“Nan A Nabega Bai Cyprus”

ASINA e buki di Echonan ta cuminsa su relato tocante e experencianan di e misioneronan cristian Pablo, Barnabas y Huan Marco, tempo cu nan a bishita Cyprus (Chipre) rond di aña 47 di nos era. (Echonan 13:4) E tempo ei, mescos cu awor, Cyprus tawatin un posicion sumamente strategico den e parti oost di Mediteraneo.

E Romanonan tawatin masha deseo di haya e isla, y el a bin cai bou di nan dominio na aña 58 prome cu nos era. Prome cu esei, Cyprus tawatin un historia hopi emocionante. E tawata bou di ocupacion di Fenicia, Grecia, Asiria, Persia y Egipto. Den Edad Medio, el a wordo ocupa pa e guereronan di e Crusadanan, pa e Franconan y pa e pueblo di Venecia, sigui pa e Turconan. Na aña 1914 e Britaniconan a tuma e isla over y a gobern’e te ora el a bira independiente na aña 1960.

Awendia ta turismo ta Cyprus su fuente principal di entrada, pero den tempo di Pablo, e isla tawata rico na recursonan natural, locual e Romanonan a probecha di dje pa yena e caha di Roma. Hende a descubri coper for di principio di e isla su historia, y ta ser calcula cu pa final di e periodo Romano, nan a saca 250.000 tonelada di coper. Sinembargo, e industria ei a caba cu gran parti di e selvanan di e isla cu nan a uza pa e proceso di refinacion. Pa  ora Pablo a yega e isla ya un parti grandi di su selvanan a disparce.

Cyprus bou di e Romanonan

Segun Encyclopædia Britannica, Julio Cesar a duna Cyprus na Egipto y, despues di dje, Marco Antonio a haci mescos. Sinembargo, bou di Emperado Augusto, e isla a bolbe bek den man di Roma y a ser goberna pa un proconsul—precis manera Lucas, e escritor di Echonan, ta menciona. E proconsul tawatin cu rindi cuenta directamente na Roma. Sergio Paulo tawata proconsul ora cu Pablo a predica einan.—Echonan 13:7.

Pax Romana, e pas internacional imponi pa Roma, a stimula expansion di e mina- y industrianan di Cyprus, locual a trece prosperidad den comercio. Dos cos mas cu a produci entrada adicional tawata e presencia di e legionnan Romano y e peregrinonan cu tawata basha bini na e isla pa honra Afrodita, e diosa protector di e isla. Consecuentemente, nan a construi camindanan nobo, hafnan y edificionan publico cu adornonan masha elabora. Nan a mantene Griego como e idioma oficial. Y hopi hende tawata adora e emperado Romano, y tambe Afrodita, Apolos y Zeus. E hendenan tawata biba den prosperidad y a gosa di un bida social y cultural rico.

Esaki tawata e ambiente cu Pablo a topa segun cu el a biaha door di Cyprus y a siña hende tocante Cristo. Sinembargo, cristianismo a keda introduci na Cyprus prome cu Pablo a yega einan. E relato di Echonan ta conta nos cu despues cu nan a mata e prome martir cristian, Esteban, algun di e prome cristiannan a hui bai Cyprus. (Echonan 11:9) Barnabas, compañero di Pablo, a nace na Cyprus, y ya cu e tawata conoce e isla bon, sin duda el a fungi como un excelente guia pa Pablo durante e campaña di predicacion aki.—Echonan 4:36; 13:2.

Repasando Pablo Su Biahe na Cyprus

No ta facil pa reconstrui Pablo su biahe na Cyprus. Sinembargo, arkeologonan tin un idea basta cla di e excelente structura di caretera di e periodo Romano. Debi na e rasgonan geografico di e isla, asta e careteranan moderno djawe por lo general tin cu sigui e mesun rutanan cu e prome misioneronan probablemente a tuma.

Pablo, Barnabas y Huan Marco a nabega for di Seleucia bai na e haf di Salamina. Dicon nan a bai Salamina, mientras cu e capital y haf principal tawata Pafos? Pa cuminsa, Salamina tawata situa na e costa oost, 200 kilometer so for di Seleucia, cu tawata na e continente. Aunke ta e Romanonan a haci Pafos e capital na luga di Salamina, toch Salamina a keda e centro cultural, educacional y comercial di e isla. Salamina tawatin un comunidad grandi di Hudiu, y e misioneronan a cuminsa “proclama e palabra di Dios den e snoanan [sinagoganan] di e Hudiunan.”—Echonan 13:5.

Awe, tur loke a resta di Salamina ta ruina. Pero asina mes descubrimentonan arkeologico  ta duna testimonio di e gloria y rikesa cu e stad ei tawatin un tempo. E plasa di mercado, cu tawata e centro di bida politico y religioso, tin e fama di ta probablemente e agora—of plasa Romano—di mas grandi cu nan a yega di coba saca den e region di Mediteraneo. Su ruinanan, cu ta data for di tempo di Cesar Augusto, a revela vloernan di mosaico cu diseñonan masha elabora, gimnasionan y un sistema impresionante di bañonan publico, un stadion y anfiteater, grafnan magnifico y un teater grandi cu por a duna asiento na 15.000 hende! Djis pega tin e ruinanan di un tempel mahestuoso di Zeus.

Pero Zeus no por a evita temblor di destrosa e stad. Un temblor grandi na aña 15 prome cu nos era a destrui gran parti di Salamina, aunke despues Augusto a laga reconstrui e. Na aña 77 di nos era, un temblor a bolbe destrui e stad, y nan a bolbe reconstrui e. Den siglo 4, un serie di temblor a destrosa Salamina, y nunca mas el a alcansa e gloria cu e tawatin. Pa Edad Medio, su haf a yena cu lodo y nan a bandon’e.

Bijbel no ta bisa con e hendenan di Salamina a reacciona riba Pablo su predicacion. Pero Pablo tawatin cu predica na otro comunidadnan tambe. Saliendo for di Salamina, e misioneronan por a scohe entre tres ruta principal: uno rumbo pa costa nort, crusando e seronan di Kyrenia; tawatin un ruta den direccion west atrabes di e yanura di Mesaoria y cu lo a crusa e parti principal di e isla; y un di tres ruta cu a sigui e costa suit.

Segun tradicion, Pablo a sigui e di tres ruta. Esei ta pasa door di cunucunan fertil di un tera cora unico. Un 50 kilometer den direccion suitwest, e ruta ta yega serca di e stad Larnaca prome cu e bira panort den direccion di interior di e isla.

“Door di Henter e Isla”

Poco despues e caretera ta yega na e antiguo stad Ledra. Awe bo ta haya construi riba e sitio aki e capital actual, Nicosia. No a resta ningun evidencia di e antiguo stad. Aunke paden di e murayanan Veneciano di siglo 16 cu ta rondona e centro di Nicosia, si tin un caya smal pero druk cu yama Caya Ledra. Nos no sa si Pablo a biaha pa Ledra. Bijbel simplemente ta bisa nos cu nan “a pasa door di henter e isla.” (Echonan 13:6) The Wycliffe Historical Geography of Bible Lands (Wycliffe Su Geografia Historico di Paisnan di Bijbel) ta bisa cu “probablemente esaki ta nifica [cu nan a haci] un recorido  basta completo di e comunidadnan Hudiu na Cyprus.”

Pablo definitivamente tawata interesa den alcansa mas tanto hende posibel na Cyprus. Pues, kisas for di Ledra el a cohe cabes pasuit y pasa door di Amathus y Kourion—dos stad cosmopolita grandi cu poblacionnan prospero.

Kourion tawata situa hopi halto for di lama riba barancanan cu tawata baha casi stret bai na e beachnan abou. E magnifico stad Griego-Romano aki a ser asota pa e mesun temblor cu a destrui Salamina na aña 77 di nos era. Tin ruinanan di un tempel dedica na Apolos cu ta data for di aña 100 di nos era. E stadion por a carga 6.000 espectador. Bo por mira cu hopi hende na Kourion tawatin un estilo di bida luhoso na e mosaiconan bunita cu ta decora e vloernan di asta villanan priva.

Rumbo pa Pafos

For di Kourion e ruta di bunita paisahe ta sigui den direccion west y ta pasa door di un region cu ta produci biña. Despues e caminda ta subi pocopoco te ora cu, inesperadamente, bo ta haya un bahada stijl cu hopi bocht door di e barancanan, y e ta sigui te ora bo yega abou na e beachnan di piedra chikito. Segun mitologia Griego, ta na e luga aki e diosa Afrodita a sali como resien naci for di lama.

Afrodita tawata e diosa mas popular di e diosnan Griego na Cyprus y te cu siglo 2 di nos era nan tawata ador’e cu fervor. E centro di adoracion di Afrodita tawata na Pafos. Tur temporada di lente nan tawata tene un fiesta grandi einan na su honor. Peregrinonan tawata bin Pafos pa e festividadnan for di Asia Menor, Egipto, Grecia y asta for di Persia. Tempo cu Cyprus tawata bou di dominio di e dinastia di Tolomeo, e habitantenan di Cyprus a siña adora e Faraonan.

Pafos tawata e capital Romano di Cyprus y e asiento di e proconsul, y e stad tawatin e privilegio di traha moneda di coper. Pafos tambe a ser destrui pa e temblor di aña 15 prome cu nos era, y mescos cu den caso di Salamina, Augusto a percura fondo pa reconstrui e stad. Cobamentonan a revela cu den prome siglo e hendenan rico di Pafos tawatin un estilo di bida luhoso; e stad tawatin cayanan hancho, villanan priva masha rico dorna, scolnan di muziek, gimnasionan y un anfiteater.

Esaki ta e Pafos cu Pablo, Barnabas y Huan Marco a bishita, y ta akinan e proconsul Sergio Paulo—“un homber inteligente”—“tawata desea di tende e palabra di Dios” apesar di e oposicion feros di e mago Elimas. E proconsul ‘a keda masha straña di e siñansa di Yehova.’—Echonan 13:6-12.

Despues cu e misioneronan a completa nan actividad di predica na Cyprus cu exito, nan a sigui cu nan obra den Asia Menor. E prome biahe aki di misionero cu Pablo a haci tawata un logro significativo den e plamamento di cristianismo berdadero. E buki St. Paul’s Journeys in the Greek Orient (E Biahenan di San Pablo den Oriente Griego) ta yam’e “e berdadero principio di e mision cristian y di . . . Pablo su carera como misionero.” E buki ta agrega: “Ubica na e punto di encuentro di rutanan di lama cu ta hiba na Siria, Asia Menor y Grecia, Cyprus a parce e prome etapa inevitabel di un campaña di misionero.” Pero esei tawata solamente e prome etapa. Binti siglo despues, e trabou di misionero cristian ta sigui, y di berdad nos por bisa cu e bon nobo di e Reino di Yehova literalmente a yega “na e parti mas aleha di mundo.”—Echonan 1:8.

[Mapanan na pagina 20]

(Pa e texto den su formato completo , wak e publicacion)

CYPRUS

NICOSIA (Ledra)

Salamina

Pafos

Kourion

Amathus

Larnaca

SERONAN DI KYRENIA

YANURA DI MESAORIA

SERONAN DI TROODOS

[Plachi na pagina 21]

Na Pafos Pablo, yena cu spirito santo, a ciega e mago Elimas