Puntonan Sobresaliente di e Buki di Numbernan
E Palabra di Yehova Ta Bibo
Puntonan Sobresaliente di e Buki di Numbernan
E ISRAELITANAN a keda organisa den un nacion despues di nan Exodo for di Egipto. Poco despues nan lo por a drenta e Tera Priminti, pero esei no a sosode. Al contrario, nan tawatin cu dual pa cuater decada den un “desierto grandi y teribel.” (Deuteronomio 8:15) Dicon? E relato historico den e buki biblico di Numbernan ta conta nos kico a pasa. E relato ei mester graba den nos mente e importancia di obedece Yehova Dios y respeta su representantenan.
Moises a skirbi e buki di Numbernan den desierto y riba e Sabananan di Moab. E buki ta abarca un periodo di 38 aña y 9 luna, for di aña 1512 te cu 1473 prome cu nos era. (Numbernan 1:1; Deuteronomio 1:3) E buki su nomber ta bin di dos censo cu a tuma di e Israelitanan, 38 aña for di otro. (Capitulonan 1-4, 26) E relato ta parti den tres seccion. E prome parti ta conta susesonan cu a tuma luga na Sero Sinai. E di dos parti ta abarca loke a tuma luga durante e tempo cu Israel tawata dual den desierto. Y e ultimo parti ta trata susesonan riba e Sabananan di Moab. Segun cu bo ta lesa e relato aki, lo bo por pensa riba e preguntanan aki: ‘Kico e incidentenan aki ta siña mi? E buki aki ta contene principionan cu por beneficia mi awe?’
NA SERO SINAI
E prome di e dos censonan ta tuma luga mientras cu e Israelitanan ta ainda na pia di Sero Sinai. En total tin 603.550 hende homber di 20 aña bai ariba, cu excepcion di e Levitanan. Evidentemente nan ta tuma e censo pa proposito militar. Henter e campamento, incluso hende mohe, mucha y e Levitanan, kisas ta yega na mas cu tres miyon hende.
Despues di e censo, e Israelitanan ta ricibi instruccion den ki orden nan mester marcha, tambe detayenan relaciona cu e debernan di Levita y sirbishi di tabernakel, mandamentonan tocante isolacion (cuarentena), y leinan relaciona cu casonan di yaluci y promesanan di e Nazarenonan. Capitulo 7 ta duna informacion tocante ofrendanan cu e lidernan di tribu a haci en conexion cu inauguracion di e altar, y capitulo 9 ta trata e celebracion di Pasco. Tambe e asamblea ta haya instruccion tocante den ki orden nan mester kampeer y den ki orden nan mester sali bai.
Contesta Riba Pregunta Biblico:
2:1, 2—Kico tawata “e emblema” rond di cua e division di tres tribu mester a kampeer den desierto? Bijbel no ta describi kico e emblema aki tawata. Sinembargo, e pueblo no a considera nan como simbolo sagrado ni a duna nan ningun nificacion religioso. Nan a uza nan pa un proposito practico—pa yuda un hende haya su debido luga den e campamento.
5:27—Kico tawata kiermen cu un mohe culpabel di adulterio su “heup lo seca”? Aki Bijbel ta uza e palabra “heup” pa indica e organonan di procreacion. E echo cu su “heup lo seca” ta duna e idea cu e organonan aki lo degenera, di manera cu lo ta imposibel pa e consebi.
Les pa Nos:
6:1-7. Nazarenonan mester a abstene di tur producto di wendruif y di tur bebida sterki, locual a rekeri pa nan frena nan deseonan. Nan mester a laga nan cabei crece bira largo, un señal di sumision na Yehova, mescos cu hende mohe mester tawata sumiso na nan casa of nan tata. E Nazarenonan mester a keda limpi door di no mishi cu nada morto, ni sikiera si tawata e cadaver di un famia serca. Sirbidonan di tempo completo awe ta demostra un spirito di sacrificio propio door di frena nan deseonan y door di ta sumiso na Yehova y na su areglo. Podise algun asignacion ta encera cu nan mester bai biba na un luga leu, y pesei kisas ta dificil of asta imposibel pa nan regresa nan pais pa entiero di un famia serca.
8:25, 26. Segun e lei, hombernan di edad mester a retira for di sirbishi obligatorio di Levita. Esei tawata pa haci sigur cu ta solamente hombernan capas tawata den e sirbishi di Levita, y pa mustra consideracion na e Levitanan di edad. Sinembargo, e hombernan di edad por a ofrece pa yuda otro Levitanan. Maske awe un hende no ta baha cu pension como proclamado di Reino, e principio di e lei aki ta siña nos un les balioso. Si debi na edad avansa un cristian no por cumpli cu cierto obligacionnan, e por participa den un otro forma di sirbishi cu si ta na su alcanse.
DI UN LUGA PA OTRO DEN DESIERTO
Cu tempo e nubia ta lanta for di riba e tabernakel, y e Israelitanan ta cuminsa un marcha cu lo abarca 38 aña y un of dos luna, y al final ta hiba nan na e sabananan di desierto di Moab. Lo ta bon pa sigui nan ruta riba e mapa na pagina 9 di e foyeto “Mira e Tera Bunita”, publica door di Testigonan di Yehova.
Riba caminda pa Kades, den e Desierto di Paran, tin por lo menos tres caso di kehamento. E prome caso ta termina ora cu Yehova manda candela pa destrui algun di e hendenan. Di dos caso ta ora e Israelitanan ta sclama pa carni, y Yehova ta percura patrishi. Den e di tres caso, Miriam cu Aron su kehamento contra Moises ta pone cu Miriam temporalmente ta ser castiga cu lepra.
Mientras cu nan ta kampeer na Kades, Moises ta manda 12 homber bai spiona e Tera Priminti. Nan ta bolbe despues di 40 dia. E pueblo ta kere e mal informe di dies di e spionnan, y kier piedra Moises cu Aron, y e fiel spionnan Hosue y Caleb. Yehova ta bisa cu e kier dal e pueblo cu pest, pero Moises ta intercede, y Dios ta declara cu nan lo cana dual den e desierto pa 40 aña, te ora cu tur esnan numera den e censo a muri.
Yehova ta duna nan leinan adicional. Core y mas hende ta lanta contra Moises cu Aron, pero candela ta destrui algun rebelde y tera ta habri y traga e otronan. E siguiente dia henter e congregacion ta murmura contra Moises cu Aron. Como resultado, 14.700 ta muri di un plaga for di Yehova. Pa Dios mustra ta ken el a scohe como sumo sacerdote, e ta laga Aron su bara saca spruit. E ora ei Yehova ta duna mas lei relaciona cu e obligacionnan di Levita y purificacion di e pueblo. E uzo di shinishi di un bishe cora embra ta prefigura e purificacion mediante e sacrificio di Hesus.—Hebreonan 9:13, 14.
E yiunan di Israel ta regresa Kades, caminda Miriam ta muri. E congregacion ta bolbe keha contra Moises cu Aron. Pakico? No tin awa. Debi cu Moises cu Aron no ta santifica Yehova su nomber ora cu milagrosamente nan ta percura awa, nan ta perde e chens di drenta den e Tera Priminti. Israel ta bai for di Kades, y Aron ta muri na Sero Hor. Segun cu e Israelitanan ta pasa rond di e teritorio di Edom, nan ta cansa y ta papia contra Dios y Moises. Yehova ta manda colebra venenoso pa castiga nan. Un biaha mas Moises ta intercede, y Dios ta instru’e pa traha un colebra di brons y pon’e riba un palo pa asina e hendenan cu colebra a pica por cura door di fiha nan bista riba e colebra. E colebra ta prefigura e clabamento di Hesus na staca pa nos beneficio eterno. (Huan 3:14, 15) Israel ta derota e reinan Amoreo Sehon y Og y ta tuma pocesion di nan tera.
Contesta Riba Preguntanan Biblico:
12:1—Dicon Miriam cu Aron a keha contra Moises? E berdadero motibo di nan kehamento aparentemente tawata Miriam su deseo pa mas poder. Ora cu Sefora, casa di Moises, a join Moises den desierto, Miriam podise a teme cu hende lo no a mir’e mas como primera dama den e campamento.—Exodo 18:1-5.
12:9-11—Dicon ta Miriam so a ser castiga cu lepra? Muy probablemente, ta e tawata esun cu a instiga e kehamento y a combence Aron pa join cu ne. Aron a desplega e actitud corecto door di confesa su eror.
21:14, 15—Ta ki sorto di buki Bijbel ta menciona akinan? E Scritura ta referi na varios buki cu escritornan biblico a uza como fuente di informacion. (Hosue 10:12, 13; 1 Reinan 11:41; 14:19, 29) “E Buki di Gueranan di SEÑOR” tawata un di e bukinan ei. El a contene un relato historico di e gueranan di e pueblo di Yehova.
Les pa Nos:
11:27-29. Moises ta un excelente ehempel encuanto con nos mester reacciona ora otro hende ricibi privilegio den e sirbishi di Yehova. En bes di bira yalurs y busca gloria pa su mes, Moises a keda contento ora cu Eldad y Medad a cuminsa actua como profeta.
12:2, 9, 10; 16:1-3, 12-14, 31-35, 41, 46-50. Yehova ta spera di su adoradonan cu nan ta mustra respet pa autoridad duna door di Dios.
14:24. Un factor crucial pa resisti e presion di mundo pa haci malo ta di desaroya ‘un spirito of actitud mental diferente.’ Esei mester ta un spirito cu ta otro for di esun di mundo.
15:37-41. Intencion di e fraña unico riba e bisti di e Israelitanan tawata pa corda nan cu nan tawata un pueblo aparta pa adora Dios y pa obedece su mandamentonan. Acaso nos tambe no tin cu biba segun e normanan di Dios y destaca como diferente for di mundo?
RIBA E SABANANAN DI MOAB
E Moabitanan ta yen di miedo ora cu e yiunan di Israel bin kampeer riba e sabananan di desierto di Moab. Pesei Rei Balak di Moab ta paga Balam pa maldiciona e Israelitanan. Pero Yehova ta forsa Balam pa bendiciona nan. E ora ei nan ta uza mohenan Moabita y Madianita pa atrae hombernan Israelita pa comete inmoralidad y idolatria. Como resultado, Yehova ta destrui 24.000 malechor. E plaga finalmente ta termina ora cu Finehas (Finees) demostra cu e no ta tolera ningun rivalidad contra Yehova.
E di dos censo ta revela cu ningun di e hombernan conta den e prome censo a keda na bida, cu excepcion di Hosue y Caleb. Hosue ta ricibi e encargo pa bira susesor di Moises. E Israelitanan ta haya instruccion tocante con pa haci e diferente ofrendanan y tocante hacimento di promesa. Tambe e pueblo di Israel ta tuma vengansa contra e Madianitanan. Ruben, Gad y mitar tribu di Manases ta establece nan mes na oost di Riu Yordan. Israel ta ricibi instruccion tocante crusamento di Yordan y con pa tuma pocesion di e tera. Yehova ta defini e fronteranan di e tera detayadamente. Pa medio di lot mester dicidi ta ken ta haya cua parti di e herencia. Levitanan ta haya 48 stad, di cua 6 di nan mester fungi como stad di refugio.
Contesta Riba Preguntanan Biblico:
22:20-22—Dicon Yehova a rabia cu Balam? Yehova a bisa profeta Balam cu e no mag maldiciona e Israelitanan. (Numbernan 22:12) Pero toch e profeta a bai cu e hombernan di Balak cu e pleno intencion di maldiciona Israel. Balam kier a agrada e rei di Moab y haya un recompensa serca dje. (2 Pedro 2:15, 16; Hudas 11) Asta ora Dios a forsa Balam bendiciona Israel en bes di maldicion’e, Balam a purba haya aprobacion di e rei door di sugeri pa uza mohenan cu tawata adora Baal pa seduci e hombernan Israelita. (Numbernan 31:15, 16) Pues, Dios tawata rabia cu Balam pa motibo di e profeta su golosidad sin escrupulo.
30:6-8—Un esposo cristian por anula e promesanan di su casa? Pa loke ta promesa, Yehova ta trata awor cu su adoradonan riba un base individual. Por ehempel, dedicacion na Yehova ta un voto of promesa personal. (Galationan 6:5) Un esposo no tin e autoridad pa anula un promesa asina. Pero un esposa, mester evita di haci promesanan cu ta na conflicto cu e Palabra di Dios of na conflicto cu su debernan pa cu su casa.
Les pa Nos:
25:11. Finehas tawata un tremendo ehempel di celo pa e adoracion di Yehova! Acaso nos deseo pa mantene e congregacion limpi no mester motiva nos pa informa e ancianonan cristian di inmoralidad serio ora nos sa di esei?
35:9-29. Un hende cu a mata un persona no intencionalmente mester a bandona su cas y hui pa un stad di refugio pa un periodo di tempo. Esei ta siña nos cu bida ta sagrado y cu nos mester tin respet p’e.
35:33. Tera contamina door di sanger drama di hende inocente por ser expia solamente door di sanger di esnan cu a dram’e. Pesei ta na su luga cu Yehova lo destrui e malbadonan prome cu transforma e tera den un paradijs.—Proverbionan 2:21, 22; Daniel 2:44.
E Palabra di Dios Tin Poder
Nos mester mustra respet pa Yehova y pa rumannan nombra den puesto di responsabilidad den su pueblo. E buki di Numbernan ta enfatisa e berdad aki bon cla. Esei ta un les masha importante pa mantene pas y unidad den e congregacion awe.
E incidentenan menciona den Numbernan ta mustra con facil hende cu neglisha nan spiritualidad por comete malecho, manera murmuramento, inmoralidad y idolatria. Algun di e ehempelnan y lesnan for di e buki biblico aki por sirbi como base pa partinan di necesidad local den Reunion di Sirbishi na congregacionnan di Testigonan di Yehova. En berdad, “e palabra di Dios ta bibo y activo” y ta eherce poder den nos bida.—Hebreonan 4:12.
[Plachi na pagina 24, 25]
Pa medio di un nubia milagroso riba e tabernakel, Yehova a dirigi den ki orden e campamento di Israel mester a kampeer y den ki orden nan mester a sali bai
[Plachinan na pagina 26]
Yehova merece nos obediencia y ta spera di nos cu nos ta respeta su representantenan