Bo Oracionnan Por Haci un Diferencia?

CUA di nos no a yega di enfrenta un situacion serio sin cu nos por a haci nada al respecto? Bijbel ta mustra cu apostel Pablo tawata sa cu oracion por tin efecto riba e resultado final di e situacion serio ei.

Tempo cu Pablo a ser encarsela inhustamente na Roma, el a pidi su rumannan den fe resa p’e, anto a agrega: “Mi ta roga boso mas ainda pa haci esaki, pa mi por wordo debolbi na boso mas lihe.” (Hebreonan 13:18, 19) Na un otro ocasion, Pablo a expresa su confiansa cu Dios lo a contesta oracionnan cu nan lo a haci pa el a sali liber mas lihe. (Filemon 22) No a dura mucho cu Pablo a sali liber y a reanuda su trabou como misionero.

Pero oracion por realmente cambia e resultado final di bo problemanan? Talbes. Corda si cu oracion no ta djis un formalidad religioso. De echo, esei ta e manera cu nos ta comunica cu nos Tata amoroso y poderoso cu ta den shelo. Nos mester sinti nos liber pa ta masha spesifico den nos oracionnan, anto spera cu pasenshi pa mira con Yehova ta contesta.

Kisas Dios no ta contesta tur oracion directamente, y no ta semper e ta contesta den e forma of na e tempo cu nos ta spera. Por ehempel, Pablo a haci oracion diferente biaha tocante su “sumpiña den carni.” Sea cual sea e problema, Dios no a elimin’e, pero el a consola Pablo cu e palabranan fortalecedor: “Mi gracia ta basta pa bo, pasobra mi poder ta wordo haci perfecto den debilidad.”—2 Corintionan 12:7-9.

Nos tambe por tin e confiansa cu asta si Dios no libra nos di cierto problema, e por “provee salida . . . pa [nos] por soporta.” (1 Corintionan 10:13) Y pronto Dios lo alivia humanidad di tur sufrimento. Mientrastanto, si nos acudi na Esun “cu ta scucha oracion”, esei por haci un diferencia.—Salmo 65:2.