Storia di Bida

Yehova Su Forsa A Tene Nos na Bida

SEGUN E RELATO DI ERZSÉBET HAFFNER

“Lo mi no laga nan deporta bo”, Tibor Haffner a bisa ora el a tende cu nan a ordena mi pa sali for di Checoslovakia. Anto el a agrega: “Si bo ta di acuerdo, lo mi casa cu bo, y lo bo keda cu mi pa semper.”

DIA 29 di januari 1938, djis un par di siman despues di e proposicion onverwacht ei, mi a casa cu Tibor, un ruman homber cristian cu tawata e prome persona cu a predica na mi famia. Casa cu ne no tawata un decision facil. Mi a caba di haci 18 aña, y como un Testigo di Yehova cu tawata predica tempo completo, mi kier a dedica mi añanan di hubentud exclusivamente na e sirbishi di Dios. M’a yora. M’a haci oracion. Ta despues cu mi a calma un tiki mi a realisa cu loke Tibor a ofrece mi tawata mas cu djis un acto di bondad, y mi a sinti cu mi kier a biba cu e homber aki cu realmente tawata stima mi.

Pero dicon mi tawata core peliger di ser deporta? Con cu bai bin, mi tawata biba den un pais cu tawata orguyoso di su sistema democratico y di su libertad di religion. Wel, mi ta kere cu lo mi tin cu conta bo mas tocante mi antecedente.

Mi a nace dia 26 di december 1919 den e pueblito Sajószentpéter, Hungria, un 160 kilometer oost di Budapest. Mi mayornan tawata miembro di e Iglesia Catolico Griego. Lamentablemente mi tata a muri prome cu mi a nace. Poco despues mi mama a casa cu un biudo cu tawatin cuater yiu, y nos a muda pa Lučenec, un bunita stad cu e tempo ei tawata parti di Checoslovakia. No tawata facil pa ta parti di un famia cu tin yiu di criansa den e tempo ei. Como cu mi tawata esun mas jong di cinco yiu, mi a sinti cu mi tawata di mas.  E situacion economico tawata dificil, y mi no a haya masha cos material. Tampoco mi no a haya mucho atencion y amor di mi mayornan.

Tin un Hende Cu Sa e Contesta?

Tempo mi tawatin 16 aña, mi tawatin preguntanan serio cu a molestia mi. Mi a lesa e historia di Prome Guera Mundial cu gran interes, y a keda babuca pa tur e matansa cu a tuma luga entre nacionnan civilisa cu tawata pretende di ta cristian. Ademas, mi por a mira cu den hopi luga militarismo tawata aumenta. Ningun di e cosnan ei no tawata cuadra cu loke mi a siña den misa tocante amor pa prohimo.

Pues, mi a bai serca un pasto catolico Romano y a puntr’e: “Ta cua mandamento mester ta obligatorio pa nos como cristian, bai guera y mata nos prohimo of stima nan?” Irita pa mi pregunta, e pasto a contesta cu loke e tawata siña hende ta loke su superiornan a bis’e pa siña. Mescos a pasa ora cu mi a bishita un domi calvinista y despues un rabi hudiu. Mi no a haya ningun contesta, simplemente nan a keda asombra pa mi pregunta poco comun. Por ultimo mi a bai serca un domi luterano. E no a keda contento cu mi pregunta, pero prome cu mi a bai e di: “Si realmente bo kier sa algo tocante esei, puntra Testigonan di Yehova.”

Mi a purba haya e Testigonan pero mi no a logra. Un par di dia despues, ora cu mi a yega cas for di trabou, mi a mira porta di cas mitar habri. Un yoncuman cu bon tipo tawata lesa for di Bijbel pa mi mama. Mesora mi a pensa: ‘Aha, casi sigur ta un Testigo di Yehova!’ Nos a invita e homber aki, Tibor Haffner, pa drenta y mi a hacie mi preguntanan. En bes di duna mi su opinion, el a mustra mi kico Bijbel ta bisa tocante e marca di identificacion di cristiannan berdadero, y tambe tocante e tempo den cua nos tawata biba.—Huan 13:34, 35; 2 Timoteo 3:1-5.

Denter di un par di luna mi a batisa, prome cu mi a haci 17 aña. Mi tawata sinti cu tur hende mester tende e berdadnan precioso aki cu mi a descubri cu masha dificultad. Mi a cuminsa predica tempo completo, algo cu tawata basta dificil na Checoslovakia durante e ultimo parti di decada di 1930. Aunke nos obra tawata oficialmente registra, nos a confronta oposicion fuerte, instiga door di clero.

Mi Prome Experencia cu Persecucion

Un dia na fin di aña 1937, mi tawata predica hunto cu un otro ruman mohe cristian den un pueblito pega cu Lučenec. Poco despues polis a aresta nos y hiba nos prizon. “Boso ta bai muri aki den”, e bewaker a bisa ora el a dal e porta di nos cel sera.

Pa anochi, tawatin cuater preso mas den nos cel. Nos a cuminsa consola nan y duna nan testimonio. Nan a bira mas calmo, y nos a pasa henter anochi papiando tocante e berdad di Bijbel cu nan.

Seis or di mainta, e bewaker a yama mi pa sali for di e cel. Mi a bisa mi compañera: “Nos lo topa atrobe den e Reino di Dios.” Mi a pidie conta mi famia kico a pasa, si acaso e si sobrevivi. Mi a haci un oracion silencioso y a bai cu e bewaker. El a hiba mi na su apartamento den e area di prizon. E di: “Mi tin algun pregunta pa bo, mucha. Ayeranochi bo di cu e nomber di Dios ta Yehova. Bo por mustra mi esei den Bijbel?” Esta un gran sorpresa y alivio! El a bin cu su Bijbel, y mi a mustra e cu su casa e nomber Yehova. E tawatin hopi pregunta mas relaciona cu e temanan cu nos a papia di dje cu e cuater mohenan durante anochi. Satisfecho cu e contestanan cu mi a dun’e, el a pidi su casa prepara desayuno pa mi cu mi compañera.

 Un par di dia despues, nan a laga nos bai, pero un hues a dicidi cu como cu mi tawata un ciudadano Hungaro, mi mester a sali for di Checoslovakia. Ta despues di e incidente ei Tibor Haffner a pidi mi pa casa cu ne. Nos a casa, y mi a bai biba na cas di su mayornan.

Persecucion Ta Aumenta

Nos a sigui den e trabou di predica como pareha, aunke Tibor tawatin tambe trabou di haci en conexion cu e organisacion. Na november 1938 nos yiu homber, Tibor, Jr., a nace, djis un par di dia prome cu soldanan Hungaro a marcha drenta nos stad. Na Europa, Segundo Guera Mundial tawata na caminda. Hungria a tuma control di un parti grandi di Checoslovakia, locual a trece mas persecucion riba e Testigonan di Yehova cu tawata biba den e areanan anexa.

Dia 10 di october 1942, Tibor a sali bai Debrecen pa topa cu algun ruman. Sinembargo, e biaha aki e no a bin cas bek. Despues el a conta mi kico a pasa. En bes di topa e rumannan, tawatin algun polis bisti na paña di trahado riba e brug caminda nan mester a tene e reunion. Nan tawata warda riba mi casa y Pál Nagypál, cu tawata e dos ultimonan pa yega. Polis a hiba nan warda y a bati nan bou di nan plant’i pia cu klop te ora cu nan a bai leu di dolor.

Caba nan a ordena nan pa bisti nan lars y lanta para. Apesar di e dolor, nan a forsa nan bai na e stacion di trein. Polis a bin cu un otro homber cu su cabes tapa cu verband cu apenas e por a mira. Tawata Ruman András Pilling, cu tambe a bin pa e reunion. Cu trein nan a hiba mi casa na e centro di detencion na Alag, serca di Budapest. Un di e bewakernan cu a mira Tibor su pianan maltrata, a bisa sarcasticamente: “Tin hende hopi cruel! No precupa, nos lo cura bo.” Dos otro bewaker a bati Tibor riba su pianan te cu sanger a spat tur caminda. Despues di un par di minuut el a bai leu.

E siguiente luna, nan a hiba Tibor y mas cu 60 ruman homber y mohe dilanti di corte. Ruman András Bartha, Dénes Faluvági y János Konrád a haya sentencia pa ser horca. Ruman András Pilling a haya castigo di bida largo, y nan a sentencia mi casa na 12 aña di prizon. Kico tawata nan delito? Fiscal a acusa nan di traicion contra estado, di a nenga servicio militar, di spionahe y di lanta calumnia contra e iglesia santisimo. Despues nan a cambia e sentencianan di morto pa castigo di bida largo.

Mi Tambe Ta Bai Sera

Dos dia despues cu Tibor a sali pa e reunion na Debrecen, mi tawata lanta prome cu seis or di mainta, ta strica nos pañanan. Diripiente tawatin batimento duro na porta. Mi a pensa: ‘Nan t’aki.’ Seis polis a cana drenta y bisa mi cu nan tin permit pa rista e cas. Nan a aresta tur hende den cas y a hiba nos warda di polis, incluso nos yiu di tres aña. E mesun dia ei nan a hiba nos na un facilidad na Pétervására, Hungria.

Despues cu nos a yega einan mi a haya keintura, y nan a aparta mi for di e otro presonan. Ora cu mi a recupera, tawatin dos solda ta pleita over di mi den mi cel. Un tawata bisa: “Nos mester tir’e mata! Ami lo tir’e mata!” Pero e otro kier a check con mi curpa ta prome cu nan mata mi. Mi a roga nan pa laga mi biba. Porfin nan a sali for di mi cel, y mi a gradici Yehova cu el a yuda mi.

E bewakernan tawatin un metodo special di interogacion. Nan a manda mi drumi boca  abou riba suela. Caba nan a pone meya den mi boca, mara mi man cu mi pia, y a suta mi te ora mi tawata sangra. Nan a stop solamente pasobra un di e soldanan a bisa cu e tawata cansa. Nan a puntra mi ta ken mi casa mester a topa e dia cu nan a arest’e. Mi no a bisa nan, pues nan a sigui bati mi durante tres dia. E di cuater dia, nan a laga mi hiba mi yiu serca mi mama. Tawata masha friu mes, y mi a carga mi yiu riba mi lomba tur na herida. Nos a cana 13 kilometer pa yega e stacion di trein. Djei mi a bai cas cu trein, pero mi mester a regresa na e campamento riba e mesun dia.

Nan a sentencia mi na seis aña di prizon na Budapest. Ora mi a yega einan, mi a tende cu Tibor tambe tawata einan. Esta felis nos tawata ora cu nan a permiti nos papia cu otro, maske tawata djis pa un par di minuut na waya! Nos tur dos a sinti Yehova su amor y e momentonan precioso aki a fortalece nos. Prome cu nos a haya chens di bolbe topa atrobe, nos tur dos lo a pasa door di pruebanan horibel, y lo a scapa di chiripa bes tras bes.

Di Prizon pa Prizon

Nos tawata mas o menos 80 ruman mohe gepak riba otro den un cel. Nos a anhela poco cuminda spiritual, pero tawata parce imposibel pa laga cos drenta den prizon. Acaso nos lo por a haya algo for di den prizon mes? Laga mi conta bo kico nos a haci. Mi a ofrece pa drecha meya di e oficinistanan di prizon. Den un di e meyanan, mi a pone un pida papel cu e peticion pa haya e number di catalok di e Bijbel cu tin den e biblioteca di prizon. Pa no lanta sospecho, mi a pone tambe titulo di dos otro buki.

E siguiente dia, mi a haya un otro stapel di meya di e oficinistanan. Den un di nan tawatin e contesta. E ora ei mi a duna un bewaker e numbernan aki y a pidie pa mi haya e bukinan. Esta contento nos tawata ora nos a haya e bukinan, incluso e Bijbel! E resto di e bukinan nos tawata cambia tur siman, pero e Bijbel si nos a keda cu ne. Ora cu e bewaker tawata pidi nos p’e, semper nos tawata contest’e: “E ta un buki grandi, y tur hende kier les’e.” Asina nos por a lesa e Bijbel.

Un dia, un funcionario a invita mi na su oficina. E tawata parce sumamente cortes.

E di: “Sra. Haffner, mi tin bon noticia pa bo. Bo por bai cas. Kisas mañan. Si tin un trein, bo por bai awe mes.”

Mi a contesta: “Esei lo ta fantastico.”

E di: “Claro cu lo ta fantastico. Bo tin un yiu, y mi ta kere cu bo mes kier cri’e.” Anto el a agrega: “Djis firma e carta aki.”

Mi a puntr’e: “Kico e ta?”

El a insisti: “No worry cu e carta. Djis firm’e, y bo por bai.” Caba el a bisa mi: “Asina cu bo yega cas, bo por haci kico cu bo kier. Pero awor bo tin cu firma cu bo no ta un Testigo di Yehova mas.”

Mi a hala patras y a nenga rotundamente.

“Awel, lo bo muri akiden!” el a grita rabia y a manda mi bai.

Na mei 1943, nan a manda mi un otro prizon na Budapest y despues na e pueblito di Márianosztra, caminda nos a biba den un combento hunto cu aproximadamente 70 soeur. Apesar cu nos a pasa hamber y otro miseria, nos tawata ansioso pa comparti nos speransa cu nan. Un di e monhanan a mustra berdadero interes den nos mensahe y a bisa: “E siñansanan aki ta bunita. Nunca mi no a tende nada paresido. Por fabor, conta mi mas.” Nos a cont’e tocante e mundo nobo y con maraviyoso bida lo ta. Segun cu nos tawata papia, e madre superiora a yega. Mesora  nan a cohe e soeur interesa bai cu ne, kit’e sunu y batie mal bati cu zwiep. Ora nos a bolbe top’e, el a roga nos: “Por fabor, pidi Yehova pa e salba mi y saca mi for di djaki. Mi kier ta un di boso.”

Nos siguiente destinacion tawata un prizon bieu na Komárom, un stad na oriya di Riu Danube, rond di 80 kilometer west di Budapest. E condicion di bida den e prizon ei tawata teribel. Mescos cu varios ruman mohe, mi tambe a bira hopi malo cu tifus, y mi tawata saca sanger y a bira hopi suak. Nos no tawatin remedi, y mi a pensa cu mi ta bai muri. Pero net a sosode cu un di e funcionarionan di prizon tawata busca un hende cu por a haci trabou di oficina. E rumannan a menciona mi nomber. Asina mi a haya remedi y a recupera.

Bek Hunto cu Mi Famia

Segun cu e ehersito Sovietico tawata bin for di oost, nos mester a muda pa west. E historia lo bira mucho largo si mi mester describi tur e horornan cu nos a pasa aden. Mi a hera muri varios biaha, pero danki na e proteccion di Yehova mi a sobrevivi. Ora cu e guera a termina, nos tawata den e stad Checo Tábor, un 80 kilometer for di Praga. A tuma tres siman pa ami cu mi cuña Magdalena yega nos cas na Lučenec, dia 30 di mei 1945.

Djaleu mi por a mira mi suegra y mi yiu stima, Tibor, den cura. Mi wowonan a yena cu awa, y mi a grita: “Tibike!” El a core bin y bula den mi brasa. “Bo no ta bai atrobe, no, Mama?” Esei tawata e prome palabranan cu el a bisa mi, y nunca lo mi lubida nan.

Yehova a tene misericordia tambe cu mi casa, Tibor. For di prizon na Budapest, nan a mand’e na e campo di trabou forsa na Bor, hunto cu aproximadamente 160 ruman homber. Hopi biaha nan a hera muri, pero como grupo nan a keda na bida. Tibor a bin cas bek dia 8 di april 1945, casi un luna prome cu mi.

Despues di guera, ainda nos tawatin mester di Yehova su forsa pa sobrevivi e pruebanan di e siguiente 40 añanan bou di mando comunista na Checoslovakia. Nan a bolbe sentencia Tibor na un castigo largo di prizon, y mi mester a cria nos yiu sin dje. Despues cu Tibor a sali, el a sirbi como superintendente biahero. Durante e 40 añanan di comunismo, nos a probecha di tur oportunidad pa comparti nos fe. Nos a logra yuda hopi hende siña e berdad. Asina nan a bira nos yiunan spiritual.

Tawata un goso grandi ora cu nos a haya libertad religioso na 1989! E siguiente aña, nos a asisti na e prome congreso den nos pais despues di hopi tempo. Ora cu nos a mira miles di nos rumannan cu pa decadanan largo a mantene nan integridad, nos tawata sa cu ta Yehova tawata un fuente poderoso di fortalesa pa nan tur.

Mi kerido esposo, Tibor, a muri fiel na Dios dia 14 di october 1993. Y awor ami ta biba pega cu mi yiu na Žilina, Slovakia. Fisicamente mi no tin masha forsa mas, pero mediante e poder di Yehova mi spirito ta fuerte. Mi no tin duda cu pa medio di su forsa mi por soporta cualkier prueba cu presenta den e sistema bieu aki. Ademas, mi ta anticipa e tempo ora cu pa medio di Yehova su bondad inmereci, lo mi por biba pa semper.

[Plachi na pagina 20]

Mi yiu homber Tibor, Jr., (na edad di 4 aña) cu mi mester a laga atras

[Plachi na pagina 21]

Tibor, Sr., hunto cu otro rumannan na Bor

[Plachi na pagina 22]

Ami cu Tibor y Magdalena, mi cuña, na 1947, na Brno

[Plachi na pagina 23]

Mi a hera muri varios biaha, pero danki na e proteccion di Yehova mi a sobrevivi