E Herencia di Mas Balioso Cu Ta Existi

ORA e biehito apostel Huan tawata den su ultimo añanan di bida, el a skirbi: “No tin goso mas grandi pa mi cu di tende cu mi yiunan ta cana den e berdad.”—3 Huan 4.

E apostel fiel aki tawata referi na su yiunan den e sentido spiritual. Sinembargo, hopi mayor por bisa e mesun cos di nan yiunan. Nan a haci hopi esfuerso pa lanta nan yiunan “den e disiplina y instruccion di Señor” y awor nan ta contento pa mira nan yiunan grandi caba sigui “cana den e berdad.” (Efesionan 6:4) De echo, siña bo yiunan e caminda pa bida eterno ta nifica duna nan e herencia di mas balioso cu ta existi. Esei ta pa motibo cu debocion na Dios, cu ta encera entre otro biba manera Yehova kier pa un cristian biba, “ta contene promesa pa e bida presente y pa esun cu ta bin.”—1 Timoteo 4:8.

E Tata perfecto Yehova, tin masha hopi aprecio pa mayornan deboto cu ta haci tur nan esfuerso pa educa na yiunan spiritualmente. Ora e yiunan ta reacciona faborablemente, nan lo haya hopi goso den e caminda di e berdad hunto cu nan mayornan. Segun cu yiunan asina ta madura, nan lo keda cu dushi recuerdo di e momentonan hunto ei. Tin di nan ta corda yen di alegria e prome bes cu nan a participa den e Scol di Ministerio Teocratico. * Of kisas nan ta corda e prome bes cu nan por a lesa un texto biblico den nan trabou di predica di cas pa cas, den compania di un di nan mayornan. Con nan por lubida e momentonan cu nan mayornan tawata lesa for di Mi buki di relato biblico of for di Scuchando e Gran Maestro? * Gabriel ta corda algo cu e tawata gusta masha hopi: “Tempo cu mi tawatin cuater aña so, tur dia mientras cu mi mama tawata cushina, e tawata canta pa mi. Ainda mi ta corda cu sintimentonan profundo un cierto cantica di Reino. Mas despues, e cantica aki a yuda mi mira e importancia di sirbi Yehova.” Podise abo tambe ta corda e cantica bunita cu Gabriel ta referi na dje. E ta cantica 157 den e buki di cantica Canta Alabanza na Jehova, y e ta titula “Adora Yehova den Bo Hubentud.”

E cantica ta cuminsa: “Boca di mucha Dios a conmove;/Cristo a haya elogio fo’i dje.” Si, tin mucha cu tawatin e privilegio di asocia cu Hesus, y no cabe duda cu el a keda encanta cu nan manera refrescante y honesto. Door cu  mucha ta cla pa siña, Hesus a asta uza nan como un ehempel pa su siguidonan imita. (Mateo 18:3, 4) Kiermen anto cu mucha tin nan debido luga den e adoracion di Yehova. De echo, e palabranan di e cantica ta sigui bisa: “Si, asta mucha por rindi honor, halsa Yehova uni cu mayor.”

Mediante nan bon conducta, na cas, na scol y na otro luganan, hopi mucha a trece honor pa Dios y pa nan famia. Esta un bendicion cu nan tin “tata y mama cu stima e berdad.” (Deuteronomio 6:7) Mayornan deboto ta haci loke Dios ta bisa y siendo cu e ta un Tata amoroso, e ta siña su criaturanan pa cana den e caminda cu nan mester cana. Anto ki un bendicion nan ta haya! Si nan na nan turno siña nan yiunan, esta felis nan lo ta di tin yiunan cu ta “alegra nan y scucha nan bos”! (Isaias 48:17, 18) Angélica, kende actualmente ta sirbi na e oficina di sucursal di Testigonan di Yehova na Mexico, ta bisa: “Mi mayornan semper a haci esfuerso pa aplica principionan biblico. Esei a haci mi infancia masha placentero. Mi tawata felis.”

Cristiannan asina ta di acuerdo cu ta bale la pena pa cuida bo herencia spiritual bon. Kisas bo ta un hoben cu ta lantando den un famia cu berdadero normanan cristian. Si ta asina, e mesun cantica aki ta anima bo: “Hoben cristian keda limpi y moral.” Lo yega e momento cu bo mes tin cu tuma bo propio decisionnan, pues awor “siña di mucha cu Dios ta vital./Nenga anhelo pa ser popular.”

Si bo comete e kibocacion di pone popularidad na prome luga den bo bida, henter e educacion cu bo a haya lo por resulta di ta pornada y lo bo por perde loke ta warda bo den futuro. E deseo pa bira popular por pone cu bo no ta keda vigila. Como resultado algun hoben a cuminsa asocia cu otro hobennan cu aparentemente tawata parce inofensivo, asta cu bon manera y un aparencia atractivo, pero cu no tin ningun interes den normanan cristian. Esei a wordo ilustra den e caso di Tara, kende a hunga un di e rolnan principal den e video Hobennan Sa Puntra—Con Mi Por Haya Berdadero Amigo? Mescos cu Tara, cualkier hoben cristian cu asocia cu personanan cu no ta balora adoracion berdadero lo descubri tardi of tempran cu “no tin bienestar” cu mal amigo, manera e cantica ta bisa. Ta dura añanan largo di esfuerso pa desaroya bon custumbernan, pero den un rato di ora nan por bai perdi.

Sin duda, no ta facil pa hiba un bida cu ta refleha temor pa Dios. Pero, manera e cantica ta sigui bisa, si un hoben “den hubentud haci  Su boluntad./Y sirbi Dios cu spirito y berdad”, lo e traha un fundeshi solido pa berdadero exito. Y “goso ta crece pareu cu edad.” Lo bo realisa mas ainda cu bou di Yehova su cuido amoroso, nada por stroba bo di haci loke ta bon den su bista. Esei ta e manera pa bira un adulto madura y cu tin temor di Dios. Ademas, door di saca probecho sabiamente di educacion cristian cu bo ta ricibi, bo ta haya e oportunidad pa “duna Dios felicidad.” Cua otro privilegio mas grandi un hende lo por tin?—Proverbionan 27:11.

Pesei, hobennan, nunca lubida con balioso e educacion di Yehova y di bo mayornan cristian ta. Ta di spera cu nan gran amor lo conmove bo pa haci loke ta bon den Yehova su bista. E ora ei, mescos cu Hesucristo y e hoben fiel Timoteo, lo bo alegra bo Tata celestial y bo mayornan aki riba tera. Y si un dia abo mes bira un mayor, probablemente lo bo bai di acuerdo cu Angélica (menciona anteriormente) cu a bisa: “Si un dia mi haya un yiu, lo mi haci mi maximo esfuerso pa for di infancia inculca amor pa Yehova den su curason, pa esei ta e cos di mas importante den su bida.” No tin ningun duda cu e caminda recto cu ta hiba na bida eterno ta e herencia di mas balioso cu ta existi!

[Nota]