“Nos Ta Desea di Por Contesta, ‘Si!’”

E OFICINA di sucursal di Testigonan di Yehova na Nigeria resientemente a haya un carta, cu ta bisa entre otro:

“Anderson, nos yiu, a muri ora cu e tawatin 14 aña. Tempo cu e tawata na bida, e tawata cria dos galiña. E kier a bende nan y manda e placa pa e oficina di sucursal como un contribucion na e obra mundial di predica. Pero el a fayece prome cu e por a bende nan.

Pa cumpli cu su deseo, nos, su mayornan, a cria e galiñanan y a bende nan. Nos ta manda e placa pa boso como un contribucion di parti di Anderson. Debi na Yehova su promesa, nos tin confiansa cu pronto, si, muy pronto, nos lo mira Anderson atrobe. Nos ta desea di por contesta, ‘Si!’ ora e puntra si nos a cumpli cu e deseo di su curason. Si, nos ta anhela pa mira no solamente Anderson sino tambe un ‘nubia grandi di testigo’ cu lo wordo resusita.”—Hebreonan 12:1: Huan 5:28, 29.

Manera e carta menciona akiriba ta indica bon cla, fe den e resureccion ta un speransa cu ta fortalece cristiannan berdadero. Ki un alegria miyones di famia lo sinti ora nan, mescos cu Anderson su famia, lo por duna un bonbini na nan sernan keri cu e enemigo, esta, morto a bai cu ne!—1 Corintionan 15:24-26.

E Palabra di Dios ta ofrece e speransa alentador aki di resureccion, cu ta un di e tantisimo cosnan maraviyoso cu pronto lo ser realisa den e husto mundo nobo bou di e Reino di Dios. (2 Pedro 3:13) Papiando di loke Dios lo haci pa hende na e tempo ei, Bijbel ta bisa: “E lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor; e prome cosnan a pasa.”—Revelacion 21:4.