“Siña Nan pa Cumpli cu Tur Loke Mi A Ordena Boso”

“Pesei, bai y haci tur e nacionnan disipel . . . siña nan pa cumpli cu tur loke mi a ordena boso.”—MATEO 28:19, 20.

1. Ki combersacion a tuma luga entre disipel Felipe y un homber di Etiopia?

E HOMBER di Etiopia a biaha bai te Herusalem. Einan el a rindi adoracion na e Dios cu e tawata stima, Yehova. Evidentemente, el a stima Dios su Palabra inspira tambe. Den su garoshi riba caminda pa cas, e tawata lesando un copia di e buki di profeta Isaias ora cu Felipe, un disipel di Cristo, a top’e. Felipe a puntra e Etiope: “Bo ta compronde loke bo ta lesa?” E homber a contesta: “Con mi por compronde, si un hende no guia mi?” E ora ei Felipe a yuda e studiante sinsero aki di e Scritura pa bira un disipel di Cristo.—Echonan 8:26-39.

2. (a) Den ki manera e contesta cu e Etiope a duna ta significativo? (b) Ki preguntanan relaciona cu Cristo su encargo pa haci disipel nos lo considera?

² E contesta di e Etiope ta remarcabel. El a bisa: “Con mi por compronde, si un hende no guia mi?” Si, e tawatin mester di guia, un hende pa mustr’e e caminda. Riba su mes e comentario aki ta un ehempel cu ta mustra e importancia di un instruccion spesifico cu Hesus a inclui den su encargo pa haci disipel. Cua instruccion? Pa haya e contesta, laga nos sigui considera e palabranan di Hesus cu ta para skirbi na Mateo capitulo 28. E articulo anterior a consentra riba e preguntanan dicon? y na unda? Nos lo considera awor dos pregunta mas relaciona cu Cristo su mandamento pa haci disipel—kico? y ki tempo?

“Siña Nan pa Cumpli cu Tur Loke Mi A Ordena”

3. (a) Con un persona ta bira disipel di Hesucristo? (b) Haci disipel ta inclui siña hende kico?

³ Kico nos mester siña hende pa yuda nan bira disipel di Cristo? Hesus a manda su siguidonan: “Bai y haci tur e nacionnan disipel di mi, y batisa nan den nomber di e Tata y di e Yiu y di e spirito santo, y siña nan pa cumpli cu tur loke mi a ordena boso.” (Mateo 28:19, 20) Pues, nos tin cu siña hende loke Cristo a ordena. * Pero kico nos por haci pa ta sigur cu un persona cu nos siña e mandamentonan di Hesus, no solamente lo bira disipel sino tambe keda disipel? Un factor clave nos por mira den e palabranan cu Hesus a scohe cuidadosamente. Tuma nota cu e no a djis bisa: ‘Siña nan tur loke mi a ordena boso.’ Mas bien, el a bisa: “Siña nan pa cumpli cu tur loke mi a ordena boso.” (Mateo 19:17) Kico esei ta encera?

4. (a) Kico ta nifica warda un mandamento? (b) Ilustra con nos ta siña un hende warda Cristo su mandamentonan.

⁴ Warda un mandamento ta nifica obedece of cumpli cu loke un hende ta ordena bo. Pues anto, con nos ta siña un hende warda of obedece e cosnan cu Cristo a ordena? Wel, pensa  riba e manera cu un dunado di rijles ta siña su studiantenan cumpli cu lei di trafico. E instructor kisas ta siña su studiantenan e teoria di e reglanan di trafico na mesa. Sinembargo, pa siña su studiantenan con pa obedece e reglanan ei, e tin cu guia e studiantenan segun cu nan ta core auto den trafico y ta lucha pa pone na practica loke nan a siña. Di igual manera, ora nos ta studia Bijbel cu hende, nos ta siña nan loke Cristo a ordena, su mandamentonan. Sinembargo, tambe nos tin cu guia e studiantenan segun cu nan ta haci esfuerso pa aplica e instruccionnan di Cristo den nan bida diario y den sirbishi. (Huan 14:15; 1 Huan 2:3) Pues, pa cumpli plenamente cu Cristo su mandamento di haci disipel ta rekeri pa nos ta maestro y tambe guia. Den e manera ei nos ta imita e ehempel cu Hesus y Yehova mes a pone.—Salmo 48:14; Revelacion 7:17.

5. Dicon un persona cu nos ta studia Bijbel cu ne kisas ta basila pa obedece Cristo su mandamento di haci disipel?

⁵ Siña hende cumpli cu loke Hesus a ordena ta inclui yuda nan obedece e mandamento pa haci disipel. Pa algun persona cu nos ta studia Bijbel cu ne, esei kisas ta un tarea dificil. Asta si antes nan tawata miembro activo di un iglesia di cristiandad, ta improbabel cu nan exmaestronan religioso a siña nan pa bai haci disipel. Algun lider religioso ta admiti francamente cu pa loke ta siña nan tou predica e evangelio, iglesianan di cristiandad a faya barbaramente den esei. E comentarista biblico John R. W. Stott, comentando riba Hesus su mandamento pa bai den mundo y yuda tur clase di hende bira disipel, a bisa: “E echo cu nos no a obedece e implicacionnan di e mandamento aki ta e debilidad di mas grandi di cristiannan evangelico den e actividad di evangelismo djawe.” El a agrega: “Nos tin e tendencia di proclama e mensahe for di un distancia. Tin biaha nos parce e hendenan cu ta para safe na canto y ta grita conseho na hende cu ta hogando. Nos no ta bula den awa pa scapa nan. Nos tin miedo di muha nos curpa.”

6. (a) Ora di yuda un studiante di Bijbel, con nos por imita e ehempel di Felipe? (b) Con nos por mustra nos interes ora un studiante di Bijbel ta cuminsa participa den e trabou di predica?

⁶ Si un persona cu nos ta studia Bijbel cu ne tawata antes parti di un religion di cua su miembronan tin ‘miedo di muha nan curpa’, kisas ta un reto pa e persona vence su miedo di awa, na moda di papia, y obedece Cristo su mandamento di haci disipel. Lo e tin mester di yudansa. Pues, nos mester tin pasenshi segun cu nos ta dun’e e tipo di instruccion y  guia cu ta profundisa su comprondemento y ta motiv’e na actua, mescos cu e siñansanan di Felipe a ilumina e Etiope y a motiv’e pa batisa. (Huan 16:13; Echonan 8:35-38) Ademas, nos deseo di siña studiantenan di Bijbel cumpli cu e mandamento di haci disipel ta motiva nos pa ta na nan lado pa guia nan ora nan ta dal nan prome pasonan den e predicacion di Reino.—Eclesiastes 4:9, 10; Lucas 6:40.

“Tur Loke Mi A Ordena”

7. Siña hende “cumpli cu tur loke” Hesus a ordena ta encera siña nan cua mandamento?

⁷ Nos no ta limita nos mes na solamente siña disipelnan nobo pa haci disipel. Hesus a instrui nos pa siña hende “cumpli cu tur loke” el a ordena. Esei sigur ta encera e dos mandamentonan di mas grandi—stima Dios y stima bo prohimo. (Mateo 22:37-39) Con nos por siña un disipel nobo pa cumpli cu e dos mandamentonan ei?

8. Ilustra con por siña un disipel nobo pa cumpli cu e mandamento di mustra amor.

⁸ Pensa un biaha mas riba e ilustracion di e persona cu ta siña core auto. Segun cu e persona ei ta core den trafico cu e instructor banda di dje, e ta siña core no solamente door di scucha su instructor sino tambe door di observa otro chauffeur. Por ehempel, e instructor kisas ta mustr’e un chauffeur cu bondadosamente ta permiti un otro auto drenta su dilanti den trafico; of un chauffeur cu cortesmente ta dim su lusnan di auto pa e no blind e autonan cu ta bin; of un chauffeur cu boluntariamente ta ofrece pa yuda un conoci kende su auto a daña. E ehempelnan ei ta siña e studiante algun les balioso cu e por aplica ora e ta core. Asina tambe, un disipel nobo cu ta riba e caminda cu ta hiba na bida ta siña no solamente for di su maestro, sino tambe for di e bon ehempelnan cu e ta mira den congregacion.—Mateo 7:13, 14.

9. Con un disipel nobo ta siña kico ta nifica cumpli cu e mandamento di mustra amor?

⁹ Por ehempel, un studiante di Bijbel kisas ta observa con un mayor soltero ta haci hopi esfuerso pa bin Salon di Reino cu su yiunan chikito. Podise e studiante ta mira un persona deprimi cu fielmente ta bin reunion apesar di su lucha cu depresion, of un biuda di edad cu ta pasa busca otro rumannan di edad cu su auto pa trece nan na tur reunion di congregacion, of un teenager cu ta yuda limpia Salon di Reino. E studiante di Bijbel kisas ta tuma nota di un anciano di congregacion cu fielmente ta hiba delantera den sirbishi di veld apesar cu e tin hopi responsabilidad di congregacion. E por topa un Testigo cu ta incapasita y cu no por sali for di cas, pero cu ta un fuente di animacion spiritual pa ken cu bishit’e. E studiante por observa un pareha cu ta haci cambionan drastico den nan bida pa nan por bai cuida nan mayornan di edad. Door di observa cristiannan asina bondadoso, servicial y confiabel, e disipel nobo ta siña mediante nan ehempel kico ta nifica obedece Cristo su mandamento di stima Dios y stima bo prohimo, specialmente bo rumannan den fe. (Proverbionan 24:32; Huan 13:35; Galationan 6:10; 1 Timoteo 5:4, 8; 1 Pedro 5:2, 3) Den e manera aki, cada miembro di e congregacion cristian por—y lo mester—ta un maestro y un guia.—Mateo 5:16.

“Te na Fin di Mundo”

10. (a) Pa cuanto tempo nos lo sigui haci disipel? (b) Ki ehempel Hesus a pone pa loke ta cumpli cu asignacionnan?

¹⁰ Te na ki tempo nos lo mester sigui cu e trabou di haci disipel? Durante henter e periodo di e conclusion di e sistema di cosnan te na fin. (Mateo 28:20) Nos lo por cumpli cu e aspecto aki di e tarea cu Hesus a encarga na nos? Como congregacion mundial, nos ta dicidido pa haci esei. Durante e añanan cu a pasa, gustosamente nos a uza nos tempo, nos energia y nos recursonan pa busca hende cu “e disposicion corecto pa bida eterno.” (Echonan 13:48, NW) Actualmente, Testigonan di Yehova na nivel mundial ta dedica un promedio di mas  cu tres miyon ora pa dia, tur dia di aña, na e actividad di predica e Reino y haci disipel. Nos ta haci esei pasobra nos ta sigui e ehempel di Hesus. El a declara: “Mi cuminda ta pa haci e boluntad di esun cu a manda mi, y pa cumpli cu su trabou” [of, “completa e trabou”, BPK]. (Huan 4:34) Esei ta loke nos tambe ta desea sinseramente. (Huan 20:21) Nos kier haci mas cu djis cuminsa cu e trabou confia na nos; nos kier cumpli cu ne te na final.—Mateo 24:13; Huan 17:4.

11. Kico a sosode cu algun di nos rumannan cristian, y kico nos mester puntra nos mes?

¹¹ Sinembargo, ta tristo pa mira cu algun di nos rumannan den fe a bira spiritualmente debil y como resultado, nan a baha man of stop di cumpli cu Cristo su mandamento di haci disipel. Tin un manera cu nos por yuda nan renoba nan asociacion cu e congregacion y reanuda nan participacion den e trabou di haci disipel? (Romanonan 15:1; Hebreonan 12:12) E manera cu Hesus a yuda su apostelnan ora cu nan tawata temporalmente den un condicion debil ta indica kico nos por haci awe.

Mustra Interes

12. (a) Kico e apostelnan a haci poco prome cu Hesus su morto? (b) Con Hesus a trata cu su apostelnan apesar cu nan a demostra debilidadnan serio?

¹² Na fin di Hesus su ministerio riba tera, ora cu su morto tawata serca, e apostelnan “a bandon’e y a hui bai.” Manera Hesus a predeci, nan a “wordo plama, cada un pa su mes cas.” (Marco 14:50; Huan 16:32) Con Hesus a trata cu su compañeronan spiritualmente debil? Poco despues di su resureccion, Hesus a bisa algun di su siguidonan: “No tene miedo; bai y bisa mi rumannan pa nan bai Galilea, y aya nan lo mira mi.” (Mateo 28:10) Aunke e apostelnan a demostra debilidadnan serio, toch Hesus a sigui yama nan “mi rumannan.” (Mateo 12:49) E no a perde confiansa den nan. Di e manera aki, Hesus a demostra di ta misericordioso y dispuesto pa pordona, mescos cu Yehova ta misericordioso y dispuesto pa pordona. (2 Reinan 13:23) Con nos por imita Hesus?

13. Con nos mester mira rumannan cu a bira spiritualmente debil?

¹³ Nos mester tin interes profundo den e rumannan cu a baha man of stop di participa den sirbishi. Ainda nos ta corda e obranan di amor cu e rumannan ei a haci den pasado, tin di nan kisas pa varios decada. (Hebreonan 6:10) Nos ta echt sinti falta di nan compañerismo. (Lucas 15:4-7; 1 Tesalonicensenan 2:17) Pero con nos por expresa nos interes den nan?

14. Imitando Hesus, con nos por yuda un persona debil?

 ¹⁴ Hesus a bisa e apostelnan desanima cu nan mester a bai Galilea y cu nan lo a mir’e einan. En realidad, Hesus a invita nan pa asisti na un reunion special. (Mateo 28:10) Mescos awe, nos ta anima esnan cu a bira spiritualmente debil pa asisti na e reunionnan di e congregacion cristian, y kisas nos tin cu anima nan mas cu un biaha pa haci esei. Den caso di e apostelnan, e invitacion a duna fruta, pasobra “e diesun disipelnan a sali bai Galilea, na e sero cu Hesus a indica nan pa bai.” (Mateo 28:16) Ki un goso nos ta sinti ora cu rumannan debil tambe reacciona riba nos invitacion caloroso y cuminsa asisti na reunionnan cristian!—Lucas 15:6.

15. Con nos por imita Hesus su ehempel ora di duna bonbini na esnan debil cu bin reunion?

¹⁵ Con nos lo reacciona ora un cristian debil yega Salon di Reino? Wel, kico Hesus a haci ora cu el a mira su apostelnan, kende nan fe temporalmente a bira debil, na e luga di reuni cu el a palabra? “Hesus a hala serca y a papia cu nan.” (Mateo 28:18) E no a para na un distancia y keda wak nan, sino a bai serca nan. Imagina bo con alivia e apostelnan lo mester a sinti ora cu Hesus a tuma e iniciativa ei! Laga nos tambe tuma e iniciativa y duna un bonbini caloroso na esnan spiritualmente debil cu ta haci esfuerso pa bolbe na e congregacion cristian.

16. (a) Kico nos por siña for di e manera cu Hesus a trata cu su siguidonan? (b) Con nos por refleha e manera cu Hesus ta mira rumannan debil? (Wak nota na pia di pagina.)

¹⁶ Kico mas Hesus a haci? Na prome luga, el a anuncia: “Tur autoridad a wordo duna na mi.” Na di dos luga, el a duna un asignacion: ‘Bai y haci disipel.’ Na di tres luga, el a priminti: “Mi ta cu boso semper.” Pero bo a tuma nota di loke Hesus no a haci? E no a scual e disipelnan pa e fayonan cu nan a comete ni pa e dudanan cu nan tawatin. (Mateo 28:17) E metodo ei tawata efectivo? Si. No a tarda masha cu e apostelnan atrobe tawata “siña hende y predica.” (Echonan 5:42) Door di imita Hesus su ehempel encuanto con pa mira y trata rumannan debil, nos tambe por tin resultadonan similar den nos congregacion local. *—Echonan 20:35.

“Mi Ta cu Boso Semper”

17, 18. Ki pensamento fortalecedor tin den e palabranan di Hesus: “Mi ta cu boso semper”?

¹⁷ “Mi ta cu boso semper”, ta e ultimo palabranan di e tarea cu Hesus a duna. E palabranan aki ta contene un pensamento fortalecedor  pa tur cristian cu ta haci esfuerso pa cumpli cu Cristo su mandamento di haci disipel. Nos no tin motibo di tene miedo ni maske ki oposicion enemigonan bin cu ne contra e predicacion di Reino, ni maske ki forma di calumnia nan lansa contra nos. Dicon no? Hesus, nos Lider, kende tin ‘tur autoridad den shelo y riba tera’, ta cu nos pa apoya nos!

¹⁸ Hesus su promesa: “Mi ta cu boso semper”, tambe ta un fuente di gran consuelo. Segun cu nos ta haci esfuerso pa cumpli cu Cristo su mandamento di haci disipel, nos tin dianan di goso pero tambe dianan di tristesa. (2 Cronicanan 6:29) Algun di nos ta pasa den periodonan di tristesa segun cu nos ta sufri pa motibo di morto di un ser keri. (Genesis 23:2; Huan 11:33-36) Otro rumannan ta lucha cu biehes, e periodo cu nan salu y forsa ta bai atras. (Eclesiastes 12:1-6) Tambe tin rumannan ta confronta periodonan di depresion pisa. (1 Tesalonicensenan 5:14) Y mas y mas di nos ta lucha cu contratiemponan economico severo. No obstante, apesar di e dificultadnan ei, nos tin exito den nos ministerio pasobra Hesus ta cu nos “semper”, incluso durante e dianan di mas scur di nos bida.—Mateo 11:28-30.

19. (a) E asignacion cu Hesus a duna pa haci disipel ta contene ki instruccionnan? (b) Kico ta yuda nos cumpli cu Cristo su asignacion?

¹⁹ Manera nos a mira den e articulo aki y esun anterior, e asignacion cu Hesus a duna pa haci disipel ta encera tur aspecto di e tarea. Hesus a bisa nos dicon y na unda nos tin cu cumpli cu su mandamento. Tambe el a bisa nos kico nos tin cu siña hende y te ki tempo nos tin cu hacie. Ta berdad cu ta dificil pa cumpli cu e gran asignacion aki. Pero cu e respaldo di Hesus su autoridad y cu su presencia na nos lado, nos por logr’e! Bo no ta di acuerdo?

[Nota]

Con Lo Bo Contesta?

• Con nos ta siña hende cumpli cu loke Hesus a ordena?

• Ki lesnan un disipel nobo por siña for di otro rumannan den congregacion?

• Kico nos por haci pa yuda esnan cu a bira spiritualmente debil?

• Ki fortalesa y consuelo nos por saca for di Hesus su promesa: “Mi ta cu boso semper”?

[Preguntanan di Estudio]

[Plachi na pagina 15]

Nos mester ta maestro y tambe guia

[Plachinan na pagina 17]

Un disipel nobo ta siña lesnan balioso for di e ehempel di otro rumannan