Ki Herencia Bo Tin Cu Laga pa Bo Yiunan?

PAVLOS, un cabes di famia di sur Europa, masha poco sa ta na cas hunto cu su casa y yiunan. E tin dos yiu mohe di 13 y 11 aña, y un yiu homber di 7 aña. Shete dia pa siman Pavlos ta traha dos warda di hopi ora, pa e purba gana suficiente placa pa e realisa su soño. E kier cumpra un apartamento pa cada un di su yiu mohenan, y e kier cuminsa un negoshi chikito pa su yiu homber. Su esposa, Sofia, ta traha duro pa yega na cosnan di lino manera paña di mesa, paña di cama, y tambe cos di cushina, articulo di porselana y bestek pa e futuro hogarnan aki. Ora puntra nan pakico nan ta traha asina duro, nan ta contesta pareu: “Pa nos yiunan!”

Mescos cu Pavlos y Sofia, hopi mayor rond  mundo ta haci nan best pa duna nan yiunan un bon comienso den bida. Algun ta spar pa futuro di nan yiunan. Otronan ta haci sigur cu nan yiunan ta haya un educacion adecuado y siña habilidadnan cu lo ta util pa nan despues den bida. Aunke mayoria mayor ta mira e regalonan ei como un herencia di amor, hopi bes e percuracionnan aki ta pone mayornan bou di un presion grandi pa cumpli cu e expectativanan di famia, amigo y e comunidad den cua nan ta biba. Pesei, mayornan cu tin interes di nan yiunan na pecho tin bon motibo pa puntra: ‘Kico nos tin cu laga pa nos yiunan?’

Haciendo Areglo pa Futuro

No ta solamente natural sino tambe biblico pa mayornan cristian laga algo pa nan yiunan. Apostel Pablo a bisa e cristiannan di su tempo: “No ta yiunan mester spar pa nan mayornan, pero mayornan pa nan yiunan.” (2 Corintionan 12:14, BPK) Pablo a bisa mas aleu cu mayornan tin un responsabilidad serio pa cuida nan yiunan. El a skirbi: “Si un hende no provee pa su mes hendenan, y specialmente pa esnan di su cas, el a nenga e fe y ta piyo cu un incredulo.” (1 Timoteo 5:8) Varios relato di Bijbel ta ilustra cu asuntonan di herencia tawata importante entre e sirbidonan di Dios den temponan biblico.—Rut 2:19, 20; 3:9-13; 4:1-22; Job 42:15.

Sinembargo, tin biaha mayornan ta pensa cu nan mester laga un herencia grandi pa nan yiunan. Pakico? Manolis, un tata cu a muda for di sur Europa bai Merca, ta splica un di e motibonan: “Mayornan cu a yega di sufri di hamber y pobresa, y cu a pasa den e desaster di Segunda Guera Mundial ta determina pa nan yiunan tin un miho futuro.” E ta agrega: “Pa motibo di nan sentido exagera di responsabilidad y un deseo pa duna nan  yiunan e miho comienso posibel den bida, tin biaha mayornan ta causa daño na nan mes.” En berdad, algun mayor ta keda sin cumpli cu algun di nan necesidadnan di bida of ta priva nan mes di cierto cosnan pa por laga placa y propiedad pa nan yiunan. Pero ta sabi pa mayornan hiba un bida asina?

“Banidad y Gran Maldad”

Rei Salomon di Israel di antiguedad tawatin un palabra di spiertamento relaciona cu herencia. El a skirbi: “Mi tawata odia tur e fruta di mi trabou cu mi a traha p’e bou di solo, pasobra mi mester lag’e pa e hende cu lo bin despues di mi. Y ken sa si e lo ta un hende sabi of un hende bobo[?] Toch e lo tin control riba tur fruta di mi trabou cu mi a traha p’e door di actua cu sabiduria bou di solo. Esaki tambe ta banidad. . . . Despues cu un hende a traha cu sabiduria, conocemento y habilidad, e ta duna su propiedad na un hende cu no a traha cu esakinan. Esaki tambe ta banidad y gran maldad.”—Eclesiastes 2:18-21.

Manera Salomon ta splica, hende cu ta ricibi un herencia kisas no ta realisa su balor completo pasobra no ta nan mes a traha duro p’e. Consecuentemente, e herederonan por actua na un manera bobo cu loke e mayornan a lucha duro pa acumula pa nan. Nan por asta malgasta tur pertenencia cu nan grandinan a yega na dje cu sodo di nan frenta. (Lucas 15:11-16) Esta un “banidad y [un] gran maldad” esei lo ta!

Herencia y Golosidad

Tin algo mas cu mayornan tin cu pensa ariba. Den culturanan cu ta duna hopi importancia na propiedadnan hereda y regalo di matrimonio, yiunan por bira golos, y cuminsa exigi propiedad, of un bruidsschat, riba loke e mayornan rasonablemente por duna. “Ai di e tata cu tin dos of tres yiu mohe”, Loukas, un tata di Grecia, ta bisa den forma di chansa. “Yiu mohe por compara loke nan tata por duna nan cu loke otro mayornan ‘di bon curason’ ta acumula pa nan yiunan. Nan por bisa cu si nan no tin un bruidsschat satisfactorio, nan chens di casa lo bira mas chikito.”

Manolis, menciona anteriormente, ta bisa: “Un yoncuman lo por alarga e enamoracion te ora e tata di e futuro bruid primintie algo pa e bruid, por lo general propiedad of un suma considerabel di placa. E por bira un tipo di chantahe.”

Bijbel ta spierta nos contra tur forma di golosidad. Salomon a skirbi: “Un herencia haya mucho lihe na principio lo no ta  bendiciona na fin.” (Proverbionan 20:21) Apostel Pablo a enfatisa: “Amor pa placa ta raiz di tur sorto di maldad.”—1 Timoteo 6:10; Efesionan 5:5, BPK.

“Sabiduria Hunto cu un Herencia”

Ta berdad cu un herencia tin cierto balor, pero sabiduria tin mucho mas balor cu cos material. Rei Salomon a skirbi: “Sabiduria hunto cu un herencia ta bon, y ta un probecho . . . Pasobra sabiduria ta proteccion mescos cu placa ta proteccion. Ma e bentaha di conocemento ta cu sabiduria ta preserva bida di esnan cu ta pose’e.” (Eclesiastes 7:11, 12; Proverbionan 2:7; 3:21) Aunke placa ta duna cierto proteccion, loke ta permiti esun cu ta pose’e haya loke e tin mester, e por bai perdi. En cambio, sabiduria—e capasidad pa uza conocemento pa resolve problema of pa logra cierto meta—por proteha un persona di core riesgonan imprudente. Ora e ta basa riba un temor di Dios cu ta na su luga, e por yuda un persona haya bida eterno den Dios su mundo nobo cu lo bini pronto—un herencia precioso en berdad!—2 Pedro 3:13.

Mayornan cristian ta eherce e sabiduria ei door di establece prioridadnan adecuado pa nan mes y pa nan yiunan. (Filipensenan 1:10, BPK) Acumulacion di cos material pa yiunan haya despues no mester ta mas importante cu cosnan spiritual. Hesus a anima su siguidonan: “Busca prome e reino di Dios y su husticia, y tur e cosnan aki lo wordo añadi na boso.” (Mateo 6:33) Mayornan cu ta fiha metanan spiritual pa nan famia cristian por spera cu nan lo ser ricamente recompensa. E Rei sabi Salomon a skirbi: “Tata di e husto lo tin gran goso, y esun cu engendra un yiu sabi lo tin delicia den dje. Laga bo tata y bo mama ta contento, y laga esun cu a haya bo regociha.”—Proverbionan 23:24, 25.

Un Herencia Duradero

Pa e Israelitanan di antiguedad, asuntonan di herencia tawata hopi importante. (1 Reinan 21:2-6) Sinembargo, Yehova a adverti nan: “E palabranan aki, cu mi ta ordena bo awe, mester ta riba bo curason. Siña nan cu tur diligencia na bo yiunan, y papia di nan ora bo ta sinta den bo cas, ora bo ta cana riba caminda, ora bo ta bai drumi y ora bo ta lanta.” (Deuteronomio 6:6, 7) Mescos tambe, Bijbel ta bisa mayornan cristian: “Lanta [bo yiunan] den e disiplina y instruccion di Señor.”—Efesionan 6:4.

Mayornan cu tin un punto di bista spiritual ta realisa cu provee pa nan cas ta inclui duna instruccion for di Bijbel. Andreas, un tata di tres yiu, ta remarca: “Si yiunan siña aplica principionan di Dios den nan bida, nan lo ta miho prepara pa futuro.” Un herencia asina ta enfoca tambe riba yuda nan establece y cultiva un relacion personal cu nan Creador.—1 Timoteo 6:19.

Bo a pensa riba ki preparacion bo por haci pa e futuro spiritual di bo yiu? Por ehempel, kico mayornan por haci si nan yiu tin meta pa drenta e sirbishi di tempo completo? Aunke un predicado di tempo completo no mag di exigi ni spera sosten financiero, mayornan amoroso por dicidi di ‘contribui na necesidadnan’ di nan yiunan pa yuda nan keda den e sirbishi di tempo completo. (Romanonan 12:13; 1 Samuel 2:18, 19; Filipensenan 4:14-18) Un actitud asina sigur lo agrada Yehova.

Pues, anto, kico mayornan tin cu laga pa nan yiunan? Ademas di percura pa nan necesidadnan material, mayornan cristian lo haci sigur cu nan yiunan ta ricibi un herencia spiritual rico cu lo beneficia nan pa semper. Den e manera ei, e palabranan na Salmo 37:18 lo bira realidad: “SEÑOR conoce e dianan di e perfectonan; y nan herencia lo keda pa semper.”

[Plachinan na pagina 26]

Ki futuro bo tin na mente pa bo yiunan?