Un Carta pa Noe

“APRECIABEL Noe, diferente biaha mi a lesa tocante bo den Bijbel y con bo a construi un arca den cua abo y bo famia a sobrevivi e Dilubio.”

Asina un carta skirbi door di un hobensita di 15 aña cu yama Minnamaria a cuminsa. El a entrega e carta pa participa den un competencia di skirbimento entre studiantenan di 14 pa 21 aña. E competencia a ser organisa door di servicio postal Finlandes, e Federacion di Maestronan Finlandes di Idioma Materno, y e Sosiedad di Literatura Finlandes. E participantenan mester a skirbi un carta basa riba un buki. Nan por a dirigi nan carta na e escritor di e buki of na un personahe den dje. Di tur e cartanan cu a ser entrega, e maestronan a scohe mas cu 1.400 di nan y a manda nan pa e hurado di e competencia. Anto e hurado a scohe esun miho, despues dies pa e di dos luga y dies mas pa e di tres luga. Minnamaria tawata sumamente contento cu su carta tawata den e di tres grupo.

Pakico Minnamaria, un studiante teenager, a skirbi su carta pa Noe, un homber cu a biba rond di 5.000 aña pasa? E ta bisa: “E prome cos cu a dal na mi mente tawata Bijbel. Mi conoce personahenan di Bijbel hopi bon. Mi a lesa asina tanto tocante nan cu, pa ami, ta como si fuera nan ta na bida. Mi a scohe Noe pasobra su bida tawata hopi fasinante y distinto di mi.”

E carta cu Minnamaria a skirbi pa Noe ta termina cu e siguiente palabranan: “Ainda bo ta un ehempel di fe y obediencia. Bo bida ta anima tur persona cu ta lesa Bijbel pa biba nan fe.”

E carta aki di un hoben lesado di Bijbel ta un bon ehempel di cu en berdad Bijbel “ta bibo y activo” den bida di tanto hende hoben como hende grandi.—Hebreonan 4:12.