Tene Cuidou cu “Bos di Hende Straño”

“Un hende straño sigur nan lo no sigui, ma lo hui bai for di dje, pasobra nan no conoce bos di hende straño.”—HUAN 10:5.

1, 2. (a) Con Maria a reacciona ora Hesus a yam’e na su nomber, y e suseso aki ta ilustra ki declaracion cu Hesus a haci na un ocasion anterior? (b) Kico ta yuda nos sigui Hesus masha di acerca?

HESUS resusita a mira un mohe para banda di su graf bashi. E tawata conoc’e bon. Tawata Maria Magdalena. Casi dos aña mas prome, el a libr’e di demoño. Desde e dia ei e mohe a compaña Hesus y su apostelnan y a percura pa nan necesidadnan di tur dia. (Lucas 8:1-3) Pero awor Maria tawata yora, e tawata tristo pasobra el a mira Hesus muri, y awor asta su curpa a disparce! Pesei Hesus a puntr’e: “Mohe, pakico bo ta yora? Ta ken bo ta busca?” Keriendo cu tawata trata aki di e cuidado di e hofi, Maria a contest’e: “Señor, si ta bo a carg’e bai cu ne, bisa mi unda bo a pon’e, y lo mi coh’e bai cu ne.” E ora ei Hesus a bisa: “Maria!” Mesora e mohe a reconoce su manera custumbra di papia cu ne. Contento di su alma, el a sclama: “Rabuni [“Maestro”, NW]!” Y el a yega serca Hesus.—Huan 20:11-18.

² E relato aki ta ilustra na un manera conmovedor loke Hesus a bisa na un ocasion anterior. Comparando su mes cu un wardado y su siguidonan cu carne, el a bisa cu e wardado ta yama su mes carnenan na nan nomber y cu nan conoce su bos. (Huan 10:3, 4, 14, 27, 28) En berdad, mescos cu un carne ta reconoce su wardado, asina Maria a reconoce su Wardador, Cristo. Esaki ta conta pa Hesus su siguidonan djawe tambe. (Huan 10:16) Mescos cu un  carne su horea skerpi ta yud’e keda serca di su wardado, asina nos discernimento spiritual ta permiti nos sigui e pasonan di nos Bon Wardador, Hesucristo, masha di acerca.—Huan 13:15; 1 Huan 2:6; 5:20.

3. Cua ta algun pregunta cu Hesus su ilustracion tocante e cura di carne ta trece na nos mente?

³ Sinembargo, segun e mesun ilustracion ei, e capasidad di un carne pa reconoce bos di hende ta permitie haya sa no solamente ken ta su amigo sino tambe ken ta su enemigo. Esei ta sumamente importante pasobra nos tin oponentenan engañoso. Ken nan ta? Con nan ta actua? Con nos por proteha nos mes? Pa nos haya sa, laga nos mira kico mas Hesus a bisa den su ilustracion tocante e cura di carne.

‘Esun Cu No Ta Drenta Door di e Porta’

4. Segun e ilustracion di e wardado, ken e carnenan ta sigui, y ken nan no ta sigui?

⁴ Hesus a bisa: “Esun cu drenta door di e porta ta un wardado di carne. Pa esaki e wardado di porta ta habri porta, y e carnenan ta tende su bos, y e ta yama su mes carnenan na nan nomber y ta saca nan hiba pafo. Ora cu e saca tur cu ta di dje hiba pafo, e ta bai nan dilanti, y e carnenan ta siguie, pasobra nan conoce su bos. Y un hende straño sigur nan lo no sigui, ma lo hui bai for di dje, pasobra nan no conoce bos di hende straño.” (Huan 10:2-5) Tuma nota cu Hesus a uza e palabra “bos” tres bes. Dos bes el a papia tocante e bos di un wardado, pero e di tres biaha, el a referi na “bos di hende straño.” Ki tipo di hende straño Hesus a referi na dje?

5. Pakico nos no ta mustra hospitalidad na e tipo di hende straño menciona den Huan capitulo 10?

⁵ Hesus no tawata papiando di e tipo di hende straño na ken nos kier mustra hospitalidad—un palabra cu den e idioma original di Bijbel ta nifica “amor pa hende straño.” (Hebreonan 13:2) Den Hesus su ilustracion, e hende straño no ta un persona invita. E “no [ta] drenta den e cura di carne door di e porta, ma ta subi drenta pa un otro caminda.” E ta “un ladron y un hortado.” (Huan 10:1) Ken ta e prome individuo menciona den e Palabra di Dios cu a bira un ladron y un hortado? Satanas e Diabel. Nos ta haya evidencia di esaki den e buki di Genesis.

Dia A Tende e Bos di un Hende Straño pa Prome Bes

6, 7. Pakico nos por yama Satanas corectamente un hende straño y un ladron?

⁶ Genesis 3:1-5 ta describi con a tende e bos di un hende straño pa prome bes aki riba tera. E relato ta conta con Satanas, pa medio di un colebra, a acerca e prome mohe, Eva, y a papia cu ne y engañ’e. Ta berdad cu den e relato aki Satanas no ta ser yama literalmente “un hende straño.” No obstante, su accionnan ta mustra cu den hopi sentido e tawata manera e hende straño describi den Hesus su ilustracion registra den Huan capitulo 10. Laga nos wak algun di e similaridadnan.

⁷ Hesus a bisa cu e hende straño ta acerca su victimanan den e cura di carne den un forma indirect. Mescos tambe, Satanas a acerca su victima indirectamente, uzando un colebra. E metodo astuto aki a saca na cla loke Satanas ta realmente—un intruso engañoso. Ademas, e hende straño den e cura di carne ta busca moda di horta e carnenan for di nan doño legitimo. De echo, e ta piyo cu un ladron, pasobra su meta ta “pa mata y pa destrui” tambe. (Huan 10:10) Di igual manera, Satanas tawata un ladron. Engañando Eva, el a ‘hort’e’ of kit’e for di su lealtad na Dios. Ademas, Satanas a trece morto tambe pa humanidad. Pesei, e ta un asesino.

8. Con Satanas a troce Yehova su palabra- y motibonan?

⁸ E deshonestidad di Satanas tawata bisto den e manera cu el a troce e palabranan y motibonan di Yehova. El a puntra Eva: “Di berdad Dios a bisa: ‘Bo no mag come di ningun palo?’” Satanas kier a duna e impresion cu el a keda sorprendi. Ta como si fuera el a bisa: ‘Con Dios por ta irasonabel asina?’ El a agrega: “Dios sa cu e dia cu boso come di dje, boso wowo lo habri.” Ripara su palabranan: “Dios sa.” Na moda di papia, Satanas a bisa: ‘Mi sa loke Dios  sa. Mi sa su motibonan, y nan ta malo.’ (Genesis 2:16, 17; 3:1, 5) Lamentablemente, Eva y Adam no a aleha for di e bos di e hende straño aki. Mas bien, nan a haci caso di dje y a trece calamidad tanto pa nan mes como pa nan yiunan.—Romanonan 5:12, 14.

9. Pakico nos por spera cu hende ta tende bos di hende straño awe?

⁹ Satanas ta uza metodonan similar pa engaña e pueblo di Dios awe. (Revelacion 12:9) E ta “e tata di mentira”, y esnan cu ta purba engaña sirbidonan di Dios mescos cu ne, ta su yiunan. (Huan 8:44) Laga nos tuma nota di algun manera den cua hende por tende bos di hende straño awe.

Con e Bos di Hende Straño Ta Ser Tendi Awe

10. Den ki manera hende ta tende bos di hende straño?

¹⁰ Rasonamento engañoso. Apostel Pablo a declara: “No laga boso wordo hiba p’aki p’aya door di tur sorto di siñansa straño.” (Hebreonan 13:9) Ki sorto di siñansa? Siendo cu nan por ‘hiba nos’, ta obvio cu aki Pablo a referi na siñansanan cu ta debilita nos balansa spiritual. Ken ta bosifera e siñansanan straño ei? Pablo a bisa un grupo di anciano cristian: “For di meimei di boso mes lo lanta hombernan cu ta papia cosnan perverso [“troci”, NW], pa desvia e disipelnan y haci nan bai nan tras.” (Echonan 20:30) Si, mescos cu den tempo di Pablo, algun individuo cu un tempo tawata forma parti di e congregacion cristian awor ta purba engaña e carnenan door di papia “cosnan perverso”, esta, mitar berdad y mentira flagrante. Manera apostel Pedro a expres’e, nan ta uza “palabranan di engaño”, esta, palabranan cu ta parce berdad, pero cu en realidad no tin ningun balor.—2 Pedro 2:3.

11. Con e palabranan na 2 Pedro 2:1 y 3 ta describi e metodonan y meta di apostatanan?

¹¹ Mas aleu, Pedro a describi e metodonan di apostatanan door di bisa cu nan ta “introduci na scondi herehianan [sectanan] destructivo.” (2 Pedro 2:1, 3) Mescos cu e ladron den Hesus su ilustracion di e cura di carne no ta drenta “door di e porta, ma ta subi drenta pa un otro caminda”, asina apostatanan ta sluip drenta den nos. (Galationan 2:4; Hudas 4) Cu ki meta? Pedro a agrega: “Nan lo explota [“probecha di”, NW] boso.” En berdad, maske cuanto apostatanan ta purba hustifica nan mes, e berdadero meta di intrusonan ta “pa horta, pa mata y pa destrui.” (Huan 10:10) Tene cuidou cu tal hende straño!

12. (a) Con nos asociacionnan por expone nos na bos di hende straño? (b) Ki similaridad tin entre e tacticanan di Satanas y esnan di hende straño awe?

¹² Asociacion perhudicial. Bos di hende straño por ser tendi tambe pa medio di e personanan  cu nos ta asocia cu ne. Asociacion perhudicial ta specialmente peligroso pa hobennan. (1 Corintionan 15:33) Corda, den caso di e prome pareha humano Satanas a mik riba Eva—esun mas hoben y cu menos experencia. El a combence Eva cu Yehova a limita su libertad demasiado, siendo cu realmente ta lo contrario tawata e berdad. Yehova a stima su creacion humano y a percura pa nan bienestar. (Isaias 48:17) Mescos tambe awe, hende straño ta purba combence boso, hobennan, cu boso mayornan cristian ta duna boso mucho tiki libertad. Con tal hende straño por afecta bo? Un mucha mohe cristian ta admiti: “Pa un tempo e muchanan di mi klas a debilita mi fe bastante. Cada bes nan tawata bisa mi cu mi religion ta mucho streng y irasonabel.” Pero e berdad ta cu bo mayornan stima bo. Pues ora e muchanan di bo scol ta purba combence bo pa desconfia bo mayornan, no laga nan engaña bo, manera Eva a laga su mes wordo engaña.

13. Ki rumbo sabi David a sigui, y den ki manera nos por imit’e?

¹³ Relaciona cu asociacion perhudicial, e salmista David a declara: “Mi no ta sinta hunto cu hombernan gañado, tampoco lo mi no anda cu hipocritanan.” (Salmo 26:4) Bo a nota atrobe e caracteristica tipico di hende straño? Nan ta sconde loke nan ta—mescos cu Satanas a sconde su identidad door di uza un colebra. Awe, algun hende inmoral ta sconde nan identidad y berdadero intencionnan door di uza Internet. Den chat room, adultonan perverso por asta laga parce cu nan ta hobennan pa lok bo den un trampa. Hobennan por fabor, si boso no kier sufri daño spiritual, tene masha cuidou.—Salmo 119:101; Proverbionan 22:3.

14. Con medionan di comunicacion sa publica e bos di hende straño?

¹⁴ Acusacion falso. Aunke algun informe di noticia tocante Testigonan di Yehova ta basa riba berdad, tin biaha medionan di comunicacion ta laga bos di hende straño propaga nan prehuicio. Por ehempel, den un pais, un informe di noticia a declara falsamente cu e Testigonan a apoya e regimen di Hitler durante Segundo Guera Mundial. Den un otro pais, un informe a acusa e Testigonan di actonan di vandalismo contra iglesianan. Den varios pais e medionan di comunicacion a acusa e Testigonan di ta nenga di duna tratamento medico na nan yiunan y tambe di ta sera wowo deliberadamente pa e picanan serio cu nan rumannan den fe ta comete. (Mateo 10:22) Pero apesar di esei, hende sinsero cu conoce nos personalmente ta reconoce cu e acusacionnan ei ta falso.

15. Pakico no ta sabi pa kere tur loke ser presenta den medionan di comunicacion?

¹⁵ Kico nos mester haci si nos haya nos confronta cu acusacionnan cu e bos di hende  straño ta plama? Ta bon pa nos haci caso di e conseho di Proverbionan 14:15: “E hende simpel ta kere tur cos, ma e homber prudente ta wak bon unda e ta bai.” No ta sabi pa kere tur loke ser presenta como berdad den medionan di comunicacion. Aunke sigur nos no ta desconfia tur informacion seglar, nos ta reconoce si cu “henter mundo ta bou di control di e malbado.”—1 Huan 5:19.

“Pone e Expresionnan Inspira na Prueba”

16. (a) Con e comportacion di carne literal ta ilustra cu e palabranan di Hesus na Huan 10:4 ta berdad? (b) Kico Bijbel ta anima nos pa haci?

¹⁶ Pero con nos por sa sigur si nos ta tratando cu un amigo of un enemigo? Wel, Hesus a bisa cu e carnenan ta sigui e wardado “pasobra nan conoce su bos.” (Huan 10:4) No ta e aparencia di wardado di carne ta impulsa e carnenan pa siguie; ta su bos. Un buki tocante teranan di Bijbel ta conta di un bishitante cu a yega di pretende cu carnenan ta reconoce nan wardado na su paña, no na su bos. Un wardado di carne a contesta cu ta e bos e carnenan conoce. Pa proba esaki, el a cambia paña cu e hende straño. Bisti cu paña di e wardado di carne, e hende straño a yama e carnenan, pero nan no a haci caso di dje. Nan no tawata conoce su bos. Pero ora e wardado a yama nan, aunke e no tawata bisti cu su paña di wardado, e carnenan a bini mesora. Pues, un hende por parce un wardado di carne, pero pa e carnenan esei no ta nifica cu en berdad e ta un wardado. Basicamente, e carnenan ta analisa e bos di esun cu ta yama nan y compar’e cu e bos di e wardado. E Palabra di Dios ta bisa nos pa haci mescos, esta, “pone e expresionnan inspira na prueba pa mira si nan ta origina di Dios.” (1 Huan 4:1, NW; 2 Timoteo 1:13) Kico lo yuda nos haci esei?

17. (a) Con nos por siña conoce e bos di Yehova? (b) Kico conocemento di Yehova ta yuda nos haci?

¹⁷ Ta logico anto cu mas nos conoce e bos of mensahe di Yehova, mas miho nos por detecta e bos di hende straño. Bijbel ta mustra nos con nos por desaroya e conocemento ei. E ta bisa: “Bo horea lo tende un palabra tras di bo ta bisa: ‘Esaki ta e caminda, cana den dje.’” (Isaias 30:21) E “palabra” ei cu ta nos tras ta bini di e Palabra di Dios. Cada biaha cu nos lesa e Palabra di Dios, nos ta tende, na moda di papia, e bos di nos Gran Wardador, Yehova. (Salmo 23:1) Pesei, mas nos studia Bijbel, mas nos ta siña conoce e bos di Dios. En buelta, e conocemento profundo ei ta yuda nos detecta e bos di hende straño instantaneamente.—Galationan 1:8.

18. (a) Kico conoce e bos di Yehova ta encera? (b) Segun Mateo 17:5, pakico nos tin cu obedece e bos di Hesus?

¹⁸ Kico mas conoce e bos di Yehova ta encera? Ademas di tende, e ta encera obedece. Tuma nota di Isaias 30:21 atrobe. E Palabra di Dios ta declara: “Esaki ta e caminda.” Si, pa medio di un studio di Bijbel, nos ta tende e instruccionnan di Yehova. Siguientemente, e ta manda nos: “Cana den dje.” Yehova kier pa nos practica loke nos ta tende. Pues door di aplica loke nos ta siña, nos ta mustra cu nos no ta djis tende e bos di Yehova sino ta obedec’e tambe. (Deuteronomio 28:1) Obedece e bos di Yehova ta nifica tambe obedece e bos di Hesus, pasobra Yehova mes a bisa nos pa haci esei. (Mateo 17:5) Kico Hesus, e Bon Wardador, ta bisa nos pa haci? E ta siña nos pa haci disipel y pa confia “e esclabo fiel y prudente.” (Mateo 24:45;  28:18-20) Obedece su bos ta nifica bida eterno pa nos.—Echonan 3:23.

‘Nan Lo Hui Bai for di Dje’

19. Con nos mester reacciona riba e bos di hende straño?

¹⁹ Con anto nos tin cu reacciona riba e bos di hende straño? Mescos cu carne. Hesus a bisa: “Un hende straño sigur nan lo no sigui, ma lo hui bai for di dje.” (Huan 10:5) Nos lo reacciona na dos manera. Pa cuminsa, nos “sigur . . . lo no sigui” un hende straño. Si, nos lo rechasa un hende straño sin basila. De echo, den e idioma Griego di Bijbel, e palabranan “sigur . . . lo no” ta expresa e rechaso di mas fuerte posibel den e idioma ei. Na di dos luga, nos “lo hui bai for di dje”, of hala leu for di dje. Esei ta e unico manera corecto pa reacciona riba esnan kende nan siñansanan no ta na harmonia cu e bos di e Bon Wardador.

20. Con nos lo reacciona ora nos haya nos confronta cu (a) apostatanan engañoso, (b) asociacion perhudicial, (c) informenan basa riba mitar berdad den medionan di comunicacion?

²⁰ Pesei, ora nos haya nos confronta cu personanan cu ta bosifera ideanan apostata, nos kier haci loke e Palabra di Dios ta declara: “Tene na bista esnan cu ta causa division y strobacion contrario na e siñansa cu boso a haya, y aparta boso for di nan.” (Romanonan 16:17; Tito 3:10) Mescos tambe, hobennan cristian cu ta enfrenta e peligernan di coleganan perhudicial kier aplica e conseho cu Pablo a duna e hoben Timoteo: “Hui pa e pasionnan di hubentud.” Y ora nos haya nos confronta cu acusacionnan falso den medionan di comunicacion, nos lo corda Pablo su siguiente conseho na Timoteo: “[Esnan cu ta scucha bos di hende straño] lo bolbe na fabula. Ma abo, sea sobrio den tur cos.” (2 Timoteo 2:22; 4:3-5) Maske con agradabel e bos di hende straño por parce, nos ta hui for di tur loke por corumpi nos fe.—Salmo 26:5; Proverbionan 7:5, 21; Revelacion 18:2, 4.

21. Ki recompensa ta spera hende cu ta rechasa bos di hende straño?

²¹ Door di rechasa e bos di hende straño, cristiannan ungi cu spirito ta responde na e palabranan di e Bon Wardador na Lucas 12:32. Ei Hesus ta bisa nan: “No tene miedo, tou chikito, pasobra a agrada boso Tata pa duna boso e reino.” Mescos tambe, e “otro carnenan” ta anticipa ansiosamente pa tende e palabranan di Hesus: “Bin, boso cu ta bendiciona di mi Tata, hereda e reino cu ta prepara pa boso desde e fundacion di mundo.” (Huan 10:16; Mateo 25:34) Ki un recompensa alentador ta spera nos si nos rechasa “bos di hende straño”!

Bo Ta Corda?

• Con Satanas ta cuadra cu e descripcion di e hende straño menciona den Hesus su ilustracion tocante e cura di carne?

• Con e bos di hende straño ta ser tendi awe?

• Con nos por reconoce e bos di hende straño?

• Con nos mester reacciona riba e bos di hende straño?

[Preguntanan di Estudio]

[Plachi na pagina 15]

Maria a reconoce Cristo

[Plachi na pagina 16]

E hende straño no ta acerca e carnenan directamente

[Plachi na pagina 18]

Con nos ta reacciona riba e bos di hende straño?