Odia sin Motibo
Odia sin Motibo
“Sin motibo nan a odia mi.”—HUAN 15:25.
1, 2. (a) Dicon algun persona ta keda straño cu hende ta papia malo di cristiannan, pero dicon tal papiamento no mester sorprende nos? (b) Den e articulo aki nos lo considera ‘ser odia’ den ki sentido? (Wak nota na pia di pagina.)
TESTIGONAN DI YEHOVA ta haci esfuerso pa biba segun e principionan cu tin den e Palabra di Dios. Debi na esei nan ta gosa di un excelente reputacion den hopi pais. Sinembargo, tin biaha hende a pinta nan malo. Por ehempel, segun un funcionario gubernamental di e stad St. Petersburg na Rusia: “Hende a pinta Testigonan di Yehova pa nos como un tipo di secta clandestino cu tawata sinta den scuridad y mata mucha y mata nan mes.” Pero despues di a traha cu Testigonan di Yehova en conexion cu un congreso internacional, e mesun funcionario aki a remarca: “Awor mi ta mira hende normal, cu ta smile . . . Nan ta pacifico y trankil, y nan stima otro masha hopi.” El a agrega: “Di berdad mi no por compronde dicon hende ta gaña e sorto di cosnan ei riba nan.”—1 Pedro 3:16.
2 Sirbidonan di Dios no ta haya placer den ser calumnia como malechor, sinembargo nan no ta keda sorprendi ora hende papia malo di nan. Hesus a adverti su sirbidonan di antemano: “Si mundo odia boso, sa anto cu el a odia ami prome cu boso. . . . Pa e palabra cu ta para skirbi den nan Lei keda cumpli: ‘Sin motibo nan a odia mi.’” * (Huan 15:18-20, 25; Salmo 35:19; 69:4) Mas prome Hesus a bisa su disipelnan: “Si nan a yama e cabes di cas Beelzebub, anto cuanto mas e miembronan di su cas!” (Mateo 10:25) Cristiannan ta compronde cu nan tin cu soporta tal reproche como parti di e “staca di tormento” cu nan a acepta ora nan a bira siguido di Cristo.—Mateo 16:24, NW.
3. Te na ki grado hende a persigui adoradonan berdadero?
3 Persecucion di adoradonan berdadero tin un historia masha largo, y a cuminsa for di tempo di “Abel, e husto.” (Mateo 23:34, 35) Esei no tawata limita na algun incidente isola. Hesus a bisa cu “tur hende lo odia” su siguidonan pa causa di su nomber. (Mateo 10:22) Ademas, apostel Pablo a skirbi cu tur sirbido di Dios—incluyendo cada un di nos—mester spera cu nos lo ser persigui. (2 Timoteo 3:12) Kico ta e motibo pa esaki?
E Fuente di Odio sin Motibo
4. Con Bijbel ta revela ta ken ta e fuente di tur odio sin motibo?
4 E Palabra di Dios ta revela cu for di principio tawatin un instigado invisibel. Tuma por ehempel e asesinato cruel di e prome homber di fe, Abel. Bijbel ta declara cu su ruman homber asesino, Cain, “tawata di e malbado”, Satanas e Diabel. (1 Huan 3:12) Cain a desplega e caracter di Satanas, y Diabel a uz’e pa cumpli cu su plannan malicioso. Tambe Bijbel ta revela e papel cu Satanas a hunga den e atakenan feros contra Job y Hesucristo. (Job 1:12; 2:6, 7; Huan 8:37, 44; 13:27) E buki di Revelacion ta indica bon cla ta ken ta tras di e persecucion di e siguidonan di Hesus, bisando: “Diabel ta bai tira algun di boso den prizon, pa boso wordo poni na prueba.” (Revelacion 2:10) Si, Satanas ta e fuente di tur odio sin motibo contra e pueblo di Dios.
5. Kico ta e motibo cu Satanas ta odia adoradonan berdadero?
5 Kico ta e motibo cu Satanas ta odia adoradonan berdadero? Den un plan malicioso di Satanas cu ta mustra su enorme arogancia, el a lanta contra “e Rei eterno”, Yehova Dios. (1 Timoteo 1:17; 3:6) E ta pretende cu Dios su gobernacion riba su criaturanan ta demasiado restrictivo y cu ningun persona ta sirbi Yehova cu un motibo puro, sino mas bien cu nan ta haci esei solamente pa probecho egoista. Tambe segun Satanas, si permitie pone hende na prueba, e por pone delaster un di nan stop di sirbi Dios. (Genesis 3:1-6; Job 1:6-12; 2:1-7) Satanas ta purba establece su mes como un soberano rival di Yehova door di calumnia Yehova di ta un opresor, un mentiroso y un fracaso. Pues anto, su furia contra e sirbidonan di Dios ta motiva pa su anhelo intenso pa ser adora.—Mateo 4:8, 9.
6. (a) Con nos ta personalmente envolvi den e cuestion di Yehova su soberania? (b) Con un comprondemento di e cuestion aki ta yuda nos mantene nos integridad? (Wak e cuadro, pagina 16.)
6 Abo ta mira con e cuestion aki ta toca bo bida? Como un sirbido di Yehova, probablemente bo a descubri cu aunke pa haci Dios su boluntad ta rekeri esfuerso sinsero, e beneficionan di esei ta sobresaliente. Pero kico si bo circunstancianan den bida ta hacie dificil, asta doloroso, pa sigui cumpli cu e leinan y principionan di Yehova? Y kico si ta parce cu bo no ta ricibi ningun beneficio a cambio? Lo bo yega na e conclusion cu no ta bale la pena pa sigui sirbi Yehova? Of bo amor pa Yehova y aprecio profundo pa su cualidadnan magnifico lo motiva bo pa sigui cana den tur su camindanan? (Deuteronomio 10:12, 13) Door di permiti Satanas trece cierto grado di sufrimento riba nos, Yehova a duna cada un di nos e chens di mustra kico ta nos contesta personal riba e desafio di Satanas.—Proverbionan 27:11.
“Ora Cu Hende Insulta Boso”
7. Cua ta un tactica cu Diabel ta uza pa purba kita nos for di Yehova?
7 Laga nos bai considera mas a fondo un di e trampanan mañoso cu Satanas ta uza den un intento pa proba su banda di e cuestion—su uzo di calumnia of insultonan mentiroso. Hesus a yama Satanas “e tata di mentira.” (Huan 8:44) E nomber descriptivo Diabel, cu ta nifica “Calumniado”, ta identific’e como e calumniado principal di Dios, di Dios su palabra confiabel y di su nomber santo. Diabel ta uza insinuacion, acusacion falso y mentira flagrante pa desafia Yehova su soberania, y e ta uza e mesun tacticanan pa calumnia Dios su sirbidonan fiel. Door di montona calumnia y insulto riba e Testigonan aki, e por haci un prueba pisa bira asta mas dificil pa carga.
8. Con Satanas a trece reproche riba Job, y cu ki efecto?
8 Considera loke a sosode cu Job, kende su nomber ta nifica “Obheto di Hostilidad.” Fuera di pone Job perde su medio di mantencion, su yiunan y su salu, Satanas a laga parce cu Job ta un pecado cu tawata haya castigo di Dios. Aunke Job tawata un homber masha respeta, hende a cuminsa despreci’e, entre nan, asta su famia y amigonan intimo. (Job 19:13-19; 29:1, 2, 7-11) Ademas, pa medio di consoladornan falso, Satanas a trata na ‘kibra Job cu palabra.’ Prome, door di insinua cu Job mester a comete algun pica serio, y despues door di conden’e directamente como un malechor. (Job 4:6-9; 19:2; 22:5-10) Ki un gran desanimacion esei lo mester tawata pa Job!
9. Con Satanas a laga Hesus parce un pecado?
9 E Yiu di Dios, como defensor principal di Yehova su soberania, a bira Satanas su obheto principal di hostilidad. Ora Hesus a bin na mundo, Satanas a trata na lag’e parce desfigura den sentido spiritual—mescos cu el a haci cu Job—door di duna e impresion cu Hesus ta un pecado. (Isaias 53:2-4; Huan 9:24) Hende a yama Hesus un burache y un homber golos, y a bisa cu e ‘tawatin un demoño.’ (Mateo 11:18, 19; Huan 7:20; 8:48; 10:20) Nan a acus’e falsamente di blasfemia. (Mateo 9:2, 3; 26:63-66; Huan 10:33-36) Esaki a causa Hesus angustia, pasobra e tawata sa cu esei a trece reproche inhustamente riba su Tata. (Lucas 22:41-44) Por ultimo, nan a claba Hesus na staca como un criminal maldiciona. (Mateo 27:38-44) Pa mantene integridad perfecto, Hesus a hay’e ta soporta hopi “hostilidad di pecadonan.”—Hebreonan 12:2, 3.
10. Con e resto di e unginan a bira e blanco di Satanas den tempo moderno?
10 Den tempo moderno, e resto di Cristo su siguidonan ungi tambe a bira Diabel su obheto di hostilidad. Bijbel ta describi Satanas como “e acusado di [Cristo su] rumannan, cu ta acusa nan di dia y anochi dilanti di nos Dios.” (Revelacion 12:9, 10) Desde cu a saca Satanas for di shelo y e ta limita na e bicindario di tera, el a intensifica su esfuerso pa pinta Cristo su rumannan como basura. (1 Corintionan 4:13) Den algun pais, hende calumniosamente a yama nan un secta peligroso, mescos cu hende a yama e cristiannan di prome siglo. (Echonan 24:5, 14; 28:22) Manera nos a menciona den introduccion, hende a calumnia nan pa medio di propaganda falso. Sinembargo, “atrabes di gloria y deshonor, atrabes di mal informe y bon informe”, e rumannan ungi di Cristo—apoya pa nan compañeronan di ‘otro carne’—humildemente a haci esfuerso pa ‘warda e mandamentonan di Dios y duna testimonio di Hesus.’—2 Corintionan 6:8, NW; Huan 10:16; Revelacion 12:17.
11, 12. (a) Kico por ta e causa di algun reproche cu cristiannan ta experencia? (b) Den ki maneranan un cristian por sufri inhustamente pa motibo di su fe?
11 Claro cu no ta tur reproche cu sirbidonan individual di Dios ta experencia ta pa “causa di husticia.” (Mateo 5:10) Algun problema por ta debi na nos propio imperfeccion. Nos no ta haya ningun merito special si ora nos ta “peca y wordo trata severamente, [nos] soporta esaki cu pasenshi.” Sinembargo, si “pa motibo di consenshi pa cu Dios un hende wanta pena ora cu e ta sufri inhustamente”, lo e “haya aprobacion” di Yehova. (1 Pedro 2:19, 20) Bou di ki circunstancianan esaki por sosode?
12 Tin cristiannan cu a sufri maltrato pasobra nan a nenga di participa den custumbernan di entiero cu ta contra di principionan biblico. (Deuteronomio 14:1) Hobennan Testigo tawata e blanco di insultonan constante pasobra nan ta pega na Yehova su normanan moral. (1 Pedro 4:4) Algun mayor cristian a ser acusa eroneamente di ta “negligente” of “abusado” pasobra nan a busca tratamento sin sanger pa nan yiunan. (Echonan 15:29) Famia y biciñanan a kibra tur contacto cu cierto cristiannan djis pasobra nan a bira sirbidonan di Yehova. (Mateo 10:34-37) Tur e cristiannan ei ta siguiendo e ehempel cu e profetanan y asta Hesus a pone di sufri inhustamente.—Mateo 5:11, 12; Santiago 5:10; 1 Pedro 2:21.
Soporta Reproche di Buena Gana
13. Kico por yuda nos mantene nos balansa spiritual ora nos ta confronta reproche of insultonan severo?
13 Ora nos ta confronta reproche of insultonan severo debi na nos fe, nos por bira desanima, mescos cu profeta Yeremias, y sinti cu nos no por sigui sirbi Dios. (Yeremias 20:7-9) Kico por yuda nos mantene nos balansa spiritual? Purba mira e asunto for di Yehova su punto di bista. E ta considera esnan cu ta keda fiel bou di prueba como vencedo, no como victima. (Romanonan 8:37) Purba visualisa den bo mente e personanan cu a sostene Yehova su soberania apesar di tur indignidad cu Diabel a lansa contra nan, tanto homber como mohe, manera por ehempel Abel, Job, Maria mama di Hesus, y otro sirbidonan fiel di pasado, y tambe nos rumannan den fe di tempo moderno. (Hebreonan 11:35-37; 12:1) Medita riba nan bida di integridad. Ta como si fuera e nubia grandi ei di personanan fiel ta yama nos pa bin para hunto cu nan riba e plataforma di victoria cu tin reserva pa esnan cu pa medio di nan fe ta vence mundo.—1 Huan 5:4.
14. Con oracion ferviente por fortalece nos pa keda fiel?
14 Si ‘nos precupacionnan ta bira hopi den nos’, nos por acudi na Yehova den oracion ferviente, y lo e consola nos y fortalece nos. (Salmo 50:15; 94:19) Lo e duna nos e sabiduria necesario pa nos enfrenta e prueba y lo e yuda nos keda enfoca riba e cuestion grandi—Yehova su soberania—cu tin tras di e odio sin motibo cu su sirbidonan ta experencia. (Santiago 1:5) Tambe Yehova por duna nos “e pas di Dios, cu ta surpasa tur comprondemento.” (Filipensenan 4:6, 7) E trankilidad aki cu Dios ta duna, ta capasita nos pa keda calmo y dicidido apesar di presion extremo, sin entrega na duda of miedo. Mediante su spirito santo, Yehova por sostene nos atrabes di loke sea e permiti bin riba nos.—1 Corintionan 10:13.
15. Kico por yuda nos pa no bira amarga ora nos ta sufri?
15 Kico por yuda nos pa nos no bira amarga of haya rabia riba hende cu ta odia nos sin motibo? Corda cu nos adversarionan principal ta Satanas y e demoñonan. (Efesionan 6:12) Aunke tin algun hende cu concientemente y deliberadamente ta persigui nos, hopi di esnan cu ta opone e pueblo di Dios ta haci esei pa motibo di ignorancia of pasobra nan ta ser manipula door di otro hende. (Daniel 6:4-16; 1 Timoteo 1:12, 13) Yehova ta desea pa ‘tur clase di hende’ haya e oportunidad di “wordo salba y yega na conocemento di e berdad.” (1 Timoteo 2:4) De echo, algun persona cu antes tawata opone nos awor ta nos rumannan cristian door cu nan a observa nos conducta intachabel. (1 Pedro 2:12) Ademas, nos por siña un les for di e ehempel di Josef (Hose), yiu di Yacob. Aunke Josef a sufri masha hopi pa falta di su mitar rumannan, e no a carga rencor contra nan. Dicon no? Pasobra e por a mira cu Yehova su man tawata den e asunto, maniobrando susesonan pa cumpli cu Su proposito. (Genesis 45:4-8) Asina tambe Yehova por pone cu cualkier sufrimento inhusto cu nos pasa aden por resulta pa e gloria di su nomber.—1 Pedro 4:16.
16, 17. Dicon nos no mester bira mucho precupa pa e esfuersonan di opositor pa stroba e trabou di predica?
16 Nos no mester ta indebidamente precupa si pa un tempo ta parce cu opositornan tin exito den stroba e bon nobo di progresa. Yehova ta sagudiendo e nacionnan aworaki pa medio di e testimonio mundial cu ta ser duna, y e rikesa of cosnan deseabel ta drentando. (Hageo 2:7) Cristo Hesus, e Bon Wardador, a bisa: “Mi carnenan ta tende mi bos, y mi conoce nan, y nan ta sigui mi; y mi ta duna nan bida eterno, . . . y ni un hende lo no ranca nan for di mi man.” (Huan 10:27-29) E angelnan santo tambe ta envolvi den e gran cosecha spiritual. (Mateo 13:39, 41; Revelacion 14:6, 7) Pesei, nada cu opositornan bisa of haci, por stroba Dios su proposito.—Isaias 54:17; Echonan 5:38, 39.
17 Hopi bes e esfuerso di opositornan ta resulta net lo contrario di loke tawata nan intencion. Den un comunidad Africano, hende a plama hopi mentira teribel tocante Testigonan di Yehova, incluso cu nan tawata adoradonan di Diabel. Debi na esaki, ki ora cu e Testigonan tawata pasa na su cas, Grace a core bai sconde patras di cas y a keda einan te ora nan a bai. Un dia e pasto di su misa a mustra un di nos publicacionnan y a bisa tur presente pa nan no les’e pasobra lo e por a pone nan bandona nan fe. Esaki a lanta Grace su curiosidad. E siguiente biaha cu e Testigonan a pasa, en bes di sconde, el a papia cu nan y a ricibi su ehemplar personal di e publicacion. Nan a cuminsa un studio di Bijbel cu ne, y el a batisa na 1996. Awor Grace ta uza su tempo pa busca otro hende cu kisas a ser malinforma tocante Testigonan di Yehova.
Fortifica Bo Fe Awor
18. Dicon ta necesario pa fortifica nos fe prome cu pruebanan severo surgi, y con nos por haci esei?
18 Ya cu Satanas por ataca nos un ora pa otro cu odio sin motibo, ta masha importante pa nos fortifica nos fe awor. Con nos por haci esaki? Un informe for di un pais caminda e pueblo di Yehova tawata ser persigui a bisa: “Tin un cos cu a bira masha bisto: Cristiannan cu tin bon custumbernan spiritual y un aprecio profundo pa e berdad biblico no tin problema pa para firme ora nan haya nan cu prueba. Pero esnan cu den ‘tempo faborabel’ ta falta reunion, ta iregular den sirbishi di veld y ta compromete nan fe den cosnan chikito, hopi bes ta cai ora nan haya nan cu un prueba ‘ardiente.’” (2 Timoteo 4:2, NW) Si abo mira areanan den cua bo por mehora, traha duro pa haci esei sin tarda.—Salmo 119:60.
19. Kico e integridad cu Dios su sirbidonan a warda apesar di ser odia sin motibo, a logra?
19 E integridad cu adoradonan berdadero a warda apesar di e plaga di odio satanico ta un testimonio bibo cu Yehova su soberania ta legitimo, husto y mereci. Nan fieldad ta haci Dios su curason contento. Aunke hende kisas ta montona reproche riba nan, Esun kende su dignidad ta mas halto cu shelo y tera “no tin berguensa di wordo yama nan Dios.” De echo, corectamente Bijbel por bisa di tur e personanan fiel ei cu “mundo no tawata digno di nan.”—Hebreonan 11:16, 38.
[Nota]
^ par. 2 Den e Scritura, e palabra “odia” tin diferente nificacion. Den algun contexto, e kiermen simplemente stima menos. “Odia” por nifica tambe un repugnancia fuerte pa algo pero sin intencion di causa daño na dje, purbando mas bien di evit’e debi cu bo ta sinti asco di dje. Sinembargo, e palabra “odia” por indica tambe hostilidad intenso, un rencor continuo hopi bes acompaña pa malicia. Ta e sentido aki di e palabra nos ta trata den e articulo aki.
Abo Por Splica?
• Kico tin tras di e odio sin motibo dirigi contra adoradonan berdadero?
• Con Satanas a uza reproche of insulto den un intento pa kibra e integridad di Job y Hesus?
• Con Yehova ta fortifica nos pa para firme apesar di odio satanico?
[Preguntanan di Estudio]
[Cuadro/Plachi na pagina 16]
Nan A Compronde Kico Ta e Berdadero Cuestion
Un Testigo di Yehova na Ucrania, caminda e trabou di predica e Reino tawata prohibi pa mas cu 50 aña, a comenta: “Nos no mester evalua e situacion di e Testigonan di Yehova unicamente den e contexto di relacionnan humano. . . . Mayoria di e funcionarionan tawata simplemente cumpli cu nan trabou. Ora cu gobierno a cambia, e funcionarionan tambe a cambia di banda, pero nos a keda mescos. Nos tawata conciente di e echo cu Bijbel a revela e berdadero fuente di nos dificultadnan.
Nos no a mira nos mes como djis victimanan inocente di hombernan opresivo. Loke a yuda nos persevera tawata un comprondemento cla di e cuestion cu a surgi den hofi di Eden—e cuestion di Dios su derecho di goberna. . . . Nos a tuma nos posicion na fabor di un cuestion cu no tawata liga solamente cu interesnan personal di sernan humano, sino tambe cu e interesnan di e Soberano di universo. Nos conocemento mas eleva di e berdadero cuestionnan envolvi a haci nos fuerte y a yuda nos mantene nos integridad asta bou di e circunstancianan di mas extremo.”
[Plachi]
Victor Popovych, aresta na 1970
[Plachi na pagina 13]
Ken tawata tras di e reproche cu nan a somete Hesus na dje?
[Plachi na pagina 15]
Job, Maria y sirbidonan di Dios di tempo moderno, manera Stanley Jones, a sostene Yehova su soberania