Uza Metanan Spiritual pa Glorifica Bo Creador

“ORA un hende no sa cua haf ta su destinacion, no ta importa ki direccion biento ta supla.” E palabranan aki, atribui na un filosofo Romano di prome siglo, ta mustra un berdad bon cla—pa bo por tin un direccion den bida, ta importante pa pone meta.

Bijbel ta duna ehempel di cierto personanan cu semper a traha cu meta. Noe a traha rond di 50 aña pa “prepara un arca pa salbacion di e hendenan di su cas.” Profeta Moises “tawatin su bista riba e recompensa.” (Hebreonan 11:7, 26) Dios a duna Hosue, susesor di Moises, e meta pa conkista e tera di Canan.—Deuteronomio 3:21, 22, 28; Hosue 12:7-24.

Den e prome siglo di nos era, e palabranan di Hesus di cu “e evangelio aki di e reino lo wordo predica den henter mundo”, sin duda tawatin hopi influencia riba e metanan spiritual di apostel Pablo. (Mateo 24:14) Pablo a hunga un papel importante den yuda establece un serie di congregacion cristian rond Asia Menor y te den Europa. Loke a stimul’e tawata e mensahenan personal y visionnan di parti di Señor Hesus, incluso e tarea cu Hesus a dun’e pa “hiba [Hesus su] nomber na e paganonan.”—Echonan 9:15; Colosensenan 1:23.

Si, atrabes di historia Yehova su sirbidonan a fiha metanan eleva y a cumpli cu nan pa e gloria di Dios. Con nos awe por fiha metanan spiritual? Ki metanan nos por haci esfuerso pa alcansa, y ki pasonan practico nos por dal pa alcansa nan?

E Motivacion Corecto Ta Importante

Nos por pone meta den tur area di bida, y den e mundo aki tambe hopi hende tin nan metanan. Sinembargo, metanan teocratico no ta mescos cu ambicionnan mundano. E motivacion principal tras di hopi meta den mundo ta e obsesion pa yega na rikesa y un hamber insasiabel pa haya puesto y poder. Lo ta un gran ekibocacion pa sigui e meta di haya poder y prominencia. Metanan cu ta trece gloria pa Yehova Dios ta directamente conecta cu nos adoracion na dje y cu interesnan di Reino. (Mateo 6:33) E metanan ei ta ser motiva pa nos amor pa Dios y pa prohimo, y nan proposito ta pa sirbi Dios na un manera deboto.—Mateo 22:37-39; 1 Timoteo 4:7, NW.

Ora nos ta pone metanan spiritual—sea pa haya mas privilegio di sirbishi of pa bai dilanti spiritualmente—y ta traha pa alcansa nan, nos motivacion mester ta puro. Y toch, tin biaha, ni ora nos tin e motivacion corecto, nos no ta alcansa nos metanan. Con nos por fiha metanan y aumenta e chens di alcansa nan?

Nos Mester Tin un Deseo Fuerte pa Alcansa Meta

Tuma nota con Yehova a realisa creacion di universo. Cu e palabranan “tawata atardi y tawata mainta”, Yehova a separa e periodonan di creacion cu a sigui tras di otro. (Genesis 1:5, 8, 13, 19, 23, 31) Na comienso di cada periodo di creacion, e tawata sa precis kico ta su meta pa e dia ei. Y Dios a cumpli cu su proposito pa crea cosnan. (Revelacion 4:11) E patriarca Job a bisa: “Loke [Yehova] su alma ta desea, ta esei e ta haci.” (Job 23:13) Cu gran satisfaccion Yehova lo a mira “tur loke el a traha” y declara cu e tawata “masha bon”!—Genesis 1:31.

Pa nos metanan bira realidad, nos tambe mester tin un deseo fuerte pa alcansa nan. Kico lo yuda nos desaroya un deseo intenso asina? Asta tempo cu tera tawata sin forma y  bashi, Yehova por a premira e resultado final—un bunita hoya den espacio cu ta trece gloria y honor p’e. Asina tambe, ora nos medita riba e resultadonan y e beneficionan cu un cierto meta cu nos alcansa lo trece cu ne, nos deseo pa logr’e ta bira mas fuerte. Esei tawata e experencia di Tony di 19 aña. Nunca el a lubida e prome impresion cu el a haya dia el a bishita un oficina di sucursal di Testigonan di Yehova na West Europa. Djei padilanti, e pregunta cu a keda den mente di Tony tawata: ‘Con lo ta pa biba y sirbi den un luga asina?’ Nunca Tony a stop di pensa riba e posibilidad ei, y el a sigui traha pa logra e meta ei. Anto, el a keda masha contento ora cu varios aña despues nan a aproba su solicitud pa sirbi na e sucursal!

Ora nos asocia cu otro hende cu ya a alcansa cierto meta caba, esei tambe por crea den nos un deseo pa alcans’e. Jayson, di 30 aña, no tawata gusta traha den sirbishi di veld tempo cu e tawatin 13 pa 14 aña. Pero despues cu el a caba scol secundario, el a cuminsa traha yen di entusiasmo como pionero, y asina a bira un proclamado di Reino di tempo completo. Kico a yuda Jayson cultiva e deseo pa traha pionero? E ta contesta: “Dos cos cu a haci un impacto grandi riba mi tawata: combersa cu pioneronan y traha cu nan den sirbishi.”

Pone Nos Metanan Riba Papel Tambe Ta Yuda

Un idea vago ta bira mas cla y ta haya mas forma ora nos expres’e cu palabra. Salomon a bisa cu palabranan apropiado por ta manera un pui cu por guia nos den cierto direccion. (Eclesiastes 12:11) Ora e palabranan ei ta skirbi, nan ta haci un impresion profundo riba mente y curason. Ta pa e motibo ei mes Yehova a manda e reinan di Israel skirbi un copia personal di e Lei. (Deuteronomio 17:18) Pesei, nos lo kier pone nos metanan y tambe e strategia pa alcansa nan riba papel, hunto cu e obstaculonan cu nos ta spera di topa y e maneranan pa supera nan. Lo por ta bon tambe pa identifica e temanan riba cua nos mester haya mas conocemento, e habilidadnan cu nos tin cu domina y e personanan cu por yuda nos y sostene nos.

Pa Geoffrey, un pionero special di hopi aña den un teritorio isola den un pais Asiatico, e metanan spiritual cu el a fiha pa su mes tawata manera un calmante p’e. Morto inespera di su casa tawata un sla duro p’e. Despues di un periodo den cua Geoffrey mester a custumbra cu su situacion, el a dicidi di ocupa su mes completamente cu su trabou di pionero door di fiha meta. El a pone su plannan riba papel, anto cu yudansa di oracion el a pone e meta pa e cuminsa tres studio di Bijbel nobo prome cu fin di luna. Tur dia e tawata repasa su actividad y cada dies dia, e tawata check su progreso. El a alcansa su meta? Si, cu alegria el a raporta cuater studio di Bijbel nobo!

Fiha Metanan di Termino Cortico pa Indica Logro

Na prome instante algun meta por parce demasiado dificil pa alcansa. Pa Tony, menciona anteriormente, sirbi na un oficina di sucursal di Testigonan di Yehova, a parce un soño inalcansabel. Esei ta pa motibo cu su estilo di bida no tawata masha di gaba, ni e no a ni dedica  su bida na Dios. Pero Tony a dicidi di drecha su bida di acuerdo cu Yehova su normanan y a pone e meta di cualifica pa bautismo. Despues cu el a alcansa e meta ei, el a pone meta pa traha pionero ausiliar y pionero regular, marcando riba su kalender e fechanan pa e cuminsa. Despues cu el a traha pa un tempo como pionero, sirbishi na un oficina di sucursal no tawata parce un meta dje irealistico ei.

Ta bon pa nos tambe dividi nos metanan di termino largo den un par di meta di termino cortico. Segun cu nos ta alcansa e metanan di termino cortico, nan ta indica cu nos ta riba caminda pa alcansa e meta di termino largo. Door di evalua regularmente nos progreso relaciona cu e metanan aki, nos mente ta keda enfoca riba nos meta di termino largo. Oracion constante na Yehova tocante nos plannan tambe lo yuda nos keda riba e caminda pa alcansa nos meta. Apostel Pablo a conseha nos pa “haci oracion sin stop.”—1 Tesalonicensenan 5:17.

Determinacion y Persistencia Ta Necesario

Pa bon defini cu nos plannan por ta y pa fuerte cu nos deseo por ta pa cumpli cu nan, algun meta ta keda inalcansabel. Disipel Huan Marco lo mester a keda hopi desapunta ora apostel Pablo a nenga di bai cu ne riba su di dos biahe como misionero! (Echonan 15:37-40) Marco tawatin cu siña un les for di e decepcion aki y ahusta su meta pa haci mas den sirbishi. Y tur cos ta mustra cu Marco a siña su les, pasobra despues Pablo a papia bon di dje y tambe e tawata un compañero intimo di apostel Pedro na Babilonia. (2 Timoteo 4:11; 1 Pedro 5:13) Kisas su privilegio di mas grandi tawata e echo cu e por a skirbi un relato inspira di e bida y ministerio di Hesus.

Den nos afan pa logra metanan spiritual, nos tambe por haya nos cu decepcion. En bes di entrega, nos tin cu repasa, reevalua, y si ta necesario, reahusta nos metanan. Ora obstaculo presenta, nos tin cu haci esfuerso pa progresa cu determinacion y persistencia. Rei Salomon ta sigura nos: “Encomenda bo obranan na SEÑOR, y bo plannan lo wordo estableci.”—Proverbionan 16:3.

Toch, tin biaha circunstancianan ta pone cu nos no por logra cierto metanan. Por ehempel, mal salu of obligacion di famia por stroba nos di alcansa cierto metanan. Laga nos nunca perde for di bista e echo cu e premio final ta bida eterno—sea den shelo of den Paradijs riba tera. (Lucas 23:43; Filipensenan 3:13, 14) Con nos por haya esaki? Apostel Huan a skirbi: “Esun cu haci e boluntad di Dios ta permanece pa semper.” (1 Huan 2:17) Aunke nos situacion kisas no ta permiti nos alcansa cierto meta, loke si nos por haci ta “teme Dios y warda su mandamentonan.” (Eclesiastes 12:13) Metanan spiritual ta yuda nos keda enfoca riba haci e boluntad di Dios. Pesei laga nos uza nan pa glorifica nos Creador.

[Cuadro na pagina 22]

Posibel Metanan Spiritual

○ Lesa Bijbel tur dia

○ Lesa tur edicion di E Toren di Vigilancia y Spierta!

○ Mehora e calidad di nos oracionnan

○ Desplega e fruta di spirito

○ Haci esfuerso pa aumenta nos sirbishi

○ Bira mas eficas den predica y siña otro hende

○ Siña con pa duna testimonio informal, testimonio via telefon y den teritorio di negoshi