Hende Tin Mester di Bon Conseho?

AWENDIA, hopi hende ta kere cu nan mes por distingui bon for di malo y cu nan tin derecho di haci loke nan kier. Otronan ta bisa cu tur cos mag, basta e persona mes ta sintie bon. Matrimonio y bida di famia, areglonan cu pa hopi tempo hende a considera fundeshi di e sosiedad humano, ta ser afecta drasticamente.—Genesis 3:5.

Tuma por ehempel, Verónica, * kende ta biba na Mexico. El a conta: “Un poco prome cu nos haci 15 aña casa, mi casa a bisa mi cu e tin un otro mohe. El a bisa mi cu e mohe ei ta mas jong y ta hacie mas felis, pesei lo e no lag’e. E pensamento cu mi miho amigo lo no ta na mi lado mas pa compaña mi, a shock mi. Antes mi tawata pensa cu e morto di un ser keri ta causa e dolor di mas grandi. Pero pa mi, adulterio tawata asta mas piyo, pasobra no solamente mi a perde e persona cu mi tawata stima profundamente, ma hunto cu esei e persona aki a sigui haci cosnan cu ta haci mi dolor.”

Un otro caso ta e situacion di un yoncuman di 22 aña cu ya caba ta diborcia y tin un yiu homber pero cu no ta dispuesto pa carga su responsabilidadnan como tata. E ta steun cu ta su mama mester percura p’e y pa su yiu. Si e mama no cumpli cu tur su exigencianan, e ta bira furioso y ta zundr’e y ofend’e, mescos cu un yiu malcria. E mama no sa kico pa haci ora e yiu ta comport’e di e manera ofensivo aki.

E casonan aki no ta unico. Tur caminda tin mas y mas casonan di separacion legal y diborcio. Hopi mucha ta mira con un di nan mayornan ta bandona nan hogar pa cuminsa un bida nobo. Tin hobennan cu a perde tur respet pa otro hende, asta pa nan mayornan,  y ta comporta nan mes di un manera cu den pasado tawata casi inimaginabel. Den hopi pais, a bira basta comun cu muchanan ta experimenta cu sex, uza droga, ataca hende y asesina maestronan of mayornan. Y podise bo a ripara cu no ta riba e tereno di criamento di yiu y matrimonio so hende ta confronta dificultad den e mundo djawe.

Segun cu nos ta mira e desaroyonan aki, podise nos ta puntra nos mes ta kico a sosode cu e sosiedad humano. Si hende realmente por distingui bon for di malo, con bin tin asina tanto problema sin solucion? Hende tin mester di bon conseho? Tin un fuente di tal bon conseho, uno cu a resulta di ta confiabel? Aunke hopi hende ta bisa cu nan ta kere den Dios y den su Palabra skirbi, no ta parce cu esaki tin masha influencia riba e decisionnan cu nan ta tuma. Pero ki beneficionan nos por saca ora nos busca y obtene conseho for di Dios? Laga nos considera esei den e siguiente articulo.

[Nota]