Con pa Vence Desanimacion

BO TA desanima? Den e era aki di insiguridad y conflicto, hopi hende ta desanima. Algun ta desanima pa motibo cu nan no tin trabou. Otronan ta sintiendo e efectonan di un accidente. Tambe tin hende cu ta lucha cu problema di famia, enfermedad serio of sintimento di soledad.

Si bo ta desanima, unda bo por acudi pa yudansa? Miyones di hende rond mundo a haya consuelo door di lesa Bijbel, e Palabra di Dios. Nan por haya esei den e palabranan di apostel Pablo, kende a bisa: “Bendiciona sea e Dios y Tata di nos Señor Hesucristo, e Tata di misericordianan y Dios di tur consuelo, kende ta consola nos den tur nos afliccion.” (2 Corintionan 1:3, 4) Pakico no lesa e texto aki y otro pasashinan biblico den bo mes Bijbel? Esei lo ‘consola y fortalece bo curason.’—2 Tesalonicensenan 2:17.

Tambe nos por haya yudansa pa vence desanimacion mediante nos asociacion cu personanan cu ta sirbi Yehova. Proverbionan 12:25 ta bisa: “Ansha den curason di hende ta hacie abati, ma un bon palabra ta hacie contento.” Ora nos asisti na reunionnan cristian, nos ta tende e “bon palabra” ei, cu ta “dushi pa alma y curamento pa weso.” (Proverbionan 16:24) Pakico bo no ta asisti na un reunion di Testigonan di Yehova na un Salon di Reino pa bo mes por sinti e efecto fortalecedor cu un reunion asina por tin riba bo?

E poder di oracion tambe por yuda bo. Si bo ta sinti cu e ansiedadnan di bida a bira di mas pa bo, comparti bo sintimentonan di mas profundo cu ‘Esun cu ta scucha oracion.’ (Salmo 65:2) Nos Creador, Yehova Dios, ta compronde nos miho cu nos ta compronde nos mes. Nos por conta cu su yudansa. Su Palabra ta priminti nos: “Tira bo carga riba SEÑOR, y e lo sostene bo; nunca e lo no permiti pa e husto wordo movi.” (Salmo 55:22) Si, “esnan cu spera riba SEÑOR lo haya forsa renoba.”—Isaias 40:31.

Yehova Dios a duna nos tur e medionan poderoso cu por yuda nos vence desanimacion. Abo lo haci uzo di nan?