Storia di Bida

Un Bida Rico y Felis di Sacrificio Boluntario

SEGUN E RELATO DI MARIAN Y ROSA SZUMIGA

“Boluntariamente lo mi ofrece sacrificio na bo”, Salmo 54:6 ta declara. E declaracion aki tawata e tema den bida di Marian Szumiga y su esposa, Rosa, kendenan ta biba na Francia. Poco tempo pasa nan a sinta conta algun di e puntonan sobresaliente di nan bida largo y rico den e sirbishi di Yehova.

MARIAN: Mi mayornan tawata imigrante catolico Romano for di Polonia. Tata tawata un homber humilde. Nunca el a haya chens di bai scol. Sinembargo, durante prome guera mundial, el a siña lesa y skirbi segun cu e tawata traha warda como solda. Tata tawata un homber temeroso di Dios, pero hopi bes iglesia a decepcion’e.

Tawatin un incidente en particular cu nunca el a lubida. Un biaha durante e guera, un capelan a bishita Tata su unidad. Ora cu un granada a explota djis eibanda, e capelan a hui bai den panico, batiendo su cabai cu un crusifiho pa e core mas lihe. Tata a keda geshock cu un “representante” di Dios a uza un obheto “sagrado” pa acelera su huida. Apesar di e tipo di experencianan ei y e horornan di guera cu el a mira, Tata su fe den Dios no a debilita. Hopi bes e tawata bisa cu ta Dios a yud’e regresa sano y salvo for di guera.

“Polonia Chikito”

Na 1911 mi tata a casa cu un mucha mohe di un pueblito biciña. E mucha mohe su nomber tawata Anna Cisowski. Un poco despues di guera, na 1919, Tata cu Mama a emigra di Polonia pa Francia, caminda Tata a haya trabou den un mina di carbon. Ami a nace na maart  1926 den e pueblito Cagnac-les-Mines, parti suitwest di Francia. Despues mi mayornan a establece nan mes den un comunidad Polaco na Loos-en-Gohelle, serca di Lens den nort di Francia. E panadero tawata Polaco, e carnisero tawata Polaco y e pasto di parokia tawata Polaco. Pesei no ta straño cu nan a yama e area aki Polonia Chikito. Mi mayornan tawata hopi envolvi den actividadnan di comunidad. Hopi bes Tata tawata organisa shownan, cu a consisti di un presentacion teatral, musica y cantamento. Tambe e tawatin discusion regular cu e pasto, pero e no tawata keda satisfecho ora cu por lo general e pasto tawata contesta: “Tin hopi misterio.”

Un dia na 1930, dos señora a bati na nos porta. Nan tawata Studiantenan di Bijbel, manera Testigonan di Yehova tawata conoci e tempo ei. Mi tata a haya un Bijbel serca nan, un buki cu pa añanan e tawatin gana di lesa. Tambe cu smak e cu Mama a lesa e publicacionnan basa riba Bijbel cu e señoranan a laga. Mi mayornan a keda hopi impresiona cu loke nan a lesa den e publicacionnan aki. Apesar di nan bida ocupa, mi mayornan a cuminsa asisti na reunionnan organisa door di e Studiantenan di Bijbel. E discusionnan cu e pasto a bira mas cayente, te cu un dia el a menasa di saca mi ruman mohe Stéphanie for di catisashi si mi mayornan sigui asocia cu e Studiantenan di Bijbel. “No precupa bo”, Tata a contest’e. “Djawe padilanti mi yiu mohe y mi otro yiunan lo bai hunto cu nos na e reunionnan di Studiantenan di Bijbel.” Tata a kita su nomber for di iglesia, y na principio di 1932, mi mayornan a batisa. E tempo ei tawatin solamente un 800 publicado di Reino na Francia.

Rosa: Mi mayornan tawata di Hungria y mescos cu e famia di Marian, nan a establece nan mes den nort di Francia pa traha den e minanan di carbon. Ami a nace na 1925. Na 1937, un Testigo di Yehova, Auguste Beugin, of Papa Auguste manera nos tawata yam’e, a cuminsa trece E Toren di Vigilancia na Hungaro pa mi mayornan. Nan a haya e revistanan interesante, pero ningun di dos no a bira Testigo di Yehova.

Aunke mi tawata jong, e loke mi a lesa den E Toren di Vigilancia a conmove mi curason, y Papa Auguste su suegra, Suzanne Beugin, a encarga su mes di mi. Mi mayornan a laga mi bai reunion cu ne. Despues, ora cu mi a cuminsa traha, mi tata no tawata gusta pa mi bai reunion riba diadomingo. Aunke normalmente e tawata un hende masha amabel, el a keha: “Henter siman bo no ta na cas, anto diadomingo bo ta bai bo reunionnan!” Sinembargo, mi a sigui bai. Wel, riba un dia mi tata di: “Piki bo cosnan y bai fo’i djaki!” Tawata anochi laat. Mi tawatin 17 aña so, y mi no tawata sa unda pa bai. Finalmente mi a bai cas di  Suzanne, yorando awa cuater cuater. Mi a keda serca Suzanne pa mas o menos un siman, prome cu Tata a manda mi ruman mohe bin busca mi pa bin cas bek. Di naturalesa mi tawata timido, pero e pensamento expresa na 1 Huan 4:18 a yuda mi para firme. E texto ei ta bisa cu “amor perfecto ta core cu miedo.” Na 1942, mi a batisa.

Un Herencia Spiritual Precioso

Marian: Mi a batisa na 1942, hunto cu mi rumannan mohe Stéphanie cu Mélanie y mi ruman homber Stéphane. Na cas, nos bida di famia a consentra riba e Palabra di Dios. Cu nos tur sinta rond di mesa, Tata tawata lesa Bijbel pa nos na Polaco. Hopi bes nos tawata pasa nos anochinan scuchando nos mayornan conta nan experencianan den e trabou di predica e Reino. E ocasionnan spiritualmente rico aki a siña nos stima Yehova y confia den dje mas y mas. Problema cu salu a obliga mi tata stop di traha, pero el a sigui percura pa nos den sentido spiritual y material.

Como cu awor Tata tawatin tempo liber, e tawata conduci un biaha pa siman un studio di Bijbel na Polaco cu e hobennan di congregacion. Einan mi a siña lesa Polaco. Tambe Tata tawata anima e hobennan den otro manera. Un biaha cu Ruman Gustave Zopfer, kende e tempo ei tawata supervisa e trabou di Testigonan di Yehova na Francia, a bishita nos congregacion, Tata a organisa un coro y un drama biblico na trahe di antes basa riba e bankete di Rei Belsasar y e skirbimento riba muraya. (Daniel 5:1-31) Esun cu a hunga e papel di Daniel tawata Louis Piéchota, kende despues a tuma un posicion firme contra e nazinan. * Ta den e tipo di ambiente aki nos a lanta como mucha. Nos a mira con nos mayornan tur ora bai tawata ocupa cu asuntonan spiritual. Awe mi ta realisa cu ta un herencia masha precioso nos mayornan a laga pa nos.

Ora cu Segundo Guera Mundial a cuminsa na 1939, nan a prohibi e actividad di predica di Testigonan di Yehova na Francia. Na un ocasion, nan a tene un razia den nos pueblito. Tur cas tawata rondona pa soldanan Aleman. Tata a traha un bom falso den un cashi di paña, y nos a sconde varios publicacion biblico den dje. Sinembargo, tawatin varios ehemplar di e foyeto Fasismo of Libertad den un lachi di e buffet. Tata a sconde nan rapidamente den saco di un jas cu tawatin colga den gang. Dos solda y un polis Frances a rista nos cas. Nos tawata den suspenso. Un di e soldanan a cuminsa rista e pañanan colga den gang, y un poco despues el a drenta den cushina, caminda nos tawata, cu e foyetonan den su man. El a keda wak nos den nos cara, pone e foyetonan riba mesa y a sigui busca otro caminda. Rapidamente mi a cohe e foyetonan y pone nan den un lachi cu e soldanan a rista caba. E solda no a puntra mas pa e foyetonan, ta como si fuera el a lubida completamente riba nan!

Den Sirbishi di Tempo Completo

Na 1948 mi a dicidi di pone mi mes disponibel pa sirbi Yehova di tempo completo den e sirbishi di pionero. Un par di dia despues, mi a haya un carta di e sucursal di Testigonan di Yehova na Francia. E carta tawatin e asignacion pa mi bai sirbi como pionero den e congregacion di e stad Sedan, serca di Belgica. Mi mayornan tawata masha contento di mira mi tuma e rumbo ei den e sirbishi di Yehova. No obstante, Tata a corda mi cu sirbishi di pionero lo no ta un picknick. Lo e encera trabou duro. Sinembargo, el a bisa cu semper su cas lo ta habri pa mi y cu lo mi por a conta cu ne si mi haya mi den problema. Aunke mi mayornan no tawatin hopi placa, nan a cumpra un bais nobis nobis pa mi. Ainda mi tin e resibo di e bais ei, y ki ora cu mi wak e, mi wowo ta yena cu awa. Tata cu Mama a muri na 1961, pero ainda e palabranan sabi di Tata ta resona den mi horea; nan a anima mi y consola mi  durante tur mi añanan di sirbishi.

Un otro fuente di animacion tawata Elise Motte, un ruman mohe cristian di 75 aña den e congregacion di Sedan. Den zomer, mi tawata bai predica riba bais na e pueblitonan pafo di stad, y Elise tawata cohe trein pa join mi. Pero un dia e trahadonan di trein tawata welga, y Elise no por a bai cas. E unico solucion cu mi por a pensa ta di dun’e un lift riba bais. El a sinta patras caminda di pone ekipahe, y esei no tawata un careda comodo. E siguiente mainta mi a bai cu un cusinchi y a pasa busca Elise na su cas. El a stop di cohe trein, y cu e cen di trein cu el a spar, e por a cumpra cos di bebe cayente ora nos a come merdia. Ken lo por a pensa cu mi bais lo a fungi como transporte publico?

Mas Responsabilidad

Na 1950 e rumannan a pidi mi pa sirbi como superintendente di sircuito pa henter e parti nort di Francia. Como cu mi tawatin 23 aña so, mi prome reaccion tawata miedo. Mi a pensa cu sucursal a haci un fout! Mi cabes tawata carga cu pregunta: ‘Mi ta spiritualmente y fisicamente cualifica pa e tarea ei? Con lo mi haci cu e echo cu tur siman lo tawatin un otro alohamento?’ Es mas, for di seis aña, mi ta sufri di un problema cu mi bista. Mi tin un wowo scheel. Semper mi tawata sinti mi masha incomodo debi na esaki, como cu mi tawata precupa con hende lo reacciona. Afortunadamente, mi a haya hopi yudansa na e ocasion ei di Stefan Behunick, un graduado di e scol di misionero di Galad. Nan a deporta Ruman Behunick for di Polonia debi na su actividad di predica y el a ser reasigna na Francia. Su curashi realmente a impresiona mi. E tawatin respet profundo pa Yehova y pa e berdad. Tawatin hende ta haya cu e tawata mucho duro cu mi, pero mi a siña masha hopi for di dje. Su curashi a yuda mi haya mas confiansa.

E trabou di sircuito a duna mi chens di gosa di algun experencia maraviyoso den sirbishi di veld. Na 1953 e rumannan a pidi mi bishita un cierto Sr. Paoli, cu tawata biba pasuit di Paris y cu tawata abona riba E Toren di Vigilancia. Nos a topa, y mi a haya sa cu el a baha cu pension for di ehersito y cu e tawata fasina cu E Toren di Vigilancia. El a conta mi cu despues cu el a lesa un articulo tocante e Memorial di e morto di Cristo den un edicion resiente, el a conmemora e Memorial su so y a pasa e resto di e anochi lesando e buki di Salmo. Nos combersacion a dura casi henter merdia. Prome cu mi a bai, mi a papia brevemente tocante bautismo. Despues mi a manda un invitacion pa e asisti na nos asamblea di sircuito cu mester a tuma luga na principio di 1954. El a bin, y entre e 26 personanan cu a batisa na e asamblea ei tawatin Ruman Paoli. Experencianan asina te ainda ta alegra mi curason.

Rosa: Na october 1948, mi a cuminsa sirbi como pionero. Despues di a sirbi na Anor, pega cu Belgica, mi a ser asigna na Paris, hunto cu un otro pionero, Irène Kolanski (awor Leroy). Nos tawata biba den un cuarto chikitico  den e bario Saint-Germain-des-Près den curason di e stad. Siendo un mucha di cunucu, mi tawata hopi impresiona cu e hendenan di Paris. M’a imagina mi cu nan tur tawata sofistica y masha inteligente. Pero no a tarda hopi cu door di predica na nan mi a siña cu nan no tawata distinto for di otro hende. Hopi bes e concierge tawata core cu nos, y tawata dificil pa cuminsa studionan di Bijbel. Pero asina mes algun hende a acepta nos mensahe.

Durante un asamblea di sircuito na 1951, ami cu Irène a ser entrevista relaciona cu nos sirbishi di pionero. Rei ken a entrevista nos? Un superintendente di sircuito jong cu yama Marian Szumiga. Nos a yega di topa un biaha prome, pero despues di e asamblea ei, nos a cuminsa skirbi otro. Ami cu Marian tawatin hopi cos en comun, incluso e echo cu nos a batisa na e mesun aña y a bira pionero na e mesun aña. Pero mas importante ainda, nos tur dos kier a keda den sirbishi di tempo completo. Pues, despues di considera e asunto den oracion, nos a casa dia 31 di juli 1956. Cu e paso ei, un estilo di bida completamente nobo a cuminsa pa mi. Mi mester a custumbra no solamente di ta un esposa, sino tambe di compaña Marian den e trabou di sircuito, locual a nifica cu tur siman nos tawata drumi den un otro cama. Na principio no tawata ni un tiki facil, pero tawatin gosonan grandi nos dilanti.

Un Bida Rico

Marian: Atrabes di añanan, nos tawatin e privilegio di yuda den preparacion di varios congreso. Mi tin grato recuerdo specialmente di uno cu nos a tene na 1966 na Bordeaux. E tempo ei e actividadnan di Testigonan di Yehova na Portugal tawata prohibi. Pesei nos a presenta e programa di asamblea na Portugues tambe pa beneficio di e Testigonan cu lo por a bin Francia. Centenares di nos rumannan  cristian a bini di Portugal, pero e problema tawata unda pa aloha nan. Como cu e Testigonan na Bordeaux no tawatin suficiente luga den nan cas, nos a huur un cine bashi pa nos uza como dormitorio. Nos a saca tur stul, y a uza e cortina di e escenario pa comberti e sala den dos dormitorio, uno pa e ruman hombernan y uno pa e ruman mohenan. Tambe nos a instala douche y labamano, pone yerba seco riba e vloer di cement, y tap’e cu lona. Tur hende a keda satisfecho cu e areglo aki.

Despues di e sesionnan di congreso, nos tawata bishita e rumannan den e dormitorio. Tawatin un ambiente maraviyoso. E experencianan cu nan tawatin apesar di a soporta añanan di oposicion, a anima nos masha hopi. Na final di e asamblea, nos tur tawata awa na wowo ora nan tawata bai.

Mi a haya un otro privilegio dos aña prome, na 1964, tempo cu e rumannan a pidi mi pa sirbi como superintendente di districto. Un biaha mas mi tawata puntra mi mes si mi ta cualifica pa haci e tarea ei. Pero mi a bisa mi mes cu si e rumannan responsabel a pidi mi pa acepta e asignacion, ta pasobra nan mester a pensa cu mi tawata suficiente capas pa hacie. Tawata un dushi experencia pa sirbi den asociacion estrecho cu otro superintendentenan biahero. Mi a siña hopi for di nan. Hopi di nan ta berdadero ehempel di pasenshi y perseverancia, cualidadnan sumamente importante den bista di Yehova. Mi a bin compronde cu si nos siña warda, Yehova sa unda pa haya nos.

Na 1982 sucursal a pidi nos pa atende tambe un grupo chikito di 12 publicado Polaco na Boulogne-Billancourt, pafo di Paris. Esei tawata un sorpresa. Mi tawata conoce e palabranan teocratico na Polaco, pero mi tawatin dificultad pa formula frase. Sinembargo, e bondad y cooperacion boluntario di e rumannan ei a yuda mi masha hopi. Awe, tin rond di 170 publicado den e congregacion ei, entre nan, 60 pionero. Despues, ami cu Rosa a bishita tambe gruponan y congregacionnan Polaco na Alemania, Dinamarca y Austria.

Cambio di Circunstancia

Bishita diferente congregacion tawata nos bida, pero mi problemanan di salu a pone cu nos a stop cu nos sirbishi biahero na aña 2001. Nos a haya un apartamento den e stad Pithiviers, caminda mi ruman mohe Ruth ta biba. Bondadosamente sucursal a nombra nos como pionero special cu un rekisito di ora adapta na nos circunstancia.

Rosa: E prome aña despues cu nos a stop cu e trabou di sircuito tawata masha dificil pa mi. E cambio tawata asina drastico cu mi a sinti mi inutil. Despues mi a recorda mi mes: ‘Ainda bo por haci bon uzo di bo tempo y di e forsa cu bo tin door di sirbi como pionero.’ Awe, mi ta felis di por traha hunto cu otro pioneronan den nos congregacion.

Yehova Semper A Percura pa Nos

Marian: Mi ta masha gradicido na Yehova cu Rosa tawata mi compañera pa e ultimo 48 añanan. Atrabes di tur e añanan ei den e trabou biahero, e tawata un gran sosten pa mi. Ni un solo biaha mi a tend’e bisa: ‘Mare nos por stop di biaha y tin nos propio cas.’

Rosa: Tin biaha hende tawata bisa mi: “E bida cu bo ta hiba ei no ta un bida normal. Semper bo ta biba cu otro hende.” Pero kico realmente ta un “bida normal”? Hopi bes nos ta rondona nos mes cu un cantidad di cos cu por stroba nos di sigui tras di actividadnan spiritual. Tur loke nos realmente tin mester ta  un bon cama, un mesa y un par di otro cos basico. Como pionero nos tawatin masha tiki cos material, pero toch nos tawatin tur loke nos mester pa haci e boluntad di Yehova. Tin biaha hende tawata puntra mi: “Kico lo bo haci ora bo bira bieu, sin bo propio cas y sin pension?” E ora ei mi tawata cita e palabranan di Salmo 34:10: “Esnan cu ta busca [Yehova] lo no tin falta di ningun cos bon.” Yehova semper a percura pa nos.

Marian: Asina mes! De echo, Yehova a duna nos hopi mas di loke ta necesario. Por ehempel, na 1958 mi a ser selecta pa representa nos sircuito na un congreso internacional na New York. Sinembargo, nos no tawatin cen pa cumpra pasashi pa Rosa. Un anochi un ruman homber a duna nos un envelop cu “New York” skirbi riba dje. E regalo den dje a haci posibel cu Rosa por a compaña mi!

Ami cu Rosa no tin ni un tiki duele di e añanan cu nos a pasa den sirbishi di Yehova. Nos no a perde nada pero si a gana tur cos—un bida rico y felis den sirbishi di tempo completo. Yehova ta un Dios masha maraviyoso. Nos a siña confi’e completamente, y nos amor p’e a bira mas profundo. Algun di nos rumannan cristian a paga pa nan fieldad cu nan bida. Sinembargo, mi ta kere cu atrabes di añanan, un persona por sacrifica su bida tambe tiki tiki. Esei ta loke ami cu Rosa a purba di haci te cu awor, y esei ta loke nos ta dicidido pa haci den futuro.

[Nota]

[Plachi na pagina 20]

François cu Anna Szumiga y nan yiunan, Stéphanie, Stéphane, Mélanie y Marian rond di 1930. Marian ta para riba e stul chikito

[Plachi na pagina 22]

Ariba: Presentando publicacionnan biblico na un stand di mercado na Armentières, parti nort di Francia, na 1950

[Plachi na pagina 22]

Banda robes: Stefan Behunick cu Marian na 1950

[Plachi na pagina 23]

Marian cu Rosa, un dia prome cu nan casa

[Plachi na pagina 23]

Rosa (na man robes te na punta) cu su compañera pionero Irène (di cuater na man robes), anunciando un asamblea na 1951

[Plachi na pagina 23]

Durante bishitanan di sircuito, e medio principal di transporte tawata bais