Cultiva Cristo Su Punto di Bista di Grandesa

“Ken cu kier bira grandi entre boso lo ta boso sirbido.”—MATEO 20:26.

1. Kico ta mundo su punto di bista di grandesa?

SERCA di e antiguo stad Egipcio Tebas (awe Karnak), cu ta keda un 500 kilometer suit di Cairo, tin un estatua di 18 meter halto di Farao Amenhotep III. Bo no por wak e imagen inmenso ei sin sinti bo hopi chikito. Sin duda, nan a trah’e pa inspira hende pa adora e Farao. Pesei e monumento aki ta un bon simbolo di mundo su punto di bista di grandesa—haci bo mes parce mas grandi y mas importante posibel y laga otro hende sinti nan insignificante.

2. Ki ehempel Hesus a pone pa su siguidonan, y kico nos tin cu puntra nos mes?

² Wak e contraste entre e punto di bista aki di grandesa cu loke Hesucristo a siña hende. Aunke Hesus tawata e “Señor y Maestro” di su siguidonan, el a siña nan cu bo tin grandesa ora bo ta sirbi otro hende. E ultimo dia di su bida riba tera, Hesus a demostra su disipelnan kico e tawata kiermen cu esei door di laba nan pia. Esei sigur tawata un acto humilde di sirbi otro hende! (Huan 13:4, 5, 14) Kico bo ta gusta mas tanto, sirbi hende of laga hende sirbi bo? Cristo su  ehempel ta lanta den bo e deseo pa ta humilde mescos cu ne? Si ta asina, laga nos analisa Cristo su punto di bista di grandesa na contraste cu e punto di bista comun cu tin den mundo.

Evita Mundo Su Punto di Bista di Grandesa

3. Ki ehempelnan biblico ta mustra e resultado tristo di esnan cu ta anhela di haya gloria serca hende?

³ Tin hopi ehempel biblico cu ta mustra cu mundo su punto di bista di grandesa ta hiba na puro fracaso. Pensa riba e homber poderoso Haman, kende tawata un persona prominente den e corte real di Persia den tempo di Ester cu Mardokeo. Haman su anhelo intenso pa gloria a hiba na su humiliacion y morto. (Ester 3:5; 6:10-12; 7:9, 10) Considera tambe e caso di e Rei orguyoso Nabucodonosor, kende a bira loco net na culminacion di su poder. El a expresa su idea troci di grandesa den e siguiente palabranan: “Esaki no ta e gran Babilonia cu ami mes a traha como un residencia real cu e forsa di mi poder y pa e gloria di mi mahestad?” (Daniel 4:30) Tambe tin e caso di Herodes Agripa I, cu en bes di duna gloria na Dios, orguyosamente a acepta gloria inmereci pa su mes. “Bichi a com’e y el a muri.” (Echonan 12:21-23) Loke a hiba tur e hombernan aki na nan caida humiliante ta cu nan no a compronde Yehova su punto di bista di grandesa.

4. Ken ta tras di mundo su spirito orguyoso?

⁴ Ta bon si nos kier uza nos bida den un manera cu ta laga nos haya honor y respet. Sinembargo Diabel ta probecha di e deseo aki pa fomenta un spirito orguyoso cu ta refleha su propio ambicionnan. (Mateo 4:8, 9) No lubida nunca cu t’e ta “e dios di e mundo aki”, y cu e ta dicidido pa promove su manera di pensa aki riba tera. (2 Corintionan 4:4; Efesionan 2:2; Revelacion 12:9) Como cu cristiannan sa ta for di ken mundo su punto di bista di grandesa ta bin, ta pesei nan ta evita e manera di pensa ei.

5. Logro, fama y rikesa ta garantisa satisfaccion duradero? Splica.

⁵ Un idea cu Diabel ta promove ta cu un nomber famoso den mundo, elogio serca hende y saco yen di placa automaticamente ta hiba na un bida felis. Pero esei ta berdad? Acaso logro, fama y rikesa ta garantisa un bida yen di satisfaccion? Bijbel ta spierta nos pa no laga tal manera di pensa gaña nos. Rei sabi Salomon a skirbi: “Mi a mira cu tur trabou y tur logro ta resultado di competencia entre un hende y su prohimo. Esaki tambe ta banidad y coremento tras di biento.” (Eclesiastes 4:4) Hopi hende cu a dedica henter nan bida pa alcansa prominencia of rikesa den mundo por confirma cu e conseho biblico inspira ei ta berdad. Un ehempel di esei ta un homber cu a yuda diseña, traha y test e nave espacial cu a hiba hende luna. El a reflexiona y bisa: “Mi a traha duro y a bira hopi bon den loke mi tawata haci. Toch esei tawata en vano, di ningun balor, pasobra e no a yuda mi haya felicidad duradero ni pas mental.” * Mundo su concepto di grandesa, sea ta riba tereno di negoshi, deporte of entretenimento, no ta garantisa satisfaccion duradero.

 Sirbi Otro Hende Motiva pa Amor Ta Loke Ta Haci Bo Grandi

6. Kico ta mustra cu Santiago cu Huan tawatin un punto di bista robes di grandesa?

⁶ Un suseso den bida di Hesus a revela loke berdadero grandesa ta encera. Hesus y su disipelnan tawata bayendo Herusalem pa e Pasco Hudiu di aña 33 di nos era. Na caminda, dos primo di Hesus, Santiago cu Huan, a demostra un punto di bista robes di grandesa. Via nan mama, nan a haci e siguiente peticion na Hesus: ‘Duna ordo pa den bo reino nos por sinta, un na bo man drechi y un na bo man robes.’ (Mateo 20:21) Hudiunan tawata considera sinta na man drechi of na man robes como un gran honor. (1 Reinan 2:19) Sin escrupulo, Santiago cu Huan ambiciosamente a haci un intento pa obtene e puestonan mas distingui. Di antemano nan kier a reserva e puestonan di autoridad aki. Hesus tawata sa kico nan ta pensa y a uza e ocasion ei pa corigi nan punto di bista robes di grandesa.

7. Con Hesus a describi e manera pa alcansa berdadero grandesa cristian?

⁷ Hesus tawata sa cu den e mundo orguyoso aki, e homber cu nan ta considera grandi ta esun cu ta controla y manda riba otro hende y cu door di djis klap man e por pone hende satisface mesora delaster un capricho cu e tin. Pero serca e disipelnan di Hesus, ta sirbishi humilde ta e norma pa determina grandesa. Hesus a bisa: “Ken cu kier bira grandi entre boso lo ta boso sirbido, y ken cu kier ta esun di prome entre boso lo ta boso esclabo.”—Mateo 20:26, 27.

8. Kico kiermen ser un sirbido, y kico nos por puntra nos mes?

⁸ E palabra Griego traduci den Bijbel como “sirbido” of “minister” [NW] ta referi na un persona cu diligentemente y persistentemente ta haci tur esfuerso pa rindi sirbishi na fabor di otronan. Hesus a siña su disipelnan un les importante: Duna hende ordo pa haci cos no ta haci bo grandi; loke si ta haci bo grandi ta ora cu bo ta sirbi otro hende motiva pa amor. Puntra bo mes: ‘Con ami lo a reacciona si mi tawata Santiago of Huan? Lo mi a compronde cu berdadero grandesa ta bin di sirbi otro hende motiva pa amor?’—1 Corintionan 13:3.

9. Ki ehempel Hesus a pone den e manera cu el a trata otro hende?

⁹ Hesus a mustra su disipelnan cu mundo su norma di grandesa no ta e norma di grandesa cu el a pone como ehempel. Cristo nunca  tawatin e actitud di ta superior cu e hendenan cu el a sirbi ni e no a laga nan sinti cu nan ta inferior. Tur clase di hende a sinti nan mes comodo serca dje—homber, mohe y mucha, hende rico, pober, poderoso, y tambe esnan conoci como pecado. (Marco 10:13-16; Lucas 7:37-50) Hopi bes hende no tin pasenshi cu esnan cu tin debilidad. Hesus tawata otro. Maske su disipelnan tin biaha a pleita of mustra falta di consideracion, cu pasenshi el a instrui nan, y asina el a mustra nan cu di berdad e tawata humilde y manso.—Zacarias 9:9; Mateo 11:29; Lucas 22:24-27.

10. Con henter Hesus su curso di bida a refleha sirbishi sin egoismo na fabor di otro hende?

¹⁰ E ehempel sin egoismo di Dios su Yiu di mas importante a demostra loke grandesa realmente a nifica. Hesus no a bin na tera pa hende sirbie, sino pa e sirbi hende, curando “tur sorto di malesa” y librando hende for di gara di demoño. Aunke el a cansa y tawatin mester di tempo pa sosega, semper el a pone necesidadnan di otro hende prome cu esnan di dje, y a haci esfuerso pa consola nan. (Marco 1:32-34; 6:30-34; Huan 11:11, 17, 33) Su amor a motiv’e pa yuda hende spiritualmente, y pa cana cientos di kilometer den caminda di tera pa predica e bon nobo di e Reino. (Marco 1:38, 39) Sin duda, Hesus a considera sirbi otro hende como un asunto masha serio.

Imita e Humildad di Cristo

11. Ki cualidadnan ta busca den rumannan nombra pa sirbi como superintendente den congregacion?

¹¹ Na fin di siglo 19, e rumannan a enfatisa e spirito corecto cu superintendentenan cristian mester cultiva ora cu nan mester a scohe hombernan pa bira representante biahero pa sirbi e necesidadnan di e pueblo di Dios. Segun e revista Zion’s Watch Tower di 1 di september 1894, loke e rumannan tawata busca ta hombernan “manso—pa nan no bira halsa . . . , di mente humilde cu no ta purba predica na fabor di nan mes, sino pa Cristo—cu no ta expresa nan propio conocemento, sino Su Palabra den su simplesa y poder.” Ta bisto anto cu cristiannan berdadero nunca mester busca manera pa haya responsabilidad djis pa satisface ambicion personal of pa haya prominencia, poder y control riba otro hende. Un superintendente humilde ta corda cu e responsabilidadnan cu e tin ta “un bon trabou”, no un puesto eleva pa trece gloria pa su mes. (1 Timoteo 3:1, 2) Tur anciano y sirbido ministerial mester haci nan maximo esfuerso pa sirbi humildemente na fabor di otro hende y mester hiba delantera den sirbishi sagrado, poniendo asina un ehempel cu ta digno di imitacion.—1 Corintionan 9:19; Galationan 5:13; 2 Timoteo 4:5.

12. Kico e rumannan cu ta haci esfuerso pa alcansa privilegio den congregacion lo por puntra nan mes?

¹² Cualkier ruman homber cu ta haci esfuerso pa alcansa privilegio lo tin cu puntra su mes:  ‘Mi ta busca oportunidadnan pa sirbi otro rumannan, of mi tin e tendencia di kier pa hende sirbi mi? Mi ta dispuesto pa haci tareanan util cu otro hende no ta mira umbes?’ Por ehempel, un ruman homber jong kisas ta dispuesto pa duna parti of discurso den e congregacion cristian, pero ta basila pa yuda hende di edad. Kisas e ta gusta asocia cu rumannan responsabel den congregacion, pero e no ta gusta participa den e trabou di predica. E ruman ei ta haci bon di puntra su mes: ‘Mi ta enfoca principalmente riba e aspectonan di Dios su sirbishi cu ta trece reconocemento y elogio? Mi ta haciendo esfuerso pa sobresali riba otronan?’ Si nos ta busca gloria personal, definitivamente nos no ta imitando Cristo su ehempel.—Huan 5:41.

13. (a) Con un superintendente su ehempel di humildad por influencia otro hende? (b) Dicon nos por bisa cu humildad no ta djis un opcion pa un cristian?

¹³ Ora nos ta traha duro pa imita e humildad di Cristo, nos ta sinti nos motiva pa sirbi otro hende. Considera e ehempel di un superintendente di zona cu tawata inspecciona e funcionamento di un di e oficinanan di sucursal di Testigonan di Yehova. Apesar cu e superintendente aki tawatin un programa hopi yen y bastante responsabilidad, el a para yuda un ruman homber jong cu tawata bringa pa stel un mashin di niet buki. E ruman jong a conta: “Mi no por a kere e cos ei! El a bisa mi cu el a yega di traha cu e mesun tipo di mashin aki tempo cu e tawata sirbi na Betel como mucha homber jong. El a corda con dificil tawata pa stel e mashin. El a traha riba e mashin ei cu mi pa basta rato maske e tawatin hopi otro cos importante pa haci. Esei a impresiona mi hopi.” E ruman jong aki, cu awor ta superintendente na un oficina di sucursal di Testigonan di Yehova, te ainda ta corda e acto di humildad ei. Laga nos no sinti nunca cu nos ta mucho halto of mucho importante pa haci tareanan humilde. Mas bien, nos mester bisti “humildad.” Esei no ta djis un opcion. E ta parti di e “hende nobo” of personalidad nobo cu un cristian mester bisti.—Filipensenan 2:3; Colosensenan 3:10, 12; Romanonan 12:16.

Con Nos Por Haya Cristo Su Punto di Bista di Grandesa

14. Con door di medita riba nos relacion cu Dios y cu nos prohimo, nos por cultiva e punto di bista corecto di grandesa?

¹⁴ Con nos por haya e punto di bista corecto di grandesa? Un manera ta door di medita riba nos relacion cu Yehova Dios. Yehova su mahestuosidad, poder y sabiduria ta elev’e hopi mas halto cu e campo di actividad di hende insignificante. (Isaias 40:22) Un otro cos cu por yuda nos cultiva humildad ta di medita riba nos relacion cu nos prohimo. Por ehempel, kisas nos ta mas miho cu otro hende riba cierto tereno, pero kisas nan ta sobresali den aspectonan di bida cu ta hopi mas importante, of podise nos rumannan cristian tin cierto cualidadnan cu nos no tin. De echo, hopi ruman cu ta precioso den bista di Dios no sa destaca, debi na nan manera manso y humilde.—Proverbionan 3:34; Santiago 4:6.

15. Con e integridad di Dios su pueblo ta mustra cu ningun hende tin base pa sinti cu e ta superior cu otro hende?

¹⁵ Experencianan di Testigonan di Yehova cu a pasa den prueba severo debi na nan fe ta ilustra e punto aki bon. Hopi bes, ta esnan cu mundo lo a considera comun y coriente ta esnan cu a mantene nan integridad na Dios bou di prueba severo. Meditando riba e tipo di  ehempelnan ei por yuda nos keda humilde y ta siña nos ‘pa no pensa mas halto di nos mes cu ta necesario.’—Romanonan 12:3. *

16. Con tur hende den congregacion por cultiva grandesa segun e ehempel cu Hesus a pone?

¹⁶ Tur cristian, hoben y bieu, mester trata na cultiva Cristo su punto di bista di grandesa. Den congregacion tin varios tarea pa haci. Nunca rabia of sinti bo ofendi si e rumannan pidi bo pa haci tareanan cu por parce humilde. (1 Samuel 25:41; 2 Reinan 3:11) Mayornan, boso ta curasha boso yiunan chikito y teenager pa haci tur asignacion cu smak, sea ta na Salon di Reino, na asamblea of na congreso? Nan ta mira boso haci tareanan humilde? Un ruman homber, cu awor ta sirbi na e sede mundial di Testigonan di Yehova, ta corda cla cla e ehempel di su mayornan. El a bisa: “E manera cu nan tawata trata cu e trabou di limpiesa di Salon di Reino of di e luga di congreso a laga mi compronde cu nan a considera e trabou ei importante. Hopi bes nan tawata ofrece pa haci cos na beneficio di e congregacion of di e hermandad, sin importa con humilde e tareanan ei por a parce di ta. E actitud aki a yuda mi acepta di buena gana cualkier asignacion cu mi a haya aki na Betel.”

17. Den ki maneranan ruman mohenan humilde por ta un bendicion pa e congregacion?

¹⁷ Pa loke ta pone interes di otro hende prome cu di bo mes, nos tin e excelente ehempel di Ester, kende a bira reina di e Imperio di Persia den siglo 5 prome cu nos era. Aunke el a biba den un palacio, e tawata dispuesto pa risca su bida na fabor di e pueblo di Dios, y asina actua na harmonia cu Dios su boluntad. (Ester 1:5, 6; 4:14-16) Awe ruman mohenan cristian, sin importa nan circunstancia economico, por manifesta e mesun spirito cu Ester door di anima rumannan deprimi, bishita esnan enfermo, participa den e predicacion y coopera cu e ancianonan. Ruman mohenan humilde asina ta un bendicion pa e congregacion!

Bendicionnan Cu Ta Bin Door di Manifesta Cristo Su Punto di Bista di Grandesa

18. Ki beneficionan bo ta cosecha door di manifesta grandesa segun e ehempel di Cristo?

¹⁸ Bo ta cosecha hopi beneficio ora bo ta mantene Cristo su punto di bista di grandesa. Sirbi otro hende na un manera generoso ta trece goso tanto pa nan como pa bo. (Echonan 20:35) Segun cu bo ta traha duro na fabor di bo rumannan, haciendo esei di buena gana y cu entusiasmo, nan ta haya mas cariño pa bo. (Echonan 20:37) Mas importante ainda, Yehova ta considera loke bo ta haci pa promove e bienestar di rumannan cristian como un sacrificio agradabel di alabansa na dje.—Filipensenan 2:17.

19. Kico nos mester ta determina pa haci relaciona cu Cristo su punto di bista di grandesa?

¹⁹ Cada un di nos tin cu samina su propio curason y puntra: ‘Lo mi papia cu boca so tocante cultiva Cristo su punto di bista di grandesa, of lo mi traha diligentemente pa pon’e na practica?’ Bijbel ta bisa bon cla kico Yehova ta pensa di hende orguyoso. (Proverbionan 16:5; 1 Pedro 5:5) Laga nos accionnan mustra cu gososamente nos ta manifesta Cristo su punto di bista di grandesa, sea cu ta den e congregacion cristian, den nos bida di famia of den nos trato diario cu otro hende, haciendo tur cos pa e gloria y alabansa di Dios.—1 Corintionan 10:31.

[Nota]

Bo Por Splica?

• Dicon nos tin cu evita mundo su punto di bista di grandesa?

• Con Hesus a midi grandesa?

• Con superintendentenan por imita e humildad di Cristo?

• Kico por yuda nos cultiva Cristo su punto di bista di grandesa?

[Preguntanan di Estudio]

[Cuadro na pagina 17]

Ken Tin Cristo Su Punto di Bista di Grandesa?

Esun cu kier pa hende sirbie of esun cu ta dispuesto pa sirbi otro?

Esun cu ta prefera di ta e centro di atencion of esun cu ta acepta tareanan humilde?

Esun cu ta pone su mes na halto of esun cu ta pone otro hende na halto?

[Plachi na pagina 14]

Un imagen inmenso di Farao Amenhotep III

[Plachi na pagina 15]

Bo sa ta kico a hiba na Haman su caida?

[Plachi na pagina 16]

Bo ta busca oportunidadnan pa sirbi otro hende?