Pregunta di Lector

Pakico Testigonan di Yehova ta mira e cifra 144.000 menciona den e buki di Revelacion como algo literal y no simbolico?

Apostel Huan a skirbi: “Mi a tende e cantidad di esnan cu a wordo seya, 144.000.” (Revelacion 7:4) Den Bijbel, e frase “esnan cu a wordo seya” ta referi na un grupo di persona cu a ser scohi for di humanidad pa reina cu Cristo den shelo riba e benidero Paradijs terenal. (2 Corintionan 1:21, 22; Revelacion 5:9, 10; 20:6) Nan cantidad, 144.000, ta un cifra literal pa varios motibo. Un di e motibonan ei ta den e contexto direct di Revelacion 7:4.

Despues cu apostel Huan a mira e grupo aki di 144.000 persona den un vision, el a mira un otro grupo. Huan ta describi e di dos grupo aki como “un multitud grandi cu ningun hende no por a conta, di tur nacion y tur tribu y pueblo y lenga.” E multitud grandi aki ta referi na esnan cu lo sobrevivi e benidero “gran tribulacion”, cu lo destrui e mundo malbado djawe.—Revelacion 7:9, 14.

Sinembargo, tuma nota di e contraste cu Huan ta haci entre versiculo 4 y 9 di Revelacion capitulo 7. E ta bisa cu e prome grupo, “esnan cu a wordo seya”, ta un cantidad defini. Sinembargo, e di dos grupo, “un multitud grandi”, no ta un cantidad defini. Cu esei na mente, ta logico anto pa mira e cantidad di 144.000 como algo literal. Si e cifra 144.000 ta algo simbolico y ta referi na un grupo cu en realidad ta indefini, e efecto di e contraste entre e dos versiculonan ei lo bai perdi. Pues, e contexto ta duna indicacion fuerte cu e cifra 144.000 mester ta algo literal.

Varios experto den Bijbel, tanto di pasado como di awe, a yega na e mesun conclusion, esta, cu e cifra ta literal. Por ehempel, comentando riba Revelacion 7:4 y 9, e escritor di diccionario Britanico dr. Ethelbert W. Bullinger a remarca rond di 100 aña pasa: “Ta e simpel declaracion di un echo: un cantidad defini na contraste cu e cantidad indefini den e mesun capitulo aki.” (The Apocalypse or “The Day of the Lord” [Apocalipsis of “Dia di Señor”], pagina 282) Mas resientemente, Robert L. Thomas, Jr., profesor di Testament Nobo na e Seminario di Master na Merca, a skirbi: “No tin un base solido pa mira e cantidad di 144.000 como algo simbolico.” El a agrega: “Ta un cantidad defini [na 7:4] na contraste cu e cantidad indefini di 7:9. Si mir’e como algo simbolico, anto no por mira ningun otro cifra den e buki aki como algo literal.”—Revelation: An Exegetical Commentary, Volumen 1, pagina 474.

Algun experto ta bisa cu ya cu Revelacion ta contene idioma sumamente simbolico, tur cifra den e buki aki, incluyendo e cifra 144.000, mester ta simbolico. (Revelacion 1:1, 4; 2:10) Sinembargo, ta bisto cu e conclusion ei no ta corecto. Ta berdad cu Revelacion  ta contene varios cifra simbolico, pero tambe e ta inclui cifranan literal. Por ehempel, Huan ta papia di “e diesdos nombernan di e diesdos apostelnan di e Lamchi.” (Revelacion 21:14) Ta obvio cu e cifra 12 menciona den e versiculo aki ta literal, no simbolico. Mas aleu, apostel Huan ta skirbi tocante “e mil añanan” di e reinado di Cristo. Manera un investigacion cuidadoso di Bijbel ta mustra, e cifra ei tambe ta literal. * (Revelacion 20:3, 5-7) Pesei, ta e contexto y marco di circunstancia ta determina si mester mira un cifra den Revelacion como algo literal of simbolico.

E idea cu e cifra 144.000 ta literal y cu e ta referi na un cantidad limita di persona, un grupo relativamente chikito compara cu e “multitud grandi”, ta cuadra tambe cu otro pasashinan di Bijbel. Por ehempel, mas despues den e vision cu apostel Huan ta ricibi, e 144.000 ta ser describi como esnan cu “a wordo cumpra for di entre hende como e prome frutanan.” (Revelacion 14:1, 4) E expresion “prome frutanan” ta referi na un grupo chikito representativo. Tambe, tempo cu Hesus tawata riba tera, el a papia di esnan cu lo reina cu ne den su Reino celestial y a yama nan un “tou chikito.” (Lucas 12:32; 22:29) En berdad, e personanan scohi for di entre humanidad cu lo reina den shelo ta poco na comparacion cu e hendenan cu lo biba den e benidero Paradijs riba tera.

Pesei, e contexto di Revelacion 7:4 y otro declaracionnan den Bijbel relaciona cu esaki ta confirma cu e cifra 144.000 ta literal. E ta referi na esnan cu lo goberna den shelo cu Cristo riba un paradijs terenal, cu lo ta habita pa un cantidad grandi indetermina di hende felis cu ta adora Yehova Dios.—Salmo 37:29.

[Nota]

[Comentario na pagina 31]

E cantidad di heredero celestial ta limita na 144.000

[Plachi na pagina 31]

E “multitud grandi” ta un cantidad indefini

[Reconocemento pa Potret na pagina 31]

Streyanan: Pa cortesia di Anglo-Australian Observatory, potret di David Malin