Cansa, Pero Nos No Ta Entrega

“[Yehova] e Creador di e finnan di tera . . . ta duna forsa na esun cansa, y e ta aumenta poder pa esun cu ta falta poder.”—ISAIAS 40:28, 29.

1, 2. (a) Ki invitacion atractivo ta ser extendi na tur cu kier practica adoracion puro? (b) Kico por ta un peliger serio pa nos spiritualidad?

COMO disipelnan di Hesus, nos ta bon conoci cu su invitacion atractivo: “Bin serca mi tur cu ta cansa y carga, y lo mi duna boso sosiego. . . . Pasobra mi yugo ta suave y mi carga ta lihe.” (Mateo 11:28-30) Tambe Bijbel ta ofrece cristiannan ‘temponan di refrescamento for di e presencia di Yehova.’ (Echonan 3:19) Abo mes tambe sin duda a experencia personalmente e efectonan refrescante di siña berdadnan biblico, di tin un speransa briyante pa futuro y di aplica e principionan di Yehova den bo bida.

² Sinembargo, algun adorado di Yehova ta pasa den periodonan di cansancio emocional. Den algun caso e periodo di desanimacion ta cortico. Pero den otro casonan e sintimento di ta agota, por dura pa periodonan largo. Cu pasamento di tempo, algun ruman por cuminsa sinti cu nan responsabilidadnan cristian a bira un peso en bes di un carga refrescante manera Hesus a priminti. Tal sintimentonan negativo por ta un peliger serio pa un cristian su relacion cu Yehova.

3. Dicon Hesus a ofrece e conseho cu nos ta haya na Huan 14:1?

³ Poco prome cu nan a aresta Hesus y ehecut’e, el a bisa su disipelnan: “No laga boso curason bira intrankil; kere den Dios, kere tambe den mi.” (Huan 14:1) Hesus a bisa e palabranan aki pasobra e apostelnan tawata a punto di confronta susesonan tragico. Despues lo a bin un ola di persecucion. Hesus tawata sa cu su apostelnan lo por a trompica di puro desanimacion. (Huan 16:1) Si e apostelnan no controla nan tristesa, esei lo por a pone nan bira spiritualmente debil y perde nan confiansa den Yehova. Esaki ta conta tambe pa cristiannan djawe. Un periodo largo di desanimacion por causa hopi tristesa y angustia, y nos curason por bira pisa. (Yeremias 8:18) E persona cu nos ta di paden por bira debil. Bou di e presion aki, nos por paralisa emocionalmente y spiritualmente, y asta perde nos deseo di adora Yehova.

4. Kico nos por haci pa nos curason figurativo no cansa y entrega?

⁴ Pesei e siguiente conseho biblico ta na su luga: “Warda bo curason riba tur cos, pasobra e ta e fuente di bida.” (Proverbionan 4:23) Bijbel ta ofrece conseho practico cu ta yuda nos proteha nos curason figurativo contra desanimacion y cansancio spiritual. Sinembargo, prome nos tin cu identifica e causa di nos cansancio.

Cristianismo No Ta Opresivo

5. Kico ta parce un contradiccion relaciona cu ser un disipel cristian?

⁵ Ta berdad cu ser un cristian ta rekeri esfuerso vigoroso. (Lucas 13:24) Hesus a asta declara: “Ken cu no carga su staca di tormento y sigui mi no por ta mi disipel.” (Lucas 14:27, NW) Na prome instante e palabranan aki por parce di ta contradeci loke Hesus a bisa tocante cu su carga ta lihe y ta duna sosiego. Pero en realidad e no ta un contradiccion.

6, 7. Dicon nos por bisa cu nos forma di adoracion no ta causa cansancio?

⁶ Aunke nos curpa ta cansa ora nos ta haci esfuerso vigoroso y ta traha duro, toch esei  por duna nos satisfaccion y laga nos sinti nos refresca ora nos ta hacie pa un bon causa. (Eclesiastes 3:13, 22) Y no por tin miho causa cu comparti berdadnan biblico maraviyoso cu nos prohimo. Ademas, nos lucha pa biba na harmonia cu Dios su normanan moral halto no ta nada na comparacion cu e beneficionan cu nos ta ricibi door di haci esei. (Proverbionan 2:10-20) Asta ora hende ta persigui nos, nos ta consider’e un honor pa sufri pa causa di e Reino di Dios.—1 Pedro 4:14.

⁷ Hesus su carga en berdad ta refrescante, specialmente ora compar’e cu e scuridad spiritual di e hendenan cu ainda ta bou di e yugo di religion falso. Dios ta stima nos tiernamente y e no ta exigi cosnan irasonabel for di nos. Yehova “su mandamentonan no ta pisa.” (1 Huan 5:3) Cristianismo berdadero, manera e Scritura ta describie, no ta opresivo. Pues, claramente nos forma di adoracion no ta causa cansancio y desanimacion.

“Pone un Banda Tur Strobacion”

8. Kico hopi bes ta e causa di cansancio spiritual?

⁸ Cualkier cansancio spiritual cu nos ta sinti, hopi bes ta debi na e peso extra cu e sistema di cosnan corupto aki ta pone riba nos. Como cu “henter mundo ta bou di control di e malbado”, nos ta rondona pa forsanan negativo cu por cansa nos y caba cu nos balansa cristian. (1 Huan 5:19) Actividadnan innecesario por complica y stroba nos rutina cristian. E pesonan extra aki por bira un carga pisa pa nos y asta kibra nos spirito. Apropiadamente, Bijbel ta conseha nos pa “pone un banda tur strobacion.”—Hebreonan 12:1-3.

9. Con metanan materialista por bira un carga pisa pa nos?

⁹ Por ehempel, mundo su precupacion extremo cu prominencia, placa, entretenimento, biahenan di placer y otro metanan materialista por influencia nos manera di pensa. (1 Huan 2:15-17) Algun cristian di prome siglo cu tawata core tras di rikesa a complica nan bida severamente. Apostel Pablo a splica: “Esnan cu kier bira rico ta cai den tentacion y den trampa y den hopi deseonan loco y dañino, cualnan ta hundi hende den ruina y destruccion. Pasobra amor pa placa ta raiz di tur sorto di maldad, y algun hende, door di desea esaki, a desvia for di e fe, y a traspasa nan mes cu hopi dolor.”—1 Timoteo 6:9, 10.

10. Kico nos por siña tocante rikesa for di Hesus su comparacion di e sembrado?

¹⁰ Si nos ta sinti nos cansa y desanima den nos sirbishi na Dios, e motibo lo por ta pasobra nos ta asina ocupa cu cosnan material cu no ta resta tempo pa nos cosnan spiritual? Manera Hesus su comparacion di e sembrado ta indica, esaki por ta un posibilidad masha real. Hesus a compara “e precupacionnan di mundo, y e engaño di rikesa, y e deseonan pa otro cosnan” cu mata di sumpiña cu “ta drenta y ta hoga” e simiña di e palabra di Dios cu tin den nos curason. (Marco 4:18, 19) Pesei Bijbel ta conseha nos: “Laga boso caracter ta liber di amor pa placa y sea contento cu loke boso tin; pasobra e mes a bisa: ‘Nunca lo mi no bandona bo, y nunca lo mi no laga bo desampara.’”—Hebreonan 13:5.

11. Con nos por elimina cosnan cu por ta un carga pisa pa nos?

 ¹¹ Tin biaha e cos cu ta complica nos bida no ta cu nos ta core tras di mas cos, sino ta loke nos ta haci cu e cosnan cu nos tin caba. Tin ruman kisas ta sinti nan emocionalmente agota debi na problemanan serio di salu, of morto di un ser keri of otro problemanan angustioso. Nan a mira cu ta necesario pa de bes en cuando nan haci algun ahuste. Un pareha casa a dicidi di stop cu cierto hobby y proyectonan personal innecesario. De echo nan a pasa door di nan cosnan y literalmente a paketa tur material relaciona cu e proyectonan ei y a warda nan caminda nan no ta mira nan. Periodicamente, ta bon pa nos tur haci un inventario di nos custumbernan y pocesionnan, y pone un banda tur peso innecesario pa asina nos no cansa, perde animo y entrega.

Ta Importante pa Nos Ta Rasonabel y Conciente di Nos Limitacionnan

12. Kico nos mester reconoce tocante nos propio erornan?

¹² Nos propio erornan, asta den asuntonan chikito, pocopoco por haci nos bida complica. E siguiente palabranan di David ta hopi cierto: “Pasobra mi inikidadnan [“erornan”, NW] a pasa riba mi cabes; manera un carga pisa nan ta pisa mucho pa mi.” (Salmo 38:4) Hopi bes, un par di cambio practico lo alivia nos di carganan pisa.

13. Con ser rasonabel ta yuda nos tin un punto di bista balansa di nos sirbishi?

¹³ Bijbel ta anima nos pa cultiva “sabiduria sano y discrecion.” (Proverbionan 3:21, 22) Segun Bijbel, ‘e sabiduria di ariba ta rasonabel.’ (Santiago 3:17) Algun ruman a sinti nan presiona pa haci mes tanto cu otro rumannan ta haci den sirbishi cristian. Sinembargo, Bijbel ta conseha nos: “Laga cada un samina su mes obra, y e ora ei e lo tin motibo pa gaba solamente encuanto su mes, y no encuanto un otro. Pasobra cada un lo carga su mes carga.” (Galationan 6:4, 5) Ta berdad cu e bon ehempel di nos rumannan cristian por anima nos pa sirbi Yehova di henter alma, pero sabiduria sano y ser rasonabel lo yuda nos pone metanan realistico, segun nos propio circunstancianan.

14, 15. Con nos por desplega sabiduria sano door di percura pa nos necesidadnan fisico y emocional?

¹⁴ Si nos ta rasonabel asta den cosnan cu por parce di menos importancia, esei por yuda cu nos no ta sinti nos cansa. Por ehempel, nos ta cultiva custumbernan balansa cu ta contribui na bon salu fisico? Considera e ehempel di un pareha casa cu ta sirbi na un di e sucursalnan di Testigonan di Yehova. Nan a mira e balor di sabiduria sano pa preveni agotamento. E esposa a bisa: “Sin importa con hopi trabou nos tin, nos ta purba di bai drumi tur anochi rond di e mesun ora. Tambe nos ta haci ehercicio cu regularidad. Esaki realmente a yuda nos. Nos a siña kico ta nos limitacionnan, y nos ta actua di acuerdo cu esei.  Nos no ta purba compara nos mes cu e rumannan cu ta parce di tin energia pa no caba.” Nos ta come cuminda nutritivo regularmente y ta haya suficiente sosiego? Si nos ta duna atencion rasonabel na nos salu en general, lo tin menos chens cu nos ta sinti nos agota emocionalmente y spiritualmente.

¹⁵ Algun di nos tin necesidadnan special. Por ehempel, un ruman mohe cristian tawata den sirbishi di tempo completo den varios asignacion basta dificil. El a confronta problemanan serio di salu, incluso cancer. Kico a yud’e trata cu situacionnan cu ta causa tension? El a bisa: “Pa mi, ta importante pa mi tin momentonan cu mi por ta mi so y cu rond di mi ta totalmente keto. Mas mi ta sinti stress y cansancio ta acumula den mi, mas urgente ta pa mi haya momentonan cu mi ta so y trankil, caminda mi por lesa y sosega.” Sabiduria sano y discrecion ta yuda nos reconoce nos necesidadnan individual y satisface nan, y asina nos ta evita cansancio spiritual.

Yehova Dios Ta Duna Nos Energia

16, 17. (a) Dicon ta masha importante pa cuida nos salu spiritual? (b) Kico nos mester inclui den nos rutina diario?

¹⁶ Naturalmente ta masha importante pa nos cuida nos salu spiritual. Ora nos tin un amistad intimo cu Yehova Dios, nos por bira fisicamente cansa, pero nunca nos lo cansa di ador’e. Yehova ta esun cu “ta duna forsa na esun cansa, y e ta aumenta poder pa esun cu ta falta poder.” (Isaias 40:28, 29) Apostel Pablo, kende personalmente a experencia cu e palabranan aki ta berdad, a skirbi: “Nos no ta perde animo, ma maske nos hende exterior ta degenera, toch nos hende interior ta wordo renoba dia pa dia.”—2 Corintionan 4:16.

¹⁷ Tuma nota di e expresion “dia pa dia.” Esaki ta indica cu nos tin cu haci uzo di Yehova su percuracionnan riba un base diario. Un cristian cu a sirbi fielmente como misionero pa 43 aña, a confronta periodonan di cansancio fisico y di desanimacion. Pero e no a entrega. El a bisa: “Mi a hacie un custumber pa lanta tempran ya asina prome cu mi cuminsa cu cualkier trabou, mi por a dedica tempo na haci oracion na Yehova y lesa su Palabra. E rutina diario aki a yuda mi persevera te cu awor.” En berdad nos por conta riba Yehova su poder sostenedor si regularmente, si “dia pa dia”, nos ta haci oracion na dje y medita riba su cualidadnan eleva y su promesanan.

18. Ki consuelo Bijbel ta duna cristiannan fiel cu ta di edad avansa of cu ta malo?

¹⁸ Specialmente pa cristiannan cu ta sinti nan desanima debi na edad avansa y problema cu salu, esaki ta masha util. Rumannan asina por bira deprimi, no pasobra nan ta compara nan mes cu otro hende, sino pasobra nan ta compara nan mes cu loke nan tawata. Ta un gran consuelo pa sa cu Yehova ta honra hende di edad! Bijbel ta bisa: “Cabei blanco ta un corona di gloria; den e caminda di husticia e ta wordo haya.” (Proverbionan 16:31) Yehova conoce nos limitacionnan y ta duna gran balor na e adoracion di henter curason cu nos ta rindi apesar di nos problemanan di salu. Y e bon obranan cu ya nos a haci caba ta keda permanentemente graba den su memoria. E Scritura ta sigura nos: “Dios no ta inhusto pa lubida boso trabou y e amor cu boso a mustra pa su nomber, door cu boso a sirbi y ainda ta sirbi e santonan.” (Hebreonan 6:10) Nos tur ta masha contento cu den nos seno nos tin rumannan cu pa hopi decada a duna prueba di nan fieldad na Yehova!

No Entrega

19. Ki beneficio nos ta saca door di keda ocupa haciendo loke ta bon?

¹⁹ Hopi hende ta kere cu actividad fisico vigoroso riba un base regular por alivia cansancio. Di igual manera, actividadnan spiritual regular por yuda alivia cualkier sintimento di cansancio emocional of spiritual. Bijbel ta bisa: “No laga nos cansa di haci bon, pasobra na debido tempo nos lo cosecha, si nos no desmaya. Asina anto, mientras nos tin  oportunidad, laga nos haci bon na tur hende, y specialmente na esnan cu ta di e famia di fe.” (Galationan 6:9, 10) Tuma nota cu e texto ta bisa “laga nos haci bon.” Esaki ta indica accion di nos parti. Haci bon pa otro hende en berdad por yuda nos pa no cansa den nos sirbishi na Yehova y entrega.

20. Pa combati desanimacion, ken su compania nos mester evita?

²⁰ Na contraste, asociacion y actividadnan cu hende cu no ta haci caso di e leinan di Dios, por bira un carga pisa. Bijbel ta spierta nos: “Piedra ta pisa, y santo ta pisa hopi, ma furia di un bobo [of, “iritacion causa pa un bobo”, NW] ta mas pisa cu tur dos.” (Proverbionan 27:3) Pa combati sintimentonan di desanimacion y cansancio, nos mester evita compania di hende cu ta pensa riba cosnan negativo so y cu ta gusta piki pieu y critica otro hende.

21. Con nos por ta un animacion pa otro hende na reunionnan cristian?

²¹ Reunionnan cristian ta un percuracion di Yehova cu por yena nos cu energia spiritual. Na e reunionnan nos tin un excelente oportunidad pa anima otro cu instruccion y asociacion refrescante. (Hebreonan 10:25) Tur ruman den congregacion mester haci esfuerso pa nan palabranan ta edificante ora nan ta duna comentario na reunion of ora nan tin parti den e programa riba plataforma. Specialmente esnan cu ta hiba delantera como maestro tin e responsabilidad di ta un animacion pa otro rumannan. (Isaias 32:1, 2) Asta ora cu ta necesario pa nan exhorta of reprende, nan mester hacie na un manera refrescante. (Galationan 6:1, 2) Nos amor pa otro hende realmente lo yuda nos sirbi Yehova sin entrega.—Salmo 133:1; Huan 13:35.

22. Apesar di nos naturalesa humano imperfecto, dicon nos por tin bon animo?

²² Adora Yehova den e tempo aki di fin ta encera trabou. Y cristiannan tambe ta sinti e efectonan di agotamento mental, dolor emocional y circunstancianan cu ta causa tension. Nos naturalesa humano imperfecto ta delicado, mescos cu cos traha di klei. Sinembargo, Bijbel ta bisa: “Nos tin e tesoro aki den pochi di klei, pa e excelencia di e poder por ta di Dios y no di nos mes.” (2 Corintionan 4:7) Si, nos lo cansa, pero laga nos nunca entrega. Mas bien, laga nos tin bon animo y ‘bisa cu tur confiansa: “Yehova ta mi yudado.”’—Hebreonan 13:6.

Un Repaso Cortico

• Menciona algun carga hopi pisa cu nos lo por pone un banda.

• Con nos por “haci bon” na nos rumannan cristian?

• Con Yehova ta sostene nos ora nos ta sinti nos cansa of desanima?

[Preguntanan di Estudio]

[Plachi na pagina 23]

Hesus tawata sa cu periodonan largo di desanimacion por a descurasha e apostelnan

[Plachi na pagina 24]

Algun cristian a stop cu cierto hobby y proyectonan personal innecesario

[Plachi na pagina 26]

Apesar di nos limitacionnan, Yehova ta duna gran balor na e adoracion cu nos ta rindi di henter curason