preso, tin rumannan di edad cu no por sali for di cas debi na problema di salu. De echo, kisas nan ta bisando: ‘Por fabor, haci tur boso esfuerso pa bishita mi pronto.’ Nos ta haci caso di tal apelacion?

18. Bishita rumannan di edad por resulta den ki beneficio?

¹⁸ Nunca balota e efectonan probechoso di bishita un ruman homber of ruman mohe di edad. Ora cu un cristian cu yama Onesiforo tawata na Roma, el a busca Pablo diligentemente te ora el a hay’e, y despues ‘hopi biaha el a refresc’e.’ (2 Timoteo 1:16, 17) Un ruman mohe di edad a bisa: “Mi gusta compania di rumannan jong. Loke mi ta gusta mas tanto ta ora nan ta trata mi manera un miembro di nan famia. Esei ta anima mi masha hopi mes.” Un otro cristian di edad a declara: “Mi ta aprecia masha tanto ora cu un hende manda un carchi pa mi, of yama mi na telefon pa djis un par di minuut of bishita mi pa un rato. Ta manera un biento fresco.”

Yehova Ta Recompensa Esnan Cu Ta Mustra Interes y Duna Cuido

19. Ki bendicion nos ta ricibi door di percura pa rumannan di edad?

¹⁹ Percura pa rumannan di edad ta resulta den hopi bendicion. E echo cu nos por asocia cu esnan di edad y haci uzo di nan conocemento y experencia, riba su mes ta un privilegio. Esnan cu ta duna e cuido ta sinti e gran felicidad cu ta bini di dunamento, y tambe nan tin un sintimento di logro y e pas interno di cu nan a cumpli cu nan responsabilidad biblico. (Echonan 20:35) Ademas, esnan cu ta percura pa rumannan di edad no mester tin miedo cu nan mes lo ser bandona ora nan bira bieu. E Palabra di Dios ta sigura nos: “E hende generoso lo prospera, y esun cu duna di bebe tambe lo haya di bebe.”—Proverbionan 11:25.

20, 21. Con Yehova ta mira esnan cu ta percura pa rumannan di edad, y kico mester ta nos determinacion?

²⁰ Yehova ta recompensa yiunan temeroso di Dios, superintendentenan y otro cristiannan amoroso cu generosamente ta percura pa e necesidadnan di rumannan di edad. Tal actitud ta na harmonia cu e proverbio aki: “Esun cu tene misericordia di un hende pober ta fia SEÑOR, y E lo pag’e bek pa su bon obra.” (Proverbionan 19:17) Si amor motiva nos pa mustra misericordia na hende pober y humilde, Dios ta considera tal dunamento como un fiansa cu lo e paga bek cu hopi bendicion. Asina tambe e ta paga nos bek pa e cuido amoroso cu nos ta duna na nos rumannan creyente di edad, di cua hopi ta entre ‘e pobernan di e mundo aki pero siendo rico den fe.’—Santiago 2:5.

²¹ Esta generoso Dios su pago ta! E ta inclui bida eterno. Pa e gran mayoria di sirbido di Yehova, esei lo ta bida eterno riba e tera comberti den Paradijs, caminda e efectonan di pica hereda lo ser elimina y sirbidonan fiel di edad lo ser restaura na nan vigor hubenil. (Revelacion 21:3-5) Mientras cu nos ta spera riba e tempo bendiciona ei, laga nos sigui cumpli cu nos responsabilidad cristian di percura pa rumannan di edad.

[Nota]

Kico Ta Bo Contesta?

• Con yiunan por honra mayornan di edad?

• Con ancianonan ta mustra aprecio pa miembronan di edad di e tou?

• Kico cristiannan individual por haci pa mustra nan interes sinsero den esnan di edad?

• Ki bendicion nos ta ricibi door di percura pa cristiannan di edad?

[Preguntanan di Estudio]

[Cuadro na pagina 17]

Ora Cu Su Mayornan Tawatin Mester di Yudansa

Philip tawata sirbi como boluntario den e trabou di construccion na Liberia na 1999 ora cu el a ricibi noticia cu su tata tawata gravemente malo. Combenci cu su mama so lo no por a trata cu e situacion, Philip a dicidi di bolbe na su pais pa regla cuido medico pa su tata.

Philip ta corda: “No tawata facil pa mi bai bek, pero mi a sinti cu mi prome obligacion tawata cu mi mayornan.” Durante e siguiente tres añanan, el a percura pa su mayornan muda pa un cas mas apropiado y cu yudansa di e rumannan cristian local, el a adapta e cas pa acomoda e necesidadnan special di su tata.

Awor Philip su mama ta miho prepara pa trata cu e problemanan serio di salu di su tata. Resientemente, Philip por a acepta un invitacion pa bai traha como boluntario na e oficina di sucursal di Testigonan di Yehova na Macedonia.

[Cuadro na pagina 19]

Nan No A Ignora Su Necesidadnan

Ora cu Ada, un cristian di 85 aña na Australia, no por a sali mas for di cas debi na problemanan cu salu, e ancianonan di congregacion a haci areglo pa dun’e un man. Nan a organisa un grupo di rumannan creyente cu lo por a yud’e. E rumannan aki gustosamente tawata limpia, laba, cushina y haci rospondi pa Ada.

E yudansa ei a cuminsa casi dies aña pasa. Te asina leu, mas cu 30 Testigo di Yehova a yuda cuida Ada. Nan ta sigui bishit’e, lesa p’e for di publicacionnan biblico, ten’e al tanto di e progreso spiritual di e rumannan den congregacion, y cu regularidad ta haci oracion cu ne.

Un anciano cristian local a comenta: “Esnan cu ta cuida Ada ta considera cu ta un privilegio di por yud’e. Ada su sirbishi fiel durante varios decada tawata un inspiracion pa hopi di nan, y simplemente nan no por imagina nan mes cu nan lo ignora su necesidadnan.”

[Plachi na pagina 16]

Nos ta generoso den expresa nos cariño pa mayornan di edad?

[Plachi na pagina 18]

Tur hende den congregacion por demostra nan amor pa rumannan di edad