Puntonan Sobresaliente di e Buki di Levitico
E Palabra di Yehova Ta Bibo
Puntonan Sobresaliente di e Buki di Levitico
MENOS cu un aña a pasa for di dia cu Dios a libra e Israelitanan for di sclabitud den Egipto. Awor cu nan a ser organisa den un nacion nobo, nan ta riba caminda pa e tera di Canan. Yehova su proposito ta pa un nacion santo biba einan. Sinembargo, e estilo di bida y practicanan religioso di e Cananeonan ta hopi degrada. Pesei e Dios berdadero ta duna e congregacion di Israel reglanan cu lo aparta nan pa Dios su sirbishi. Esakinan a keda registra den Bijbel den e buki di Levitico. E buki aki ta abarca no mas cu un luna lunar. Profeta Moises a skirbie den e desierto di Sinai, aparentemente na aña 1512 prome cu nos era. (Exodo 40:17; Numbernan 1:1-3) Bes tras bes den e buki Yehova ta urgi su adoradonan pa nan ta santo.—Levitico 11:44; 19:2; 20:7, 26.
Testigonan di Yehova djawe no ta bou di e Lei cu Dios a duna mediante Moises. E morto di Hesucristo a aboli e Lei ei. (Romanonan 6:14; Efesionan 2:11-16) Sinembargo, e reglanan cu nos ta haya den Levitico por beneficia nos, y siña nos hopi cos tocante e adoracion di nos Dios, Yehova.
OFRENDANAN SANTO—BOLUNTARIO Y OBLIGATORIO
Algun di e ofrenda- y sacrificionan di e Lei tawata boluntario, mientras cu otronan tawata obligatorio. Por ehempel, e ofrenda kima tawata boluntario. Nan a present’e na Dios den su totalidad, mescos cu Hesucristo boluntariamente a duna su bida completo como un sacrificio di rescate. E ofrenda boluntario di sacrificio di comunion a ser comparti. Un parti di dje a keda presenta na Dios riba altar, e sacerdote a come un parti, y esun cu a ofrec’e a come e otro parti. Di igual manera, pa cristiannan ungi, e Conmemoracion di e morto di Cristo ta un cena di comunion, un cena cu nan ta comparti cu Dios.—1 Corintionan 10:16-22.
Ofrenda pa pica y ofrenda pa culpa tawata obligatorio. E ofrenda pa pica a cubri picanan cometi pa eror, esta, no intencionalmente. E ofrenda pa culpa a satisface Dios ora cu un malechor a viola e derecho di un otro persona, of e ofrenda a restaura cierto derechonan di un malechor cu a repenti, of pa ambos cos. Tambe tawatin ofrenda di maishi cu tawata pa duna reconocemento na Yehova su percuracionnan abundante. Tur e asuntonan aki ta interesa nos pasobra e sacrificionan stipula bou di e aliansa di e Lei a señala na Hesucristo y su sacrificio of na e beneficionan di su sacrificio.—Hebreonan 8:3-6; 9:9-14; 10:5-10.
Contesta Riba Pregunta Biblico:
2:11, 12—Dicon miel tawata inaceptabel pa Yehova como “un ofrenda di candela”? Aunke Beibel Santu ta uza e palabra miel, den e contexto aki e no por ta referi na miel di abeha. (Wak e nota na pia di pagina di e Traduccion di Mundo Nobo di e Santo Scritura—Cu Referencia.) Pasobra maske miel no tawata permiti como “un ofrenda di candela”, e tawata inclui si den “e prome frutanan di . . . loke cunucu ta produci.” (2 Cronicanan 31:5) E miel aki evidentemente tawata e juice of stropi di fruta. E tawata inaceptabel como ofrenda riba altar pasobra e por a fermenta.
2:13—Dicon nan mester a ofrece salo ‘hunto cu tur ofrenda’? Esaki no tawata pa drecha sabor di e sacrificionan. Rond mundo hende ta uza salo como un preservativo. Probablemente nan a ofrece salo hunto cu tur ofrenda pasobra salo a representa cu e ofrenda tawata liber di cos putri y daña.
Les pa Nos:
3:17. Siendo cu nan a considera e vet como e parti mas miho of mas rico di e carni, e prohibicion pa com’e evidentemente a inculca den e Israelitanan cu e miho parti a pertenece na Yehova. (Genesis 45:18) Esaki ta recorda nos cu nos mester duna Yehova lo miho cu nos tin.—Proverbionan 3:9, 10; Colosensenan 3:23, 24.
7:26, 27. E Israelitanan no tawatin mag di come sanger. Desde Dios su punto di bista, sanger ta representa bida. Levitico 17:11 ta declara: “Bida di e carni ta den e sanger.” Te awe, abstene di sanger a keda e norma pa adoradonan berdadero.—Echonan 15:28, 29.
TA ESTABLECE E SACERDOCIO SANTO
Na ken Dios a duna e responsabilidad di percura pa e debernan relaciona cu sacrificio y ofrenda? Esei a keda encarga na e sacerdotenan. Riba instruccion di Dios, Moises a tene un ceremonia di ordenacion pa Aron, e sumo sacerdote, y pa su cuater yiu hombernan, cu lo mester a traha como sacerdote bou di dje. E ceremonia aparentemente a dura shete dia, y e sacerdocio a cuminsa funciona e siguiente dia.
Contesta Riba Pregunta Biblico:
9:9—Kico tawata e importancia di basha sanger na pia di e altar y di pon’e na e cachonan di e altar? Esaki a demostra cu Yehova a acepta sanger pa e proposito di expiacion, esta, pa cubri pica. Henter e areglo di expiacion tawata basa riba sanger. Apostel Pablo a skirbi: “Segun Lei, casi tur cos ta wordo purifica cu sanger, y sin dramamento di sanger no tin pordon.”—Hebreonan 9:22.
10:1, 2—Kico por tawata envolvi den e pica di Nadab y Abihu, e yiu hombernan di Aron? Un poco despues cu Nadab y Abihu a comporta nan mes inapropiadamente ora nan tawata eherce nan debernan sacerdotal, Yehova a prohibi sacerdotenan di bebe biña of bebida sterki mientras cu nan ta sirbiendo na e tabernakel. (Levitico 10:9) Esaki ta indica cu posiblemente Aron su dos yiu hombernan lo tawata bou di influencia di alcohol na e ocasion describi aki. Sinembargo, e motibo real pakico nan a muri tawata cu nan a ofrece ‘candela straño [of ilegitimo], cu Yehova no a ordena nan.’
Les pa Nos:
10:1, 2. Sirbidonan di Dios djawe den puesto di responsabilidad mester cumpli cu rekisitonan dibino. Ademas, nan no mester tuma cierto libertad ora nan ta atende nan responsabilidadnan.
10:9. Nos no mester efectua nos debernan pa cu Dios bou di influencia di bebida alcoholico.
ADORACION SANTO TA EXIGI LIMPIESA
E reglanan di cuminda relaciona cu bestia limpi y impuro a beneficia e Israelitanan den dos manera. E reglanan aki a proteha nan di ser infecta cu organismonan perhudicial y tambe a fortalece e barera entre nan y e pueblonan di e nacionnan rond di nan. Otro reglanan a trata cu impuresa door di contacto cu cadaver, e purificacion di hende mohe despues di duna lus, proceduranan relaciona cu lepra y impuresa debi na derame di likido for di e organonan sexual di hende homber y hende mohe. Sacerdotenan mester a atende e asuntonan relaciona cu personanan cu a bira impuro.
Contesta Riba Pregunta Biblico:
12:2, 5—Dicon dunamento di lus a haci un mohe “impuro”? Dios a traha e organonan reproductivo pa transmiti bida humano perfecto. Sinembargo, debi na e efectonan hereda di pica, hende a pasa bida imperfecto y pecaminoso na nan yiunan. E periodonan temporal di “impuresa” conecta cu dunamento di lus y tambe cu otro asuntonan, manera menstruacion y emision di simiña, a haci e Israelitanan conciente di e pica cu nan a hereda. (Levitico 15:16-24; Salmo 51:5; Romanonan 5:12) E reglanan rekeri pa purificacion lo a yuda e Israelitanan compronde cu nan tawatin mester di un sacrificio di rescate pa cubri humanidad su condicion pecaminoso y restaura hende na perfeccion. Pues, e Lei a bira nan ‘tutor pa guia nan na Cristo.’—Galationan 3:24.
15:16-18—Kico ta e “emision di simiña” menciona den e versiculonan aki? Esaki aparentemente ta referi na un emision di simiña durante anochi y tambe na relacion sexual entre hende casa.
Les pa Nos:
11:45. Yehova Dios ta santo y ta exigi di esnan cu ta rindi sirbishi sagrado na dje pa nan ta santo. Nan mester haci esfuerso pa alcansa santidad y keda limpi den sentido fisico y spiritual.—2 Corintionan 7:1; 1 Pedro 1:15, 16.
12:8. Yehova a permiti hende pober ofrece parha como sacrificio en bes di un carne, cu ta mas costoso. E ta tene consideracion cu hende pober.
MESTER MANTENE SANTIDAD
E sacrificionan di mas importante pa pica a ser ofreci anualmente riba e Dia di Expiacion. Nan a ofrece un toro pa e sacerdotenan y e tribu di Levi. Pa e tribunan di Israel no sacerdotal nan a sacrifica un cabrito. Tambe tawatin un cabrito bibo cu nan a manda bai den desierto despues di pronuncia e pueblo su picanan riba dje. E dos cabritonan aki a conta como un solo ofrenda pa pica. Tur esaki a señala na e echo cu Hesucristo lo a ser sacrifica y tambe cu lo el a bai cu pica.
Reglanan tocante comemento di carni y tocante otro asuntonan ta enfatisa pa nos e necesidad di ta santo ora nos ta adora Yehova. Apropiadamente, e sacerdotenan mester a mantene nan mes santo. E tres fiestanan anual tawata ocasionnan pa gran alegria y pa gradici e Creador. Tambe Yehova a duna su pueblo reglanan relaciona cu mal uzo di su nomber santo, wardamento di sabat y e Hubileo, comportacion pa cu hende pober y con mester trata esclabo. E bendicionnan cu lo a resulta door di obedece Dios a ser poni na contraste cu e maldicionnan cu e pueblo lo a experencia si nan desobedece. Tambe tin reglanan tocante ofrenda en conexion cu voto y evaluacion, e primogenito di bestia y dunamento di un decimo parti (diesmo) di tur cos como ‘algo cu ta santo pa Yehova.’
Contesta Riba Pregunta Biblico:
16:29—Den ki manera e Israelitanan mester a ‘humiya nan alma’? E procedura aki, cu mester a tuma luga riba Dia di Expiacion, tawata relaciona cu buscamento di pordon pa pica. Evidentemente, na e tempo ei nan tawata conecta yunamento cu reconocemento di pica. Pesei, muy probablemente ‘humiya nan alma’ a referi na yunamento.
19:27—Kico e mandamento pa “no feita e cabei cu ta crece na banda di boso cabes” ni “daña e randnan” di barba a nifica? Dios a duna e lei aki evidentemente pa evita cu e Hudiunan a corta nan barba of cabei den un manera cu lo a imita cierto practicanan pagano. (Yeremias 9:25, 26; 25:23; 49:32) Sinembargo, Dios su mandamento no a nifica cu e Hudiunan no por a corta nada nada di nan barba of di nan cabei di cara.—2 Samuel 19:24.
25:35-37—Tawata semper malo pa e Israelitanan cobra interes? Si e placa cu un hende a fia tawata pa haci negoshi, esun cu a fi’e e placa por a cobra interes. Sinembargo, e Lei a prohibi pa cobra interes riba fiansa cu hende a haci pa combati pobresa. Tawata un mal cos pa saca probecho di e contratiemponan economico di un prohimo desampara.—Exodo 22:25.
26:19—Con ‘shelo por bira manera hero y tera manera brons’? Debi na falta di awasero, e shelo riba tera di Canan lo a haya un aparencia manera hero duro impenetrabel. Sin awasero, e tera lo tawatin un briyo metalico color di brons.
26:26—Kico Bijbel kiermen cu ‘dies mohe lo horna pan den un solo forno’? Normalmente, cada hende mohe lo tawatin mester di un forno pa tur e cosnan cu lo e tawatin di horna. Pero e palabranan aki a indica cu lo a bin asina un scarsedad di cuminda cu asta un solo forno lo tawata suficiente pa horna loke dies mohe tawatin cu cushina. Esaki tawata un di e consecuencianan profetisa si nan no mantene santidad.
Les pa Nos:
20:9. Un actitud odioso y malicioso tawata mes malo cu asesinato den bista di Yehova. Pesei el a prescribi e mesun castigo pa maldiciona bo mayornan cu si bo a echt asesina nan. Esaki no mester motiva nos pa mustra amor na rumannan den fe?—1 Huan 3:14, 15.
22:32; 24:10-16, 23. Nos no mag zundra of profana e nomber di Yehova. Al contrario, nos tin cu alaba su nomber y resa pa e ser santifica.—Salmo 7:17; Mateo 6:9.
Ki Efecto Levitico Tin Riba Nos Adoracion
Testigonan di Yehova djawe no ta biba bou di e Lei. (Galationan 3:23-25) Sinembargo, como cu loke ta ser bisa den Levitico ta duna nos un idea mas cla di Yehova su punto di bista riba varios asunto, e por tin un efecto riba nos adoracion.
Segun cu bo ta haci e lesamento semanal di Bijbel como preparacion pa e Scol di Ministerio Teocratico, lo bo keda indudablemente impresiona pa e echo cu nos Dios ta rekeri santidad di su sirbidonan. Tambe e buki biblico aki por motiva bo pa duna e Haltisimo lo miho cu bo tin, y semper mantene santidad cu lo resulta den su alabansa.
[Plachi na pagina 21]
Sacrificionan ofreci bou di e Lei a señala na Hesucristo y su sacrificio
[Plachi na pagina 22]
E Fiesta di Pan sin Zuurdeeg tawata un evento di gran goso
[Plachi na pagina 23]
E fiestanan anual, manera e Fiesta di Tabernakelnan (Cabaña), tawata ocasionnan pa gradici Yehova