“Bisti e Armadura Completo di Dios”

“Bisti e armadura completo di Dios, pa boso por para firme contra e trampanan di Diabel.”—EFESIONAN 6:11.

1, 2. Describi cu bo mes palabra e armadura spiritual cu cristiannan tin cu bisti.

ROMA tawata na e punto culminante di su poder durante e prome siglo di nos era. E poder di e legionnan Romano a haci posibel cu Roma por a controla gran parti di e mundo conoci e tempo ei. Un historiado a describi e ehersito aki como “e organisacion militar mas exitoso den historia.” Roma su ehersito profesional a consisti di soldanan bon disiplina cu a sigui un entrenamento pisa, pero nan exito como un forsa di bataya efectivo a depende tambe di nan armadura. Apostel Pablo a uza e armadura di un solda Romano pa ilustra e ekipo spiritual cu cristiannan mester tin pa nan por lucha cu exito contra Diabel.

² Nos ta haya un descripcion di e armadura spiritual aki na Efesionan 6:14-17. Pablo a skirbi: “Para firme . . . cu boso heup faha cu berdad, y cu e corasa di husticia bisti, y cu boso pianan bisti cu e preparacion di e evangelio di pas; y riba tur cos, tumando e escudo di fe, cu cual boso lo por paga tur e flechanan sendi di e malbado. Y tuma e helm di salbacion, y e spada di e spirito, cual ta e palabra di Dios.” Mira for di un punto di bista literal, e armadura aki cu Pablo a describi lo a duna un solda Romano bastante proteccion. Es mas, e solda tawatin un spada, su arma principal pa combatenan individual.

3. Dicon nos mester obedece e instruccionnan di Hesucristo y sigui su ehempel?

³ E exito di e ehersito Romano no a depende solamente di nan ekipo y entrenamento, sino tambe di e soldanan su obediencia na nan comandante. Di igual manera, cristiannan tin cu obedece Hesucristo, kende Bijbel ta describi como un “comandante pa e pueblonan.” (Isaias 55:4) Tambe e ta “cabes di e iglesia.” (Efesionan 5:23) Hesus a duna nos instruccion pa nos guera spiritual y a percura un ehempel perfecto di e manera cu nos mester bisti e armadura spiritual. (1 Pedro 2:21) Siendo cu un personalidad semehante di Cristo ta hopi paresido na nos armadura spiritual, e Scritura ta conseha nos pa “arma” nos mes cu e disposicion mental di Cristo. (1 Pedro 4:1, NW) Segun cu nos ta bai analisa  cada parti di nos armadura spiritual, nos lo uza e ehempel di Hesus pa demostra e armadura ei su importancia y efectividad.

Proteha Nos Heup, Pecho y Pia

4. Ki papel e faha a hunga den e armadura di un solda, y kico esei ta ilustra?

⁴ Heup faha cu berdad. Den tempo biblico, soldanan tawata bisti un faha di cuero hancho cu tawata entre 5 pa 15 centimeter hancho. Algun traductor ta sugeri cu eigenlijk e versiculo mester bisa, “cu berdad como faha preta na bo sintura.” E faha di e solda a yuda proteha su heup, y e tawata un bon caminda pa colga su spada. Ora un solda a faha su heup, tawata pa e prepara pa bataya. Pablo a uza e faha di e solda pa ilustra te na ki grado berdad biblico mester influencia nos bida. Na moda di papia, e mester ta preta mara na nos curpa di manera cu nos ta biba na harmonia cu e berdad y por defend’e na tur ocasion. (Salmo 43:3; 1 Pedro 3:15) Cu esaki na bista, nos tin cu studia Bijbel diligentemente y medita riba su contenido. Hesus tawatin e lei di Dios ‘den su curason.’ (Salmo 40:8) Pesei ora opositornan a hacie pregunta e por a contesta door di cita e Scritura for di cabes.—Mateo 19:3-6; 22:23-32.

5. Splica con conseho biblico por yuda nos ora nos ta confronta prueba of tentacion.

⁵ Ora nos ta permiti berdad di Bijbel guia nos, e por proteha nos contra rasonamento incorecto y yuda nos tuma decisionnan sabi. Ora nos ta confronta tentacion of prueba, e instruccionnan di Bijbel lo fortalece nos determinacion pa haci loke ta corecto. Ta como si fuera nos ta mira nos Magnifico Instructor, Yehova, y nos ta tende un palabra nos tras ta bisa: “Esaki ta e caminda, cana den dje.”—Isaias 30:20, 21.

6. Dicon nos curason figurativo tin mester di proteccion, y con husticia por proteh’e efectivamente?

⁶ Corasa di husticia. E corasa di un solda a proteha un organo masha importante, su curason. Nos curason figurativo—e persona cu nos ta di paden—tin mester di proteccion special pasobra e ta inclina pa haci loke ta malo. (Genesis 8:21) Pesei nos tin cu siña conoce y stima Yehova su normanan husto. (Salmo 119:97, 105) Nos amor pa husticia ta pone nos rechasa mundo su manera di pensa cu ta ignora of debilita e instruccionnan bon cla cu Yehova ta duna. Ademas, ora nos ta stima loke ta husto y ta odia loke ta malo, nos ta evita di sigui un rumbo cu por ruina nos bida. (Salmo 119:99-101; Amos 5:15) Hesus ta un bon ehempel den esaki, pasobra e Scritura ta bisa relaciona cu ne: “Bo a stima husticia y a odia maldad.”—Hebreonan 1:9. *

7. Dicon un solda Romano tawatin mester di bon sapato, y kico esei ta ilustra?

⁷ Pianan bisti cu e preparacion di e evangelio di pas. Soldanan Romano tawatin mester di sapato adecuado of bon sandalia, pasobra durante un campaña militar hopi bes nan a marcha 30 kilometer pa dia cu rond di 30 kilo di armadura y ekipo bisti of carga. Pablo apropiadamente a uza sapato na pia  pa representa e echo cu nos ta cla pa predica e mensahe di Reino na tur cu kier scucha. Esaki ta importante pasobra con hende lo por siña conoce Yehova si nos no ta cla y dispuesto pa predica?—Romanonan 10:13-15.

8. Con nos por imita Hesus su ehempel como predicado di e bon nobo?

⁸ Kico tawata e actividad mas importante den bida di Hesus? El a bisa e gobernado Romano Poncio Pilato: ‘Mi a bin den mundo pa duna testimonio di e berdad.’ Hesus a predica na unda cu el a haya un horea cu kier a scuch’e, y el a disfruta asina tanto di su sirbishi cu el a pon’e prome cu su necesidadnan fisico. (Huan 4:5-34; 18:37) Si mescos cu Hesus, nos tambe ta ansioso pa declara e bon nobo, nos lo haya hopi oportunidad pa compartie cu otro hende. Ademas, ora nos ta completamente ocupa den nos sirbishi, esei lo yuda nos keda spiritualmente fuerte.—Echonan 18:5.

E Escudo, e Helm y e Spada

9. Ki proteccion un escudo grandi a ofrece un solda Romano?

⁹ E escudo grandi di fe. E palabra Griego traduci “escudo” ta referi na un escudo cu tawata suficiente grandi pa tapa gran parti di e curpa. Lo el a duna proteccion contra e “flechanan sendi” cu Efesionan 6:16 ta menciona. Den tempo biblico, soldanan tawata uza flecha traha di richi hol cu tawatin un contenedor chikito di hero cu nan por a yena cu combustibel na candela. Un comentarista a describi e flechanan aki como “un di e armanan mas peligroso den gueranan di antiguedad.” Si un solda no tawatin un escudo grandi pa proteha su mes contra e flechanan ei, lo e por a resulta gravemente herida of asta ser mata.

10, 11. (a) Kico ta e “flechanan sendi” di Satanas cu lo por debilita nos fe? (b) Con Hesus su ehempel ta demostra e importancia di fe durante tempo di prueba?

 ¹⁰ Kico ta e “flechanan sendi” cu Satanas ta uza pa debilita nos fe? E por fomenta persecucion of oposicion den famia, na trabou of na scol. Den caso di algun cristian, ta e deseo pa haya mas y mas cos material y e atraccion di inmoralidad a resulta spiritualmente desastroso pa nan. Pa proteha nos mes contra tal menasanan ‘nos tin cu tuma, riba tur cos, e escudo grandi di fe.’ Nos ta haya fe door di siña tocante Yehova, door di comunica regularmente cu ne den oracion y door di tuma nota con e ta proteha y bendiciona nos.—Hosue 23:14; Lucas 17:5; Romanonan 10:17.

¹¹ Ora Hesus tawata riba tera, el a demostra e importancia di tin un fe firme durante tempo critico. El a confia plenamente e decisionnan di su Tata y gustosamente el a haci Dios su boluntad. (Mateo 26:42, 53, 54; Huan 6:38) Asta ora Hesus tawata experencia gran angustia den e hofi di Getsemani, el a bisa su Tata: “No manera ami kier, ma manera abo kier.” (Mateo 26:39) Hesus nunca a perde for di bista e importancia di mantene integridad y di haci su Tata contento. (Proverbionan 27:11) Si nos tambe tin e mesun confiansa den Yehova, nos lo no laga critica of oposicion debilita nos fe. Mas bien nos fe lo bira mas fuerte si nos depende riba Dios, demostra amor p’e y warda su mandamentonan. (Salmo 19:7-11; 1 Huan 5:3) No tin ningun recompensa material ni placer sensual pasahero cu por para banda di e bendicionnan cu Yehova tin warda pa esnan cu stim’e.—Proverbionan 10:22.

12. Nos helm figurativo ta proteha cua parti importante di nos curpa, y dicon e proteccion ei ta sumamente importante?

 ¹² E helm di salbacion. Helm ta proteha un solda su cabes y celebro, su centro di intelecto. Nos speransa cristian ta ser compara cu un helm pasobra e ta proteha nos mente. (1 Tesalonicensenan 5:8) Aunke nos a transforma nos mente pa medio di conocemento exacto di e Palabra di Dios, ainda nos ta hende imperfecto y debil. Ta masha facil pa nos mente bira corupto. Metanan di e sistema di cosnan aki por distrai nos of asta remplasa e speransa cu Dios a duna nos. (Romanonan 7:18; 12:2) Diabel a purba en vano di desvia Hesus door di ofrec’e “tur e reinonan di mundo y nan gloria.” (Mateo 4:8) Pero Hesus a rechasa e oferta firmemente, y Pablo a bisa di Hesus: “Pa motibo di e goso poni su dilanti, [el] a soporta e sufrimento di [“e staca di tormento”, NW], sin haci caso di berguensa, y a sinta na man drechi di e trono di Dios.”—Hebreonan 12:2.

13. Con nos por mantene nos confiansa den e speransa cu tin nos dilanti?

¹³ E clase di confiansa cu Hesus tawatin no ta bin automaticamente. Si nos yena nos mente cu e soñonan y metanan di e sistema di cosnan aki, en bes di enfoca riba e speransa cu tin nos dilanti, nos fe den e promesanan di Dios lo bira mas debil. Cu tempo, nos lo por asta perde nos speransa completamente. Di otro banda, si nos ta medita cu regularidad riba e promesanan di Dios, nos lo sigui alegra den e speransa cu tin poni nos dilanti.—Romanonan 12:12.

14, 15. (a) Kico nos spada figurativo ta, y con nos por uz’e? (b) Ilustra con e spada di spirito por yuda nos resisti tentacion.

¹⁴ E spada di spirito. Dios su palabra, of mensahe, cu tin para skirbi den Bijbel ta manera un spada poderoso di dos fila cu por caba cu falsedad religioso y yuda hende di curason sinsero haya libertad spiritual. (Huan 8:32; Hebreonan 4:12) E spada spiritual aki por defende nos tambe ora nos ta ser ataca pa tentacion of pa personanan apostata cu ta purba destrui nos fe. (2 Corintionan 10:4, 5) Nos ta masha gradicido cu ‘tur Scritura ta inspira pa Dios y ta ekipa nos completamente pa tur bon obra’!—2 Timoteo 3:16, 17.

¹⁵ Ora cu Satanas a tenta Hesus den desierto, Hesus a haci bon uzo di e spada di spirito pa rechasa rasonamento falso y tentacionnan tramposo. Cada un tentacion di Satanas, el a contesta cu: “Ta para skirbi.” (Mateo 4:1-11) David, un Testigo di Yehova na Spaña, tambe a descubri cu e Scritura a yud’e supera tentacion. Tempo cu e tawatin 19 aña, un mucha mohe atractivo cu tawata traha hunto cu ne den e mesun compania di limpiesa a sugeri pa nan dos “ban pasa un tempo dushi hunto.” David a rechasa su avancenan y a pidi su supervisor pa e bai traha un otro caminda pa asina e situacion no bolbe presenta. David a bisa: “Mi a corda riba e ehempel di Hose. El a rechasa inmoralidad y mesora a sali bai for di einan. Mi a haci mescos.”—Genesis 39:10-12.

16. Splica dicon nos tin mester di training pa por “parti e palabra di berdad na un manera corecto.”

¹⁶ Hesus a uza e spada di spirito tambe pa yuda otro hende scapa for di e control di  Satanas. Hesus a bisa: “Mi siñansa no ta di mi, ma di Esun cu a manda mi.” (Huan 7:16) Pa nos por imita Hesus su manera habil di siña hende, nos mester di training. E historiado Yosefo a skirbi di e soldanan Romano: “Tur solda a train tur dia, y nan tawata hacie cu gran diligencia, como si fuera nan tawata den tempo di guera. Ta pesei nan por a soporta e cansancio di bataya asina facilmente.” Den nos guera spiritual, nos tin cu uza e Bijbel. Ademas, nos mester ‘haci tur nos esfuerso pa presenta nos mes aproba dilanti di Dios manera un trahado cu no tin motibo pa tin berguensa, cu ta parti e palabra di berdad na un manera corecto.’ (2 Timoteo 2:15) Y nos ta sinti un gran satisfaccion ora nos uza e Scritura pa contesta un pregunta sinsero di un persona interesa!

Haci Oracion Tur Ora Bai

17, 18. (a) Ki papel oracion ta hunga den resisti Satanas? (b) Duna un ehempel pa ilustra e balor di oracion.

¹⁷ Despues di a considera e armadura spiritual completo, Pablo a agrega un otro conseho importante. Ora di resisti Satanas, cristiannan tin cu haci uzo di ‘tur forma di oracion y suplica.’ Cu ki frecuencia? Pablo a skirbi pa haci oracion of “pidi tur ora bai den spirito.” (Efesionan 6:18) Ora nos ta confronta tentacion, prueba of desanimacion, oracion por fortifica nos masha hopi. (Mateo 26:41) Hesus a “ofrece oracion y suplica cu gran sclamacion y lagrima na Esun cu ta capas pa salb’e for di morto, y el a wordo tendi pa motibo di su piedad.”—Hebreonan 5:7.

¹⁸ Milagros tawatin cu cuida su casa cu tawata cronicamente enfermo pa mas cu 15 aña. Milagros a bisa: “Ora mi ta sinti mi desanima, mi ta acudi na Yehova den oracion. Ningun hende por yuda mi mas cu ne. Ta berdad cu tin momentonan cu mi ta sinti cu gewoon mi no por sigui mas. Pero bes tras bes despues di a haci oracion na Yehova, mi a sinti cu mi a bolbe haya forsa y cu mi animo a lanta.”

19, 20. Kico nos tin cu haci pa nos por resulta victorioso den nos lucha contra Satanas?

¹⁹ Diabel sa cu su tempo ta cortico, y e ta intensifica su esfuersonan pa vence nos. (Revelacion 12:12, 17) Nos tin cu resisti e enemigo poderoso aki y “lucha e bon lucha di fe.” (1 Timoteo 6:12) Esaki ta rekeri forsa mas aya di loke ta normal. (2 Corintionan 4:7) Tambe nos tin mester di e yudansa di Dios su spirito santo y pesei nos mester pidi p’e. Hesus a bisa: “Si boso anto, siendo malbado, sa di duna cosnan bon na boso yiunan, cuanto mas boso Tata celestial lo duna e spirito santo na esnan cu pidie!”—Lucas 11:13.

²⁰ Claramente anto, ta masha importante pa nos bisti e armadura completo cu Yehova ta suministra. Pa nos por bisti e armadura aki nos mester desaroya cualidadnan cu ta agrada Dios, cualidadnan manera fe y husticia. Tambe nos mester stima e berdad como si fuera nos tine faha na nos curpa, nos mester ta cla pa plama e bon nobo na tur ocasion y nos mester tene tur ora bai na mente e speransa nos dilanti. Nos tin cu siña uza e spada di spirito habilmente. Door di bisti e armadura completo di Dios, nos por resulta victorioso den nos lucha contra forsanan spiritual malbado y en berdad trece gloria pa Yehova su nomber santo.—Romanonan 8:37-39.

[Nota]

Con Lo Bo Contesta?

• Ken ta e miho ehempel di bisti e armadura spiritual, y dicon nos mester considera su ehempel cu sumo atencion?

• Con nos por proteha nos mente y nos curason figurativo?

• Con nos por bira habil den uza e spada di spirito?

• Dicon nos tin cu haci oracion tur ora bai?

[Preguntanan di Estudio]

[Plachinan na pagina 17]

Studia Bijbel diligentemente por motiva nos pa declara e bon nobo na tur ocasion

[Plachinan na pagina 18]

Nos speransa firme ta yuda nos confronta prueba

[Plachinan na pagina 19]

Abo ta uza “e spada di e spirito” den sirbishi?