Kico Ta Duna Bida Berdadero Proposito?

ORA nan a puntra Jesse, un alumno di 17 aña di scol secundario, kico ta e proposito di bida, el a contesta: “Gosa mas tanto cu bo por, tanten cu bo ta na bida.” Suzie tawatin un otro punto di bista. El a bisa: “Ami ta kere honestamente cu e proposito di bida ta loke abo scohe pa e ta.”

Abo a yega di puntra bo mes kico ta e proposito di bida? Ta un solo proposito universal tin pa henter humanidad? Of Suzie tin rason, esta, cu bida ta basicamente loke cada un di nos haci cu ne? Sin importa con sofistica nos sosiedad bira, tin algo den nos cu aparentemente ta anhela pa haya sa e proposito di bida. Na dado momento den nos bida, mayoria di nos ta puntra nos mes: ‘Pakico nos ta na mundo?’

Ciencia moderno a lucha pa contesta e pregunta ei. Cu ki resultado? David P. Barash, un profesor di psicologia y di mundo animal, a declara: “Ser na bida, riba su mes no tin ningun proposito den e proceso di evolucion.” Pa biologonan cu ta kere den evolucion, criaturanan tin un solo proposito: sobrevivi y reproduci. Pesei Profesor Barash a sugeri: “Den un universo inmenso cu no tin proposito y cu no tin cu nes cu hende, ta e responsabilidad di hende pa duna nos bida proposito mediante e decisionnan liber, conciente y delibera cu nos ta tuma.”

E Fuente di e Nificacion y Proposito di Nos Existencia

Acaso esei anto ta e unico proposito di bida, esta, cu cada un di nos ta haci loke e kie? En bes di laga nos dual rond sin rumbo den un universo sin proposito of nificacion, Bijbel a revela hopi tempo pasa cu nos ta aki na mundo pa un motibo. Nos existencia no ta debi na un of otro accidente cosmico. Bijbel ta informa nos cu e Creador a tuma añanan pa prepara e tera pa hende su yegada. E no a laga nada na casualidad. El a haci sigur cu tur cos tawata “masha bon.” (Genesis 1:31; Isaias 45:18) Dicon? Pasobra Dios tawatin un proposito pa hende.

Sinembargo, un punto interesante ta cu Dios no a predestina e futuro di cada persona, ni mediante intervencion dibino ni mediante un proceso biologico. Aunke nos herencia genetico tin influencia riba nos, pa gran parti nos tin control riba nos accionnan. Nos tur ta liber pa scohe nos propio rumbo den bida.

Maske cada un di nos por scohe kico nos kier haci cu nos bida, lo ta un eror pa laga e Creador afo ora nos ta plania nos asuntonan. De echo, hopi hende a descubri cu berdadero nificacion y proposito den bida ta estrechamente liga cu un relacion cu Dios. E conexion crucial aki entre Dios y nos proposito den bida ta keda destaca den Dios su nomber personal, Yehova, cu literalmente ta nifica, “E Ta  Causa pa Bira.” (Exodo 6:3, NW; Salmo 83:18, NW) Es decir, progresivamente Dios ta cumpli cu loke sea e priminti y semper e ta logra su proposito. (Exodo 3:14, NW; Isaias 55:10, 11) Pensa un rato riba esei. E nomber Yehova ta un garantia pa nos tur cu e ta e Fuente original y eterno di proposito cu tin sentido.

Djis reconoce cu e Creador ta existi por tin un impacto profundo riba un persona su manera di mira bida. Linet, un mucha mohe di 19 aña, a bisa: “Mirando tur e cosnan maraviyoso cu Yehova a crea y nan proposito, ta demostra mi cu mi tambe a ser crea pa un motibo.” Amber a agrega: “Ora hende ta papia di ‘lo desconoci’, esei semper ta pone mi corda cu ami si sa. E prueba cu Yehova ta existi ta simplemente e cosnan cu el a traha.” (Romanonan 1:20) Claro cu ta bon pa reconoce cu tin un Creador, pero cultiva un relacion significativo cu ne ta un otro cos.

Amistad cu Dios

Atrobe Bijbel por yuda. Den su prome capitulonan Bijbel ta duna evidencia cla cu Yehova Dios ta un Tata amoroso. Por ehempel, e no a crea Adam cu Eva anto caba laga pa nan mes rei ta ken e ta. Al contrario, cu regularidad el a comunica cu nan. E no a laga nan den Eden pa nan cuenta, mientras cu el a sigui tras di otro interesnan. Mas bien, Yehova a duna nan instruccion spesifico tocante cua ta e miho manera pa biba. El a duna nan trabou pa haci cu lo a satisface nan, y el a haci areglo pa nan sigui siña. (Genesis 1:26-30; 2:7-9) Esaki no ta loke bo ta spera di un mayor amoroso y capas? Awor pensa un rato ta kico esei ta nifica. Denielle a bisa: “E echo cu mi sa cu Yehova a crea e tera y a diseña nos cu e capasidad di disfruta di su creacion, ta demostra mi cu e kier pa nos ta felis.”

Mas cu esei, mescos cu cualkier bon tata, Yehova kier pa tur su yiunan tin un relacion personal cu ne. Pa logra esei, Echonan 17:27 ta sigura nos: “E no ta leu di cada un di nos.” Ki diferencia esei ta haci? Amber a bisa: “Siña conoce Yehova a duna mi e confiansa cu nunca mi no ta completamente mi so. Sin importa den ki situacion mi ta, semper mi tin un persona cu mi por acudi na dje.” Mas ainda, segun cu bo ta siña conoce Yehova, lo bo haya sa cu e ta bondadoso, husto y bon. Bo por steun riba dje. Jeff a bisa: “Ora Yehova a bira mi amigo intimo, mi tawata sa cu lo no tin ningun otro persona miho cu ne pa yuda mi ora mi ta den preta.”

Desafortunadamente, hende ta bisa hopi cos malo di Yehova. Nan ta culp’e pa gran parti di sufrimento humano y pa mal comportacion di hende religioso. Algun di e piyo atrocidadnan cu a tuma luga den historia ta ser atribui na Yehova. Pero Deuteronomio 32:4 y 5 [NW] ta splica: “Tur su camindanan ta husticia. . . . Nan a obra ruinosamente riba nan propio cuenta; nan no ta su yiunan, e defecto ta di nan mes.” Pesei nos ta obliga na investiga e echonan pa nos mes.—Deuteronomio 30:19, 20.

Dios Su Proposito Cumpli

Sinembargo, no ta importa kico nos dicidi di haci. Nada lo no stop Dios di cumpli plenamente cu su proposito pa e tera y pa humanidad. Al fin y al cabo, t’e ta e Creador. Kico anto ta e proposito ei? Hesucristo a referi na dje den su Sermon Riba Sero ora el a bisa: “Bendiciona ta esnan humilde, pasobra nan lo hereda e tera.” Mas despues el a indica na apostel Huan cu Dios ta determina pa “destrui esnan cu ta destrui e tera.” (Mateo 5:5; Revelacion 11:18) Como cu Hesus tawata hunto cu Dios durante creacion, e sa cu for di principio Dios su proposito tawata pa e tin un famia humano perfecto, bibando riba tera pa semper den un paradijs. (Genesis 1:26, 27; Huan 1:1-3) Y Dios no ta cambia. (Malakias 3:6) Dios ta priminti nos: “Siguramente, manera mi a pensa, asina a sosode, y manera mi a plania, asina lo pasa.”—Isaias 14:24.

Den nos tempo, Yehova ya a cuminsa pone e fundeshi caba di un comunidad uni cu ta  basa riba amor pa Dios y pa prohimo, y no riba golosidad y interes propio manera gran parti di nos mundo awe. (Huan 13:35; Efesionan 4:15, 16; Filipensenan 2:1-4) Esaki ta un asociacion boluntario di personanan progresivo y sumamente motiva pa cumpli cu nan proposito, esta, di predica e bon noticia di e benidero Reino di Dios prome cu fin di e sistema di cosnan aki. (Mateo 24:14; 28:19, 20) Den mas cu 230 pais, mas cu seis miyon cristian ya caba ta adora Dios hunto den un hermandad uni, amoroso y internacional.

Duna Bo Bida Proposito

Si bo ta buscando mayor proposito den bo bida, ta bon pa bo sa cu Yehova Dios ta invita bo pa asocia cu su pueblo—su “nacion husto”—awor. (Isaias 26:2) Pero kisas bo ta puntra bo mes: ‘Con bida ta den e comunidad cristian aki? Di berdad lo mi kier ta parti di esei?’ Scucha kico algun hoben tin di bisa:

Quentin: “E congregacion ta mi refugio contra mundo. Realisando cu Yehova ta envolvi den mi bida ta yuda mi mira cu e ta existi y kier pa mi ta felis.”

Jeff: “E congregacion ta e miho luga cu mi por bai pa haya animacion. Mi rumannan spiritual ta einan, y nan ta duna mi sosten y elogio. Di berdad nan ta mi famia.”

Linet: “No tin nada cu por para banda di e goso di mira un hende acepta e berdad di Bijbel y tuma e decision pa sirbi Yehova. Esaki ta duna mi gran satisfaccion den bida.”

Cody: “Sin Yehova, mi bida lo no ta bal nada. Lo mi ta dual rond sin rumbo mescos cu hopi hende, di un cos pa otro, en busca di felicidad y sin por hay’e. Na luga di esei, Yehova a duna mi e privilegio increibel di por tin un amistad cu ne, y esei ta duna mi bida proposito.”

Dicon bo no ta investiga esaki pa bo mes? Lo bo descubri cu door di hala serca bo Creador, Yehova Dios, bo bida ta haya berdadero proposito.

[Plachinan na pagina 31]

Amistad cu Dios ta duna bo bida proposito

[Reconocemento pa Potret na pagina 29]

Potret di NASA