Bendiciona Ta Esnan Cu Ta Duna Gloria na Dios

“[Nan] lo bin adora bo dilanti, o Señor, y nan lo glorifica bo nomber.”—SALMO 86:9.

1. Dicon nos por duna gloria na Dios den maneranan cu ta surpasa loke e creacion sin bida por haci?

YEHOVA ta merece alabansa for di henter su creacion. Mientras cu e parti di su creacion sin bida ta dun’e gloria silenciosamente, nos como hende tin e capasidad di rasona, compronde, aprecia y adora. Pues anto, ta na nos e salmista ta bisa: “Grita di alegria na Dios, mundo henter; canta e gloria di su nomber; haci su alabansa glorioso.”—Salmo 66:1, 2.

2. Ken a reacciona faborabel riba e mandamento pa duna gloria na Dios su nomber, y dicon?

² E mayor parti di humanidad ta nenga di reconoce Dios of dun’e gloria. Sinembargo, den 235 pais, mas cu seis miyon Testigo di Yehova ta demostra cu nan ta mira Dios su “atributonan invisibel” pa medio di e cosnan cu el a traha y cu nan ta ‘tende’ e testimonio silencioso di creacion. (Romanonan 1:20; Salmo 19:2, 3) Tambe door di studia Bijbel, nan a bin conoce Yehova y stim’e. Salmo 86:9 y 10 a profetisa: “Tur nacion cu bo a traha lo bin adora bo dilanti, o Señor, y nan lo glorifica bo nomber; pasobra bo ta grandi y ta haci obranan maraviyoso; abo so ta Dios.”

3. Con e “multitud grandi” ta ‘sirbi Dios di dia y anochi’?

³ Revelacion 7:9 y 15 tambe ta describi “un multitud grandi” di adorado cu ta “sirbi [Dios] di dia y anochi den su tempel.” No ta asina cu Dios ta exigi alabansa nonstop for di su sirbidonan, pero mas bien su adoradonan ta un organisacion mundial. Pesei ora ta anochi den algun pais, Dios su sirbidonan na otro banda di mundo ta druk bezig ta predica. Pues por ser bisa cu di dia y anochi tin hende ta duna gloria na Yehova. Pronto “tur loke tin rosea” lo hisa nan bos den alabansa na Yehova. (Salmo 150:6) Pero mientrastanto, kico nos individualmente por haci pa duna gloria na Dios? Ki retonan nos lo por confronta? Y ki bendicion ta spera esnan cu duna gloria na Dios? Pa haya  contesta, laga nos considera un relato biblico relaciona cu e tribu Israelita di Gad.

Un Reto den Antiguedad

4. Ki reto e tribu di Gad a confronta?

⁴ Prome cu e miembronan di e tribu Israelita di Gad a drenta e Tera Priminti nan a pidi pa establece nan mes na e parti oost di Riu Yordan, cu tawata un tereno cu bon yerba pa crio di bestia. (Numbernan 32:1-5) Pero biba einan lo a nifica cu nan lo a confronta retonan serio. E tribunan na west di e riu lo tawatin e proteccion di Vaye di Yordan, cu a forma un barera natural contra invasion militar. (Hosue 3:13-17) Sinembargo, pa loke ta e terenonan na oost di Riu Yordan, e buki The Historical Geography of the Holy Land (Geografia Historico di e Tera Santo), skirbi pa George Adam Smith, ta bisa: “[E terenonan] tur tawata plat y extenso riba e gran plateau of meseta di Arabia, cu casi ningun barera entremedio. Consecuentemente, semper nan tawata exponi na e invasion di e nomadanan hambra, di cua algun grupo grandi tawata invadi nan tur aña pa haya yerba pa nan bestianan.”

5. Con Yacob a curasha e desendientenan di Gad pa reacciona ora nan ta bou di atake?

⁵ Con lo a bai cu e tribu di Gad bou di tal presion implacabel? Siglonan mas prome, nan antepasado Yacob a profetisa riba su cama di morto: “Pa loke ta Gad, bandidonan lo atac’e, ma e lo sali ataca nan hilchi.” (Genesis 49:19) Na prome bista e palabranan ei lo por parce pesimista. Pero en realidad, nan tawata un ordo indirect pa e Gaditanan ataca bek ora nan wordo ataca. Yacob a sigura nan cu si nan haci esei, e invasornan lo a bati un retirada humiliante, y cu e Gaditanan lo a ataca nan hilchi, es decir, persigui nan.

Retonan Cu Nos Adoracion Ta Confronta Awe

6, 7. Con e situacion di cristiannan djawe ta similar na esun di e tribu di Gad?

⁶ Mescos cu e tribu di Gad, cristiannan djawe ta ser exponi na e presionnan y carganan di e sistema di Satanas; no tin un proteccion milagroso cu ta scapa nos di lucha cu nan. (Job 1:10-12) Hopi di nos tin cu trata cu e presion di bai scol, di gana nos pan di cada dia y di cria nos yiunan. Y no mester lubida riba e presionnan di un caracter personal of interno. Tin ruman ta soporta “un sumpiña den carni” den forma di un incapasidad of malesa grave. (2 Corintionan 12:7-10) Otro rumannan ta sufri di e sintimento cu nan no ta bal nada. Kisas “e dianan malo” di biehes ta stroba cristiannan di edad di sirbi Yehova cu e vigor cu un tempo nan tawatin.—Eclesiastes 12:1.

 ⁷ Tambe apostel Pablo ta recorda nos cu “nos lucha no ta contra carni y sanger, sino . . . contra e forsanan spiritual di maldad den e luganan celestial.” (Efesionan 6:12) Constantemente nos ta ser exponi na “e spirito di mundo”, e spirito di rebelion y di corupcion moral cu Satanas y su demoñonan ta promove. (1 Corintionan 2:12; Efesionan 2:2, 3) Mescos cu e homber temeroso di Dios, Lot, nos awe kisas ta sinti nos angustia of oprimi pa e cosnan inmoral cu e hendenan rond di nos ta bisa y haci. (2 Pedro 2:7) Tambe nos ta ser exponi na atake direct di Satanas. Satanas ta hibando un guera contra e resto di e unginan, ‘kendenan ta warda e mandamentonan di Dios y tin e trabou di duna testimonio di Hesucristo.’ (Revelacion 12:17) Hesus su “otro carnenan” tambe ta experencia e atake di Satanas den forma di persecucion y prohibicion riba nos obra.—Huan 10:16.

Entrega of Ataca Bek?

8. Con nos mester reacciona riba e atakenan di Satanas, y dicon?

⁸ Con nos mester reacciona riba e atakenan di Satanas? Mescos cu e antiguo tribu di Gad, nos mester ta spiritualmente fuerte y ataca bek na harmonia cu e instruccionnan di Dios. Lamentablemente, algun ruman a cuminsa entrega bou di e presionnan di bida y ta neglisha nan responsabilidadnan spiritual. (Mateo 13:20-22) Un Testigo a bisa lo siguiente tocante pakico asistencia na reunion den su congregacion a baha: “E rumannan ta gewoon cansa. Nan ta patapata di stress.” Ta berdad cu awendia hende tin hopi motibo pa ta cansa. Pesei ta facil pa mira e adoracion di Dios como un presion mas, un obligacion pisa. Pero esei ta un punto di bista sano of corecto?

9. Con tuma Cristo su yugo riba nos ta hiba na sosiego?

⁹ Considera loke Hesus a bisa e multitudnan den su tempo, kendenan tambe tawata agota door di e presionnan di bida: “Bin serca mi tur cu ta cansa y carga, y lo mi duna boso sosiego.” Acaso Hesus su declaracion a indica cu un hende lo a haya sosiego door di reduci su sirbishi na Dios? Al contrario, Hesus a bisa: “Tuma mi yugo riba boso, y siña di mi, pasobra mi ta manso y humilde di curason; y boso lo haya sosiego pa boso alma.” Un yugo ta un frame di palo of di metal cu ta permiti un hende of un bestia carga un cos pisa. Ta ken lo kier acepta un yugo asina? Nos no tin basta ‘carga’ caba? Si, pero un otro manera cu por traduci e texto Griego ta: “Bin bou di mi yugo cu mi.” Djis pensa un rato: Hesus ta ofrece pa yuda nos hala nos carga! Nos no tin cu hacie riba nos mes forsa.—Mateo 9:36; 11:28, 29; 2 Corintionan 4:7.

10. Nos esfuersonan pa duna gloria na Dios ta hiba na ki resultado?

¹⁰ Ora nos tuma e yugo cu Hesus ta ofrece nos pa ta su disipel, nos ta luchando contra Satanas. Santiago 4:7 ta priminti: “Resisti Diabel y e lo hui for di boso.” Esaki no kiermen cu ta facil pa resisti Diabel. Sirbi Dios ta encera basta esfuerso. (Lucas 13:24) Pero Bijbel ta haci e promesa aki na Salmo 126:5: “Esnan cu sembra cu awa na wowo lo cosecha cu grito di alegria.” Si, nos no ta adora un Dios malagradecido. “E ta Esun cu ta recompensa esnan cu ta busc’e”, y ta bendiciona esnan cu ta dun’e gloria.—Hebreonan 11:6.

Glorificando Dios Como Predicado di Reino

11. Con sirbishi di veld ta fungi como un defensa contra e atakenan di Satanas?

¹¹ Hesus a manda: “Bai y haci tur e nacionnan disipel di mi.” E trabou di predica ta e manera principal di ofrece Dios “un sacrificio di alabansa.” (Mateo 28:19; Hebreonan 13:15) Un parti indespensabel di nos “armadura completo”—nos defensa contra e atakenan di Satanas—ta di tin nos “pianan bisti cu e preparacion di e evangelio di pas.” (Efesionan 6:11-15) Alaba Dios den sirbishi di veld ta un manera excelente pa nutri nos fe. (2 Corintionan 4:13) Tambe esei ta yuda kita nos mente for di pensamentonan negativo. (Filipensenan 4:8) Participacion  den sirbishi di veld ta duna nos chens di disfruta di asociacion edificante cu nos rumannan den fe.

12, 13. Con participacion regular den sirbishi di veld por beneficia famianan? Duna un ehempel.

¹² E trabou di predica por ta ademas un actividad sano di famia. Ta claro cu mucha tin mester di recreo balansa. Sinembargo, e tempo cu un famia ta pasa hunto den sirbishi di veld no mester ta un tempo laf y desagradabel. Mayornan por hacie mas dushi door di entrena nan yiunan pa ta efectivo den sirbishi. Muchanan sa gusta cosnan cu nan por haci bon, no ta asina? Wel, door di ta balansa y no exigi di e muchanan mas di loke nan por haci, mayornan por yuda nan haya goso den sirbishi.—Genesis 33:13, 14.

¹³ Ademas, un famia cu ta alaba Dios hunto ta bira mas pega cu otro. Tuma e ehempel di un ruman mohe, kende su casa incredulo a bai lag’e cu cinco yiu. E ruman mohe aki pues tawatin e reto di bai traha y percura materialmente pa su yiunan. Acaso e tawata asina agota cu el a ignora e interesnan spiritual di su yiunan? E ta conta: “Mi a studia e Bijbel y publicacionnan biblico diligentemente y a purba aplica loke mi a lesa. Mi tawata bai reunion y den sirbishi di cas pa cas cu e muchanan riba un base regular. Kico tawata e resultado di mi esfuerso? Tur cinco ta batisa.” Asina tambe un pleno participacion den sirbishi por yuda bo den bo esfuerso pa lanta bo yiunan “den e disiplina y instruccion di Señor.”—Efesionan 6:4.

14. (a) Con hobennan por duna gloria na Dios na scol? (b) Kico por yuda hobennan pa nan no tin “berguensa di e evangelio”?

¹⁴ Hobennan, si boso ta biba den un pais caminda lei ta permiti esei, boso ta duna gloria na Dios door di duna testimonio na scol, of boso ta laga miedo di hende stop boso? (Proverbionan 29:25) Un hobensita Testigo di 13 aña di Puerto Rico a skirbi: “Nunca mi no a sinti berguensa di predica na scol pasobra mi sa cu esaki ta e berdad. Den klas, semper mi ta hisa man y conta kico mi a siña for di Bijbel. Ora mi no tin les, mi ta bai den biblioteca di scol y lesa e buki Hovenan sa puntra.” * Yehova a bendiciona su esfuerso? E hobensita a conta: “Tin biaha e muchanan di mi klas ta haci mi pregunta y asta nan sa pidi pa haya e buki.” Si abo no sa predica na scol, podise bo tin cu comproba pa bo mes “kico ta e bon y agradabel y perfecto boluntad di Dios” door di haci un studio personal diligente. (Romanonan 12:2) Unabes bo ta combenci cu loke bo a siña ta e berdad, nunca lo bo no tin “berguensa di e evangelio.”—Romanonan 1:16.

Un ‘Porta Habri’ di Sirbishi

15, 16. Ki “porta hancho y eficas” cu ta hiba na actividad algun cristian a drenta, y den ki bendicion esei a resulta?

¹⁵ Apostel Pablo a skirbi cu “un porta hancho y eficas” cu ta hiba na actividad a habri p’e. (1 Corintionan 16:9) Bo circunstancianan ta permiti bo drenta un porta cu ta hiba na mas actividad? Por ehempel, e sirbishi di pionero regular of ausiliar ta encera dedica 70 of 50 ora pa luna na e trabou di predica. Naturalmente, e otro rumannan ta aprecia e pioneronan pa nan sirbishi fiel. Pero e echo cu e pioneronan ta dedica mas tempo den sirbishi no ta laga nan sinti nan mes mas cu nan rumannan. Mas bien,  nan ta cultiva e actitud cu Hesus a curasha nos pa desplega: “Nos ta esclabonan inutil; nos a haci solamente loke nos mester a haci.”—Lucas 17:10.

¹⁶ E sirbishi di pionero ta rekeri pa un hende tin disiplina propio, pa su cosnan ta organisa y pa e ta dispuesto pa haci sacrificio. Pero e bendicionnan ta bale la pena. Un pionero hoben cu yama Tamika a bisa: “Un berdadero bendicion ta e habilidad di por maneha e Palabra di Dios corectamente. Ora bo ta traha pionero, bo ta uza bo Bijbel masha hopi. Awor, ora mi ta bai di cas pa cas, mi por corda textonan biblico cu ta pas pa cada doño di cas.” (2 Timoteo 2:15) Un pionero cu yama Mica a bisa: “Un otro bendicion asombroso ta di por mira con e berdad ta influencia bida di hende.” Un hoben cu yama Matthew tambe a papia di e goso di “mira un persona drenta den e berdad. No tin ningun otro goso cu por remplasa esaki.”

17. Con un cristian a supera sintimentonan negativo pa cu e sirbishi di pionero?

¹⁷ Abo lo por pensa riba e posibilidad pa drenta e porta di sirbishi di pionero? Podise bo tin gana di hacie pero bo ta sinti cu bo no ta suficientemente capasita. Un ruman mohe jong cu yama Kenyatte a admiti: “Mi no tawata masha positivo pa cu e sirbishi di pionero. Mi no a sinti cu mi tawata capasita pesei. Mi no tawata sa con pa prepara introduccion of con pa rasona for di e Scritura.” Sinembargo, e ancianonan a asigna un ruman mohe pionero maduro pa traha cu Kenyatte. Anto segun Kenyatte: “Tawata masha dushi pa traha cu ne. Esei a duna mi e deseo di traha pionero.” Cu un poco animacion y entrenamento, kisas bo tambe lo kier traha pionero.

18. Ki bendicion esnan cu drenta sirbishi di misionero por ricibi?

¹⁸ E trabou di pionero por habri porta pa otro privilegionan di sirbishi. Por ehempel, algun pareha casa lo por cualifica pa haya entrenamento como misionero pa bai predica den exterior. Misioneronan tin cu adapta nan mes na un pais nobo, y podise na un idioma nobo, un cultura nobo y cuminda nobo. Pero tal incumbiniencianan no ta nada compara cu e bendicionnan.  Mildred, un misionero veterano na Mexico, a bisa: “Nunca mi no a lamenta mi decision di bira misionero. Esei tawata mi deseo for di tempo cu mi tawata chikito.” Ki bendicionnan el a disfruta di dje? “Den mi pais, tawata masha dificil pa haya studio di Bijbel. Aki, tawatin biaha cu cuater studiante di mi a sali pareu pa prome bes den sirbishi di veld!”

19, 20. Con hopi ruman den sirbishi di Betel, sirbishi internacional y Scol di Entrenamento Ministerial a ricibi bendicion?

¹⁹ Bendicionnan rico ta bini tambe pa esnan den sirbishi di Betel na sucursalnan di Testigonan di Yehova. Sven, un ruman homber hoben cu ta sirbi na Alemania, a bisa di su trabou na Betel: “Mi ta sinti cu mi ta haciendo algo cu tin balor duradero. Lo mi por a uza mi habilidadnan den mundo. Pero lo tawata como si fuera mi ta deposita mi placa na un banco cu ta a punto di bati bankroet.” Ta berdad cu pa sirbi como un boluntario cu no ta haya salario, ta encera sacrificio. Pero Sven a bisa: “Ora bo bai cas, bo sa cu tur loke bo a haci e dia ei tawata pa Yehova. Y esei ta laga bo sinti ‘super’ bon.”

²⁰ Algun ruman a disfruta di e bendicion di sirbishi internacional, trahando riba construccion di sucursal den paisnan den exterior. Un pareha cu a sirbi den ocho asignacion den exterior a skirbi: “E rumannan akinan ta maraviyoso. Lo ta doloroso ora nos tin cu bai. Ta di ocho biaha cu nos curason ta wordo ‘kibra.’ Pero ki un experencia fantastico nos tawatin!” Anto tambe tin e Scol di Entrenamento Ministerial. E ta ofrece entrenamento spiritual na ruman hombernan soltero cualifica. Un graduado a skirbi: “Mi no por haya palabra pa gradici boso pa un scol asina maraviyoso. Ta ki otro organisacion lo a haci asina tanto esfuerso pa duna entrenamento?”

21. Ki reto tur cristian ta confronta den nan sirbishi na Dios?

²¹ Si, tin hopi porta habri cu ta hiba na actividad. Ta cierto cu hopi di nos no por sirbi na Betel of den exterior. Hesus mes a reconoce cu cristiannan lo a produci “fruta” na diferente cantidad debi na diferente circunstancia. (Mateo 13:23) Nos reto como cristian ta anto pa saca lo miho di nos situacion, es decir, percura pa nos tin e participacion mas pleno posibel den Yehova su sirbishi segun nos circunstancianan ta permiti. Ora nos ta haci esei, nos ta dunando gloria na Yehova, y nos por tin sigur cu e ta keda hopi contento. Tuma e ehempel di Ethel, un ruman di edad cu ta den un cas di cuido. Regularmente e ta duna testimonio na e otro habitantenan di e cas di cuido y ta participa den predicacion via telefon. Apesar di su limitacionnan, e ta haci su sirbishi di henter su alma.—Mateo 22:37.

22. (a) Cua maneranan mas nos por duna gloria na Dios? (b) Ki tempo maraviyoso ta spera nos?

²² Pero corda cu e predicacion ta simplemente un di e maneranan den cua nos ta duna gloria na Yehova. Nos conducta y aparencia ehemplar ora nos ta na trabou, na scol y na cas, ta haci Yehova su curason contento. (Proverbionan 27:11) Proverbionan 28:20 ta priminti: “Un hende fiel lo ta yen di bendicion.” Pesei nos mester “sembra generosamente” den nos sirbishi na Dios, sabiendo cu nos lo cosecha bendicion na abundancia. (2 Corintionan 9:6) Si nos haci esei, nos lo tin e privilegio di ta na bida durante e tempo maraviyoso ora cu “tur loke tin rosea” lo duna gloria na Yehova, e gloria tan mereci!—Salmo 150:6.

[Nota]

Bo Ta Corda?

• Con e pueblo di Dios ta sirbi Yehova “di dia y anochi”?

• Ki reto e tribu di Gad a confronta, y kico esei ta siña cristiannan awe?

• Con sirbishi di veld ta fungi como un proteccion contra e atakenan di Satanas?

• Cua ‘porta habri’ algun ruman a drenta, y ki bendicion nan a disfruta di dje?

[Preguntanan di Estudio]

[Plachi na pagina 15]

Mescos cu e Gaditanan a lucha contra bandidonan, asina cristiannan tin cu lucha contra e atakenan di Satanas

[Plachi na pagina 17]

Nos ta disfruta di asociacion edificante den sirbishi di veld

[Plachinan na pagina 18]

E trabou di pionero por habri porta pa otro privilegionan di sirbishi, entre otro:

1. Sirbishi internacional

2. Sirbishi di Betel

3. Sirbishi di misionero