Recept pa un Bida Largo y Felis

TIN un dicho cu ta bisa cu “tur hende kier bira bieu, pero ni un no kier ta bieu.” Hopi hende cu ta yegando edad di bai cu pension ta anhela e dia cu nan por tin mas tempo pa nan mes y menos responsabilidad. Pero nan tin miedo di bira inutil y perde proposito den bida. Tambe nan tin miedo di haya nan nan so, infelis y cu un salu cu ta bai atras.

Kico anto ta e secreto di un bida felis? Loke sigur por yuda trece felicidad pa grandi y chikito ta bon amigo y un famia amoroso. Pero loke otro hende por haci pa enrikece bida di un persona di edad no ta tur loke ta conta. Asta mas importante ainda ta loke un persona di edad por haci pa otro hende.

Un estudio di termino largo di 423 pareha di edad a indica cu “ora nos contribui cu algo na e bida di otro hende, esei por yuda alarga nos mes bida.” Stephanie Brown, kende a conduci e investigacion, ta splica: “E resultadonan aki ta indica cu no ta loke nos ta saca for di nos relacion cu otro hende ta asina beneficioso; sino ta loke nos ta duna.” E dunamento ei por inclui yuda otro hende cu trabou di cas, wak pa yiu, haci rospondi pa nan, yuda cu transport, of scucha un persona cu tin necesidad di papia.

Rond di 2.000 aña pasa, Hesucristo a bisa: “Ta mas bendiciona pa duna cu pa ricibi.” (Echonan 20:35) E recept pa un bida largo y felis no ta depende di cuanto placa bo tin na banco, ni di terapia y dieta contra biramento bieu. Mas bien, e ta consisti di keda activo y duna di bo tempo, energia y forsa pa enrikece bida di otro hende.

Toch, maske cuanto nos duna, nos no por evita di bira bieu, bira malo y muri. Ta e Reino di Dios so por elimina e cosnan ei. Bou di su gobernacion, enfermedad lo disparce y asta “lo no tin morto mas.” (Revelacion 21:3, 4; Isaias 33:24) De echo, hende obediente lo biba pa semper den felicidad den un paradijs riba tera. (Lucas 23:43) Testigonan di Yehova ta contento di por duna otro hende e recept basa riba Bijbel aki, cu por hiba na un bida largo y felis.