E Splendor di Yehova Su Creacion

“E Abundancia di e Lama”

ATARDI ora solo ta baha, tin un dushi brisa ta supla riba lama, y suavemente e olanan ta bin canto. E zonido trankilisante di olanan ta atrae un cantidad di hende cu ta basha bin canto di lama pa haya sosiego y trankilidad. *

Miles di kilometer di costa rond mundo ta consisti di beachnan asina. E liña di division aki entre santo y awa ta marca te na unda lama tin control. Ta asina e Creador a diseñ’e. Referiendo na su mes, Dios a declara cu el a “pone santo como un frontera pa lama.” Anto el a agrega: “Maske e olanan lora bai laira, nan no por prevalece; maske nan ronca, nan no por pasa over di dje.”—Yeremias 5:22; Job 38:8; Salmo 33:7.

Nos planeta Tera en berdad ta un planeta di awa, no tin ningun otro manera e den nos sistema solar. Mas cu 70 porshento di e globo ta cubri cu awa. Ora cu Yehova tawata prepara e tera pa hende biba ariba, el a decreta: “Laga e awanan cu tin bou dje shelonan bin hunto na un luga y laga tera seco aparece.” Y, “asina tawata.” E relato ta agrega: “E parti seco Dios a yama Tera, y tur e awanan cu a bin hunto el a yama Lama. Y Dios a mira cu esaki tawata bon.” (Genesis 1:9, 10) Ki trabou precis e oceanonan ta haci?

Den un cantidad di manera remarcabel, Dios a diseña e awa di oceano pa sostene bida. Por ehempel, awa tin e capasidad di almacena cayente. Pues, e oceanonan ta fungi como un deposito inmenso di cayente, locual ta yuda baha e friu extremo di winter.

Awa tin un otro capasidad mas cu ta sostene bida. Mas cu cualkier otro likido, awa por disolve otro substancianan facilmente. Siendo cu ta reaccionnan kimico ta haci procesonan di bida posibel, e presencia di awa ta necesario pa por disolve e substancianan cu ta reaccionando y combina nan moleculenan pa forma otro componente. Hopi di e componentenan kimico cu tin den tehido bibo ta contene awa. E buki The Sea (Lama) a remarca: “Tur forma di bida tin mester di awa; awa cu na final di cuenta mester bin di e oceanonan, asta awa pa mata y bestia cu ta biba riba tera seco.”

E oceanonan di mundo ta hunga tambe un papel importante den purificacion di e atmosfer. Plankton den oceano ta absorba kooldioxide y ta saca oxigeno. Segun un investigado, “70 porshento di e oxigeno cu pa aña ta ser agrega na e atmosfer ta bini di plankton den lama.”

Un otro cos cu e oceanonan ta produci ta remedinan natural pa trata malesa. Pa siglonan hende a uza extracto di pisca como remedi. Por ehempel, ya pa hopi tempo hende conoce azeta di bakiyou. Ultimo tempo, hende a cuminsa uza kimiconan saca for di pisca y otro criaturanan di lama pa trata asma y pa combati virus y cancer.

Expertonan a purba calcula e balor economico di producto- y servicionan relaciona cu oceano. Aunke ta imposibel pa bin  cu cifranan exacto, investigadonan a calcula cu casi dos tercera parti di e balor di servicionan ecologico mundial ta bini di oceano. Esaki ta confirma e echo cu lama a ser crea cu un proposito: pa acomoda y sostene bida. Esaki ta cuadra cu loke Bijbel ta yama e rikesa of “abundancia di e lama.”—Deuteronomio 33:19.

Yehova ta ser glorifica como e Gran Diseñador y Trahador di e rikesa aki. Nehemias a sintie conmovi pa alaba Yehova cu e siguiente palabranan: “Ta abo so ta SEÑOR. Abo a traha e shelonan, . . . e lama y tur loke tin den nan. Ta abo ta duna bida na nan tur.”—Nehemias 9:6.

[Nota]

[Cuadro/Plachinan na pagina 9]

Awa, Biento y Ola

Awa cu biento ta forma olanan grandi cu ta dal cu masha bochincha contra baranca, manera esnan aki na California, Merca. Ola semper tawata un rasgo maraviyoso di oceano, demostrando e oceano su poder impresionante. Ola ta tambe un recordatorio asombroso di e Creador su poder magnifico. Yehova ta esun cu “ta cana riba e olanan di lama.” “El a agita lama cu su poder, y pa medio di su comprondemento el a destrosa e atacado na pida-pida.” (Job 9:8; 26:12, NW) Si, Yehova “den e halturanan ta poderoso, mas cu e zonidonan di hopi awanan, mas cu e olanan poderoso di lama.”—Salmo 93:4.

Esculturanan di Santo

Beachnan sa fungi de bes en cuando como e escenario di esculturanan impresionante di santo, manera e duinnan aki na costa di Namibia, den parti suit di Africa. Biento ta e forsa principal cu ta duna e santo formanan unico. Aunke algun duin por parce djis bultonan chikito, otronan por alcansa un haltura di 400 meter. E cantidadnan grandi ei di santo ta yuda nos compronde e expresion biblico “manera e santo cu tin canto di lama.” Bijbel ta uza esei pa indica algo incontabel, dificil pa midi. (Genesis 22:17) Nos ta sinti un respet profundo pa e Creador, kende a diseña un barera di santo asina ingenioso pa para e invasion di lama bruto.

[Plachi na pagina 9]

Bahada di solo canto di costa, Bahia di Biafra, Camerun