Haciendo Loke Ta Bon den Tempo di Necesidad

“LAGA nos haci bon na tur hende, y specialmente na esnan cu ta di e famia di fe”, apostel Pablo a urgi. (Galationan 6:10) Rond mundo, Testigonan di Yehova ta haci esfuerso diligentemente pa aplica e principio ei den nan bida door di haci bon na tur hende, specialmente na nan rumannan den fe. Nos ta mira esaki bes tras bes den tempo di necesidad. Laga nos considera algun ehempel resien for di tres pais.

Na december 2002, un tifon poderoso a suta Guam cu bientonan di mas cu 300 kilometer pa ora. Hopi cas a sufri daño, y algun di nan a keda completamente destrui. Rapidamente congregacionnan local a organisa grupo di limpiesa pa yuda e famianan Testigo cu a ser afecta mas severamente. E sucursal di Guam a suministra material y trahado pa drecha casnan cu a sufri daño, y e sucursal di Hawai tambe a duna sosten. Denter di algun siman, un team di carpinte a yega for di Hawai pa yuda cu e trabou di reconstruccion, y algun ruman local a tuma facansi di nan trabou pa yuda nan. E spirito di cooperacion gososo tawata un testimonio pa tur hende den e comunidad.

Den un bario di e stad Mandalay, na Myanmar, a surgi un candela no mucho leu for di un Salon di Reino. Pega cu e candela tawatin cas di un ruman mohe inactivo y su famia. Biento tawata supla den direccion di su cas, pesei el a core bai na e salon pa pidi yudansa. Na e momento ei nan tawata renobando e salon, pues tawatin hopi ruman homber presente. Nan a keda sorprendi di topa e ruman mohe pasobra nan no tawata sa mes cu e ta biba eibanda. Rapidamente, e rumannan a yuda saca e pertenencianan di e famia y hiba nan na un luga safe. Ora cu e esposo, cu no ta Testigo, a tende di e candela, el a core bin cas y a topa e rumannan ta percurando pa su famia. El a keda impresiona y gradicido, pero tambe alivia pasobra hopi bes sakeadonan ta probecha di situacionnan asina. E manera aki cu e rumannan a manifesta bondad a motiva e ruman mohe y su yiu homber pa bolbe cuminsa asocia cu e congregacion cristian, y awor nan ta asisti na tur reunion.

Durante e aña di sirbishi cu a pasa, hopi hende na Mozambique tawata bai confronta hamber debi na secura y cosechanan cu a bai perdi. E sucursal local di Testigonan di Yehova a reacciona rapidamente door di percura cuminda pa esnan den necesidad. Nan tawata parti cuminda na Salonnan di Reino, tin biaha despues di reunion di congregacion.  Un ruman mohe cu ta un mayor soltera a bisa: “Mi a bin reunion tur deprimi, pasobra mi no tawata sa kico lo mi a duna mi yiunan pa come ora nos bai cas.” E yudansa amoroso cu e rumannan a percura a lanta su animo mesora. El a bisa: “Tawata manera mi a resusita!”

Tambe e Testigonan ta “haci bon” den un manera spiritual door di comparti Bijbel su mensahe di consuelo y speransa cu otro hende. Nan ta kere mescos cu e homber sabi di pasado: “Ma esun cu scucha [sabiduria dibino] lo biba confiadamente, y lo biba trankil, sin miedo di maldad.”—Proverbionan 1:33.

[Plachinan na pagina 31]

1, 2. Partimento di cuminda na esnan den necesidad na Mozambique

3, 4. E tifon na Guam a destrui hopi cas

[Reconocemento]

Mucha, banda robes: Andrea Booher/FEMA News Photo; señora, ariba: AP Photo/Pacific Daily News, Masako Watanabe