Pregunta di Lector

Tin hende ta pretende cu Pablo no a naufraga riba e isla di Malta, suit di Sicilia, sino riba un otro isla. Unda el a naufraga?

E pregunta aki tin di aber cu un idea cu resientemente a bin dilanti, esta, cu apostel Pablo no a naufraga riba e isla di Malta, sino riba Cefalonia (of Kefallinía) serca di Corfu den Lama Jonico, pega cu costa west di Grecia. E registro inspira ta conta nos cu Pablo a sali for di Cesarea bou di custodia di e centurion Romano cu yama Julio, hunto cu otro soldanan y Pablo su compañeronan. Manera e mapa ta mustra, nan a nabega bai Sidon y Mira. Despues di a cambia di barco y a subi  abordo di un barco grandi di grano di Alehandria, Egipto, nan a cohe rumbo west pa bai Snido. Nan no por a sigui cu e ruta cu nan a propone, esta, atrabes di Lama Egeo, pasa e punta di Grecia y bai Roma. Bientonan fuerte a obliga nan bai suit den direccion di Creta y nabega den e awanan trankil a lo largo di su costanan. Nan a para na un haf cu yama Bon Hafnan. Ora nan a “nabega sali for di Creta”, e barco a “wordo gara” door di “un biento di horcan cu yama Euroclidon.” E barco pisa di grano a “wordo tira di un banda pa otro den lama” durante 14 dia largo. Finalmente, tur e 276 personanan a naufraga riba un isla cu e texto Griego di e Santo Scritura ta yama Me·lí·te.—Echonan 27:1–28:1.

Atrabes di añanan hende a sugeri varios posibilidad pa identifica e isla Me·lí·te aki. Algun a pensa cu tawata trata di e isla Melite Ilirica, cu awor ta conoci como Mljet, den Lama Adriatico pega cu costa di Croacia. Pero esaki no ta parce probabel, ya cu Mljet ta situa panort y esei no ta cuadra cu e siguiente etapanan di Pablo su biahe, esta, Siracusa, Sicilia, y despues e costa west di Italia.—Echonan 28:11-13.

Mayoria traductor di Bijbel a yega na e conclusion cu Me·lí·te ta referi na e isla Melite Africanus cu awor ta conoci como Malta. E ultimo haf cu e barco cu a hiba Pablo a bishita tawata Bon Hafnan, na Creta. Despues un tempestad a obliga e barco bai den direccion west, caminda Clauda tawata situa. Biento a keda hiba e barco hopi dia. Ta masha rasonabel cu e barco hiba pa biento di tempestad lo a bai mas den direccion west y yega Malta.

Teniendo cuenta cu e biento cu tawata domina y “e direccion y velosidad cu e barco tawata drif”, Conybeare y Howson a remarca den nan buki The Life and Epistles of St. Paul (E Bida y Cartanan di San Pablo): “E distancia entre Clauda [of, Cauda] y Malta ta un tiki menos cu 770 kilometer. E coinsidencia ta asina remarcabel cu ta casi imposibel pa kere cu e tera cu e nabegantenan [a acerca] riba e di diescuater anochi por tawata un otro sitio cu no ta Malta. E chens cu ta trata di Malta ta masha grandi mes.”

Aunke hende por bin cu otro sitionan como opcion, un naufragio na Malta manera e mapa hunto cu e articulo aki ta mustra ta parce di cuadra cu loke Bijbel ta bisa.

[Mapa/Plachi na pagina 31]

(Pa e texto den su formato completo , wak e publicacion)

Herusalem

Cesarea

Sidon

Mira

Snido

CRETA

CLAUDA

MALTA

SICILIA

Siracusa

Roma

MLJET

GRECIA

CEFALONIA