Cua Religion Bo Tin cu Scohe?

‘DIFERENTE religion ta simplemente diferente caminda cu ta hiba na e mesun meta. Al fin y al cabo, ta un Dios so tin, no ta berdad?’ Hopi hende ta pensa asina. Pa nan, e cos importante ta pa bo afilia na un religion, pero realmente no ta importa cua religion bo ta scohe, basta bo ta den un.

Na prome instante, e argumento aki por parce rasonabel, ya cu ta berdad cu ta un Dios so tin, e Todopoderoso. (Isaias 44:6; Huan 17:3; 1 Corintionan 8:5, 6) Sinembargo, nos no por ignora e diferencianan obvio—asta contradiccionnan—cu tin entre e tantisimo gruponan religioso cu ta bisa cu nan ta sirbi e Dios berdadero. Tin diferencianan grandi den nan custumbernan, nan creencianan, nan siñansanan y nan rekisitonan. E diferencianan ta asina grandi cu esnan cu ta pertenece na un religion of grupo ta haya cu ta dificil pa compronde of acepta loke e otronan ta siña of kere.

Di otro banda, Hesus a bisa: “Dios ta Spirito, y esnan cu ta ador’e mester adora den spirito y berdad.” (Huan 4:24) Adora Dios den berdad ta laga espacio pa un variedad di idea contradictorio tocante ken Dios ta, kico ta su proposito, y con e kier pa hende ador’e? Ta logico pa kere cu no ta importa e Dios Todopoderoso con nos ta ador’e?

Cristiannan Berdadero di e Tempo Aya y Awor

De bes en cuando e cristiannan di prome siglo tawatin nan diferencianan di opinion. Por ehempel, papiando di e cristiannan na Corinto, apostel Pablo a bisa: “Di e hendenan di cas di Cloe mi a tende, mi rumannan, cu tin pleito entre boso. Awor esaki ta loke mi kiermen, cu cada un di boso ta bisa: ‘Ami ta disipel di Pablo’, y ‘Ami di Apolos’, y ‘Ami di Sefas’, y ‘Ami di Cristo.’”—1 Corintionan 1:11, 12.

Pablo a mira e diferencianan di opinion aki como di menor importancia? Cada cristian tawata simplemente siguiendo su mes caminda di salbacion? Sigur cu no! Pablo a spierta nan: “Mi ta exhorta boso, rumannan, pa medio di e nomber di nos Señor Hesucristo, pa boso tur papia e mesun cos, y pa no tin division entre boso, ma pa boso ta perfectamente uni den e mesun mente y den e mesun opinion.”—1 Corintionan 1:10.

Claro cu unidad di creencia no mester ta algo forsa. E ta ser logra solamente ora cada persona investiga asuntonan profundamente y yega na e mesun conclusionnan y acepta  esakinan. Pues, un studio personal di e Palabra di Dios y un deseo sinsero pa aplica loke ta ser siña ta pasonan esencial pa yega na e clase di unidad cu Pablo a papia di dje. E unidad ei ta existi? Manera nos a mira, pa hopi tempo Dios a trata cu su pueblo como grupo. Ta posibel pa identifica e grupo ei awe?

E Beneficionan di Uni Bo Mes cu e Grupo Aproba pa Dios

E salmista David a puntra un biaha: “O SEÑOR, ken por biba den bo tabernakel? Ken por biba riba bo sero santo?” Esei sigur ta un pregunta cu mester pone bo pensa seriamente. David a duna e contesta: “Esun cu ta cana den rectitud y ta haci husticia, y ta papia berdad den su curason.” (Salmo 15:1, 2) Un comprondemento exacto di Bijbel lo yuda bo identifica e religion cu ta cumpli cu e rekisitonan dibino ei. Anto door di uni bo mes cu e grupo ei, bo por disfruta di compañerismo edificante cu hende cu ta adora Dios den unidad y “den spirito y berdad.”

Testigonan di Yehova a demostra cu ta posibel pa logra unidad di creencia y accion asta den e mundo desuni djawe. Den nan filanan tin diferente persona cu un tempo tawata miembro di hopi religion y grupo etnico. Tin Testigonan cu un tempo tawata agnostico of ateo. Otronan simplemente no tawata pensa masha riba religion. For di e diversidad di religion, cultura y filosofia aki a sali individuonan cu awor ta gosa di un unidad religioso cu bo no ta mira otro caminda den e mundo djawe.

E base pa e unidad ei ta Bijbel, e Palabra di Dios. Claro cu Testigonan di Yehova sa cu nan no por dicta riba otro hende kico nan tin cu haci of laga. Pero nan ta contento si cu nan tin e privilegio di por anima otro hende pa siña Bijbel pa asina nan por basa nan escohencia di religion riba un fundeshi solido. Den e manera aki, hopi hende mas por gosa di e beneficionan cu adora Dios “den spirito y berdad” ta trece cu ne.

Awe, e peliger di bira victima di influencianan perhudicial y tentacion ta grandi. Pesei ta masha importante pa scohe bon asociacion. Bijbel ta bisa cu “esun cu anda cu hende sabi lo ta sabi” y cu “mal compania ta daña bon custumber.” (Proverbionan 13:20; 1 Corintionan 15:33) Ora nos ta den compania di e berdadero adoradonan di Dios, esei lo ta un proteccion pa nos. Pesei, Bijbel ta recorda nos: “Laga nos considera con pa stimula otro pa stima y haci bon obra, y no laga di asisti na nos mes reunionnan, manera ta custumber di algun, ma curasha otro; y mucho mas ainda, ora boso ta mira cu e dia ta yegando serca.” (Hebreonan 10:24, 25) Ta un bendicion ora berdadero amigo, rumannan spiritual, ta yuda otro amorosamente y ta cumpli cu nan responsabilidadnan dilanti Dios!

Ottmar ta confirma e punto di bista aki. El a lanta den un famia catolico na Alemania, pero a stop di bai misa. E ta splica: “Ki ora cu mi a bai misa, mi tawata sali mes bashi cu mi a drenta.” Ma e no a perde su fe den Dios. Despues el a haya contacto cu Testigonan di Yehova y a keda combenci cu nan ta e berdadero adoradonan di Dios. El a mira e necesidad pa asocia cu nan. Awor e ta bisa: “Como un persona activo den un organisacion mundial, mi ta disfruta di pas mental y di curason. Pocopoco pero sigur mi ta hayando yudansa pa mi por tin un conocemento mas exacto di Bijbel. Pa mi personalmente, esei ta algo di gran balor.”

Un Invitacion na Esnan Cu Ta Busca e Berdad

Hende cu tin e mesun punto di bista y cu ta traha estrechamente cu otro como grupo, por cumpli cu un tarea mucho mas eficas cu personanan cu ta traha independiente di otro. Por ehempel, ora Hesus a despedi di su disipelnan, el a duna nan e siguiente instruccion: “Pesei, bai y haci tur e nacionnan disipel di mi, y batisa nan den nomber di e Tata y di e Yiu y di e spirito santo, y siña nan pa cumpli  cu tur loke mi a ordena boso.” (Mateo 28:19, 20) Con nan lo por a cumpli satisfactoriamente cu un encargo asina si no tawatin guia ni organisacion? Con un persona lo por obedece e mandato biblico aki si e ta purba sirbi Dios riba su mes?

Aña pasa, Testigonan di Yehova rond mundo a reparti 91.933.280 buki y foyeto, hunto cu 697.603.247 revista basa riba Bijbel, alcansando asina miyones di hende den 235 pais cu e mensahe di e Palabra di Dios. Esei ta un prueba palpabel cu e esfuerso uni di un grupo bon organisa ta logra hopi mas cu e esfuerso di cada hende riba nan mes!

Ademas di reparti literatura biblico, Testigonan di Yehova ta conduci studio di Bijbel gratis pa yuda hende haya un comprondemento profundo di e rekisitonan di Dios. Aña pasa nan a conduci un promedio di 5.726.509 studio di Bijbel tur siman cu un of mas hende. E siñansa biblico aki a yuda miyones di hende haya un base solido riba cua nan por basa nan escohencia di religion. Nos ta invita bo pa bo siña kico ta e rekisitonan dibino cu Bijbel ta trece dilanti. E ora ei bo tambe por haci bo escohencia.—Efesionan 4:13; Filipensenan 1:9; 1 Timoteo 6:20; 2 Pedro 3:18.

Si bo kier agrada Dios, ta vital pa bo pertenece na un religion—pero no na cualkier grupo of organisacion religioso. Bo tin cu basa bo escohencia di religion riba conocemento exacto di Bijbel, no riba doctrina sin base of loke bo a tende otro hende bisa di Bijbel. (Proverbionan 16:25) Siña kico ta e rekisitonan pa e religion berdadero. Compara nan cu bo mes creencianan y despues haci bo escohencia.—Deuteronomio 30:19.

[Plachinan na pagina 7]

Testigonan di Yehova ta disfruta di unidad den un mundo desuni