Nos Por Culpa Dios pa Nos Problemanan?

TEMPO cu Marion su yiu mohe adulto a sufri un lesion celebral serio, Marion a haci loke hopi di nos lo a haci. * El a resa na Dios pa yudansa. “Mi no ta corda cu mi a yega di sinti mi asina impotente y so”, Marion ta bisa. Despues, e condicion di su yiu mohe a empeora, y Marion a cuminsa cuestiona Dios. El a puntra su mes: “Pakico e cos aki ta pasa?” E no por a compronde con un Dios amoroso y interesa den hende por a laga su yiu mohe na caya.

E experencia di Marion no ta algo unico. Hopi hende rond mundo a yega di sinti como si fuera Dios a laga nan na caya na e momentonan cu mas nan tawatin mester di dje. Por ehempel, despues cu nan a asesina un nieto di Lisa, el a bisa: “Te ainda mi no por caba di compronde dicon Dios ta permiti cos malo sosode. . . . Mi no a perde tur mi fe den Dios; pero un cos ta sigur, e no a keda mes fuerte.” Mescos tambe, despues cu un señora a perde su yiu chikito tragicamente, el a bisa: “Mi no a haya consuelo di Dios. E no a duna mi ningun señal cu e ta interesa den mi ni cu e tin compasion cu mi.” Anto el a agrega: “Lo mi no pordona Dios nunca mas.”

Otro hende ta haya un rencor contra Dios ora nan mira e mundo rond di nan. Nan ta mira paisnan asota pa pobresa y hamber, refugiadonan di guera sin ningun speransa, gran cantidad di mucha huerfano door di AIDS y miyones di hende cu ta sufri di otro enfermedadnan. En bista di esakinan y otro tragedianan similar, hopi hende ta culpa Dios pasobra aparentemente e no ta haci nada.

Sinembargo, e berdad ta cu nos no por culpa Dios pa e problemanan cu ta asota humanidad. De echo, tin bon motibo pa kere cu pronto Dios lo alivia e famia humano di tur sufrimento. Nos ta invita bo pa lesa e siguiente articulo y mira cu di berdad Dios ta interesa den nos.

[Nota]