Loke Realmente Nos Tin Mester pa Nos Ta Felis

YEHOVA, “e Dios felis”, y Hesucristo, “e felis y unico Mandatario”, sa miho cu cualkier otro persona kico nos tin mester pa nos ta felis. (1 Timoteo 1:11, NW; 6:15, NW) Pues, no ta un sorpresa cu nos ta haya e yabi pa felicidad den Dios su Palabra, Bijbel.—Revelacion 1:3; 22:7.

Den su famoso Sermon Riba Sero, Hesus a describi kico ta necesario pa nos ta felis. El a declara: “Felis ta esnan” (1) cu ta conciente di nan necesidad spiritual, (2) cu ta yora, (3) cu ta humilde (4) cu tin hamber y sed pa husticia, (5) cu ta misericordioso, (6) cu tin curason puro, (7) cu ta haci pas, (8) cu ta ser persigui pa causa di husticia y (9) cu ta ser insulta y persigui pa causa di Hesus.—Mateo 5:3-11. *

E Declaracionnan di Hesus Ta Corecto?

E declaracionnan di Hesus mester di un poco splicacion pa nos mira cu nan ta berdad. Ningun hende lo nenga cu un persona humilde, misericordioso y cu ta haci pas, motiva pa un curason puro, lo ta mas felis cu un persona yen di rabia, buscado di pleito y sin misericordia.

 Pero kisas nos ta puntra nos mes con por ta posibel cu ta yama hende cu tin hamber y sed pa husticia of cu ta yora, felis. E hendenan ei tin un punto di bista realistico di e condicionnan mundial. Nan ta “suspira y keha pa motibo di tur e abominacionnan cu ta wordo haci” den nos tempo. (Ezekiel 9:4) Esei riba su mes no ta haci nan felis. Sinembargo, ora nan haya sa tocante Dios su proposito pa trece condicionnan husto riba tera y husticia pa hende oprimi, nan goso no tin limite.—Isaias 11:4.

Amor pa husticia tambe ta pone hende yora of lamenta e echo cu nan mes frecuentemente ta faya di haci loke ta bon. Pues nan ta pober di spirito, es decir, conciente di nan necesidad spiritual. E tipo di hendenan ei ta dispuesto pa busca guia serca Dios pasobra nan ta realisa cu ta e so por yuda hende supera nan debilidadnan.—Proverbionan 16:3, 9; 20:24.

Hende cu ta yora, cu tin hamber y sed pa husticia y cu ta conciente di nan necesidad spiritual, ta reconoce e importancia di tin un bon relacion cu e Creador. Un bon relacion cu hende mes ta contribui na felicidad, pues cuanto mas ainda un bon relacion cu Dios. Si, berdaderamente nos por yama hende serio, amante di loke ta corecto, y cu ta dispuesto pa acepta Dios su guia, felis.

Sinembargo, kisas ta dificil pa bo kere cu un persona cu ta ser persigui y insulta por ta felis. Pero, si Hesus mes a bisa esei, lo e mester ta berdad. Pues anto, con nos mester compronde su palabranan?

Persigui Pero Felis—Con Por Ta?

Tuma nota cu Hesus no a bisa cu insulto y persecucion riba nan mes ta hiba na felicidad. El a stipula: “[Felis] ta esnan cu ta wordo persigui pa causa di husticia, . . . ora cu hende insulta boso y persigui boso . . . pa mi causa.” (Mateo 5:10, 11) Pues un hende ta resulta felis solamente ora e ta sufri insulto pasobra e ta un siguido di Cristo y pasobra e ta hiba su bida segun e patronchi di principionan husto cu Hesus a siña.

Un ehempel di esaki nos ta mira den loke a sosode cu e prome cristiannan. Miembronan di e Consilio, of corte supremo Hudiu, “a yama e apostelnan bin paden, nan a suta nan y a taha nan pa no papia mas den e nomber di Hesus, y a pone nan den libertad.” Con e apostelnan a reacciona? “Asina nan a bai for di presencia di e Consilio, regosihando cu nan a wordo considera digno pa sufri berguensa pa su nomber. Y tur dia, den tempel y di cas pa cas, nan tawata sigui siña hende y predica Hesus como e Cristo.”—Echonan 5:40-42; 13:50-52.

Apostel Pedro a yuda nos mira mas cla ainda e conexion entre insulto of reproche y felicidad. El a skirbi: “Si boso wordo reprocha pa e nomber di Cristo, boso ta bendiciona [felis], pasobra e spirito di gloria y di Dios ta riba boso.” (1 Pedro 4:14) Si, sufri como un cristian pasobra bo ta haci loke ta corecto—maske tal sufrimento ta desagradabel—ta duna bo e felicidad of satisfaccion di sa cu bo ta ricibi e spirito santo di Dios. Con Dios su spirito ta conecta cu felicidad?

Obranan di Carni of Fruta di e Spirito?

Dios su spirito santo ta solamente riba esnan cu ta obedece Dios como gobernante. (Echonan 5:32) Yehova no ta duna su spirito na hende cu ta practica “e obranan di carni.” E obranan ei ta “inmoralidad, impuresa, sensualidad, idolatria, bruheria, hostilidad, bringamento, yalursheid, rabiamento, pleitamento, desacuerdo, doctrina falso, envidia, buracheria, parandiamento, y cosnan asin’aki.” (Galationan 5:19-21) Ta cierto cu den e mundo djawe “e obranan di carni” ta bisto tur caminda. Sinembargo, e hendenan cu ta practica nan no ta gosa di felicidad berdadero y permanente. Mas bien, e obranan ei ta daña  un hende su bon relacion cu su famia-, amigo- y conocinan. Es mas, e Palabra di Dios ta declara cu esnan cu ta “practica sorto di cosnan asina lo no hereda e reino di Dios.”

Na contraste, Dios ta duna su spirito na hende cu ta cultiva e “fruta di e spirito.” E cualidadnan cu ta forma e fruta aki ta “amor, goso, pas, pasenshi, cariño, bondad, [“fe, suavidad”, NW], dominio propio.” (Galationan 5:22, 23) Ora nos ta desplega e cualidadnan aki, nos ta crea e condicionnan pa nos por tin relacionnan pacifico cu otro hende y cu Dios, locual ta resulta den berdadero felicidad. (Wak e cuadro.) Mas importante ainda, door di demostra amor, cariño, bondad y otro cualidadnan produci pa Dios su spirito, nos ta agrada Yehova y nos tin e speransa felis di haya bida eterno den Dios su mundo nobo di husticia.

Felicidad Ta un Asunto di Scohe

Ora Wolfgang cu Brigitte, un pareha cu ta biba na Alemania, a cuminsa studia Bijbel seriamente, nan tawatin hopi di e cosnan material cu hende ta pensa ta necesario pa nan ta felis. Nan tawata jong y salu. Nan a bisti paña caro, nan tawata biba den un cas bunita drecha, y nan tawatin un negoshi exitoso. Nan tawata dedica mayor parti di nan tempo na purba haya mas cos material, pero esei no a duna nan berdadero felicidad. Pero cu tempo, Wolfgang cu Brigitte a tuma un decision crucial. Nan a scohe pa cuminsa dedica mas tempo y esfuerso pa alcansa balornan spiritual y a busca maneranan pa hala mas serca di Yehova. No a tarda hopi cu e rumbo ei cu nan a scohe a trece un cambio den nan actitud, locual na su turno, a motiva nan pa simplifica nan bida y sirbi como pionero, es decir, como predicadonan di Reino di tempo completo. Awe, nan ta sirbi como boluntario na e sucursal di Testigonan di Yehova na Alemania. Ademas, nan ta siñando un idioma Asiatico pa asina nan por yuda stranheronan siña e berdad cu tin den Dios su Palabra, Bijbel.

E pareha aki a haya berdadero felicidad? Wolfgang a bisa: “For di tempo cu nos a cuminsa participa mas activamente den cosnan spiritual, nos ta mas felis y nos ta sinti mas satisfaccion. Sirbi Yehova di henter alma a fortalece  nos matrimonio tambe. Nos tawatin un matrimonio felis caba, pero nos obligacionnan y interesnan tawata hala nos cada un den un otro direccion. Awor nos ta sigui unidamente e mesun meta.”

Kico Nos Tin Mester pa Nos Ta Felis?

Den poco palabra: Evita “e obranan di carni”, y cultiva e “fruta di [Dios su] spirito.” Pa un hende ta felis, e mester anhela di tin un relacion sera cu Dios. Un persona cu ta haci esfuerso pa logra esei ta pas cu e descripcion cu Hesus a duna di un persona felis.

Pues anto, no conclui eroneamente cu felicidad ta fuera di bo alcanse. Por ta masha bon cu aworaki kisas bo no tin bon salu of bo por tin asta problema den bo matrimonio. Podise ya bo no por haya yiu mas, of kisas bo ta luchando pa haya un carera exitoso. Talbes bo cartera no ta yen mas manera antes. No obstante, cobra animo; bo no tin nodi desespera! Dios su gobernacion di Reino lo resolve e problemanan aki y cientos mas. De echo, pronto Yehova Dios lo cumpli cu su promesa expresa door di e salmista: “Bo reino ta un reino eterno . . . Bo ta habri bo man, y ta satisface e deseo di tur ser bibo.” (Salmo 145:13, 16) Manera miyones di sirbido di Yehova rond mundo por confirma, teniendo na mente e promesa alentador aki di Yehova lo contribui masha hopi na bo felicidad awe.—Revelacion 21:3.

[Nota]

[Cuadro/Plachi na pagina 6]

Factornan Cu Ta Contribui na Felicidad

Amor ta motiva otro hende pa nan tambe stima bo.

Goso ta duna bo e fortalesa pa trata cu problema y prueba.

Pas ta yuda bo mantene relacionnan sin conflicto.

Pasenshi ta haci posibel cu bo por keda felis asta ora bo ta bou di prueba.

Cariño ta atrae hende na bo.

Bondad di bo parti ta pone otro hende duna un man ora bo tin mester di yudansa.

Fe lo duna bo e siguransa cu lo bo ricibi Dios su guia amoroso.

Suavidad lo duna bo trankilidad di curason, mente y curpa.

Dominio propio ta nifica cu lo bo comete menos eror.

[Plachinan na pagina 7]

Pa logra felicidad, bo tin cu satisface bo necesidadnan spiritual