E Reto di Educa Yiu Awe

ANOCHI laat, doño di un restaurant ta preparando pa sera su negoshi pa e bai cas. Net e ora ei dos señora hunto cu un mucha ta drenta y ta pidi un cuminda. E doño ta haya gana di bisa nan cu e restaurant ta sera ya cu e ta hopi cansa, pero e ta dicidi di sirbi nan numa. Mientras cu e dos señoranan ta papia cu otro y ta come, e mucha ta core rond den e restaurant y ta laga buscuchi cai riba vloer y ta plecha nan. En bes di stop e, e mama ta hari. Finalmente ora e clientenan bai, e doño cu ta morto cansa tin cu limpia e desaster cu e mucha a laga atras.

Manera lo bo sa, e caso aki ta mustra cu den hopi famia criamento di yiu ta laga hopi di desea. E motibonan ta varia. Tin algun mayor ta laga nan yiunan haci y deshaci, pensando cu e yiunan mester lanta den un ambiente di libertad. Of e mayornan ta asina druk cu nan no ta dedica tempo pa duna nan yiunan e debido atencion y e entrenamento necesario. Algun mayor ta pensa cu e cos mas importante ta pa e mucha siña bon na scol. Pues, nan ta duna nan yiu libertad casi total tanten cu e ta haya bon punto na scol y ta logra bai un universidad renombra.

Di otro banda, tin otro hende ta bisa cu ta mayornan y sosiedad en general mester ahusta nan norma y balornan. Nan ta rasona cu muchanan ta haya nan envolvi den tur tipo di crimen, y cu violencia na scol ta aumentando keto bai. Pesei, un cabes di scol di brugklas na Seul, Republica di Corea, a enfatisa cu e cos di mas importante ta pa siña yiunan mehora nan personalidad. El a bisa: “Prome cu bo cuminsa duna un mucha conocemento, bo mester yud’e forma un bon caracter.”

Hopi mayor cu kier pa nan yiunan bai universidad y logra algo den bida no ta haci caso di palabranan di spiertamento. Si bo ta un mayor, ki clase di persona lo bo desea pa bo yiu ta? Un adulto cu un sentido di moralidad y responsabilidad? Un persona cu ta mustra consideracion na otro hende, cu ta adaptabel y cu tin un actitud positivo? Si ta asina, por fabor wak kico e siguiente articulo ta bisa relaciona cu esei.