E Milagernan di Hesus Realidad of Fantasia?

“NAN a trece serca dje [Hesucristo] hopi hende cu tawata posei pa demoño; y cu un palabra el a saca e spiritonan afo y a cura tur cu tawata malo.” (Mateo 8:16) “El [Hesus] a lanta, el a reprende e biento y a bisa e lama: ‘Silencio, keda keto!’ Y e biento a cai y a bira completamente calmo.” (Marco 4:39) Kico bo ta pensa di e declaracionnan aki? Bo ta kere cu tawata trata aki di susesonan real y historico, of bo ta haya cu nan ta puro cuenta y fantasia?

Awe hopi hende ta duda seriamente cu si di berdad e milagernan di Hesus a tuma luga. Den e era aki di avancenan cientifico riba tereno di telescop y microscop, di exploracion di espacio y di ingenieria genetico, hende no ta mucho inclina pa kere informenan di milager y fenomenonan sobrehumano.

Tin hende ta haya cu relatonan tocante milager ta cuenta y fantasia. Segun e escritor di un buki cu supuestamente ta explora e “berdadero” Hesus, e cuentanan tocante Cristo su milagernan ta nada mas cu “propaganda” pa promove cristianismo.

Otronan ta mira e milagernan di Hesus como puro engaño y ta bai asina leu di asta acusa Hesus di tawata un impostor. Segun Justino Martir di siglo 2 di nos era, esnan cu tawata  cuestiona Hesus a “asta tribi yam’e un mago y un gañado di pueblo.” Algun hende ta pretende cu Hesus “no a haci su milagernan como un profeta Hudiu, sino como un mago cu a ser instrui den tempelnan pagano.”

Definicion di Loke Ta Imposibel

Kisas bo ta sinti cu tras di e dudanan ei tin un motibo fundamental pakico hende no ta mucho inclina pa kere den milager. Nan ta haya cu ta simplemente dificil, asta imposibel, pa acepta e idea cu ta forsanan sobrehumano por a produci e milagernan ei. Un persona hoben cu a bisa cu e ta un agnostico a laga sa: “Simplemente no ta existi milager. Punto!” Anto el a cita e palabranan di e filosofo Escoces di siglo 18, David Hume, kende a skirbi: “Un milager ta un violacion di e leinan di naturalesa.”

Di otro banda, tin hopi hende cu lo no kier para ariba cu un cierto fenomeno ta imposibel. The World Book Encyclopedia ta bisa cu un milager ta “un suseso cu nos no por splica a base di e leinan di naturalesa cu nos conoce.” Cu e definicion ei, biahenan espacial, comunicacion sin kabel of wireless y nabegacion via satellite lo tawata “milager” pa mayoria hende di apenas un siglo pasa. Pesei, sigur no ta sabi pa descarta milager como algo imposibel djis pasobra nos no por splica nan a base di nos conocemento actual.

Kico un analisis di algun di e detayenan biblico rond di e milagernan atribui na Hesucristo ta revela? Hesus su milagernan ta realidad of fantasia?