Con pa Haya e Miho Conseho

BIDA exitoso ta algo cu tur hende kier. E factornan clave pa logra un bida asina den e mundo complica aki ta bon conseho y e deseo pa actua na harmonia cu tal conseho. Sinembargo, hende no tawata semper dispuesto pa presta atencion na bon conseho. Hopi hende a yega di pretende cu un persona mester biba su bida manera e kier. De echo, e registro biblico ta mustra cu Satanas, e enemigo original di soberania dibino, a ofrece independencia na e prome pareha. Na Genesis 3:5 tin para skirbi loke el a declara na Eva: “Dios sa cu e dia cu boso come di [e palo di conocemento di bon y malo], boso wowo lo habri y boso lo ta manera Dios, conociendo bon y malo.”

Despues di esei, Adam cu Eva a logra hiba un bida exitoso, sin consecuencianan serio, siendo guia unicamente pa nan propio opinion? Definitivamente cu no. Mesora nan a keda desapunta cu e resultadonan di e supuesto habilidad di sa loke ta bon y malo. Dios, cu rason, a desaproba nan acto y nan a cuminsa un bida duro como hende imperfecto cu morto como e resultado final. (Genesis 3:16-19, 23) Morto ta afecta nos tur. Bijbel ta bisa: “Door di un hende [Adam] pica a drenta den mundo, y morto door di pica, y asina morto a pasa pa tur hende, pasobra tur a peca.”—Romanonan 5:12.

Aunke loke Adam cu Eva a scohe tawatin mal consecuencia, tin hopi hende cu ainda no ta combenci cu ta sabi pa pone na practica e conseho di Dios, Esun cu a crea hende. Sinembargo, Bijbel ta declara cu e “ta inspira pa Dios”, y cu e por yuda nos pa ta “perfecto [of “plenamente competente”, NW], ekipa pa tur bon obra.” (2 Timoteo 3:16, 17) Sigur sigur nos lo ta mas felis si nos sigui e conseho di Bijbel. Un area principal den cua esaki ta e caso ta bida di famia.

 Fieldad den Matrimonio

Segun Bijbel, Dios su proposito tawata pa matrimonio ta un union permanente. (Genesis 2:22-24; Mateo 19:6) Ademas, e Scritura ta bisa cu “e cama matrimonial [mester] ta sin mancha.” Esei ta nifica cu no mester contamina e union aki cu relacion sexual pafo di e matrimonio. (Hebreonan 13:4) Sinembargo, probablemente bo sa cu awe mayoria matrimonio no ta cumpli cu e norma aki. Algun hende tin e custumber di flirt na trabou cu hende cu no ta nan casa. Otronan ta gaña nan famianan pa asina nan por pasa tempo cu un persona cu no ta nan casa, pero cu ken nan tin un relacion romantico. Tin hende cu ta asta bandona nan casa pa bai biba cu un partner mas jong, pretendiendo cu asina nan ta sinti nan mes mas jong y mas felis, manera a sosode den e caso di Verónica cu e articulo anterior a menciona.

Sinembargo, un determinacion pa agrada bo mes cueste loke cueste lo no trece felicidad duradero. Ronald por duna testimonio di esei. Combenci cu su bida lo bira miho, el a bandona su casa pa cuminsa un famia nobo cu un mohe cu tawata su amante secreto pa seis aña largo y cu ken e tawatin dos yiu caba. Sinembargo, algun tempo despues cu Ronald a pone fin na su matrimonio, su amante a bandon’e! Finalmente Ronald a bai biba hunto cu su mayornan. El a describi e situacion como “humiyante.” Esei ta djis un ehempel. E clase di conducta ei, motiva pa deseonan egoista, a contribui na un ola sin precedente di diborcio y famia kibra, cu ta resulta den sufrimento pa hopi hende, tanto adulto como mucha.

Di otro banda, si nos sigui conseho di Bijbel esei ta resulta den berdadero felicidad. Esei tawata e caso cu Roberto, kende a bisa: “Ta danki na e conseho di Bijbel cu mi no a perde mi casa. Nos no ta logra berdadero felicidad door di entrega na tentacion y cuminsa un relacion cu un hende cu no ta nos casa, aunke con atractivo e persona ei por parce. Educacion biblico a yuda mi balora mi casa, kende tin hopi aña na mi lado.” E conseho biblico pa “no laga ningun hende trata e esposa di su hubentud cu traicion”, a hunga un papel importante den bida di Roberto. (Malakias 2:15) Den ki otro aspecto nos por beneficia di e conseho di Dios?

Con pa Cria Nos Yiunan

Decadanan pasa, tawatin e idea popular cu mayornan no mester pone mucho limite ora nan ta cria nan yiunan. A parce cu tawata rasonabel pa laga yiunan tuma nan propio decisionnan tocante con pa pensa y con pa comporta nan mes. E meta tawata pa no frena nan desaroyo. Den algun luga, nan  a establece asta sistemanan di educacion menos structura den cua entre otro, e alumnonan por a dicidi si nan ta bai les of no y nan por a scohe cuanto nan ta recrea of cuanto instruccion nan kier haya. E maneho di un di e tipo di scolnan aki tawata “pa laga e muchanan expresa nan sintimentonan sin ser influencia pa e opinion y intervencion di un adulto.” Awendia, ainda tin algun consehero di comportacion humano cu no ta kere cu ora nos duna mucha cierto grado di disiplina esei ta trece beneficio, ni asta ora cu mayornan ta pensa cu ta necesario pa duna disiplina amoroso.

Kico tawata e resultado? Tin hopi hende ta kere cu e sistema permisivo di cria yiu a duna e muchanan demasiado libertad. Segun nan, esaki a hiba na un aumento di criminalidad y uzo di droga. Un encuesta na Merca a revela cu casi 70 porshento di esnan entrevista tawata pensa cu mucha- y hobennan no ta haya suficiente guia di nan mayornan. Ora hende ta purba splica e causa di tiroteonan na scol y di otro crimennan horibel cu teenagernan a comete, hopi di nan ta culpa e “falta di disiplina firme di parti di mayornan.” Anto asta ora e resultadonan no ta asina tragico, mayornan y yiunan ta cosecha e frutanan amargo di e manera incorecto di cria yiu.

Kico Bijbel ta bisa relaciona cu e asunto aki? E Scritura ta conseha mayornan pa nan eherce nan autoridad cu amor y firmesa. Bijbel ta bisa: “Locura ta mara den curason di un mucha; bara di coreccion lo aleha esaki for di dje.” (Proverbionan 22:15) Claro cu tur disiplina cu un mayor ta duna mester ta apropiado pa e circunstancia. Cualkier disiplina cu nan duna mester ta caracterisa principalmente pa suavidad, dominio propio y consideracion. Di e manera ei, e disiplina ta un muestra di amor. Ora mayornan ta eherce nan autoridad den un manera amoroso y no na un manera cruel y bruto, nan tin mas chens di logra exito.

Aplicacion di e conseho aki a duna resultadonan bisto. Arturo, un homber di 30 aña di edad na Mexico cu a casa resientemente, a bisa: “Mi tata a laga ami cu mi rumannan compronde bon cla cu ta e y mi mama ta esnan cu ta eherce autoridad den nos famia. Nunca nan a basila pa disiplina nos. Pero semper nan tawatin tempo pa combersa cu nos. Awor cu mi ta adulto, mi ta balora e bida stabil cu mi tin, y mi sa cu pa gran parti esaki ta e resultado di e bon guia cu mi a ricibi.”

 Probecha di e Miho Conseho

Dios su Palabra, Bijbel, ta contene e miho conseho cu hende por haya. No ta pa e circulo di famia so e tin guia. E ta yuda ekipa nos den hopi manera pasobra e ta siña nos con pa actua den un mundo caminda mayoria hende no ta dispuesto pa acepta cu ta un Fuente superior di sabiduria mester goberna nan bida pa nan por saca probecho.

Yehova Dios, e Creador di hende, a duna e garantia aki mediante salmista David: “Lo mi instrui bo y siña bo e caminda cu bo tin cu cana; lo mi conseha bo; mi wowo ta riba bo.” (Salmo 32:8) Bo por imagina bo kico ta nifica cu e Creador tin su bista riba nos pa asina e por proteha nos di peliger? Pero, e pregunta cu nos cada un tin cu haci nos mes ta: ‘Lo mi acepta Yehova su guia protector humildemente?’ Su Palabra ta bisa nos amorosamente: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.”—Proverbionan 3:5, 6.

Pa nos siña conoce Yehova ta rekeri esfuerso y dedicacion, pero cu yudansa di Bijbel hende por logr’e. E estilo di bida cu Yehova ta recomenda “ta contene promesa pa e bida presente y pa esun cu ta bin.” Considerando tur e beneficionan cu e estilo di bida ei ta ofrece, esaki sigur ta un medio di gran ganashi.—1 Timoteo 4:8; 6:6.

Kisas bo ta haya e comprondemento penetrante cu Bijbel ta ofrece y e bendicionnan cu biba di acuerdo cu esaki ta trece cu ne masha atractivo. Si ta asina, pone como bo prioridad pa lesa y medita riba e Palabra di Dios. Esaki lo yuda bo enfrenta cu exito e desafionan di awendia y tambe esnan cu por bin den futuro. Ademas, lo bo siña di e speransa pa biba den Dios su mundo nobo, caminda tur hende lo ta siña pa Yehova y lo disfruta di pas abundante.—Isaias 54:13.

[Plachi na pagina 5]

Conseho di Bijbel por fortalece e banchi matrimonial

[Plachinan na pagina 6]

Conseho di Bijbel ta e base pa guia excelente, y toch e ta laga luga pa hende relaha tambe

[Plachinan na pagina 7]

Hende cu ta aplica conseho di Bijbel por disfruta di un bida bon balansa