Yehova, Nos “Fortalesa den Tempo di Angustia”

“Salbacion di e hustonan ta bin for di SEÑOR; e ta nan fortalesa den tempo di angustia.”—SALMO 37:39.

1, 2. (a) Kico Hesus a pidi den oracion na fabor di su disipelnan? (b) Kico ta Dios su boluntad pa cu su pueblo?

YEHOVA ta todopoderoso. E tin e poder pa proteha su fiel adoradonan den cualkier manera cu e kier. Lo e por asta separa su pueblo fisicamente for di e resto di mundo y pone nan den un ambiente safe y trankil. Sinembargo, Hesus a pidi relaciona cu su disipelnan den oracion na su Tata celestial: “Mi no ta pidi bo pa saca nan for di mundo, ma pa bo warda nan di e malbado.”—Huan 17:15.

² Yehova a scohe pa no saca nos “for di mundo.” Mas bien, ta su boluntad pa nos biba meimei di e poblacion general di e mundo aki afin di proclama su mensahe di speransa y consuelo na otro hende. (Romanonan 10:13-15) Pero, manera Hesus a indica indirectamente den su oracion, door di biba den e mundo aki, nos ta keda exponi na “e malbado.” Humanidad desobediente y forsanan spiritual malbado ta causa hopi dolor y angustia, y cristiannan no ta liber di angustia.—1 Pedro 5:9.

3. Asta adoradonan fiel di Yehova mester confronta ki realidad, pero ki consuelo nos ta haya den e Palabra di Dios?

³ Ta natural cu ora nos ta bou di pruebanan asina, nos ta pasa door di periodonan di desanimacion. (Proverbionan 24:10) E registro biblico ta contene varios relato di sirbidonan fiel cu a pasa angustia. E salmista a bisa: “Hopi ta e afliccionnan di e husto, ma SEÑOR ta libr’e for di nan tur.” (Salmo 34:19) Si, cos malo ta sosode asta cu “e husto.” Mescos cu salmista David, tin biaha nos por bira “agota y masha kibra.” (Salmo 38:8) Sinembargo, ta un consuelo pa sa cu Yehova “ta serca di e hende di curason kibra, y ta salba esnan di spirito abati.”—Salmo 34:18; 94:19.

4, 5. (a) Na harmonia cu Proverbionan 18:10, kico nos tin cu haci pa por ricibi Dios su proteccion? (b) Menciona algun paso spesifico cu nos tin cu tuma pa ricibi Dios su yudansa.

⁴ Na harmonia cu Hesus su oracion, Yehova di berdad ta warda nos. E ta nos “fortalesa den tempo di angustia.” Aki “fortalesa” ta referi literalmente na un baluarte. (Salmo 37:39; BPK) E buki di Proverbionan ta uza  mesun tipo di expresion ora e ta bisa: “E nomber di SEÑOR ta un toren fuerte; e husto ta core drenta den dje y ta sigur.” (Proverbionan 18:10) E texto aki ta revela un berdad basico relaciona cu Yehova su tierno interes den su criaturanan. Dios ta ofrece proteccion specialmente na hende husto cu activamente ta busc’e, como si fuera nos ta core drenta un toren fuerte pa haya refugio.

⁵ Ora nos ta confronta problemanan angustioso, con nos por core bai serca Yehova pa haya proteccion? Laga nos considera tres paso sumamente importante cu nos por tuma pa ricibi Yehova su yudansa. Prome, nos tin cu acudi na nos Tata celestial den oracion. Di dos, nos tin cu obra na harmonia cu su spirito santo. Y di tres, nos tin cu somete nos mes na Yehova su areglo door di busca asociacion cu rumannan cristian cu por alivia nos angustia.

E Poder di Oracion

6. Con cristiannan berdadero ta mira oracion?

⁶ Algun experto di salu ta recomenda oracion pa trata depresion y stress. Aunke kisas ta cierto cu un rato keto di reflexion manera ora di haci oracion por alivia stress, un hende por logra mescos tambe door di scucha cierto zonidonan di naturalesa of asta door di haya un masashi. Cristiannan berdadero no ta minimisa e balor di oracion door di mir’e como djis un terapia pa laga nan sinti bon. Pa nos, oracion ta comunicacion respetuoso cu e Creador. Oracion ta encera nos debocion na Dios y nos confiansa den dje. Si, oracion ta parti di nos adoracion.

7. Kico kiermen haci oracion cu confiansa, y con e tipo di oracionnan ei ta yuda nos trata cu angustia?

⁷ Nos oracionnan mester ta acompaña pa un sintimento di confiansa den Yehova. Apostel Huan a skirbi: “Esaki ta e confiansa cu nos tin su dilanti, cu si nos pidi cualkier cos conforme su boluntad, e ta tende nos.” (1 Huan 5:14) Yehova, e Ser Supremo, e unico Dios berdadero y todopoderoso, de echo ta duna atencion special na e oracionnan sinsero di su adoradonan. E solo echo cu nos sa cu nos Dios amoroso ta tende nos ora nos ta cont’e nos precupacion- y problemanan, ta un consuelo.—Filipensenan 4:6.

8. Dicon cristiannan fiel nunca mester sinti nan mes timido of indigno ora nan ta acerca Yehova den oracion?

⁸ Cristiannan fiel nunca mester sinti nan mes timido, indigno of insigur di nan mes ora nan ta acerca Yehova den oracion. Ta berdad cu ora nos ta decepciona cu nos mes of nos ta sinti cu nos ta hoga den problema, nos lo no ta semper inclina pa acerca Yehova den oracion. Na ocasionnan asina ta bon pa nos corda cu Yehova “tin compasion di su afliginan” y cu e “ta consola esnan abati.” (Isaias 49:13; 2 Corintionan 7:6) Ta specialmente den tempo di tristesa y angustia nos tin cu  acudi cu confiansa na nos Tata celestial como nos fortalesa.

9. Ki papel fe ta hunga ora nos ta acerca Dios den oracion?

⁹ Pa nos beneficia plenamente di e privilegio di oracion, nos mester tin berdadero fe. Bijbel ta bisa cu “esun cu bin serca Dios mester kere cu e ta, y cu e ta Esun cu ta recompensa esnan cu ta busc’e.” (Hebreonan 11:6) Fe ta nifica mas cu djis kere cu Dios ta existi, cu “e ta.” Berdadero fe ta encera kere firmemente cu Dios tin e habilidad y deseo di recompensa e bida cu nos ta hiba di obediencia na dje. “E wowonan di SEÑOR ta riba e hustonan, y su horeanan ta atento pa scucha nan oracion.” (1 Pedro 3:12) Teniendo tur ora bai na mente Yehova su interes amoroso den nos, ta duna nos oracionnan un nificacion special.

10. Con nos oracionnan mester ta pa nos por ricibi sosten spiritual for di Yehova?

¹⁰ Yehova ta scucha nos oracionnan ora nos ofrece nan cu un curason completo. E salmista a skirbi: “Mi a sclama cu henter mi curason; contesta mi, o SEÑOR!” (Salmo 119:145) Distinto for di e oracionnan ritual di hopi religion, nos oracionnan no ta djis un rutina ni ta ser haci sin gracia. Ora nos ta haci oracion na Yehova cu ‘henter nos curason’, nos palabranan ta yen di nificacion y proposito. Despues di haci oracionnan sinsero asina, nos ta cuminsa sinti e alivio cu ta bin door di tira nos ‘carga riba Yehova.’ Manera Bijbel ta priminti, ‘e lo sostene nos.’—Salmo 55:22; 1 Pedro 5:6, 7.

E Spirito di Dios Ta Nos Ayudante

11. Cua ta un manera cu Yehova ta contesta nos ora nos ta “sigui pidi” su yudansa?

¹¹ Yehova no ta simplemente Esun cu ta scucha oracion, sino tambe Esun cu ta contesta oracion. (Salmo 65:2) David a skirbi: “Den e dia di mi angustia lo mi sclama na bo, pasobra abo lo contesta mi.” (Salmo 86:7) Di acuerdo cu esei, Hesus a anima su disipelnan pa “sigui pidi” [NW] Yehova su yudansa pasobra e “Tata celestial” lo “duna e spirito santo na esnan cu pidie.” (Lucas 11:9-13) Si, Dios su forsa activo ta actua como un ayudante, of consolador, pa su pueblo.—Huan 14:16.

12. Con Dios su spirito por yuda nos ora problemanan ta parce aplastante?

¹² Asta ora nos ta confronta prueba, Dios su spirito por yena nos cu “poder mas aya di loke ta normal.” (2 Corintionan 4:7, NW) Apostel Pablo, kende a soporta hopi situacion dificil, a bisa cu confiansa: “Pa tur cos mi tin e forsa den birtud di esun cu ta duna mi poder.” (Filipensenan 4:13, NW) Di igual manera, hopi cristian awe a sinti con nan forsa spiritual y emocional a ser renoba como contesta riba nan suplicanan. Hopi bes, problemanan angustioso no ta parce dje aplastante ei despues cu nos ricibi yudansa di Dios su spirito. Debi na e fortalesa aki cu Dios ta duna, nos por bisa, mescos cu e apostel: “Nos ta wordo primi di tur banda, ma nos no ta keda plecha; nos no ta mira salida, ma no ta desespera; nos ta wordo persigui, ma no ta keda desampara; nos ta wordo tumba abou, ma no destrui.”—2 Corintionan 4:8, 9.

13, 14. (a) Con Yehova a duna prueba di ta nos fortalesa pa medio di su Palabra skirbi? (b) Con abo personalmente a haya yudansa door di aplica principionan biblico?

¹³ Tambe spirito santo a inspira y conserva Dios su Palabra skirbi pa nos beneficio. Con Yehova a resulta di ta nos fortalesa den tempo di angustia mediante e paginanan di su Palabra? Un manera ta door di duna nos sabiduria sano y discrecion of capasidad di pensa. (Proverbionan 3:21-24) Bijbel ta entrena nos facultadnan mental y ta mehora nos poder di rasona. (Romanonan 12:1, NW) Nos por tin nos “mente entrena pa discerni loke ta bon y loke ta malo” door di lesa y studia e Palabra di Dios riba un base regular, y tambe door di aplica loke nos ta siña. (Hebreonan 5:14) Podise bo a experencia personalmente con principionan biblico a yuda bo tuma decisionnan sabi ora bo a confronta dificultadnan. Bijbel  ta duna nos prudencia, locual por yuda nos haya solucionnan practico pa problemanan angustioso.—Proverbionan 1:4.

¹⁴ E Palabra di Dios ta provee nos cu un otro fuente di fortalesa—e speransa di salbacion. (Romanonan 15:4) Bijbel ta conta nos cu cos malo lo no sigui sosode pa tempo indefini. Cualkier tribulacion cu nos ta sufri di dje ta un cos temporal. (2 Corintionan 4:16-18) Nos tin “e speransa di bida eterno, cu Dios, kende no por gaña, a priminti hopi siglonan pasa.” (Tito 1:2) Si nos ta alegra den e speransa ei, teniendo tur ora bai na mente e futuro briyante cu Yehova ta priminti, nos por persevera bou di tribulacion.—Romanonan 12:12; 1 Tesalonicensenan 1:3.

E Congregacion —Un Expresion di Dios Su Amor

15. Con cristiannan por ta un bendicion pa otro?

¹⁵ Un otro percuracion di Yehova cu por yuda nos den tempo di angustia ta e compañerismo cu nos ta gosa di dje den e congregacion cristian. Bijbel ta bisa: “Un amigo ta stima tur ora bai, y un ruman ta naci pa tempo di adversidad.” (Proverbionan 17:17) E Palabra di Dios ta anima tur hende den congregacion pa honra otro y stima otro. (Romanonan 12:10) Apostel Pablo a skirbi: “No laga ningun hende busca su mes interes, sino esun di su prohimo.” (1 Corintionan 10:24) Si nos tin tal actitud, esei por yuda nos consentra riba e necesidadnan di otro hende en bes di riba nos propio pruebanan. Ora nos ta duna di nos mes na otro hende, nos no solamente ta yuda nan sino cu nos tambe ta sinti un cierto grado di felicidad y satisfaccion cu ta haci nos carga mas soportabel.—Echonan 20:35.

16. Con cada cristian por ta un animacion pa otro?

¹⁶ Rumannan spiritualmente maduro—sea homber of mohe—por hunga un papel importante den fortalece otro. Pa nan por haci esei, nan ta haci nan mes acercabel y disponibel. (2 Corintionan 6:11-13) E congregacion ta realmente bendiciona ora cu tur ruman ta traha tempo pa elogia e hobennan, pa edifica creyentenan nobo y pa anima esnan cu ta deprimi. (Romanonan 15:7) Amor fraternal tambe lo yuda nos evita di tin e actitud di desconfia otro. Nos lo no ta lihe pa conclui cu dificultadnan personal ta un señal di debilidad spiritual. Pablo apropiadamente a urgi cristiannan pa “curasha esnan cu ta falta animo.” (1 Tesalonicensenan 5:14) Bijbel ta mustra cu asta cristiannan fiel ta experencia angustia.—Echonan 14:15, NW.

17. Ki oportunidadnan nos tin pa fortalece e banchi di hermandad cristian?

¹⁷ Reunionnan cristian ta duna nos un bon  chens pa consola otro y anima otro. (Hebreonan 10:24, 25) Pero e intercambio amoroso aki no ta keda limita na reunionnan di congregacion. Mas bien, e pueblo di Dios ta busca tambe oportunidad pa nan por asocia hunto den un manera saludabel den ambientenan informal. Ora situacionnan angustioso surgi, nos lo ta cla pa yuda otro pasobra ya caba ta existi entre nos un banchi fuerte di amistad. Apostel Pablo a skirbi: “Pa no tin division den e curpa, ma pa e miembronan tin e mesun percuracion un pa otro. Y si un miembro ta sufri, tur e miembronan ta sufri hunto cu ne; si un miembro wordo honra, tur e miembronan ta regociha hunto cu ne.”—1 Corintionan 12:25, 26.

18. Ki tendencia nos mester evita ora nos ta sinti nos deprimi?

¹⁸ Tin biaha nos por sinti nos mucho deprimi pa asocia cu otro rumannan cristian. Nos tin cu lucha contra tal sintimento ya nos no ta priva nos mes di e consuelo y yudansa cu otro rumannan den fe por ofrece. Bijbel ta spierta nos: “Esun cu isola su mes ta busca su mes deseo; su furia ta lanta contra tur sabiduria sano.” (Proverbionan 18:1) Nos rumannan ta un expresion di Dios su interes y cuido pa nos. Si nos ta reconoce e percuracion amoroso ei, nos lo haya alivio den tempo di angustia.

Mantene un Actitud Positivo

19, 20. Con e Scritura ta yuda nos rechasa pensamentonan negativo?

¹⁹ Ora un hende ta desanima y tristo, ta facil pa e pensa riba cosnan negativo. Por ehempel, ora algun ruman ta experencia contratiempo, kisas nan ta cuminsa cuestiona nan propio spiritualidad, y ta conclui cu nan dificultadnan ta un indicacion di Dios su desaprobacion. Pero corda cu Yehova no ta pone ningun hende na prueba cu “maldad.” (Santiago 1:13) Bijbel ta bisa: “[Dios] no ta afligi boluntariamente, ni ta haci yiunan di hende bira tristo.” (Lamentacionnan 3:33) Al contrario, Yehova ta bira masha tristo ora su sirbidonan ta sufri.—Isaias 63:8, 9; Zacarias 2:8.

²⁰ Yehova ta “e Tata di misericordianan y Dios di tur consuelo.” (2 Corintionan 1:3) E ta percura pa nos, y lo halsa nos na e debido tempo. (1 Pedro 5:6, 7) Teniendo tur ora bai na mente Dios su cariño pa nos, lo yuda nos mantene un actitud positivo, y asta yuda nos alegra. Santiago a skirbi: “Considera esaki como puro goso, mi rumannan, ora boso haya boso mes den diferente pruebanan.” (Santiago 1:2) Dicon? El a contesta: “Pasobra unabes cu el a pasa e prueba, e lo ricibi e corona di bida, cu Señor a priminti na esnan cu ta stim’e.”—Santiago 1:12.

21. Sin importa ki dificultadnan nos ta confronta, ki garantia Dios ta duna esnan cu resulta fiel na dje?

²¹ Manera Hesus a spierta nos, den mundo nos lo tin tribulacion. (Huan 16:33) Pero Bijbel ta priminti cu ningun ‘tribulacion, angustia, persecucion, hamber, sunu, of peliger’ lo separa nos for di e amor di Yehova y e amor di su Yiu. (Romanonan 8:35, 39) Ki un gran consuelo pa sa cu cualkier angustia cu nos ta confronta ta un cos temporal! Mientrastanto, segun cu nos ta warda riba e fin di sufrimento humano, nos Tata amoroso, Yehova, ta vigila nos. Si nos core bai serca dje pa haya proteccion, lo e resulta di ta “un refugio pa e opriminan, un refugio den temponan di angustia.”—Salmo 9:9.

Kico Nos A Siña?

• Kico cristiannan mester spera tanten cu nan ta biba den e mundo malbado aki?

• Con nos oracionnan ferviente por fortalece nos ora nos ta confronta prueba?

• Con Dios su spirito ta un ayudante?

• Kico nos por haci pa yuda otro?

[Preguntanan di Estudio]

[Plachi na pagina 18]

Nos tin cu busca Yehova como si fuera nos ta core drenta den un toren fuerte

[Plachi na pagina 20]

Rumannan spiritualmente maduro ta uza tur oportunidad pa elogia y anima otro ruman