Buscando un Bon Gobernacion

“E echo cu e nacionnan ta depende mas y mas di otro a causa un serie di problema mundial cu nan no por soluciona riba nan mes mas. Unicamente si tin cooperacion rond mundo nos por trata cu exito e peligernan y desafionan creciente cu humanidad ta enfrenta.”—Ghulam Umar, analista politico di Pakistan.

E MUNDO djawe ta yen di contradiccion. Maske hopi hende ta rondona pa un abundancia di cos material, apenas nan ta logra tene cabes riba awa. No cabe duda cu hende cu ta biba den e era di computer aki ta mas miho educa y informa cu nunca, y toch mas y mas hende ta pasa masha trabou pa haya un empleo fiho. Aunke ta parce cu hende tin mas tanto libertad cu nunca prome, hopi ta biba den miedo y insiguridad. E bon oportunidadnan por ta hopi, pero corupcion y violacion di lei den tur nivel di sosiedad a causa hopi desesperacion.

E magnitud di e problemanan cu humanidad ta enfrenta ta asina grandi cu ningun nacion of grupo di nacion no por resolve nan. Pesei hopi analista a yega na e conclusion cu pas y siguridad mundial por bira un realidad solamente si tur nacion uni bou di un solo gobierno. Por ehempel, Albert Einstein hopi tempo a boga pa un idea similar. Na 1946, el a declara: “Mi ta completamente combenci cu mayoria hende na mundo lo prefera di biba den pas y siguridad . . . Ta solamente si forma un gobierno mundial, hende su deseo pa pas lo por bira realidad.”

Despues di cinco decada, e necesidad importante aki ainda no a bira realidad. Den e corant Le Monde di Paris, Francia, un comentarista cu a menciona e diferente problemanan di siglo 21, a remarca: “Ta sumamente importante pa forma un fundeshi hudicial, gubernamental y constitucional pa un gobierno internacional cu por interveni mesora y na cualkier parti di mundo si un masacre etnico tuma luga. Pues nos tin cu biba cu e idea cu di awor padilanti henter e Tera ta un solo nacion.” Ken of kico tin e poder y capasidad pa logra esaki y garantisa cu humanidad lo tin un futuro pacifico?

Nacionnan Uni Ta e Solucion?

Hopi hende a pone nan confiansa den e organisacion di Nacionnan Uni pa trece pas mundial. Pero Nacionnan Uni ta un gobierno cu por trece berdadero pas y siguridad na mundo? Sin duda, masha hopi promesa bunita cu ta zona interesante y prometedor a wordo haci rondo di dje. Por ehempel, den su “Declaracion di Milenio” di aña 2000, e Asamblea General di Nacionnan Uni a haci e  siguiente resolucion solem: “Nos lo haci nos maximo esfuerso pa libra nos hendenan for di e plaga di guera civil of guera entre nacionnan, cu a mata mas cu 5 miyon hende den e ultimo decada.” Di tur skina a sali elogio y admiracion pa ONU pa motibo di e proclamacionnan ei, y asta nan a gana e Premio Nobel di Pas di 2001. Por ehempel, como muestra di su reconocemento pa ONU, e Comite di Premio Nobel di Norwega a declara cu “e unico manera pa logra pas y cooperacion internacional ta mediante Nacionnan Uni.”

Apesar di tur esaki, e organisacion di Nacionnan Uni, estableci na 1945, a demostra di ta un gobierno cu por trece berdadero y duradero pas mundial? No, pasobra en bes di coopera cu otro, cada miembro ta wak su propio interesnan y aspiracionnan nacionalista. E impresion di publico, manera un redactor di corant a trece dilanti, ta cu ONU no ta nada mas “cu un tipo di barometer di opinion di hende rond mundo” y cu “su agenda ta yen di problema cu a wordo discuti pa añanan largo casi sin logra ni un solucion.” E pregunta cu ta keda ta: En realidad e nacionnan di mundo lo uni un dia?

Bijbel ta revela cu tal unidad pronto lo bira realidad. Con asina? Y ta cua gobierno lo logra esei? Pa haya contesta pa e preguntanan ei, lesa e siguiente articulo.

[Plachi na pagina 3]

Einstein a boga pa un gobierno mundial

[Reconocemento]

Einstein: potret di U.S. National Archives