Informe di Proclamadonan di Reino

‘Bin y Yuda Nos’

NA JULI 2000, a haci un yamada na Testigonan di Alemania, Austria y Suisa cu ta papia Aleman, pa muda pa Bolivia. Dicon? Pasobra den un rayo di 300 kilometer di Santa Cruz, Bolivia, tawatin colonianan aisla di cunukero di abla Aleman di e grupo religioso menonita y den nan tawatin hende cu a mustra profundo interes den Bijbel.

Rond di 140 Testigo a reacciona riba e invitacion. Algun di nan a bai pa un par di siman, y otronan pa un aña of mas. Asina nan a desplega un actitud similar na esun di e misioneronan di prome siglo cu a haci caso di e yamada: “Bin Macedonia y yuda nos.”—Echonan 16:9, 10.

Con e predicacion ta den e teritorio ei? Un anciano di e congregacion local a splica: “Pa bai un di e 43 colonianan menonita por tuma te cu ocho ora riba caminda di tera den un vehiculo four-wheel-drive. Pa bishita e comunidadnan mas leu ta tuma hopi bes cuater dia y nos tin cu drumi algun anochi den tent. Pero definitivamente e ta bale la pena, pasobra casi ningun di e hendenan aki nunca prome a tende e bon nobo.”

Na principio, hopi di e menonitanan no tawata gusta e bishitanan. Pero door cu e rumannan a sigui haci esfuerso, nan a bin realisa ta kico e Testigonan tin di ofrece. Por ehempel, un cunukero a bisa cu e tin un aña ta lesa e revista Spierta! Anto el a agrega: “Mi sa cu hopi hende akinan no ta di acuerdo cu loke boso ta bisa, pero ami ta kere cu e ta e berdad.” Den un otro colonia, un homber a bisa: “Algun di mi biciñanan ta bisa cu boso ta profeta falso, otronan ta bisa cu boso tin e berdad. Mi mes kier haya sa kico ta kico.”

Awor tin un congregacion Aleman na Bolivia, cu 35 publicado, di cua 14 ta predicado di tempo completo. Te cu awe, 14 exmenonita a bira proclamado di Reino, y tin 9 mas ta asisti regularmente na e reunionnan. Un homber di edad cu a batisa resientemente a bisa: “Nos ta mira Yehova su guia claramente. El a manda rumannan cu experencia, y cu ta papia Aleman, pa yuda nos. Nos ta masha gradicido mes.” E homber su yiu mohe di 17 aña, cu tambe ta batisa, a agrega: “E entusiasmo di e rumannan hoben cu a bini aki ta contagioso. Mayoria di nan ta pionero, y ta dedica nan tempo y nan placa na yuda otro hende. Esei ta duna mi gana di haci mescos.”

En berdad, esnan cu a haci esfuerso pa ‘bin yuda’ ta cosechando gran goso y satisfaccion.