“Esei Ta e Miho Cos Cu Bo Por Haci”

ALEXIS ta un mucha homber di 5 aña cu ta biba na e stad Morelia, Mexico. Su mayornan ta studia Bijbel y ta asisti na e reunionnan di Testigonan di Yehova. Na un asamblea cu el a bai cu su mayornan, el a mira un demostracion tocante e trabou di predica di cas pa cas. Spontaneamente el a bira wak su tata y a puntr’e: “Papi, Papi, dicon Papi no ta bai predica?” E tata a contest’e: “Ainda mi ta studiando Bijbel, pa prepara pa bai hacie.” Contento Alexis a bis’e: “Papi, esei ta e miho cos cu bo por haci.”

E chikitin aki a mira e necesidad di actua na harmonia cu su conocemento di Yehova. Ya cu algun di su primonan chikito ta biba den e mesun cas cu ne, el a haci oracion prome na Yehova y despues el a papia cu nan tocante e cosnan cu su mayornan a siñ’e for di Mi buki di relato bíblico. Aunke Alexis no por a lesa ainda, e tawata sa e contenido di e buki hopi bon door di e plachinan cu ta ilustra e relatonan. Asta el a bisa cu e kier bai cas di hende pa conta nan loke e tawata siñando tocante Dios su proposito.

Si, tanto hoben como bieu por pone nan bida na harmonia cu loke Yehova, “Esun Santo”, ta spera di nan y asina haya e privilegio unico di duna testimonio di Yehova entre e nacionnan. (Isaias 43:3; Mateo 21:16) No tin duda cu esei ta un di e miho cosnan cu un persona por haci.