Haci Bon, of Djis no Haci Malo, na Otro Hende?

“LOKE bo no kier pa hende haci cu bo, no haci cu nan”, segun e dicho di e famoso maestro y filosofo Chines, Confucio. Awe, un 2.500 aña despues, ainda hopi hende ta kere cu door di simplemente no haci malo na otro hende nan ta cumpli cu nan deber moral.

Sin duda e regla di comportacion aki di Confucio tin su meritonan. Pero di otro banda, Bijbel ta revela un otro dimension di comportacion y interaccion humano. Ademas di comete pica door di haci malo na bo prohimo, Bijbel ta papia tambe di e pica di keda sin haci loke ta bon p’e. E disipel cristian Santiago a skirbi: “Esun cu sa di haci loke ta bon, y no ta hacie, p’e esaki ta pica.” (Santiago 4:17) En bes di simplemente instrui cristiannan pa no haci malo na otro hende, Hesucristo a duna e conseho aki: “Tur loke boso kier pa hende haci pa boso, haci mescos pa nan.”—Mateo 7:12.

E proposito original di Dios tawata pa tur hende trata otro manera nan kier wordo trata. Den e manera cu el a crea hende, el a pone e ehempel di mas sublime den expresa interes pa e bienestar di otro hende: “Dios a crea hende segun su mes imagen; segun e imagen di Dios el a crea hende; homber y mohe el a crea nan.” (Genesis 1:27) Esaki ta nifica cu den su gran amor Dios a dota hende cu un consenshi cu, ora e ser entrena corectamente, ta gui’e pa e trata otro hende den e manera cu e kier wordo trata.

Awe hopi hende ta sufri desesperadamente—y sin speransa pa haya alivio—na man di personanan egoista y sin consideracion. Claramente, loke ta necesario no ta djis abstene di haci loke ta malo y perhudicial na otro hende, sino, mas bien, haci loke ta bon y util pa nan. Pa e motibo aki, Testigonan di Yehova, di nan propio boluntad ta tuma accion positivo pa yuda otro hende siña di e speransa maraviyoso cu ta ser haya den e Palabra di Dios. Ora nan yama na cas di nan prohimo cu e bon nobo di Bijbel, nan ta haci esei cu un spirito di amor, haciendo cu otro hende loke nan kier pa otro hende haci cu nan.