Storia di Bida

For di Prizonnan Scur pa e Seronan di Suisa

SEGUN E RELATO DI LOTHAR WALTHER

Despues di a pasa tres aña largo den e prizonnan scur di Oost Alemania comunista, mi tawata masha ansioso pa sali pa mi disfruta di e dulsura di libertad y di e compania caloroso di mi famia.

PERO mi no tawata prepara pa e manera tur confundi cu Johannes, mi yiu homber di seis aña, a keda wak mi. E tawatin tres aña sin mira su tata. P’e, mi tawata un hende completamente desconoci.

Distinto for di mi yiu homber, ami si a disfruta di e compania amoroso di mi mayornan na chikito. Mi a nace na aña 1928, na Chemnitz, Alemania. Y na nos cas tawata reina un ambiente caloroso. Mi tata tawata expresa abiertamente con disgusta e tawata cu religion. E tawata corda cu durante Prome Guera Mundial, soldanan “cristian” di ambos banda a desea esnan na e otro banda “Bon Pasco” dia 25 di december, anto e siguiente dia nan a sigui mata otro manera nada no a pasa. Den su bista, religion tawata e piyo forma di hipocresia.

Fe Ta Remplasa Desilusion

Felismente, mi no a experencia e tipo di decepcion ei, pasobra Segundo Guera Mundial a termina ora cu mi tawatin 17 aña, y mi a scapa di chiripa di ser recluta. Pero toch, tawatin preguntanan inkietante cu a causa mi angustia. Preguntanan manera: ‘Dicon tin tanto matamento? Ken mi por confia? Unda mi por haya berdadero siguridad?’ Oost Alemania, caminda nos tawata biba, a bin cai bou di control Sovietico. E idealnan di comunismo manera husticia, igualdad, solidaridad y relacionnan pacifico, a atrae e hendenan cu tawata cansa di  e devastacion causa door di guera. Lo no a dura largo cu hopi di e personanan sinsero aki lo a keda profundamente desilusiona, anto e biaha aki no door di religion, sino door di politica.

Tawata durante mi buskeda personal pa contestanan satisfactorio cu un di mi tantanan, cu tawata un Testigo di Yehova, a papia cu mi tocante su fe. El a duna mi un publicacion basa riba Bijbel cu a motiva mi pa lesa—pa prome bes den mi bida—henter e capitulo 24 di Mateo. Mi a keda impresiona cu e splicacionnan rasonabel y combencente cu e buki a duna, y cu a identifica nos tempo como “e fin di tempo” of fin di e sistema di cosnan, y cu alabes a señala e causa fundamental di e problemanan di humanidad.—Mateo 24:3; Revelacion 12:9.

Poco despues mi a haya mas publicacion di Testigonan di Yehova, y segun cu mi tawata lesa nan cu smak, mi a bin realisa cu mi a haya e berdad cu mi tawata busca asina ansiosamente. Tawata emocionante pa siña cu Hesucristo a ser entronisa den shelo na aña 1914 y cu pronto lo el a domina elementonan malbado afin di trece bendicion pa humanidad obediente. Un otro revelacion grandi pa mi tawata cu mi a haya un bon comprondemento di e rescate. Esei a yuda mi acudi na Yehova Dios den oracion sinsero, y pidie pordon. Mi a keda profundamente conmovi pa e invitacion bondadoso cu tin para skirbi na Santiago 4:8: “Hala serca Dios y e lo hala serca boso.”

Apesar di mi entusiasmo ferviente pa mi religion nobo, mi mayornan y mi ruman mohe na prome instante no tawata masha dispuesto pa acepta loke mi a bisa nan. Sinembargo, esaki no a mengua mi deseo pa asisti na e reunionnan cristian cu un grupo chikito di Testigo tawata tene serca di Chemnitz. Pa mi sorpresa, mi mayornan y mi ruman mohe a compaña mi na e prome reunion! Esei tawata e temporada di winter di 1945/46. Despues, ora cu a forma un grupo di studio di Bijbel na Harthau, caminda nos tawata biba, mi famia a cuminsa asisti regularmente.

“Mi Ta un Mucha”

Siñando berdadnan biblico importante y asociacion regular cu e pueblo di Yehova a motiva mi pa dedica mi bida na Yehova, y mi a batisa dia 25 di mei 1946. Mi a keda hopi contento ora cu e miembronan di mi famia tambe a progresa spiritualmente, y cu tempo nan tur tres a bira fiel Testigo di Yehova. Mi ruman mohe ainda ta un miembro activo den un di e congregacionnan di Chemnitz. Mi mama cu mi tata a sirbi fielmente te na nan morto. Mi mama a muri na 1965 y mi tata na 1986.

Seis luna despues di mi bautismo, mi a cuminsa sirbi como pionero special. Esei tawata inicio di un bida largo di sirbishi “den tempo faborabel, den tempo dificil.” (2 Timoteo 4:2, NW) Pronto a presenta oportunidadnan nobo pa sirbishi. Tawatin mester di predicado di tempo completo den un area aisla den parti oost di Alemania. Ami cu un ruman homber a inscribi  pa e asignacion aki, pero mi a sinti cu mi no tawatin e experencia ni e madures pa un tarea responsabel asina. Siendo cu mi tawatin 18 aña so, mi a sinti mescos cu Yeremias: “Ai, Señor DIOS! Mira, mi no sa con pa papia, pasobra mi ta un mucha.” (Yeremias 1:6) Apesar di mi dudanan, e rumannan responsabel bondadosamente a dicidi di duna nos un chens. Y asina nos a ser asigna na Belzig, un pueblito den e estado di Brandenburg.

Tawata masha dificil pa predica den e teritorio ei, pero el a resulta un bon training pa mi. Cu tempo, varios señora comerciante prominente a acepta e mensahe di Reino y a bira Testigo di Yehova. Sinembargo, nan posicion como Testigo di Yehova a bai contra di e estilo di bida masha tradicional di e hendenan local cu tawata desconfia tur loke ta diferente. Tanto pastonan catolico como protestant a opone nos implacablemente y a haci acusacionnan falso contra nos pa motibo di nos predicacion. Pero door di confia den Yehova pa guia y proteccion, nos a logra yuda varios persona interesa acepta e berdad.

Creciente Indicacion di Intolerancia

Aña 1948 a trece bendicion y tambe dificultadnan inespera. Na prome luga, mi a ricibi un asignacion di pionero pa Rudolstadt, na Thüringen. Einan mi a siña conoce hopi ruman fiel, y mi a disfruta di nan compania. Un otro bendicion importante mi a haya na juli di e aña ei. Mi a casa cu Erika Ullmann, un mucha mohe cristian fiel y activo cu mi tawata conoce for di tempo cu mi a cuminsa asisti na e reunionnan di Congregacion Chemnitz. Hunto nos a cuminsa traha pionero na Harthau, mi pueblo natal. Sinembargo, cu tempo Erika no por a sigui den sirbishi di tempo completo debi na, entre otro, problema cu salu.

E temponan ei Yehova su pueblo tawata pasa den hopi prueba dificil. Departamento di Labor na Chemnitz a cansela mi carchi di cuminda cu a haci posibel cu mi por a cumpra cierto cantidad di articulo na un prijs fiho. Nan a haci esei den un intento pa obliga mi stop di predica y busca un trabou full-time. E rumannan responsabel pa e obra a uza mi caso pa busca manera di haya reconocemento legal di estado. Nan a nenga nos esaki, y dia 23 di juni 1950, nan a sentencia mi na paga un boet of sinta 30 dia den prizon. Nos a apela e decision, pero e corte superior a rechasa e apelacion, y nan a manda mi prizon.

E incidente ei tawata djis un indicacion di e creciente oposicion y calamidad cu tawata na caminda. Menos cu un luna despues, na september 1950, e regimen comunista despues di a hiba un campaña di difamacion den medionan di comunicacion, a prohibi nos actividadnan. Debi na nos crecemento rapido y nos posicion neutral, nan a cataloga nos como un agencia peligroso di spionahe di paisnan no comunista, cu tawata efectua “actividad dudoso” bou di e capa di religion. Riba e mesun dia cu nan a saca e prohibicion, nos yiu homber, Johannes, a nace. Mi casa a duna lus na cas, mientras cu ami tawata den prizon. Ignorando e protesta di e partera, funcionarionan di Siguridad di Estado a pusha drenta den nos apartamento en busca di evidencia pa proba nan acusacionnan. Claro cu nan no a haya nada. No obstante, despues nan a logra infiltra un spion den nos congregacion. Esei a hiba na aresto di tur e ruman hombernan responsabel, incluso ami, na october 1953.

Den Prizonnan Scur

Despues di a ser acusa y sentencia na castigonan di entre tres pa seis aña, nos a join varios di  nos rumannan den e prizonnan fis den bodega di Kasteel Osterstein, na Zwickau. Apesar di e condicionnan horibel einan, tawata un berdadero goso di por a asocia cu rumannan maduro. Nos falta di libertad no a nifica falta di cuminda spiritual. Aunke e regimen a desprecia y prohibi E Toren di Vigilancia, e revista tawata logra drenta den prizon y te den nos celnan! Con?

Algun ruman tawatin e asignacion di traha den e minanan di carbon, caminda nan a topa Testigonan cu no tawata encarsela y cu a duna nan e revistanan. Anto e rumannan tawata trece e revistanan secretamente den prizon y cu puro ingeniosidad tawata logra pasa e cuminda spiritual tan necesario na e resto di nos. Mi a sinti mi hopi contento y anima di por a experencia Yehova su cuido y guia den e manera aki!

Pa fin di aña 1954, nan a transferi nos pa e notorio prizon na Torgau. E Testigonan einan a ricibi nos gustosamente. Prome cu nos a yega, nan a keda spiritualmente fuerte door di resita loke nan tawata corda for di edicionnan bieu di E Toren di Vigilancia. Nan a anhela un suministro fresco di cuminda spiritual! Wel, awor tawata nos deber di comparti cu nan puntonan cu nos a studia na Zwickau. Pero con nos por a haci esei ya cu tawata strictamente prohibi pa nos papia cu otro durante nos caminatanan diario? Wel, e rumannan a duna nos algun tip precioso kico pa haci, y Yehova su man poderoso di proteccion a guia nos. Esaki a siña nos e importancia di studia Bijbel diligentemente y medita riba dje tanten cu nos tin e libertad y oportunidad pa haci esei.

Tempo pa Decisionnan Importante

Cu yudansa di Yehova nos a keda firme. Pa nos gran sorpresa, varios di nos a ricibi amnistia na fin di 1956. Ta dificil pa describi con felis nos tawata ora cu nan a habri e portanan di prizon pa nos! Pa e tempo ei mi yiu homber tawatin seis aña, y pa mi tawata un tremendo goso di por ta bek serca mi casa y yud’e cria nos yiu. Pa un tempo Johannes a trata mi manera un hende straño, pero no a dura hopi cu nos a forma un laso caloroso.

Testigonan di Yehova na Oost Alemania tawata confronta un tempo hopi dificil. Creciente hostilidad pa cu nos sirbishi cristian y nos posicion neutral a nifica cu nos tawatin cu biba constantemente bou di menasa, un bida yen di peliger, ansiedad y agotamento. Pues, ami cu Erika a haya nos ta examina nos situacion cuidadosamente hunto cu oracion. Y nos a sinti cu nos mester a muda bai un otro caminda pa por biba den condicionnan mas faborabel pa asina precupacion no caba cu nos. Nos tawata kier tin e libertad di sirbi Yehova y sigui tras di metanan spiritual.

Den lente di 1957, a presenta un oportunidad pa nos muda pa Stuttgart, West Alemania. E predicacion no tawata prohibi einan, y nos por a asocia libremente cu nos rumannan. Nan sosten amoroso tawata abrumador. Nos a keda shete aña cu e congregacion na Hedelfingen. Durante e añanan ei, nos yiu homber a cuminsa bai scol y a haci bon progreso den e berdad. Na september 1962, mi tawatin e privilegio di asisti na e Scol di Ministerio di Reino na Wiesbaden. Einan mi a haya e animacion pa muda cu mi famia y bai sirbi caminda tin mester di rumannan cu ta papia Aleman pa siña hende e Bijbel. Esaki a inclui cierto areanan di Alemania y Suisa.

Na e Seronan di Suisa

Pues, na 1963 nos a muda pa Suisa. Nos a haya instruccion pa bai traha cu un congregacion chikito na Brunnen, na costa di e bunita Lago Luzern, den e parti central di e seronan di Alpen di Suisa. Pa nos, tawata manera biba den paradijs. Nos tawatin cu custumbra cu e dialecto Aleman cu nan tawata papia einan, y tambe cu e estilo di bida local y cu e mentalidad di e hendenan. No obstante, nos a disfruta di por a traha y predica meimei di hendenan stimado di pas. Nos a keda 14 aña na Brunnen. Nos yiu homber a lanta einan.

 Na 1977, ora cu mi tawatin casi 50 aña, nos a ricibi un invitacion pa sirbi na Betel di Suisa na Thun. Nos a considera esei un privilegio inespera y a acept’e cu gran anticipacion. Ami cu mi casa a pasa nuebe aña den sirbishi di Betel, un periodo cu nos ta corda como un logro significativo den nos bida cristian y den nos desaroyo spiritual personal. Tambe nos tawata gusta predica hunto cu e publicadonan local na Thun y den areanan eibanda, ya cu semper nos tawatin un bista riba Yehova su “maraviyanan”, e seronan mahestuoso tapa cu sneu di e Alpen di Bern.—Salmo 9:1.

Nos Ta Bolbe Muda

Nos siguiente mudansa tawata na principio di aña 1986. E rumannan a pidi nos pa sirbi como pionero special den un teritorio masha grandi asigna na Congregacion Buchs den e parti oost di Suisa. Atrobe nos mester a custumbra cu un otro estilo di bida. Sinembargo, motiva pa nos deseo di sirbi Yehova na unda cu por uza nos miho, nos a cuminsa e asignacion nobo aki, y Yehova a bendiciona nos. Tawatin biaha cu mi a fungi como substituto pa superintendentenan biahero, y a bishita e congregacionnan y fortalece nan. Diesocho aña a pasa, y nos tawatin hopi experencia felis predicando den e area aki. E congregacion di Buchs a crece, y awor nos ta reuni den un bunita Salon di Reino cu a keda dedica cinco aña pasa.

Yehova a percura pa nos den un manera masha generoso. Nos a pasa e gran parti di nos bida den sirbishi di tempo completo, y toch nunca nos no tawata falta nada. Nos tin e goso di mira nos yiu homber, su casa y nan yiunan, y tambe famia di nan yiunan, cana fielmente den e caminda di Yehova.

Mirando atras, mi ta sinti cu en berdad nos a sirbi Yehova “den tempo faborabel, den tempo dificil.” Mi esfuerso pa cumpli cu e sirbishi cristian a hiba mi for di e prizonnan scur di e regimen comunista te na e seronan magnifico di Alpen di Suisa. Ami cu mi famia no a lamenta ni un solo momento.

[Cuadro na pagina 28]

“Dobel Victimanan” Ta Para Firme bou di Persecucion

Bou di e Republica Democratico Aleman (RDA), conoci tambe como Oost Alemania, Testigonan di Yehova a bira e obheto di opresion cruel. Registronan ta mustra cu nan a manda mas cu 5.000 Testigo na camponan di trabou forsa y na centronan di detencion debi na nan sirbishi cristian y nan neutralidad.—Isaias 2:4.

Algun di e Testigonan aki a ser describi como “dobel victimanan.” Un 325 di nan tawata encarsela den campo di consentracion y prizon Nazi. Anto den decada di 1950, nan a ser persigui y encarsela door di Stasi, e Servicio di Siguridad di RDA. Asta algun di e prizonnan a traha dos warda, prome como prizonnan Nazi y despues como prizonnan di Stasi.

Durante e prome decada di persecucion intenso, di aña 1950 pa 1961, un total di 60 Testigo—homber y mohe—a muri den prizon debi na maltrato, mal nutricion, malesa y biehes. Diesdos Testigo a ricibi sentencia di bida largo cu despues nan a reduci na 15 aña den prizon.

Awe, den e exsede di Stasi na Berlin, tin un exhibicion permanente cu ta resalta e 40 añanan di persecucion oficial di Testigonan di Yehova na Oost Alemania. E potretnan y relatonan personal cu tin exhibi einan ta duna un testimonio silencioso di e curashi y fortalesa spiritual di e Testigonan aki cu a keda fiel bou di atake.

[Mapa na pagina 24, 25]

(Pa e texto den su formato completo , wak e publicacion)

OOST ALEMANIA

Rudolstadt

Belzig

Torgau

Chemnitz

Zwickau

[Plachi na pagina 25]

Kasteel Osterstein, na Zwickau

[Reconocemento]

Fotosammlung des Stadtarchiv Zwickau, Deutschland

[Plachi na pagina 26]

Hunto cu mi casa, Erika