Glorifica Dios “den un Solo Bos”

“Den un solo bos . . . glorifica e Dios y Tata di nos Señor Hesucristo.”—ROMANONAN 15:6.

1. Ki les tocante con pa atende diferencia di opinion Pablo a siña su rumannan den fe?

NO TA tur cristian ta tuma e mesun decisionnan of tin e mesun gusto. Sinembargo, tur cristian mester cana uni riba e caminda cu ta hiba na bida. Esei ta posibel? Si, basta nos no laga diferencianan di opinion chikito bira problemanan grandi. Esei ta un les cu apostel Pablo a siña su rumannan den fe den e prome siglo. Con el a splica e punto importante aki? Y con nos por aplica su conseho inspira awe?

E Importancia di Unidad Cristian

2. Con Pablo a enfatisa e necesidad pa nos ta uni?

² Pablo tawata sa cu unidad cristian ta sumamente importante, y el a duna bon conseho pa yuda cristiannan soporta otro cu amor. (Efesionan 4:1-3; Colosensenan 3:12-14) No obstante, despues cu el a establece hopi congregacion y a bishita otronan durante un periodo di mas cu 20 aña, e tawata sa cu lo no tawata facil pa nan a keda uni. (1 Corintionan 1:11-13; Galationan 2:11-14) Pesei el a anima e rumannan den fe cu tawata biba na Roma: “Cu e Dios di perseverancia y di encurashamento concede pa . . . di un acuerdo boso, den un solo bos, por glorifica e Dios y Tata di nos Señor Hesucristo.” (Romanonan 15:5, 6) Awe, nos tambe tin cu glorifica Yehova Dios “den un solo bos” como un pueblo uni. Te na ki grado nos ta haciendo esaki?

3, 4. (a) Ki diferente background e cristiannan na Roma tawatin? (b) Con e cristiannan na Roma por a sirbi Yehova “den un solo bos”?

³ Hopi cristian na Roma tawata amigo personal di Pablo. (Romanonan 16:3-16) Aunke nan tawatin diferente background, Pablo a acepta tur su rumannan como “Dios su stimanan.” El a skirbi: “Mi ta gradici mi Dios pa medio di Hesucristo pa boso tur, pasobra boso fe ta wordo proclama den henter mundo.” Sin duda e Romanonan tawata ehemplar den hopi manera. (Romanonan 1:7, 8; 15:14) Pero ta berdad tambe cu algun miembro di e congregacion tawatin otro punto di bista riba cierto asuntonan. Ya cu cristiannan djawe ta bini for di varios background y cultura, un analisis di e conseho inspira di Pablo riba con pa trata cu diferencia di opinion lo por yuda nan papia “den un solo bos.”

⁴ Na Roma tawatin tanto creyente Hudiu como no Hudiu. (Romanonan 4:1; 11:13) Aparentemente algun cristian Hudiu no por a stop cu cierto custumbernan cu nan tawata sigui bou di e Lei di Moises, maske nan mester a realisa cu e practicanan ei no tawata esencial pa salbacion. Di otro banda, un cantidad di cristian Hudiu si a acepta cu e sacrificio di Cristo a libra nan for di restriccionnan cu nan tawata tene nan mes na dje prome cu nan a bira cristian. Como resultado, nan a cambia algun di nan custumbernan personal. (Galationan 4:8-11) Toch, manera Pablo a mustra, tur tawata “Dios su stimanan.” Si nan a mantene e actitud mental corecto pa cu otro, tur lo por a alaba Dios “den un solo bos.” Awe tambe cada ken por tin su propio punto di bista riba cierto asuntonan, pues lo ta bon pa nos analisa a fondo con Pablo ta splica e principio importante ei.—Romanonan 15:4.

 “Ricibi Otro cu Gusto”

5, 6. Con bin tawatin diferencia di opinion den e congregacion di Roma?

⁵ Den su carta na e Romanonan, Pablo a papia di un situacion riba cua e opinionnan tawata dividi. El a skirbi: “Esun ta kere cu e por come tur cos, mientras cu un otro cu ta debil ta come berdura so.” Pa ki motibo? Wel, bou di e Lei di Moises, no tawatin mag di come porco. (Romanonan 14:2; Levitico 11:7) Sinembargo, despues di Hesus su morto, e Lei ei no tawata na vigor mas. (Efesionan 2:15) Anto, tres aña y mei despues cu Hesus a muri, un angel a bisa apostel Pedro cu for di e punto di bista di Dios no mester a considera ningun alimento como contamina. (Echonan 11:7-12) Cu e factornan aki na mente, algun cristian Hudiu por a pensa cu nan lo por a come porco—of otro cos cu tawata prohibi bou di e Lei.

⁶ Sinembargo, e idea so di come cosnan cu un tempo tawata impuro probablemente lo tawata repugnante pa otro cristiannan Hudiu. E inclinacion natural di e rumannan delicado ei lo tawata di sinti nan ofendi ora nan a mira nan rumannan Hudiu den Cristo come e tipo di alimento ei. Ademas, cierto cristiannan no Hudiu, cu a lanta den religionnan cu probablemente nunca a prohibi nan di come cierto cuminda, lo por a keda confundi cu hende lo a forma problema tocante alimento. Claro cu no tawatin nada malo si un hende kier a abstene di cierto alimento, basta e no a insisti cu e abstinencia ei tawata necesario pa haya salbacion. Toch, e varios puntonan di bista ei facilmente por a lanta controversia den e congregacion. E cristiannan na Roma lo mester a tene cuidou pa e diferencianan di opinion ei no stroba nan di glorifica Dios “den un solo bos.”

7. Ki diferente punto di bista tawatin riba e asunto di warda un dia special tur siman?

⁷ Pablo a duna un di dos ehempel: “Esun ta considera un dia mas cu e otro; un otro ta considera tur dia mescos.” (Romanonan 14:5a) Bou di e Lei di Moises, no tawatin mag di traha riba sabat. Asta biahamento tawata strictamente prohibi riba e dia ei. (Exodo 20:8-10; Mateo 24:20; Echonan 1:12)  Sinembargo, ora e Lei a ser poni un banda, e prohibicionnan ei no tawata aplicabel mas. Toch, algun cristian Hudiu no a sinti nan comodo pa haci ningun tipo di trabou of pa biaha distancia largo riba un dia cu anteriormente nan tawata considera sagrado. Asta despues cu nan a bira cristian, kisas nan a aparta e di shete dia exclusivamente pa propositonan spiritual, maske cu for di e punto di bista di Dios e sabat no tawata na vigor mas. Nan a haci malo? No, basta nan no a insisti cu ta Dios ta exigi pa nan warda sabat. Pesei, teniendo cuenta cu consenshi di su rumannan cristian, Pablo a skirbi: “Laga cada hende ta completamente combenci den su mes mente.”—Romanonan 14:5b.

8. Aunke e cristiannan na Roma por a tene cuenta cu e consenshi di otro hende, kico nan no mester a haci?

⁸ No obstante, aunke Pablo a anima su rumannan di curason pa tene pasenshi cu esnan cu tawata lucha cu asuntonan di consenshi, el a condena fuertemente esnan cu a purba forsa nan rumannan den fe pa somete nan na e Lei di Moises como un condicion pa haya salbacion. Por ehempel, rond di aña 61 di nos era, Pablo a skirbi e buki di Hebreonan, un carta energico dirigi na cristiannan Hudiu cu ta splica masha cla cu no tawatin sentido pa somete na e Lei di Moises pasobra cristiannan tin un speransa superior basa riba e sacrificio di rescate di Hesus.—Galationan 5:1-12; Tito 1:10, 11; Hebreonan 10:1-17.

9, 10. Kico cristiannan no mester haci? Splica.

⁹ Manera nos a mira, Pablo a mustra cu tanten cu no ta falta cu un principio cristian, e echo cu cada ken ta tuma su decision no necesariamente ta pone nos union na peliger. Pesei, Pablo a puntra e cristiannan cu un consenshi mas debil: “Pakico bo ta husga bo ruman?” Y el a puntra esnan mas fuerte (talbes esnan kende nan consenshi a permiti nan come cierto alimento cu tawata prohibi bou di e Lei of pa traha riba sabat): “Pakico bo ta desprecia bo ruman?” (Romanonan 14:10) Segun Pablo, e cristiannan cu un consenshi mas debil no mester condena nan rumannan cu tin un mente mas habri. Na mesun tempo, cristiannan cu ta fuerte no mester desprecia esnan kende nan consenshi ta debil ainda den cierto areanan. Tur hende mester respeta e motivacionnan corecto di otro y no “pensa mas halto di su mes cu e mester pensa.”—Romanonan 12:3, 18.

¹⁰ Pablo a splica e punto di bista balansa den e manera aki: “No laga esun cu ta come desprecia esun cu no ta come, y no laga esun cu no ta come husga esun cu si ta come, pasobra Dios a acept’e.” Mas aleu el a bisa: “Cristo  tambe a acepta nos [“ricibi nos cu gusto”, NW] pa e gloria di Dios.” Siendo cu tanto hende fuerte como hende debil ta aceptabel pa Dios y Cristo, nos mester tin e mesun actitud y “ricibi otro cu gusto.” (Romanonan 14:3; 15:7) Ken por tin derecho di bai contra esei?

Amor Fraternal Ta Produci Unidad Awe

11. Ki situacion unico a existi den tempo di Pablo?

¹¹ Den su carta na e Romanonan, Pablo a papia di un situacion unico. Yehova a caba di aboli un aliansa y a establece un nobo. Pa algun cristian tawata dificil pa nan adapta na e cambio. E situacion spesifico ei no ta existi awe, pero tin biaha por surgi cuestionnan similar.

12, 13. Cua ta algun situacion den cua cristiannan awe por tene cuenta cu consenshi di nan rumannan?

¹² Por ehempel, podise un señora cristian tawata pertenece un tempo na un religion cu a boga pa su miembronan bisti di e manera mas simpel posibel. Ora e ta acepta e berdad, kisas e tin problema pa biba cu e idea cu na ocasionnan apropiado ta permiti pa bisti paña modesto pero colorido of pa uza makiyahe di bon gusto. Siendo cu no tin ningun principio di Bijbel envolvi, lo no ta corecto pa ningun hende purba combence e señora cristian ei pa e bai contra su consenshi. Na mes momento, e ta realisa cu e no mester critica otro mohenan cristian kende nan consenshi si ta permiti nan uza e cosnan ei.

¹³ Considera un otro ehempel. Kisas un homber cristian a lanta den un comunidad cu ta desaproba uzo di alcohol. Despues cu e yega na un conocemento di e berdad, e ta siña e punto di bista di Bijbel, esta, cu biña ta un don di Dios y cu hende por bebe cu moderacion. (Salmo 104:15) E ta acepta e punto di bista ei. Sinembargo, pa motibo di su background, e ta prefera di abstene completamente for di bebida alcoholico, pero e no ta critica esnan cu ta bebe cu moderacion. Den e forma ei, e ta aplica e palabranan di Pablo: “Laga nos busca e cosnan cu ta trece pas y edificacion di otro.”—Romanonan 14:19.

14. Den ki situacionnan cristiannan por aplica e spirito di e conseho di Pablo dirigi na e Romanonan?

¹⁴ Por surgi otro situacionnan den cua nos mester aplica e spirito di e conseho di Pablo na e Romanonan. E congregacion cristian ta consisti di hopi persona, y nan cada un tin nan preferencianan. Pesei, nan cada un por tuma nan decision—por ehempel, den e manera di bisti y di peña. Claro cu Bijbel ta describi principionan cla cu tur cristian sinsero mester sigui. Ningun di nos mester bisti paña of peña estilonan cu ta extrabagante of inmodesto of cu ta identifica nos cu elementonan indeseabel di mundo. (1 Huan 2:15-17) Cristiannan ta corda cu na tur momento, asta ora nan ta relaha, nan ta ministernan cu ta representa e Soberano Universal. (Isaias 43:10; Huan 17:16; 1 Timoteo 2:9, 10) Sinembargo, den hopi area tin un variedad amplio di decisionnan aceptabel cu cristiannan por tuma. *

Evita di Pone Otro Hende Trompica

15. Ki ora un cristian por keda sin haci uzo di su derecho pa beneficio di su rumannan?

¹⁵ Finalmente, den e conseho cu el a duna e cristiannan na Roma, tin un principio importante cu Pablo a hala nos atencion riba dje. Tin biaha, un cristian cu un consenshi bon entrena por dicidi di opta pa keda sin haci algo cu riba su mes no ta malo. Dicon? Pasobra e ta realisa cu un decision asina lo por perhudica otro hende. Kico nos tin cu haci den un caso asina? Pablo a bisa: “Ta bon pa no come carni ni bebe biña, of haci cualkier cos cu ta haci bo ruman trompica.” (Romanonan 14:14, 20, 21) Pues, “nos cu ta fuerte mester soporta e debilidadnan di esnan cu ta sin forsa, y no djis agrada nos mes. Laga cada un di  nos agrada su prohimo pa su bon, pa su edificacion.” (Romanonan 15:1, 2) Ora nos por ofende consenshi di un ruman cristian cu loke nos ta haci, amor fraternal lo impulsa nos pa tene cuenta cu ne y keda sin haci loke nos tin derecho di haci. Un ehempel di esaki por ta uzo di bebida alcoholico. Un cristian tin mag di bebe biña cu moderacion. Pero si esei ta pone su ruman spiritual trompica, lo e no insisti riba su derechonan.

16. Con nos por tene cuenta cu otro hende den nos teritorio?

¹⁶ Nos por aplica e principio aki tambe den nos trato cu hende pafo di e congregacion cristian. Por ehempel, kisas nos ta biba den un area caminda e religion dominante ta siña su miembronan pa considera un dia di siman como un dia di sosiego. Pa e motibo ei, esta, pa no pone nos biciñanan trompica y crea obstaculo pa e trabou di predica, nos lo evita mas tanto posibel di haci cualkier cos riba e dia ei cu lo por ofende nos biciñanan. Den un otro situacion, un cristian rico lo por muda bai sirbi caminda e necesidad ta mas grandi den un pueblo caminda e hendenan ta di poco recurso. Lo e por opta pa tene cuenta cu su biciñanan nobo door di bisti masha simpel of door di hiba un estilo di bida hopi mas modesto cu su recursonan ta permitie.

17. Pakico ta rasonabel pa tene cuenta cu otro hende den e decisionnan cu nos ta tuma?

¹⁷ Ta rasonabel pa spera cu esnan “cu ta fuerte” ta haci e ahustenan ei? Wel, pensa riba e ilustracion aki: Coriendo riba un caminda grandi, nos ta mira nos dilanti algun mucha ta cana na un manera peligroso pega cu e caminda. Nos ta sigui core na e mesun velosidad maximo djis pasobra nos tin e derecho legal di haci esei? No, nos ta slow pa evita posibel peliger pa e muchanan. Mescos tambe, tin biaha nos tin cu slow, of cede, den nos relacion cu nos rumannan den fe of cu otro hende. Kisas nos ta haciendo algo cu nos tin e pleno derecho di haci. Nos no ta faltando cu ningun principio di Bijbel. No obstante, si nos por ofende otro hende of perhudica esnan cu tin un consenshi mas debil, amor cristian lo impulsa nos pa actua cu cautela. (Romanonan 14:13, 15) Mantene unidad y  promove interesnan di Reino ta mas importante cu eherce un derecho cu nos tin.

18, 19. (a) Ora nos ta tene cuenta cu otro hende, con nos ta sigui e ehempel di Hesus? (b) Den ki asuntonan nos tur ta actua den un forma uni, y kico nos lo considera den e siguiente articulo?

¹⁸ Ora nos ta actua den e manera aki, nos ta siguiendo e ehempel di mas sublime. Pablo a bisa: “Ni Cristo no a agrada su mes; ma manera ta para skirbi: ‘E reprochenan di esnan cu a reprocha bo a cai riba mi.’” Hesus tawata dispuesto pa sacrifica su bida pa nos. Siguramente nos ta dispuesto pa sacrifica algun di nos derechonan si esei ta permiti ‘esnan cu no ta fuerte’ glorifica Dios den union cu nos. En berdad, ora nos ta tolerante y generoso pa cu e cristiannan cu tin un consenshi mas debil—of limita nos preferencianan boluntariamente y no insisti riba nos derechonan—esei ta demostra “e mesun actitud mental cu Cristo Hesus tawatin.”—Romanonan 15:1-5, NW.

¹⁹ Aunke cada un di nos por tin nos propio punto di bista riba asuntonan caminda no tin principio di Bijbel envolvi, den asuntonan di adoracion, nos ta actua completamente uni. (1 Corintionan 1:10) Por ehempel, e unidad ei ta bisto den nos reaccion riba esnan cu ta opone adoracion berdadero. E Palabra di Dios ta yama e opositornan ei hende straño y ta spierta nos pa tene cuidou cu “bos di hende straño.” (Huan 10:5) Con nos por identifica hende straño? Kico mester ta nos reaccion? E siguiente articulo lo contesta e preguntanan aki.

[Nota]

Con Lo Bo Contesta?

• Pakico e echo cu cada ken tin su punto di bista riba asuntonan personal no ta pone nos union na peliger?

• Pakico nos como cristian mester laga amor impulsa nos pa tene cuenta cu otro?

• Menciona algun manera den cua nos por aplica e conseho di Pablo riba unidad awe. Kico lo motiva nos pa haci esei?

[Preguntanan di Estudio]

[Plachi na pagina 9]

E conseho di Pablo tocante unidad tawata hopi importante pa e congregacion

[Plachi na pagina 10]

Cristiannan ta uni apesar di nan diferente background

[Plachi na pagina 12]

Kico e chauffeur aki mester haci awor?