Pregunta di Lector

Kico Hesus tawata kiermen ora el a bisa su disipelnan: “Mi a mira Satanas cai for di shelo manera lamper”?

Hesus a caba di scohe 70 disipel, y el “a manda nan dos-dos su dilanti pa tur stad y luga, caminda e mes tawata pa bai.” Ora e setentanan a bolbe bek, nan tawata gososo door cu nan tawatin exito cu nan asignacion. Nan a bisa: “Señor, asta e demoñonan ta someti na nos den bo nomber.” Ta na e momento ei Hesus a bisa: “Mi a mira Satanas cai for di shelo manera lamper.”—Lucas 10:1, 17, 18.

Na prome instante por parce cu Hesus tawata referi na un suseso cu a tuma luga caba. Sinembargo, 60 aña despues cu Hesus a bisa loke tin skirbi akiriba, e biehito apostel Huan a uza palabranan similar ora el a skirbi: “E gran dragon a wordo tira abou, e colebra di antiguedad, kende ta wordo yama Diabel y Satanas, kende ta gaña henter mundo; el a wordo tira abou riba tera, y su angelnan a wordo tira abou hunto cu ne.”—Revelacion 12:9.

Ora cu Huan a skirbi e palabranan ei, ainda Satanas tawata biba den shelo. Con nos por sa esei? Pasobra Revelacion ta un buki di profecia, no di historia. (Revelacion 1:1) Pues, den e dia di Huan, Satanas no a wordo tira riba tera ainda. De echo, tin evidencia cu esaki a sosode un poco despues cu Hesus a wordo entronisa como Rei di e Reino di Dios na 1914. *—Revelacion 12:1-10.

Dicon anto Hesus a papia como si fuera cu Satanas su expulsion for di shelo a tuma luga caba? Tin experto ta bisa cu Hesus a reprende su disipelnan pa motibo cu nan a refleha un orguyo inapropiado. Nan ta kere cu den un sentido Hesus a bisa: ‘Boso a vence e demoñonan, pero no bira arogante. Satanas a bira orguyoso, y esei a hiba na su caida.’

Nos no por bisa cu tur siguridad, pero muy probablemente Hesus a alegra cu su disipelnan y a referi na Satanas su caida den futuro. Mas cu cualkier un di su disipelnan, Hesus tawata bon conciente di Diabel su intencion malicioso. Imagina e goso cu Hesus a sinti ora el a tende cu su disipelnan humano imperfecto tawatin dominio riba e demoñonan poderoso! E control aki riba e demoñonan ta duna djis un idea ta kico lo a bai sosode ora cu Hesus, como Miguel e arcangel, lo a bringa contra Satanas y sac’e for di shelo y tir’e riba tera.

Ora Hesus a bisa cu el a mira Satanas “cai” for di shelo, claramente e tawata enfatisando cu Satanas lo a cai sigur. Esaki ta e caso cu otro profecianan di Bijbel cu ta papia di susesonan cu lo tuma luga den futuro pero cu ta skirbi como si fuera nan a tuma luga caba. Por ehempel, tuma nota con e profecia tocante e Mesias na Isaias 52:13–53:12 ta uza tanto verbonan di tempo pasado como futuro. Probablemente di e manera aki Hesus a mustra cu e tawatin confiansa cu Satanas su caida for di shelo lo a tuma luga na harmonia cu e proposito di Su Tata. Tambe Hesus tawatin sigur cu na Dios su debido tempo, Satanas y su demoñonan lo wordo tira den abismo pa despues haya destruccion pa semper.—Romanonan 16:20; Hebreonan 2:14; Revelacion 20:1-3, 7-10.

[Nota]