“Busca pa Haya Sa Ta Ken Ta Digno”

DAMASCO tawata un stad prospero den e prome siglo di nos era. Door cu e tawata rondona pa hofi, e tawata manera un oasis pa caravananan cu tawata bin for di e teranan cu ta keda oost di Damasco. No mucho tempo despues di e morto di Hesucristo, tawatin un congregacion cristian einan. Entre su miembronan tawatin Hudiunan cu kisas a bira siguido di Hesus na aña 33 di nos era, durante e Fiesta di Pentecoste na Herusalem. (Echonan 2:5, 41) Kisas algun disipel for di Hudea a muda bai Damasco tempo cu a surgi persecucion despues di e piedramento di Esteban.—Echonan 8:1.

Probablemente na aña 34 di nos era, un cristian di Damasco cu yama Ananias a ricibi un asignacion cu no tawata usual. Señor a bis’e: “Lanta bai den e caya cu yama Stret, y puntra na cas di Hudas pa un homber for di Tarso, cu yama Saulo, pasobra mira, e ta haciendo oracion.”—Echonan 9:11.

E caya cu yama Stret tawata rond di un kilometer y mei largo y tawata pasa door di e centro di Damasco. E plachi di siglo 19 cu tin na banda drechi ta duna nos un idea con e caya aki tawata den antiguedad. Podise Ananias lo a pasa un bon rato ta busca e cas di Hudas, debi na e manera cu e caya tawata traha. Sinembargo, Ananias a logra hay’e, y e resultado di su bishita tawata cu Saulo a bira apostel Pablo, un proclamado celoso di e bon nobo.—Echonan 9:12-19.

Hesus a manda su disipelnan pa predica y a bisa nan pa “busca pa haya sa ta ken ta digno” di e bon nobo. (Mateo 10:11) Aparentemente, Ananias a busca Saulo literalmente. Mescos cu Ananias, cu goso Testigonan di Yehova ta busca hende digno y ta keda masha contento ora e hendenan acepta e bon nobo di e Reino. Ora nan logra haya e hendenan aki, nan ta sinti cu e esfuerso cu nan a haci ta bale la pena.—1 Corintionan 15:58.

[Plachi na pagina 32]

E caya cu antes tawata “yama Stret”

[Reconocemento pa Potret na pagina 32]

Di e buki La Tierra Santa, Volumen II, 1830